 |
 |
 |
||
|
|
|
||
 |
|
 |
هذا الموقع مخصص للعلاقات الزوجية المهذبة و الثقافة الجنسية و لا يتضمن أى صور أو أى مواد مثيرة و لكن به من الموضوعات مالا يناسب من هم أقل من 18 سنة.
|
|||||||
| المنتديات المتخصصة قصص واقعية ,قصص الانبياء ، قصص للعبرة ، قصص مؤلمة |
 |
|
|
LinkBack | أدوات الموضوع | انواع عرض الموضوع |
20-04-2007, 19:42
|
#1 (permalink) | ||
|
عضو فعال
تاريخ التسجيل: 10-03-2007
المشاركات: 43
|
ياليت نكون مثلهم......................
السلاام عيكم ورحمة الله وبركاته
هذه القصه واقعيه ويمكن مرت عليكم وقريتوها بس حبيت انقلها لكم واعرف انطباعاتكم عنها :: الصداقه من اقوى العلااقات الأنسانيه ..... علااقه يميزها انها تجمع عدة مشاعر واحاسيس في اطارها المحبه بالتضحيه وغيرها يمكن اغلبنا او اقدر اقول كلنا حصلت له مواقف مع اصدقاءه منها الحلو ومنها المر منها الي تقوى العلااقه ومنها الي تنهيها قصتي تتكلم عن هالموضوعتقدرونتقولون انها تحمل مشاعر اكثر منها احداث لكني قررت بعد تفكير طويل اني اعرضها للناس عشان يستفيدون منها احنا كمجتمع للرجال حدود الصداقه غالبا معروفه عندنا واغلبها تكون للوناسه والمصلحه , انا ما اقول الكل بس اكثرها لكن الي صار معي شي ثاني وهاذي قصتي ............... في عام 1408 , كنا تونا منتقلين لمدينة الرياض والدراسه بدت من اسبوعين تقريبا وكنت في السنه الرابعه أبتدائي دخلت فصلي الجديد وقام الاستاذ تعارف بسيط بيني وبين الطلااب , ولماجاء وقت الراحه طلع كل الجميع الا انا , دخل ولد أسمراني شعره حوسه وأسنانه الأربع الأماميه الي متمسر والي طايح , مشمر اكمامه ووجهه كله مخوش وحالته حاله لله الا انه رغم كل هالبلااوي فيه شي يخليها مو باينه قعد يحوس بشنطته ساعه وكل دقيقه يطلع خرابيط وكل شوي يرفع عينه عندي ....... واخيرا طلع منها نبيطه , وقبل يطلع التفت علي وكان من النوع الي كنه بينطحك وهو يطالع ... منزل راسه شوي ومعبس طول الوقت بس كانت بريئه اكثر ما تكون مرعبه وقال بلدغه طفوليه سببها واضح وهو اسنانه الي حالتها صعبه وقال : انت الحين ليه جالس لحالك ؟؟؟؟؟ كانت هذي اول جملة سمعتها من الأنسان اللي صار بعد كذا أغلى البشر على قلبي , كان معروف عني اني انطوائي ومنعزل هاذي طبيعتي حتى اني توتر لما يكلمني احد ما اعرفه ورديت عليه وقلت بس كذا انا ما ابي اطلع وبعدين انا ما اعرف احد هنا ... وبنفس النظرات اللي الله اعلم انها كانت عاده عنده ... قالي تعال معي وانا اعرفك على نص الي في المدرسه ..... كان يجرني من يدي وانا اسحبها بخوف .... واقوله لالالاانا كذا مرتاح قلت لك ما ابي اطلع .... لكن الولد اصر لين طلعني معه بالغصب ومثل ما قال عرفني على نص المدرسه تقريبا لكن تبون الصدق حسيت اني تعلقت فيه هو يمكن عشان شخصيته عكسي تماما اجتماعي خفيف دم والكل يحبه ويحاول يتقرب منه صيح انه كان شيطاني ومشاغب لكنه ما كلن يتعدى على احد حسيت اني مبهور بشخصيته ورغم انه ذكي جدا الا انه كان يعف يمشي عمره من يومه صغير ... وعلى كثر الاولااد الي يعرفهم الا انه بعد تعلق فيني فوق ما تتصورون صرنا ما نتفارق ابد ولاا يشوفون واحد بدون الثاني ....... مرت السنوات وصداقتي تزداد قوتها مع خااااالد .... مرت علينا سنين الطفوله والمراهقه وحنا سوى ودخلنا الجامه وتخرجنا وحنا ما عمرنا تفارقنا حتى في السفر ما اذكر ان واحد سافر بدون الثاني الاا اذا كانت السفره مع الاهل , اغلب النا الي يعرفونا يحاولون ياخذونا قدوه وكثير منهم يضربون المثل في صداقتنا, يمككن تتسآءلون وش واحد كنا نطبقه بدون ما نحس من يوم حنا صغار, شي عجزت اغلب الناس انها تفهمه في تعاملها مع بعض , وهو ان كل واحد فينا كان متقبل الثاني بكل مافيه من العيوب ولا عمر واحد فينا اول يغير الثاي ويمشيه على طريقته برغم الأختاف الكبير بينا ... خالد كان فيلسوف بالفطره وبسبب علاااقاته الكثيره , وكنت اتعلم منه كثير لما أسأله كيف يقدر يجمع كل هالناس حوله كان يقول كلمات بسيطه كن تركت فيني اثر كبير كان يقول :: اسمع يابندر الناس لها مشاكلها وكل واحد فهالدنيا صدقني منشغل في نفسه ولاا واحد تهمه مشاكلك فاأذا تبي الناس يحبونك انسى نفسك وفككر فيهم وكيف تساعدهم في حياتهم بقد ما تقدر ... قصتي الأساسيه الي ابيها توصلكم مو