عالم الحياة الزوجية - منتدى

كلي خير · 12-03-2007, 18:28

السلام عليكم ورحمة الله وبركاته
كان لي صديقة من ايام الثانوية
دايم تجي عندى تحكي وتشكي لي همومها ومشاكلها بالبيت وكانت تثق فيني
لاني والحمدلله احفظ الاسرار وظلينا مع بعض نشكي ونضحك ونتالم مع بعض بكل صدق وصراحه
حتى لما نغيب عن بعض يومين او اربع ايام نشتاق لبعض
تدرون تزوجت(ملكه)وتطلقت منغير سبب طبعا
وانا بصراحه تضايقت كثير من الشماته اللى اسمعها من اهلي اني مطلقه
كنت ادخل غرفتي وانا ابكي بحرارة واكلمها واقول لها عن التوبيخ والتجريح اللى اسمعه يوميا
كانت تواسيني وتصبرني.........
مرت الايام وانا اكلمها واحكي لها اللى صار بحياتي واللى ماصار
وجاتني طلبتني اني اساعدها بموضوع خاااص وفعلا ساعدتها
وفجاءة
صرت اتصل عليها ماترد ,,,,ولماترد تقول عندي ظروف
وقالت لي ان في خطاب يبون يخطبونها
وانا كنت دايم ادعي لها بالزوج الصالح وحتى انصحها واعلمها من اخطائي كيف
تستفيد منها .....
واتصل عليها ماترد باليوم واليومين ماترد انا حسيت انها تصرفني وماتبي تكلمني
ورحت واتصلت على تلفون بيتهم وكلمتني حسيت انها تجاملني بهالمكالمه
وتبي تسكر بسرعة ....سلمت انا عليها وسكرت
وقلت ماراح اتصل ولا اسال اللى لما تجي تسال عني وتتصل ....
وظلت اسبوع والله ما اتصلت انا استغربت من تصرفها غريبه ....
وبعد اسبوع جاتني اختى المتزوجه تقولي فلانه كلمتني (((صديقتي)))
وحلفتني اني ما اقول لك هالكلام
بس امانه لا تقولي لها اني قلت لك
وقلبي دقني ساعتها حسيت انه كلام مو زين وفعلا للاسف طلع احساسي صحيح
راحت وقالت لاختي عني اني تغيرت وصرت حساسه واصلا ما ابي كلمها
اول ما سمعت هالكلام جاتني صدمه
صديقتي من اربع سنوات ونص تسوى كذا فيني ؟؟؟؟؟
ليه وش سويت فيها؟؟؟؟
اخر مرة كلمتها عااادي نضحك ونسولف كالعادة !!!!!!
عمري مازعلتها او حتى ضايقتها او حتى جرحتها ........
انا لي 7شهور من تطلقت .......توها تحس اني تغيرت ,,,,,
ولا شكلها خافت اني اخرب عليها حياتها اذا تزوجت عشاني مطلقه
والله المشكله عارفه ظروفي بالبيت
فشلتني قدام خواتي حسيت نفسي صغيرة
حتى خواتي منصدمين منها ...
قعدت ابكي وانا اكلم صديقتي الثانيه واحكي لها باللى صار وانا ابكي واقول ليتني سويت فيه شئ عشان تسوى كذا فيني ليه ما صارحتني ؟؟؟
عرفت انها ماتستاهل صداقتي .......
الصديقه اللى تنصح وتوجه وتستر على صديقتها مو تتكلم من وراى ظهرها ولي شهر ونصف والله انها مافكرت تتصل فيني او حتى تسال....
الحين انا خايفه حتى اكلم صديقاتي الباقيات يسون كذا فيني .......
احس بوحدة قاتله داخل نفسي
احس اني عشان مطلقة يخافون مني
او يحسبوني اني معقده .....
حاسه بوحده شديدة خاصه لما اروح المعهد واشوف صديقات مع بعض يسولفون ويضحكون تاخذ قلبي الحسرة ....لان ماعندي صديقات او صديقه افضفض لها او اضحك معها وا اسولف
الوحدة قاتله والله العظيم مدري وش الحل ؟؟؟؟؟؟
زعلانه من اللى صار لي ومتضايقه حيل ,,,,,
ابي اعرف ليه سوت كذا فيني ليه وش سويت انا وش سويت ؟؟؟؟عشان مطلقه
طيب المطلقه مالها احساس مالها شعور
مالها قلب مهي انسانه مثل باقي البشر .....حسبنا الله ونعم الوكيل
حسبنا الله ونعم الوكيل حسبنا الله ونعم الوكيل
اليك ياربي همي اشكوه

ابو الغالية · 12-03-2007, 20:26

اختي

لاتحزني وربك الله , فقط لاتقنطي من روح الله , وان تخلى عنك الناس فثقِ بمن لاينسى خلقه ..

