عالم الحياة الزوجية - منتدى

أمـيـرة الـعـطـا · 18-07-2007, 23:24

.
.
.
.
.
.
.
.
السلام عليــــــكم ..
مشكلتي هي اختي اللي تكبرني بثلاث سنوات وعمرها 23 ..
بدايه :
كانت في طفولتها وبدايات مراهقتها على طول مشاكل مع الوالد كان يطلب منها اشياء مثل سويلي شاي او قطعي بصل وطماط بعد شوي بجي اسوي العشاء ولمن يرجع مايلاقيها سوت اللي طلبه .. فينقهر ويقعد يصارخ ويبصق بوجهها واحيان يوصل الموضوع حد الضرب العنيف (يرفعها بيده وينزلها عالارض - يقطع شعرها ...) وغالباً احنا نفكه منها !

..
تصرفاتها واللي مازالت الى هذه اللحظه هكذا :
- لايعتمد عليها بشيء ابدا حتى اصغر الامور (يعني مثلاً نخاف نخليها بالبيت لوحدهاالخوف عليها مو منها) ..
- ماعندها ثقه بنفسها .. تخاف مواجهة المجتمع والناس حتى احنا تخاف من مواجهة اي فرد منا ..
- ماعندها طموح او حلم تسعى لتحقيقه .. (ابداً) عايشه بلا هدف دنيوي كان او ديني ..
- عندها (السرقه) تاخذ اغراضنا البسيطه(الشامبو - القلم - الهديه - الشاحن ..) يعني اشياء بسيطه تاخذها منا من ورانا (هالشي بحد ذاته يضايق) ف شلووون بكثرة تكرارهـ

.. مارح اردها لو تطلب مني لكنها ماتطلب تاخذ ومن وراي .. والشي يخليني اتضايق من هالتصرف انها ماترجِع اللي اخذت + ماتحافظ عليه ..
- صلاتها ماتهتم لها احيان تجمع كم صلاه بوقت واحد ومافي فرق عندها بين الواجب , الركن , السنه
- اللي مضايقني انا وحدي معها انها تقلدني بأي شي اسويه صح كان او خطأ يعني مثلاً قمت سويتلي كوب عصير تقوم بعد شويه تسويلها , اشتريت حاجه جديده كل ماشافتها قالت انا كنت ناويه اشتريها وبأقرب فرصه تشتري زيها او شي مشابه واذا ماسمحت لها الظروف تحصل عليها تاخذها مني في غيابي ! بس تقلد بالاشياء الصغيره اما الاشياء اللي تستاهل زي الدراسه للأسف لأ..
اشياء اضافيه :
- ماعندها صديقات للأسف .. اذكر مره رحنا لناس قرايبنا ونمنا عندهم يومين تقريباً كان عندهم بنت تصير صديقتي هذيك البنت اخذت اختي على جمب وقعدت تسولف وياها اختي بعد ذاك اليوم تعلقت فيها وعشقتها (مو قاعده ابالغ) خلاص صارت حبيبتها "كما قرأت في احد اوراقها" !

- ماعندها اهتمام بشكلها الخارجي .. لبسها غير منسق وغير نظيف ولا يزين شكلها (تلبس اي كلام)شعرها تقصه بنفسها وطالع شكله مقصص ومقطع وحاله ,, اشوف فيه ناس كثير لمن نكون برى البيت يطالعونها بعين الشفقه والرحمه على شكلها ! هالشي يطعن قلبي طعن من جوى

..
- دراستها تمشي على حبه ونص ماتنجح الا بالدف لو تسألها سؤال عادي ماتقدر تجاوبك كأن ماعمرها قرأت حرف ..
- امي يومياً هي وياها شيل وحط كل يوم هوشات وصراخ ,, امي تعاملها انها بنت طبيعيه عادي تقول قومي سوي كذا وكذا اختي تفهمها بشكل ثاني تقول لا انا مو شغاله وليش تصارخين علي وانتي غير عن الامهات وماتعرفين تعيشين بتجننيني وبتدخليني مستشفى المجانين عشان ترتاحين ومن هالكلام اللي يصدع الراس امي ماتعرفلها ولاتدري وش الطريقه الصواب معها لجل كذا ما ألومها ..
وامي صار لها كم شهر ماذاقت النوم يعني اوكي تنام بس مقطع تنام وهي قاعده ساعتين اربع وتقوم مايجيها النوم الا بالحسره من كذا صايره عصبيه وايد وعلى طول تشب انا مقدره حالتها واسوي كل اللي تقوله علي تقريبا واتجنب اني ارفع صوتي عليها لاني عارفه وضعها ..
رأيي وكلمتي :
انا خايفه عليها كثير من الذئاب البشريه بكلمتين حنان اخاف تخسر كل شي

خصوصاً انها محتاجه هالشي من زمان (حب , عطف , حنان , اهتمام خاص) .. للأسف احنا نستغلها بكلمتين وناخذ اللي نبي منها شلووون بالشاب ..
كثير نصحوني اصادقها واكون لها سند ورفيق بس عجزت مع نفسي التعبانه الحين حالياً مااالي خلق اشوفها والله لاشفتها ركبني 60 عفريت