في كيفيه صداقتن لاني مهما شرحت ماراح اقدر اوصلكم مدى عمقها لكن الحدث الي قلب حياتي ولا أظن ترجع زي ما كانت . في يوم اربعا جاني خالد لللأستراحه الي نجتمع فيها مع الشباب والفرحه مبينه في عيونه وسحبني من بينهم ...... تعال بندر ابيك في كلمة راس . لما صرنا برى قال عندي لك مفاجئه ..... وابتسم انا ذاك الوقت الي يشوف وجهي يقول خبل اناظر فيه وفاتح فمي .... كمل كلاامه ... ابشرك لوالده خطبت لي في هاللحظه حسيت كأن احد عطاني كف على وجهي ......... اييييييييييييييييييييييييييييييييييييييييييييييييي يييييييييييييييييييييييييييش؟؟؟؟؟؟؟؟؟؟؟!!!!!!!!!!! !!! طالعني بنفس طريقته يومه صغير واللي ما تغيرت ابا ......... وراك تقولها كذا كنك مو مبسوط وبارتباك رديت لاا مبسوط بس انت فاجأتني وصدمتني صراحه!! ماعمر جبت طاري للزواج !!!!!!!!! ضحك وهو يغمز .... عرف بس الوالده اقترحت علي الموضوع وقلت لها ما في مانع .. توقعت ان السالفه كلاام او عالأقل بتاخذ وقت بس ماشااالله عليها يومين الا هي جايتني تقول ترى لقينالك الظاهر انها حاطتها في بالها من زمان , وبعدين ماعاد الا خير والا شرايك ؟؟!!!!!!!!! يعني للحين ماشفت البنت ياخلللللللللود ......... آفا عليك بس يابندر !!!!!!!!! الحين اقولك توي داري وجيتك بسرعه , لوالده تقول انهم حددو يوم الأثنين عشان اجيهم اشوفها .........تفاجأت الله بهالسرعه ؟؟؟!!!!! مو اقولك شكل السالفه مطبوخه ن قبل على كلا" الله يوفقك انشالله ....... عقبالك يالرمت (خالد يوم كان صغير كان يناديني بكلمة الرومييت الانجليزيه لكنه كان يقولها بهاالطريقه ومشت معنا كذا صارت مثل اللقب بيني وبينه ) اغتصبت ابتسامه ...لاوين تو الناس عل ي المهم الحين خلنا نرجع للشباب لايبدي التعليق ....... وبتعجب ممزوج بغضب مصطنع رد خالد لحظه لحظه بندوره الحين اقولك خطبت وزحمه ولاتعزمني على شي بهالمناسبه؟؟؟!!! على الاقل ودني لكوفي شوب ياخي !!!! ضحكت ... لاياعمي الحين قهوه وبعد شوي الاحنا في واحد من هالمطاعم حقتك الي فواتيرها تكسر الظهر تراي اعرفك زين خلاص عشرة عمر ... رد والله انك قعيطي مستخسر فيني ؟؟؟ وقعدنا نضحك , وحطيت يدي على كتفه ولاا يهمك ياخالد اذا صار شي اكيد ... ابشر بذيك العشوه الي يحبها قبك فالمطعم الي تختاره وش تبي بعد ؟؟؟؟ كان ودي اعزمه بس النفسيه عدمرد بغمزه ماتقصر اصيل يابندر بس اهم شي لاتفشلنا مثل ذاك اليوم ؟؟!!افشلك !!! متى ياويلك من الله ؟؟؟ عطاني نظره اللي مو مصق .... معقوله نسيت ذاك اليوم يوم يمدح لن خوينا سامي ذاك المطعم , قلنا لازم نجربه ونشوف.......... لما تذكرت الموقف بديت اضحك .... اوووووووووه الله يقلع شرك وش ذكرك بها الموقف الحين ..... ابتسم خالد ويده على وجهه تذكر ؟؟ يومها طلبنا عصير وطقيت الصدر يعني انت الي بتدفع ويوم جا الحساب جت معه المصيبه , والله لو انك شايف وجهك يابندر يوم شفت الفاتوره تقول صابين عليك مويه بارده مانحرجت لااوالله !!! على الأقل احسن من الي قعد يتفلسف ويسوي روحه ابو العريف لاا وتاشر بيدك بعد كننا في ملعب وبديت اقلد صوتهونظرته المعروفه لو سمحت الفاتوره مو لنا حنا طلبنا عصير بس !!! والله لو انك شايف وجهك انت يوم رد عليك نعم ياسيد هاذي فاتورة العصير بس هاه الحين من الي طلع مفشل الثاني ؟؟ ابتسمت .... اذكر مابقى في جيوبنا شي ماطلعناه ويالله كفى ..ولقطنا وجيهنا وطلعنا وحنا نتصدد لا احد يشوفنا .... وطوال ماكنت اعيد القصه وخالد ميت من الضحك ........ كان يسعدنا ان حنا نعيد الذكريات اللي مثل هاذي ... المهم رجعنا للشباب من بدا موضوع الخطبه حسيت انه خلاص ماراح يرجع شي مثل اول تضايقت مره بس ما ادري وش اللي فكرت فيه يعني مستحيل نقعد كذا بدن زواج للأبد كان واقع لاازم ارضى فيه , لما رجعنا داخل كان مستانس يلعب يضحك وينكت صحيح هاذي عادته لكن اليوم كان بزياده اما انا كنت عكسه تماما حسيت اني بأفقد هالأنسان ........الشخص الوحيد الي اعتبرته صديقي.... (يتبع).......................
__________________
أحيا وإن ماتت عروق أملي أبقى ولن أنسى من أدمى قلبي __________________ |
||
|
|
|
22-04-2007, 03:36
|
#4 (permalink) | ||
|
عضو فعال
تاريخ التسجيل: 10-03-2007
المشاركات: 43
|
رد على: ياليت نكون مثلهم......................