ودمتي بود
اخوك ابو الغالية .

نعّـوومة · 12-03-2007, 21:03

حبيبتي كلي خير

والله في صديقات كثير على شاكلة صديقتك هذي ،، سنين مع بعض وآخرتها لما

بتتزوج تبتعد عن صديقتها المطلقة ،، ليه ؟ عشانها مطلقة وتخاف على زوجها منها

هذي لو واثقة من زوجها ومن نفسها ما سوت اللي سوته ، واسمحي لي ما تستاهل

حتى صداقتك اذا تفكيرها كذا

انا عن نفسي بقول لك صديقاتي الحمد لله للحين معاي كويسين الا وحدة بس ، اذا انتي

تقولي صديقتك انا اقول لك انسانة قريبتي وبنفس الوقت صديقتي واختي وحبيبتي

وكل شي يوم جت بتتزوج قاطعتني وقامت تخاف ان زوجها يشوفني معاها او لما

يزورونا بالبيت ، بس عشان انا مطلقة ، يعني شوفي عشرة عمر مع بعض وآخرتها

تخاف على زوجها وعلى حياتها الزوجية السعيدة مني

لا تهتمي وما عليكي منها وحياتك ان شاء الله ما بتتوقف بس عشان هالصديقة

وربي يوفقك ان شاء الله

Think Pink · 12-03-2007, 21:42

يااااااه ياكلي خير......كلامك تفوح منه رائحة اللام والخذلان
اتشعرين انها خذلتك ..تخلت عنك.....
اتعلمين ما اصعب ما قرأتة في كلامك:

اقتباس:

اروح المعهد واشوف صديقات مع بعض يسولفون ويضحكون تاخذ قلبي الحسرة ....لان ماعندي صديقات او صديقه افضفض لها او اضحك معها وا اسولف

ولكن لاتستحق منك هذا الالم...
وصدقيني.....لك في هذا الزمان دواء والامل باب ابيض لا تقفليه ابدا
والحمدلله ان لديك صديقة اخرى....
ربما ستندم وتعود الى سابق عهدها...وربما اكتشفتي حقيقتها باكرا...
ان تكتشفيها بعد اربع سنوات افضل من عشر سنوات....
كوني اجتماعية...وتعرفي على صديقات جدد...ويجب ان تعلمي انها تجربة وانتهت
انتي حتى لم تتزوجيه!!

أم الشباب · 12-03-2007, 21:49

والله يا عزيزتي كثير اللي صاروا على هذا المنوال وللأسف
بس قولي الحمدلله انك عرفتيتها زين من اول موقف صعب يمر فيك
وادعي ومالك الا الدعاء لا يرد القضاء الا الدعاء

م-سيف · 12-03-2007, 23:00

من باعنا بعناه لو كان غالي ....

وسعي صدرك ولا يضايقك شي ....

اتصالها باختك وكلامها عنك يدل على قله درايه و معرفه ....

كبري عقلك .... وستعود لك ... وستبحث عنك .....المسئلة مسألت وقت ان شاء الله

بالنسبة للوحدة التي تعيشينها .... كان الله في عونك

تقربي من اخواتك ...

حاولي البحث عن صداقات جديدة .... لا تستسلمي للوهن والانطواء

لا تكون تجربتك الفاشلة سبب في انطوائك او سبب في تدمير الباقي من حياتك

بالعكس يجب ان تكون تجربتك ... عتبه تقفين عليها لكي تزيدك طولاً ....

الله يوفقك

خالص الود

منيب هينة · 12-03-2007, 23:06

الحمدلله على نعمة العقل
اقول ياغاليه خليها تولي زيين ولا تفكرين فيها
وريحي بالك
وكل شي ياغاليه قسمه ونصيب وربي ماينسى عبيده
تحياتي

كلمات لها معنى · 13-03-2007, 01:32

والله ياختي لا تغلقين نفسك ولا شيء الي باعك بيعيه وارمي وراها 1000 حجره وقولي لها باي 000000000000
وبعدين وش ذي كلمه مطلقه انتي ما تعتب رين مطلقه لانك ما تزوجتي 000 هذي تسمى خطبه وما صار فيها لا قسمه ولا نصيب واكيد خيره من ربي 0000لانك مشاء الله عليك من اسلوبك واضحه وصديقه مخلصه وبنت نشميه (والله ما اجاملك )
تعوذي من الشيطان واتركي البنت هذي للابد واحمدي ربك على ان ربي كشفها لك قبل فوات الاوان 00000 وصدقيني الشخصيه هذي تطيح من عين نفسها قبل لا تطيح من عين الكل 00000ولابد للخير ان ينتصر في النهايه 000000
وانتي الحين عندك بدال الصديقه الف واحنا كلنا خواتك وصديقاتك 0000000
طنشيها وتراها هي الخسرانه 00000واذا ودك تحرجينها على المضبوط ارسلي لها باقه ورد في خطبتها وبطاقه مباركه وبعد لما تصير عندها مناسبه قومي بالواجب
والله انها راح تصير زي النمله قدامك 00000 وبتشكرك غصب عنها ومراح تنسى هالشيء ابد وبالعكس راح يذبحها الندم 0
الله يوفقك في الي يستحقك ويعرف قيمتك بس لا تقولين كلمه مطلقه 0000اوكي