مو كارهتها بس مالي خلق فعايلها على طول من اشوف زولها اتذكر اللي تسويه وياي واتذكر اني عاجزه عن تعديل وضعها

انا مو من النوع اللي يشيل بقلبه لا ابد بالعكس وحده صريحه ومأحب اشيل على احد الا قايلتله تراك مزعلني والله ياناس مو كارهتها او حاقده عليها او شي لاااااااااا بس ماودي تكون بهالشكل وهالعقليه ..
قلنا لابوي كثير وكلمناه يوديها لطبيب نفسي قلنا دواها مو عندنا حنا مانعرفلها بمعاملتنا الخاطئه لها قاعدين نزيدها وحنا ماندري بس مو عارفين شنسوي ,,
ابوي اخذ الوضع عادي ومايستاهل كل هالاهتمام وانه سهل وبسيط وبكرى تتعدل

..
شلون هاذي تتزوج وتتحمل مسؤلية بيت وزوج ,, الا شلون بتربي عيالها

..
اخر مره كلمت ابوي عن روحتها لطبيب نفسي من كم اسبوع مضوا كنت انا وياه بس بالسياره قلتله كل اللي بقلبي وخنقتني العبره وقتها بس حاولت اتماسك لأن ابوي مايحب البنت تبكي قدامه(يفكرها تتدلع!) المهم ابوي استغلرب من كلامي وقال انتي مكبره الموضوع قلت لااا هذي الحقيقه اجل وش تسمي ان للحين ماجاها ولا واحد يخطب الناس يبه لهم عيون ويشوفون ويعرفون بعد ومن هالكلام احس ابوي شوي اقتنع وقال اوكي بس الناس رح تقول انها مجنونه عشان وديناها الطب النفسي ومن كذا مراح يجي احد يخطب قلت يبه انت سو اللي عليك واللي بيدك وماعليك من الناس على الأقل هي بتسامحك لأنك ساعدتها مارح تاخذها حجه عليك لا جارت عليها ايامهااا

.. واخر كلمته قلتله اياها (انا مابيدي شي سوى هالكلمتين ووصلتهم لك اللهم بلغت اللهم فاشهد ) .. واحس كثير ارتحت عن اول زي اللي حطيت كل الحمل على ابوي لن مابيدي شي والله ..
انا ادري البيوت كلها مشاكل مو بس انا عندي مشكله بس انا ودي ارتاح مابي اكون في يوم من الايام سبب من عدة اسباب وراء ضياع اختي (لاسمح الله ماودي اتفاول عليها بس هو احتمال) ..
تعبت
واقول
اليوم
المـ
وفي
الغد
امل؟
!

طفشاانه · 18-07-2007, 23:37

والله يااختي حزنتني قصه اختك بالمرررره الله يهديها لكم

ومن ناحيه انك تكرههيها مافي ابدا اخت تكره اختها خصوصا اللي عايشه معها
ومن ناحيه اختك اكيد عندها مشكله واضح من تصرفاتها
واذا موانتوا اللي وقفتوا معاها منو بيوقف؟؟؟

انت ثابري عالزن لابوك عشان تروح لدكتور نفساني <<<وعلى فكره مو عيب زياره الدكاتره النفسانيين0000كثير ناس تروح له وهيا بكامل قواها العقليه

ومن ناحيه معاملتها انت قلتي انها محتاجه حب وحنان وعطف واي فرد من البيت فقد هالحب والحنان طبيعي بتدور عليه لاتجبريها تسلك هالدرب عشان ماتروح من ايدينكم

وفالاخر انا اسفه عالاطاله
لكن حاولي تغيري من تعامك معها انت عالاقل ابدأي عامليها بكل حب كأنها طفله كأنك انت الكبيره وهي الصغيره

والله يحفظها لكم اتمنى اكون ساعدتك
تحياااااااتي

ღღعاشقة البحرღღ · 18-07-2007, 23:38

ما دام انتم عارفين شو وجعها وعارفين انه ناقصها الحب والحنان لعاد ليش ما تحاولون تصلحون معاملتكم معها؟؟؟؟؟
بس انا اقول انه فات الاوان على تصليح المعاملة معها....كان لازم تصلحون من زمااااااااااااااااااااااااااان من وهي صغيرة مو دلحين......علشان هيك كل الذنب ذنبكم لانكم ما حليتم المشكلة من اول ما بلشت....
على كل حال اختي انا ما الومكم....بس اقول عاد حاولوا اتقربوا منها اكثر ولحقوا اللي تقدرون تلحقونه ....

(السفيرة) · 18-07-2007, 23:38

لي عودة لكن البنت تبدو لي مضطربة وللاهل دور في ذلك حسب ما ذكرتيه

_خلود_ · 19-07-2007, 00:48

الله يعينها يا رب

عزيزتي لا تصيرين زود هم على اختك مو كفاية اللي هي فيه!!