يوم الأثنين العصر جاني للبيت !! خفت يكون صاير شيء... خير خالد عسى ماشر ... وبتوتر واضح في صوته .. ابد والله
احس اني متوتر شوي ... أبتسمت له شوي ... يابن الحلاال شدة وتزول مثل غيرها ..ابتسم وقال ..وشرايك تجي معي !! قعدت أطالعه ابي اتاكد انه جاد انت صاحي !!وين اجي معك ؟؟!! طيب تعال وخك بالسياره بس ...شديت على يده وحطيت عيني بعينه وقلت : يابن الحلاال رح لحالك وانا بستناك في بيتنا طيب !! كان يطقطق اصابعه ادع لي يالرمت ... مايحتاج قول الله يوفقك ويسنع دربك انشالله , يالله عاد الحين رح حلق وتكشخ تلقاك من شهر مادخلت الحلااق على هالوجه .... كنت احاول اضحكه لانه واضح انه متوتر .. طيب اجي عندك عشان تشوف شكلي قبل لاا اروح لهم . كتمت ضحكتي .. انا له وانا اليه راجعون ؟؟!!انت وبعدين معك ياعمي اصلاا البنت اول ماتشوف عيونك بتوافق لاا تشيل هم وتوكل على ربك ... الله يستر ما ادري وش فيني خايف ياعمي ؟! (ياعمي كلمة معروف اني دايم اقولها فاذا قالها خلووود يعني خلك معي وافزع لي كانت كلمه بينا) عادي كل العالم يتوترون في هالموقف بس انت شد حيلك ولاتتاخر على لجماعه ... طلع من عندي , وبعد العشاء كنت انا الي ما ادري وش اسوي بعمري من التوتر وكل شوي ادق عليه لدرجة ان ريم اختي حاولت تهديني ... ماصارت يابندر يمكنيدري وينه انت متوتر اكثر منه ...ياريم هذا خالدةتعرفين يعني ايش خالد اقرب لي من نفسي ....... والله عارفه بتعلمني فيكم بس اذكر الله وهد الوضع شوي ...مابقى عني صبر وطلعت للشارع استناه بعد حوالي الساعه شفت سيارته مقبله بسرعه جنونيه كالعاده لدرجة انه بغى يدخلني تحتها لو لاا اني بعدت بسرعه نزل وشوي يناقز من الفرحه .... وبرعب صرخت فيه.... خلوووووووود!!! انت خبل بغيت اروح تحت سيارتك ... ناظرني بنظرات جديده علي وابتسم ... سألته هابشر؟؟ لمني الرجال وعرفت اها دخلت مزاجه لدرجة انه ماعاد يدري وينه فيه المشكله انه يتكلم ولاا فهمت من الي قاله ولاا حرف كنت اعرفه عاطفي بس ما توقعت انه يتعلق لهاالدرجه وبها السرعهفرحت لما شفت كل السعاده فيه لكني بديت اتخيل وشلون بيصيرلنا بعد هالتغيير الي ماطرى على البال , يمكن تستغربون ليش كنت متخوف كثير بس صدقوي لما يكون عندك انسان موجه لك كل ذره في كيانه وكل فكره معك ولفتره طويله من عمرك وفجأه يجي من يشاركك فيه , صدقوني تتلخبط حياتك ولوكانت المشاركه بسيطه وشلون لو جاء الأنسان الي بيصير منافس لك ؟! مو حب تملك لكنها عاده وغلاا كبير ... قطع حبل افكاري خالد وهو يقول: على فكره بندر في شي ابي اقولك اياه .. وجهه وهويقول هالكلاام ذكرني بوجهه لمل جاء يعمني انه سرق شاهي وحليب من غرفة المدير واحنا صغار , قلت بأبتسامه.. وش مسوي بعد هالمره ؟؟!... مسكني بيدي وجلسنا على رصيف بيتنا حسيت الموضوع جد قال: صراحه يابندر انا ماقلت لهم اني ادخن ؟!!لحظه قل لاا تقول شئ اصلاا هم ماا سألو الا اليوم وانحرجت وقلت لهم لاا ما ادخن خبرك خفت يرفضون ... اقا ليش ياخالد تبدى حياتك بذبه تافهه ؟! ومن قال لك انها كذبه؟! اصلا" نا نويت اني ارقف زقاير... انا لما قال لي كذا ضحكت!! تذكرت السنين الي كنت احاول فيه انه يوقف وكيف نه حاول كم يوم ولاقدر وفالأخيرلما اشوفه يعاني نستسلم لكن من عيونه واضح انه كان مصر ومصمم المره والله العالم. بندر اكيد بيجون يوم ويسألونك انت من بد الشباب عشان كذا حبيت اعطيك خبر ..مو شؤط ياخالد بالعكس كثير ناس مايفضلون سألون الأصدقاء المقربين وطبعا" واضح السبب,لكن ل جاني احد وسألني عنك ما راح اكذب عليه وبقوله هالكلمتين : خالد صديقي من سنين والف النعم فه بس انا متفق معه لما نتزوج محد يعطي معلومات عن الثاني عشان الأحراج لأن مثل ماالواحد يقول الحسنات لازم يقول السيئات مافي كامل فهالدنيا هذا زواج مو لعبه وحنا مانبي نضطر لهاالشي , بس اذا العلم باختصار لو طلبني اختي عطيته اياه وهذا كل الي عندي .... لما انتهيت من كلامي ربت على كتفي وقال ريحت بالي ماخاب ظني فيك يالرمت انا اشهد اني عرفت من اخاوي ,توادعنا وركب سيارته , ودخلت البيت وانا احس بضيقه شديده صحيح دخلنا ال26 ذاك الوقت يعني طبيعي الي قاعد يصير لكن ما ادري وش الي كان يصير معي ... كان يكلمني كل يوم عن المستجدات الي صارت ويسألني اذا كان احد جاني من اهل البنت وانا اقوله للحين ماشفت احد وحتى لما نتقابل طول الوقت يتكلم فهالموضوع بيني وبينكم بديت اطفش صار كل كلاامه عن زواجه لكن الي معجبني في الموضوع كله اصراره على ترك التدخين صحيح حالته كاسره خاطري يعني الصداع ماتركه ابد وعيونه دايم حمر ونفسه في خشمه طول الوقت والربع كلهم يحطمونه يقولون اول ماتتزوج بترجع لاتتعب نفسك ,بس في تقدم اسبوع وشوي بدون ولا زقاره ,كان مر عى هالبنت ومايبي شي يوقف في طريقه وخالد صديقي واعرفه زين اذا حط شي في باله يجيبه ((2))
__________________
أحيا وإن ماتت عروق أملي أبقى ولن أنسى من أدمى قلبي __________________ |
||
|
|
|
|
22-04-2007, 03:38
|
#5 (permalink) | ||
|
عضو فعال
تاريخ التسجيل: 10-03-2007
المشاركات: 43
|
رد على: ياليت نكون مثلهم......................