كلي خير · 13-03-2007, 15:39

مشكورين على الردود الطيبه اخي ابو الغاليه
نعووومه لاخلا ولاعدم منك ام الشباب الله يخليك
مملوحه الحنونة الله يخليك لي
سيف على عيني وراسي
كلمات لها معني انشاء الله
منيب هينه الف شكر لك ياحبيبتي
مشكورين على الرد الطيب منكم

بسيطه · 13-03-2007, 21:38

اللي يبيعك بيعيه وارفعي راسك ولا يهمونك

كنك تتكلمين عني لكن انا على طول احتقرهالاشكال علشان عقولهم الصغيره

الله يرزقك بالصديقه المخلصه الحبوبه ياااااااااارب

*دلع القمر* · 13-03-2007, 22:52

خليكي واثقة من نفسك حبيبتي .....ومايهمك حدا

نصيحتي الك تنسيها والا ماتجيكي صديقة تفهمك او شخص

عزيزي على قلبك تشكيلوا همك ...........الله يكون في عونك

t3b2006 · 14-03-2007, 20:05

فإذاً
تركتك
وكان ماكان
هل ستضلين تتأسفين وتبقين لوحدك لأجلها
أنا لن أقلل من حزنك
ولا من حجم الأسف بداخلك على من أسميتها صديقة
!!!
لكن
فكري
أوليس حتى في المصائب وجه آخر
.
.
.

أنا أيضاُ مطلقة
بل وحين ُاعرف بنفسي
لا أجد حرجاً في ذلك
.
.
.

لأنني كنت على يقين بالضريبة
وبأنني سأدفعها كاملة
ستخسرين كثيراً
وستجدين أن هناك من يؤيدك
والكثيرون يعارضونك
.
.
.

تلك حياتك ولن يتألم سواك
ومع ذلك يعارضون حق إختيارك
معرفة أربع سنوات
وإنكشف معادنها
.
.
.
فإحمدي من أعانك لتطليقها وأقصد صديقتك
هلاقة ُاخرى وفاتت
وأنتي لن تموتي
لذا
.
.
.
قولي ذهبت وفكري لاتعودي مطلقاً لها فمثلها عبء عليك
.
.
.
ومن ناحية ُأخرى
لاتثقلي الناس بهمومك
وليس كل من قال أنا صديق
هناك من لايتحملون أساساً شكوانا ولابث أحزاننا
فكوني منصفة
أنا لن ُأحامي على صديقتك
لكن
إلتمسي لها عذراً واحداً فقط
وقولي
لربما أثقلت
فإشتكي لله
وصدقيني أنتي بهذا أحق
.
.
.
بقي شيئاً
أطيلي تأمل حياتك وأخطائك
وتعلمي منها
.
.
.
وفي كل شي إعلمي لله حكمة
علمها من علمها وجهلها من جهلها
أعانك الله وفقك
...

قيس ابن الملوح · 16-03-2007, 12:16

متابع

عانس في عمر الزهور · 16-03-2007, 13:33

الله يكون في عونك ياقلبي وتلاقين الصديقة اللي تستاهلك
وتستاهل أنها تكون صديقتك والله يرزقك بالزوج الصالح
ومثل ماقالوا*من باعني برخيص بعته*

بنت حوى · 16-03-2007, 18:20

حبيبي لا تتضايقن
هي الخسرانه مو انتي
بعدين لا تتعقدين وتعتقدين كل الناس مثلها
لا والله لسى الدنيا بخير
ولسى فيه صديقاتي ينشرون بموية العين
عندي صديقاتي يسون الذهب واغلا
خليك متفائله وانسي كل اللي صار وهذا
ربي اراد انك تكشفينها بدري
والله ان اللي حصل هذا خيره لك
وإذا كنتي مطلقه وشفيها انتي ما اجرمتي ولا سويتي شي غلط
لا تحسسين الناس انك ضعيفه وتعطينهم فرصه يتشمتون فيك
والا ينظرون لك نظرة شفقه
بالعكس امشي وراسك مرفوعه وخلي نفسك عزيزه عليك
لانك إذا ما عزيتي نفسك محد راح يعزك
هذي نصيحتي لك وانت انسانه عاقله وفاهم تعرفين كيف تصرفين امورك
الله يكتب لك اللي فيه الخير

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

تركتني ......لاني مطلقة!!!!!