صراحه عندي هم في داخلي من زمان أبي أقوله .... أقسم بالله ما قلته لأقرب الناس لي

السالفه أني متزوج و مرتاح و سعيد جدا مع زوجتي و المحبه قويه من جهة زوجتي لي

و كلش تمام الحين حرمتي حامل و هذا الحمل الثاني لها لكن من فتره دخل علي شيء

جديد أتعب نفسيتي كثير و أشوف أنه يضغط علي و ما يخليني أرتاح , أو الأصح

أني إذا فكرت في الموضوع هذا أتعب ....................... أتعب كثير والله العظيم .

قبل فتره أكتشفت أن فيه إنسانه تفكر فيني من زمان و ما عرفت بالشيء هذا

الا قبل فتره , البنت هاذي من نفس القبيله من جماعتي , انقطعت عن الدراسه , دخلت

في أمراض نفسيه , عايشه في حاله يرثى لها , من بعد زواجي طبعا من سنتين

أخواتي و للأسف حتى أخواني كانوا يعرفون الموضوع و ما قالوا لي أبدا عشان

لا يسببون لي فتنه , حتى بليلة زواجي ما شفت أهلها موجودين بالحفله و اتضح

أن الأهل متعمدين ما يرسلون كرت الدعوه لهم عشان البنت هاذي , يعني خربوا السالفه

مع البنت هاذي بشكل خلى ردة فعلها قويه اتجاه نفسها , من عاداتنا و تقاليدنا أن

البنت ما تقول اللي في نفسها عن شخص معين هي تحبه , البنت هاذي قامت في حلق

أخوانها و اهلها كلهم , رسايل كانت تجيني غريبه من أرقام غريبه و اتضح انها هي .

رسايل حب و كلمات غرام و الكلمات إذا قريتها ما أعطيها إنتباه رغم أنها تصيب القلب.

لأني وقتها ما كنت أعرف مصدر هالرسايل من وين !!!!!!! جاني أخوها بنفسه والله

العظيم يوم شفته رجال يتكلم عن أخته حسيت بشيء يقطع فيني لأن ما فيه موقف مثل

كذا يجبر الأخ أنه يتكلم عن مشاعر أخته الا أنه شايف شيء أنا مو شايفه , طيب أنا

متزوج و المصيبه قلبي انفتن بالبنت هاذي و زوجتي لو تدري بالموضوع هذا يمكن

تموت فعلا والله لأن زوجتي عاطفيه معاي جدا و فيها غيره قاتله , كلمت أخواتي عن

هالموضوع قالوا مالك دخل خلاص لا تسألنا عنها أنت متزوج , طحت في إحراج وقتها

لكن تكلموا في النهاية و قالوا أنها تحبك من زمان , المشكله البنت هاذي مشهور

جمالها و معروف أدبها و الله ما ادري وش أقول لكم أنا فعلا منحرج فعلا و لاني قادر

أعبر باللي في داخلي , و يمكن فيه شيء أقوله بكل جرأه , أن زوجتي هاذي رغم

أنها تحبني و الحب منها هي من البدايه مو مني و أنا حبيتها لكن بعض الأحيان أفكر

و أقارن في حجم المحبه من زوجتي و هاذي البنت و الله ما ادري وش أقول رغم أن

زوجتي تحبني حب قوي , طيب أنا وش ذنبي بالموضوع هذا , لدرجة البنت هاذي

عايشه في عذاب من سنه أو أكثر ......... وفيه أشياء كثيره ما أقدر أذكرها هنا من

البنت هاذي , فيه شيء اكتشفته أن بعض الأشياء اللي خذيتها مثل شيء ملموس سواء

هديه والا غيره على مدار هالسنين اتضح انه منها و أهلي ما قالوا هالشيء حتى يوم

خطبت و أنا اشوف أن هاذي قسوة قلوب والله , و بعض الأحيان أشوف أهلي و طيبتهم

و أقول أن خطيبتي حبوها و أعجبوا فيها و يبونها تكون لي وعشان كذا ما قالوا

شيء , أنا عمري 29 سنه الآن و لاني قادر أتخذ قرار أو أعرف حل و بعض الأحيان

أقول في نفسي الله يلعن الوقت اللي عرفت فيها هالموضوع ,,, والله ما بغيت أشكي

لأن الشكوى لغير الله مذله , ولا أقدر أقول هالموضوع لواحد من ربعي أو صديقي أو

واحد من أخواني صعبه جدا جدا صعبه , مفتون والله , حتى زوجتي لاحظت فيني النكد

و أشوف أسلوبها معاي و هي تتودد لي و قلبي يبكي و أحس بحرقه أن قلبي أنفتن

بوحده غيرها و هي قدامي , و أحس بحرقه أني عاهدت نفسي يوم تزوجتها أني ما

أفكر بوحده غيرها و الماضي أمسحه و أدعس عليه و أشوف أني خنتها بمجرد فكره

لأول مره في حياتي تشرق دموعي فعلا , ياما شافت عيوني من إغراءات , ياما سمعت

و ياما شفت حتى من بعض حريم الجيران و اللي هن متوفرات معاي بنفس المنطقه ما

فكرت أني أخونها لو مجرد تفكير و أناظر في البنت هاذي ما أدري وشلون دخلت

حياتي و ما أدري أخوها يتكلم عن أخته و هو غصب عنه لأن وقتها قال كلام كثير

, انا ما ادري وش أسوي , وش ذنبي وش السواة ...................... أبي حل يكون حل

جذري يخلص هالموضوع لأن تفكيري تعبان جدا , تعبان من جد أقسم بالله قرفت من

حياتي ,,,,,,,,,,,,,