يوم الخميس مثل عادتنا كنا مجتمعين انا والربع فالاستراحه وخالد للحين ماجا صار دايم يتأخر لكن عمره ماتركنا, كنا جالسين بعضنا يلعب ورقه والباقين يسولفون ,انا كنت العب وسمعنا صفقة الباب الي برى وبما ان خالد الي ناقصنا عرفنا انه هو ,وبدى التعليق الي يقول جانا العريس والثاني يقول الله يعينا عليه من اول ما وقف زقاير وهونار شابه , قلت لهم : كلش الا خويي عاد لحد يغلط عليه وانا موجود ....وقعدنا نضحك, فتح باب الغرفه والتفت اسلم عليه ماحسيت الا واحد يرفعني من القلابي ويلزقني عالجدار بقوه, لما حاولت اعرف من هو الا وهو خالد كان معصب ويصرخ بوجهي ويدفع جسمي عاالجدار بطريقه عنيفه ,كنت مصدوم واطالع فيه مو فاهم شالي صاير حتى ربعنا يطالعون بتعجب ولما استوعبوا ان السالفه هوشه قاموا يفكونه عني , في هاللحظه انا للحين مابعد استوعبت الموقف بس يوم شفتهم يسحبونه عني حسيت انهم اوجعوه بديت ابعدهم معه واحاول احميه بيديني كنت خايف عليه وجسمه صار احم من تسحيبهم الشديد وانا لها اللحظه ما ادري وش صاير لكنهم كانوا اكثر منا وقدروا يمسكون كل واحد في جهه, سامي كان يسأل خالد بعصبيه:انت صاحي ؟!!وش جالك انهبلت ؟!وش صاير؟!ورد خالدبصوت انسان ثاني ما عرفه وياليته ماتكلم : اسأل هالجبان الي قدامكم وش مسوي لاا تسألوني انا
في هالوقت بديت استوعب الموقف .... خالد قدامي في حاله عمري ماشفته فيها ,معب والكلام يطلع مقطع منه بسبب تنفسه السريع ,نظراته ماغيرها تطل من عيونه بس الحقد حل محل البراءه ؟؟ كان كل شوي يحاول يتخلص من يدينهم عشان يضربني !!تصورو!! بعد كل هالعمر وهالعشره يضربني انا بندر صديق عمره ورفيق دربه , قت له واا احاول ارقب عنده اهديه : وش بلاك ياخالد انا وش سويت ياخوي؟!رجع يحاول يتهجم علي وابعدوني عنه بسرعه..لاتقول ياخوي انا لاا ني اخوك ولاا تشرف اكون اخوك وبصوت تخالطه البحه من شدة الصراخ وهويسك راسه بين يديه بعصيه ..وبعدين لاتقول وش سويت ياحقير تنرفزني زياده .. خفت عليه كان يصارخ مايتكلم ويطع كلمات مثل السم ..لما ماتكون قد الكلام لاتعد تفلسف علي يا اكبر كذاب .. قال سامي .. خالد وش ذا الكلام الي تقوله ؟!كبر عقلك وخلنا نتفهم القصه .. صرخ فيه انتم لاتدخلون ورجع يطالعني وهويضرب على صدره بقهر واضح انت ماشفتني اموت فاليوم عشرين مره وانا احاول بكل مافيني اني اوقف زقاير ليش تقولهم اني كنت ادخن ليش ؟!.... كنت هاللحظه مثل الغبي وعيوني بتطلع من مكانها رديت...خالد انا قلت لك محد جاني ولااحد سألني كلامي زاد ثورته وقام يتحرك مثل المجنون... هذا الي يبي يذبحني بندر لااتكذب لااتكذب ما ابي اسمع منك ولاا كلمه صحيح انهم رفضوني بس مايهم البنت بدالها الف وبدت نبرة صوته تخف ... لكن انت ليش سويت كذا يابندر ليش ؟! الكلام الي قلت لي ذاك اليوم كان كله كذب وتمثيل ؟!! على الأقل ليش ماتوعدني وتخلف لو قلت انك بتعلمهم كان تفهمت الموضوع , انت حطيتني في اصعب موقف ,معقوله استخسرت السعاده الي انا كنت عايشها ولاا قدر تستحمل فكره اني ابعد عنك شوي !!معقوله يابندر انت من بد هالعالم كلهم تسوي فيني كذا هذا جزاي اني عزيتك؟!...رجعت النبره العاليه...ماتوقعت كذا ابد انت انسان اناني تعرف يعني ايش اناني ؟! حاولت اتمالك نفسي ورديت بصوت هادي قد ما اقدر ...بس لاتكمل لاتقول كم تندم عليه بعدين ياخالد لا تظلمني وانا اخوك...ضحك وبسخريه اندم!!اندم على ايش ولاا ايش ؟!!على العشره الحلوه الي كانت بينا والا 16سنه الي ضيعتها من حياتي على واحد مثلك والا عالأنسان الي توقعته صديقي وما طلع وقبل ما يكمل كلمته هالمره نا الي تخلصت من يديهم وهجمت عليه ورميته على الأرض ,ولما ثبته تحتي رفعت يدي لكنها وقفت وكل عضله فيني ترجف رجفه فضيعه لأن الي تحتي كان خالد خالد الرفيق !!خالد الغالي !! يا رب انا وش قاعد اسوي معقولها امد يدي عليه؟! صرخت في وجهه.....اسمع ياخالد كل الكلام الي قلته ممكن اتغاضى عنه عشان المعزه الي بقلبي ولاني متأكد انه فيه سوء فهم فالموضوع اما انها توصل فيك انك تقول الي بينا ما كان شي فهذا الي ماراح اسمح لك تقوله فااااااهم؟!....خلص يدينه من يديني ودفعني من فوقه ... اقول ابعد عني بس ... وقف وانا للحين لى الأرض ... اسمع يابندرهي كلمه ورد غطاها ماعاد ابي اشوفك ولاا عاد ابي اسمع صوتك او حتى طاريك وكل الي كان بينا اليوم انتهى ,الانسان المخادع الي مايقدر الصداقه ماله مكان في حياتي ابد , واذا كنت سويت هالحركه خايف انك تفقد جزء مني ياطفل ابيك تدري اللحين انك فقدتني للأبد .... طلع من الأستراحه بنفس الحال الي دخل فيه واشرت لسامي وانا احس بأرهاق شديد : اطلع معه الله يعافيك لايسوق السياره وهو على هالحال بعد مب ناقص جنون فالسواقه... لكنه رجع بعد دقايق يقول انه ما قدر يلحقه . انتشر الهدوء بعد طلعة خالد وكانوا كلهم يطالعوني مو عارفين وش يقولون , كانوا مصدومين مثلي واكثر,وقفت ويدي على قلبي حسيت اني مخنوق وانا احاول استجمع القوه الي باقيه فيني قلت : عذرا ياشباب متأسف على الفصل البايخ لي صار قبل شوي , يالله انا ماشي ...يسألني سامي بتردد واضح: لحظه قبل لاتمشي يابندر صحيح الكلام ال قاله خالد؟!زيت رسي بأسى وانا امسك دموعي الي عصتها شيمة الرجال وبأبتسامه رديت : ليش استغرب منكم انكم تصدقون هالكم فيني اذا كان خالد خوي الروح قدر يصدقه؟!!!مع السلامه وطلعت , لحقني سامي .... خلني اوصلك للبيت يابندر تراك على طريقي.... شكله حاس بتأنيب الضمير وراحمني وهذا الي ما احبه رديت ..لاامشكور انا بخير لاتشغل بالك ...وركبت السياره ومشيت فالبيت الوالده وريم كانوا فالصاله لما دخلت , استغربوا رجوعي بدري... بعد السلام سألت لوالده بأهتمام : بندر يمه وش فيك ؟!.... ريم بعد فالت شي زاد الألم الي في قلبي عسى ما شر يابندر خالد فيه شي ؟؟؟ حاولت امثل اني معصب ... انت ماتفهمين ؟!!! كم مره اقولك يارويم لاتتفاولين على العالم , ياجماعه كل الي صار ان حنا ترقنا بدري اليله عادي وشفيكم ؟!....قالت الولده.......ياوليدي وجهك متغير انا امك واحس فيك قلبي يا امي من الي مضيق صدرك ؟!قالت ريم : لايكون مطاق مع واحد من العيال ؟؟ قالت اني وش دعوى ماتعودنا منك ياولدي هالحركات ؟!!كنت عارف ان شكل ثيابي يدل على اني توي طالع من هوشه .. قلت لهم : ريحو بالكم تهاوشت مع واحد من الشباب بس جت سليمه خلاص عاد فكوني , قالت ريم : اكيد بتجي سليمه اذا كان خلود المرعب ابو المشاكل معك هو الي دايم يفزع لك المفروض مح يقرب لمك ... هزت راسها كنها تذكرت شي مو حلو ...يمه منه ذاك الولد شراني ياكثر مايصيحني وحسرني وحنا صغار , تذكرين يمه ذيك الايام ؟!!... ابتسمت امي .. اول ماجينا للرياض ماكنت اربط شعرك دايم تجيني تصيحين من تمعيطه لشعرك ...قالت ريم .. وتضحكين بعد يمه المشكله ان ولدك اذا كان يطقني معه ماكني اخته الحمدالله والشكر ..... قالت امي صحيح ان خالد كان شيطان وهو صغير بس والله ان الولد والنعم فيه شوفي وش صار الحين ... المني كلاامها زياده بس سويت الوضع عادي ووحهت كلامي لريم ... وانت وش تبن ماعندك الا خالد وخالد ؟! بعدين تستاهلين رازه وجهك عند العيال الشارع دايم وهو معتبرك اخته ... حسيت اني احرجنها وردت .. انا ولاا انت الي ماعنده لا خالد ؟!... قطعت الحوار ورحت لغرفتي (3)
__________________
أحيا وإن ماتت عروق أملي أبقى ولن أنسى من أدمى قلبي __________________ |
||
|
|
|
|
23-04-2007, 04:01
|
#6 (permalink) | ||
|
عضو فعال
تاريخ التسجيل: 10-03-2007
المشاركات: 43
|
رد على: ياليت نكون مثلهم......................
قعدت في فراشي استرجع الي صار معقوله خالد يسوي معي كذا ويقول عني هالكلام ,وبدون حتى مايفكر وقدام هالعالم كلهم؟!!
لااكيد انا احلم اصلا" الي شفته اليوم انسان ما اعرفه !!!ورغم الاهانه الي كنت احس فيها والجرح الي في قلبي الا اني دست على مشاعري ورحت ادق عليه لازم افهم وش الي مضايقه لها الدرجه ليش؟؟لانه مو اي واحد لكنه للأسف عطاني مشغول بعدين قفل جواله جلست في بيتنا ثلاث ايام ولارحت للأستراحه كالعاده ولااستقبلت مكالمه من احد حتى اهلي مستغربين,لكن لأن طبعي كتوم ماقدروا يعرفون اي شي . كانت هاذي اول ثلاث ايام ما اشوف فيها خالد واحنا في نفس المكان مرت علي كنها ثلاث سنوات,ورغم الي سواه معي الا انه وحشني حيل واشتقت له ذاك الشوق الي تحسه يوجعك مو بس نفسي الا تحس شي يألمك من جد اذا فاهميني!!!!,لكنه الله يسامحه ماحاول يعطيني اي فرصه عشان اتصل عليه . اتصلوا الشباب الشباب من الأستراحه وكانوا حاطينه عالسبيكروسلموا علي وسألوا عن احوالي عاد واحد منهم اسمه ماجد قال :: وينك من زمان عنك يارجال كبر راسك علينا والا عشان خويلد ماعاد يجي صرت انت بعد ما تجي ؟! سمعت كان احد ضربه وسكته المهم قلت : معليش ياشباب انا هاليومين ما اعتقد اني بجي للأستراحه مالي نفس سامحوني ... قال سامي:وشرايك نجيك للبيت اذا ماعندك مانع استغربت بس رديت ..بالعكس حياكم الله اي وقت لبيت بيتكم ...خلاص اذا شفنا يوم مناسب بندق عليك ...خير انشالله الله يحيكم اي وقت مع السلامه ...بعد شوي دق خالد!!!!!!معقوله ماني مصدق عيوني وش القصه؟!قعدت ساعه اطالع الأسم ابي أتأكد انه فعلا هو , لكن للأسف سويت شي بظل ندمان عليه طول عمري , عطيته مشغول وقفلت الجوال ,ليش سويت كذا ماادري اظن انها كانت ردة فعل طبيعيه بعد الي صار لي معه وما اعتقد احد يولمني ,يمكن ابي ارد له الي سواه او كنت عارف لو رديت انه بيكون لي فضل عليه وهذا الي ما ابيه المهم هذا الي صار,لكن الوضع استمر صار يدق علي وانا ما ارد كنت اعاند قلبي قبل لااعانده هو ,صار يرسل مسجات يترجاني فيها اني ارد لكن الي فهمته من بعض المسجات انه يبيني اسامحه لانه اكتشف انه غلط بحقي ومن هالكلام الي خلى عنادي يزيد...بعد يومين دق علي طلال اخو خالد الكبير هو بعد صديق عزيز يجلس معنا من فتره فتره فالأستراحه وكنت اغليه من غلاا اخوه واحترمه كثير ولاا قدرت اصده رغم اني عارف سبب المكالمه ورديت :مرحبا طلال ...هلا وغلا وش اخبارك وعلوك يابندر؟ ابد والله تمام ... انت اخبارك واخبار االأهل ؟..تسلم كلهم تمام,بندر ياخوي !!..سم ؟سم الله عدوك ,انا داق عليك عشان موضوع خالد انا عارف انك ماتبي احد يتدخل فالموضوع حتى خالد مو راضي يتكلم انا عرفت من الشباب وفكرت كثير قبل لاا اكلمك لكني ما قدرت اشوف حالة اخوي كذا واسكت , الصراحه من ذاك اليوم وهو مو خالد الي نعرفه لايروح ولا يجي ماعاد يسولف ولايضحك حتى الأكل دايم مايشتهي !!والولده ضايق صدرها عليه تحسب انه زعلان على البنت وتقول لاخواني وين بندر عنه محد بيوسع صدره الا هو!! صار طول الوقت في غرفته خاصة لما عرف انه مالك يد فللي صار ,وليتها جت على كذا خالد رجع يدخن بعد بس هالمره بشكل يخوف يابندر....قلبي انقبض بس رديت ...والله ياطلال انا مقدر موقفك وخوفك على اخوك واعرف ان قوبكم على بعض دايم وصدقني اخر شي اتمناه ان خالتي يضيق صدرها وانت عارف زين اني اعتبرها امي الثانيه لكن انا ماغلطت معه ابد,هو الي جاني ونسف كل شي حلو كان بينا في لحظه غضب ...طيب ماتبي تعرف وش القصه وليش خالد سوى معك كذا ؟..مهما كانت القصه ماتعطيه الحق انه يسوي الي سواه ترانا ماعدنا صغار وانا اخوك ,بالله هاذي طريقه يعاملني فيها ؟!!والله اني ماشفته يسوي كذا مع الناس الي كان يتهاوش معهم وهو مراهق ,خالد قدر يقول عني كلام يجرح بدون مايراعي اي شي ويصدق فيني كذبه بدون حتى ما يعطيني فرصه ادافع عن نفسي تنهد طلاال....ياخوك الي صار ان اهل البنت قبلل لاتتحدد الملكه رفضوا فجأه يقولون انهم عرفوا انه يدخن او على الأقل كان يدخن ولاعندهم استعداد انهم يجازفون ,ومن ضمن الكلام فهمنا ان الي قالهم بندر وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني ؟!وطلع وصار الي صار لكن الي فهمناه بعدين انه طلع بندر ولد جيرانا بس تبي الصراحه ما احد من اخواني جاعلى باله كلنا رحنالك على طول لما سمعنا الاسم ...ضحكت بتعجب وانا اقول بقلبي (هذا الشي التافه هو الي خلاك تظلم خويك ياخالد؟!!)رديت على طلال ...والله هذا مو ذنبي ولا هو عذر للي سواه معي خالد ظلمني وكسر في داخلي شي عمره مايتصلح والله انه غالي وانا مسامحه ياطلال ولا ابي شي منه بس صدقني ما اقدر...وحسيت اني ماعاد اقدر اكمل ..بنبره هادئهرد طلال .. على كلاا" انا حبيت افهمك الي صار وانتم رجال وفاهمين وش تسوون وانا مااقدر الومك على شي بس هذا اخوي يابندر ولازم احاول اسوي اي شي ...اعذرني ياطلال ياليتك جيتني في شي ثاني والله رقبتي سداده...اصيل ماتقصر يابندر اشوفك على خير..مع السلامه........لما عرفت التفاصيل ضاق خلقي زياده كنت اتمنى ان الموضوع اكبر يعني معقوله يسي كل ذاك الفصل عان تشابه اسماء؟! شي يحز فالخاطر صراحه صحيح ان خالد معروف عنه انه عصبي ولا يقدر يضبط نفسه بس هالكم المفروض ماينطبق علي , على الأقل مو بهالطريقه الي صارت !!بأختصار حسيت اني مثل غيري بالنسبه لخالد .... فاليوم الثاني جت الوالده تصحيني الساعه 10الصبح ...يمه بندر اصحى خالد عند الباب ..كنت متوقع ان هالشي يصير وحاسب حسابه قولي له نايم ...قلتها وانا اغطي راسي بالبطانيه ..حاولت تسحبها من فوقي ...يوه اقولك خلد عند الباب وش بلاك ياولدي.. علاا صوتي شوي ...عارف انه خالد سمعتك من المره الأولى وانا اقولك ناااااااايم ...تعجبت الوالده من تصرفي لاني اول مره اسويها لكني ماعطيتها فرصه عشان تستفسر , طلعت من غرفتي وانا نطيت من فراشي للشباك على طول ,كنت اشوف سيارته لكن ما قدرت اشوفه حاولت منا ومنا مافيه مجال . صار يمر على بيتنا يوميا الظهر والليل وانا اتهرب منه واصرفه ولا عمري طلعت له , ودروا اهلي ان بيني وبينه شي اصلا" واضح مايبي لها ذكاء,اما جوالي فصار مايسكت سواء مكالمات من خالد او من الناس الي يحاولون يصلحون بينا ومسجات عل طول الوقت حتى اذا قفلته وفتحت الثاني كان يدق عليهم على طول , ما ادري العب على مين هذا خالد الي يعرفني زين ويعرف كل ارقامي وحتى لو كان عندي رقم محد يعرفه فهالكلام ماينطبق عليه (4)
__________________
أحيا وإن ماتت عروق أملي أبقى ولن أنسى من أدمى قلبي __________________ |
||
|
|
|
|
23-04-2007, 04:07
|
#7 (permalink) | ||
|
عضو فعال
تاريخ التسجيل: 10-03-2007
المشاركات: 43
|
رد على: ياليت نكون مثلهم......................
ذاك اليوم اشتقت له ورجعت بي الذكريات لايام الأبتدائي وياكثر المواقف الي حصلت لنا لأن الي يصادق واحد مثل خالد تتحول حياته
لمغامره, مره في الصف السادس اذاماخاب ظني كان الأستاذ مسوي مسابقه الي يفوز بيصير ((عريف))الي ينظم الفصل اذا ماكان الأستاذ موجود ...!!والله ايام وحشتني ,المهم انا كنت ميت عشان اصير هالعريف اجي بدري ,واشارك وصاير مؤدب ثقيل دم قوبة خالد كان مايحب الأشخاص الي مثلي يهتمون بالدراسه ويحبون المدرسين او يتمصلحون عندهم بس سبحان الله الي جمعنا مع بعض كان يقول ليش تبي تصير عريف ؟!!ترى العيال بيكرهونك ..مااهتميت لكلامه ورديت ...ابي اصير عريف كيفي !!بعدين ياغبي بخليك تطلع وتدخل على كيفك ...لامو لازم انا اسوي الي ابي حتى لو ماكنت انت العريف ...المهم قبل لايختار الأستاذ يومين شريت بلونات وجبتها للمدرسه خالد كان مريض وغايب بس انا والشله رحنا ومليناها مويه واول ما انتهى الدوام رميناها من فوق وانحشنا , يمكن بتقولون وين الولد المؤدب لكن انا بعد خالد صارت تجيني طلعات . توقعت الموضوع محد بيدري عنه لكن من بكره اول ماجيت الصبح قالوا لي العيال ان الأستاذ يسأل عن الي جاب البالونات وسوى الحركه الي امس , هنا انا قلت على العريف السلام ,هالأستاذ مايصدق ,رحت لخالد الي مجتمعين عليه كل العيال بما انه كان غايب امس, علمته بالي صاير امس لاني قلت له السالفه واحنا جايين للمدرسه , قال خلاص ولا يهمك انا اتفاهم مع الأستاذ كنت اعتمد عيه كثير ,لما بدت الحصه دخل الأستاذ وبنبره كانت تخلينا ننتفض ...الي رمى البالونات امس يوقف...محد رد فالبدايه كان ماسك مسطره وش كبرها الله يسامحه ...شوفوا لو ماتكلمتوا يعاقب الفصل كله ...ناظرت خالد وانا بموت من الروعه ابتسم وغمزلي بعدين وقف ..انا يا أستاذ...قالها كنه محرر القدس !!قرب الأستاذ من عنده وسحب اذنه ...والله اني عارف انه مافي غيرك ياخالد يسوي هالحركات , انت متى بتعقل ليش ما تصير مثل اخوانك او مثل صديقك بندر جننتني معك ياولد!! الصراحه ماتوقعت ان خالد بيتحمل الي صار بدالي ؟؟!!فعلا"كنت مستغرب والدليل اني قاعد اتفرج وهويتعاقب وانا ساكت !! طبعا"الأستاذ كسر المسطره على يدينه ياحرام وانا احس ان عقلي بيطير من المنظر بعدين وداه للمدير ..في نفس الحصه اختارني الأستاذ عريف وطبعا" ماتهنيت فالخبر لأني ما ادري وش اي مع خالد ذاك الوقت ...لما انتهت الحصه كان واقف قدام غرفة لمشرف وحوله بعض الأولاد ,يوم شافني ركض ولمني .... احلىىىىىىىىى اخيرا وصلت الي تبي مع وجهك..انا ماكنت اقدر اتكلم اشوف يدينه حمر من الطق ويفركها على جسمه ووجهه الاسمر يخالطه حمره بسبب المرض وهو يضحك..وقبت وانا متنرفز يمكن من الأحراج...خالد ليش سويت كذا انا ما قلت لك ...قاطعني ....يابن الناس يعني اول مره انطق خلاص مشها يالله لازم نحتفل اليوم ....من بعد الي صار عمرنا ماتكلمنا عن هالسافه شكله نساها او مااعتبرها شي بس عمري مانسيت صحيح اننا كنا صغار لكن فزعنه هاذي لايمكن انساها ... هالذكريات شوقني له ورح اتفرج على صورنا وعلى اشرطة الفيديو , عجبني كيف كنا مره قريبين من بعض ولا في مكان يطلع فيه واحد الا الثاني جنبه , اغلب الأشرطه ما قد شفتها من قبل كانو حوالي العشرين شريط شي لسفرتنا وشي لطلعاتنا البروكلها شفتها في يوم واحد ورى بعض , اكتشفت اني على طول الوقت اطالع فيه هو حتى في الصور عيني عليه بس ,وطوال وقت عرض الأشرطه وانا اضحك عليه كان بطبعه خفيف دم محد فهالدنيا يخليني ابتسم او اضحك او حتى يجنني مثل مايسوي ,واحد من الأشرطه كان فيه مقطع اثر فيني كثير كنا مخيمين فالصمن واحد من البب يصور ومعه خالد , مروا على اغلب الشباب , لي ينصبون الخيام والي ينزلون الأغراض وخالد كان ماخذ دور المقدم عشان يتهرب من الشغل كالعاده هو والي معه وقعد يسوي مقابلات معهم ويستهبل عليهم وانا اضحك ول لوقت على طريقة كلامه وتعليقاته لما جاء دوري كنت قاعد اشب الفحم ومعطيه ظهري قرب مني ...عاد جينا الحين لأغلى انسان ..كنت مشغول بالي معي .. هلا هلا خلود ,مسوي فيها مذيع يعني ؟!!ودك تساعدني بدال هالخرابيط ازعجت العالم ياعمي ...كان يوجه كلامه للكاميراوحاط يده على ظهري وانا مو معطيه وجه... هالولد الي تشوفونه عرته من يوم كنا صغار عزيز وغالي علي ولا ابدله بكنوز الأرض...قاله الي يصور :ما اقدر انا على هالكلام !! يابعدي هالي انت كاشخ فيه وتمدحه من الصبح حتى ماعطاك وجه وانت تتكلم ...طالعني بنظرات ماانتبهت لها ذاك الوقت كانت تحمل معاني حلوه...كمل كلامه ..والله لو ايش يصير ما يتغير شي من غلاه.... تجمعت الدموع وانا اسمع كلامه مع اني ذاك الوقت واضح اني ما انتبهت لاي كلمه جتني مشاعر متضاربه كنت اقول في نفسي كلام رائع لكن ماطبقته ياخالد بالي سويته فيني سكرت الفيديو ورحت انام او بالأصح احاول انام . يوم الثلاثاء رجعت للبيت متأخر ولما وصلت عند الباب شفت سيارته,كان يستنى داخلها والله وحده الي يدري من متى ,وعلى مايبدو لي من طريقة قعدته وتكتيفة يدينه انه نايم لأن راسه مايل على جنب بس شكله صغير مره !!اول شي لحيته بدت تطلع , شعره تركه يطول بدون مايرتبه وهاذي مو عاديه ابد , واضح ان جسمه ضعف يعني كأنه واحد توه طالع من السجن. وقفت سيارتي لكنه ماحس ما ادري وش الي خلاني اصفق باب سيارتي بوه عشان ينتبه ...يمكن ماكنت ابغى انتظاره يطول , فز من ومته ونزل بسرعه,ناداني وصوته تخالطه بحه واضحه ,وخالد من النوع الي صوته يروح بسرعه اذا صارخ او اذا صار مريض حسيت بتعبه لكني مالتفت له وسويت روحي ما اسمع ودخلت للبيت , الرجال قعد يطق الباب مثل المجنون لدرجة اني خفت يصحى الجيران ويفضحنا قدام العالم وانا واقف عنده من داخل منزل راسي واسمعه...افتح يابندر خلني اكلمك الله يعافيك لاتسوي فيني كذا يابندر...كان كل مره ينادي فيها باسمي بصوته الي مره تسمع الكلمه ومره ماتسمعها أتالم بس من جد ما ادري وش قوة القلب الي جت لي فجأة وخلتني اتماسك ولااطلع له كل ما مر الوقت زادعنادي,بعد فتره سمعت صوت جسمه ينسحب على بابنا كنه يقعد فالأرض, رحت اركض افتح الباب خفت انه صار فيه شي لكن سمعت صوته يكلم نفسه لانه توقع اني دخلت داخل خلاص ...سامحني يابندر انا اسف والله اسف.... وانا اسمعه كنت كني اسمع اعتذار من طفل متأكد ان الي قدامه ماراح يسامحه , جلست على الأرض وحطيت راسي بين يدي وسندت ظهري للباب ن داخل , وانا افكر في نفسي معقوله الي قاعد يصير معنا يارب ؟!!والله دنيا غريبه , وجلسنا ساكتين , بعد فتره سمعته يتحرك ويركب سيارته . بعد يومين جاني واحد من ربع الثانويه اسمه نواف كانت علاقته قويه مع خالد والى الحين وهو ربع بس هو مو من الشله ابتسمت اول ماشفته تذكرت على طول هباله هو وخالد ايام ماكانوا اجرا اثنين وكيف جتهم تهزيئه من المدير خلتهم ينسون الرقص كله وسبحان الله وشلون تغير هالنواف وصار شيء ثاني رغم ان خالد لازال على جنونه... ماقال شيءعن الموضوع لكن جيته صدقوني كان لها اثرفي نفسي ذكرتني بأشياء كثيره واظن ان هذا مقصده من الزياره...
__________________
أحيا وإن ماتت عروق أملي أبقى ولن أنسى من أدمى قلبي __________________ التعديل الأخير تم بواسطة 'Taghrid ; 23-04-2007 الساعة 18:26 |
||
|
|
|
|
24-04-2007, 03:12
|
#8 (permalink) | ||
|
ادارية
 
تاريخ التسجيل: 17-11-2006
المشاركات: 16,845
|
رد على: ياليت نكون مثلهم......................
حرام عليه بندر باليسويه بنفسه
ومع خالد ...صحيح انه معه الحق بالزعل بس زعله طول لا سمح الله اذا صار شي لخالد هل سيقدر على تانيب الضمير؟؟؟ تحمسنا للنهايه لا تطولي علينا __________________ |
||
|
|
|
|
24-04-2007, 04:29
|
#9 (permalink) | ||
|
عضو فعال
تاريخ التسجيل: 10-03-2007
المشاركات: 43
|
رد على: ياليت نكون مثلهم......................
جاني مسج من خالد فاليوم الي بعده وكان مقطع من اغنيه كانت تعجبنا ودايم نرددها...المسج اثر فيني وقررت ارسله مسج ثاني كرد عليه
مقطع ثاني من نفس الأغنيه. يوم الخميس اتصل سامي فرحت بمكالمته ذكرني بالجمعات في الأستراحه , هلاا سامي وش الأخبار ......تسلم ,وينك يارجال اشتقنالك فاضي اليوم بنمرك انا والشباب المغرب , الساعه المباركه حياكم الله جو الشباب في موعدهم وكلهم كانوا جايين ولما دخلو كلهم وتوني بسكر الباب الا ودفعه واحد وانفتح بسرعه وقبل ما اشوف مين قلت السموحه ماشفتك...يا...كان خالد!!! ماعرفت وش المفروض تكون ردة فعلي , لما تلااقت عيوننا بعد كل هالغيبه حسيت كني بطير من الفرحه في داخلي وانا احاول بكل ما اقدر اني اخفيها واني ما انط عليه واحضنه , ابتسم ذيك الأبتسامه الحلوه والي وحشتني حيل وهومثل ماتقولون كنه واحد غرقان ورد النفس...فتح يدينه عشان يلمني لكني بكل جمود مديت يدي وصافحته بدون اي كلمه. الشباب كلهم سبقونا للمجلس واصلاا كان سبب الزياره خالد وهو الي جابهم , اذن العشاء وقامو الشباب طلعوا من المجلس الا خالد وكنت متوقع الشي المهم ودعت الشباب ولما التفت لقيت خالد واقف عند الباب الداخلي ينتظرني , قربت من عنده وبدون اي كلمه كتفت يديني .. وبدا بالكلام على طول ...بندر سامحني ياخوك ترى كل هاللي قاعد يصير ماله داعي ,انا تهورت وقلت كلام ماكان لازم اقوله وجيت اليوم اعتذر لك واحب على راسك بعد تكفى خل عنك العناد وريح بالي ...اسف ياخالد صدقني ما اقدر انت حطمت كل الأشياء الحلوه بعد ماسمعتني ذاك الكلام ولاا نسيت ؟!!والأيام كفيله انها تنسينا اقام للصلاة ودعنا بعض وطلع مر كم يوم وخالد للحين مادق لكني يوم الأربعاء شفت ميه ميس كول من طلال ورجعت ادق عليه قلت اكيد ان خالد يبيه يتوسط بينا لانه يعرف معزة طلاال عندي لما فقد الأمل فيني وبعدين انا خلاص وصلت عندي ابي كل هالسالفه تنتهي ودقيت وانا فرحان ...مرحبا...طلاال .هلاا بندر صوته ابد ماعجبني واختفت الأبتسامه , طلاال خير انشالله عسى ماشر معليش ماكنت عند الجوال بغيتني في شي ؟!الرجال بدا يتنهد وحسيت ان في شي مو زين صاير...بندر انا لي ساعه وانا ادق عليك لكن.....طلاال ياخوك لاتلعب باعصابي قلي وش فيكم؟ خالد يابندر .....!!لما سمعت اسمه حسيت ان قلبي وصل حلقي .......خالد وش فيه حرام عليك تكلم خلد يطلبك الحل يابندر ادع له بالرحمه انا كنت ساكت ولااعاد اشوف شي قدامي قعد يتكلم كلاام مافهمت منه شي الي قدرت استوعبه ان خالد الظهر صارله حادث والظاهر انه كان متوجه لبيتي وتوفى بالمستشفى ...قفلت الجوال وقبل لاا انهي القصه اذا كنت تقرا قصتي ووكان بينك وبينه شي ارسله قصتي وارفقها بأعتذار بسيط..........تمت
__________________
أحيا وإن ماتت عروق أملي أبقى ولن أنسى من أدمى قلبي __________________ |
||
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
|
|
|
الساعة الآن 09:45.
موقع حلوة - ابراج مكتوب - للرجال فقط - الثقافة الجنسية - الحياة الزوجية - اختبار القدرة الجنسية - للمقبلين على الزواج - الحمل و الولادة - اخبار الفنانين - كلمات الاغاني تجارة الكترونية - منتديات الامارات - اناشيد طيور الجنة - العاب - العاب بنات - صور اطفال - صوت الاسلام - الفراشة - عالم حواء - منتديات - طيران - سفر - كورة - ابراج – حظك اليوم - اخبار - كليبات - العاب فلاش - التنمية البشرية - بنت الحلال – زواج - اصحاب–تعارف - مدونات مكتوب – مدونات عربية - توبيكات - العاب بنات- العاب تلبيس-العاب ماكياج |
||||
العرض العادي