ارحمي حالها وساعديها

من غير ما تروح لطبيب نفساني انتم خلكم طبيبها ودواها

انتم عالجوها زي ما حطمتوها

شكل معامله ابوك كانت مو كويسه معاها من صغرها عشان كذا خذت موقف وانمحت شخصيتها

واكيد احد رامي عليها كم كلمة هزت أنوثتها وثقتها بنفسها ولا ليه بنت بعمرها ما تهتم بنفسها ولا بشكلها وتتصرف تصرف مراهقات على سالفه حبيبتها!!

صدقيني يا اختي انتم عالجوها اذا ما قدرتوا تودونها طبيب نفسي

أساساً انتم ما سألتوها اذا هي موافقه تروح ولا لأ!!؟

كل واحد فيكم ياخذ قرارها بنفسه

مهمااا كااااان لازم رضاها في كل الأمر

والله يهديكم ويحنن قلبك على اختك المسكينه

أمـيـرة الـعـطـا · 19-07-2007, 01:07

اشكر لكن مروركن اخواتي العزيزات ..

نقاطكن سليمه لكن ..
اعتقد راح وقت التعديل من عندناااا ..

من ناحيتي ترى صايره بلييييييييييييييييييييييييده ما اهتم لأي شي يخص اهلي دافنه روحي بدراستي والحمدلله اطلع من الاوائل بالكليه .. واشغل وقتي بالقرااااااااااااااااااااااااااااااااااءة ..

ابوي هو السبب الرئيس وراء تلك الحاله الحاصله لهااا انا وياها تعرضنا لنفس الظروف انا ساعدت نفسي بروحي لوحدي لا ابوي ولا امي ولا اي احد بالدنيا مسك ايدي ودلاني الطريق الصواب ,,

انا نهضت روحي وقومتها وغذيتها بالقراءة وتطبيق ما اقرأه من فوائد بالرغم من قلة المصادر اللي اقرأ منها الا اني انا (اعوذ بالله من هالكلمه) ساعدت نفسي ..

لي كم سنه اعدل بنفسي لين صرت انا الحين ومازلت اعدل فيها لكن اختي وين وين اعدلها شلون اقعد اقرأ عليها كتاب وافهمها كلمه كلمه مالي خلق ..
لو عطيتها كتاب تقرأ فيه لوحدها مراح تفهم بتقول شلون؟؟ وليش ؟؟ يعني بيصير فوق مستواها العقلي ..

وربي مو قاعده اتمسخر بس هذا الصدق انا ابقعد اربيها؟ واعلمها ؟ وهي اكبر مني؟
مو عيب اوكي اختي بس ........ مدري شقول شلون خلاص السنين مضت وحنا مكتفين الحين نجي نعدل بأنفسنا لا مانقدر انا نفسي ما اقدر مابي اتنصل من الموضوع واقول مالي دخل ابوي وامي عليهم تحمل كل شي صار لكن انا مابيدي الا اقناع ابوي يوديها للطبيب النفسي بس ..
تعديل راح وقت التعديل .. يالله ويالله اشتغل على نفسي .. مو انانيه ياناس بس مادري شلون اوضحلكم انا ليش رافضه تعديلها من جهتي ..

اعتقد كلنا كل البيت مفروض يروحون للطبيب النفسي عشان يفهمنا ويعلمنا وش نسوي ..
الله يحفظنا واياكم ..

المجهـــول · 19-07-2007, 02:50

>>>>>>>>>>> دمع

أمـيـرة الـعـطـا · 19-07-2007, 02:56

المجهول حراااااااااااااااااااااااااام عليك ..

مب ناقصه ..

em tala · 19-07-2007, 04:08

الله يهديها لكم

همسة_حنان · 19-07-2007, 09:10

الله يهديها يارب

لازم تروح ل دكتورة لازم هدي اختكم كلمي امك بعد لا تخلوها

عسل وقمر · 19-07-2007, 15:24

ودوها دكتور نفساني ودعولها بالهدايه وحتضنوها بحنانكم

دمعه وفى · 19-07-2007, 16:41

لازم ياقلبي تودونها طبيب نفسي
اخاف تزيد حالتها
الله يشفيها ويعينكم يارب العالمين

ريمـــآ · 19-07-2007, 19:51

صراحه بكييييييييييييييييييت وهي مو اختي كيف لو كانت اختي
اميره العطا اكيد مراح تكرهين اختك لكن اقري بالنت واعرضي مشكلتها على دكاتره من النت اذا ابوك مايساعد في منتدى اسمه الحصن النفسي عن المشاكل النفسيه حاولي تساعدينها
وابوك هو السبب وامك ايضا .. انتي كلميهم وقولي لاابوك اصلا بدون تفكير لازم تساعدها هي بنتك وانت اللي مرضتها وكلنا مراح نسامحك على هالشي
احيانا الكلام القاسي يصحي الواحد
وادعيلها بالليل والله هي محتاجتكم
اذا ابوك ماوافق على انه يوديها لمستشفى نفسي انتي كلمي دكتور وتواصلي معه بالجوال عن كيفيه علاج اختك
واقعدي مع اختك وسولفي معها خليها تفضفض وانتي عطيها الحب اذا امك وابوك مااعطوها
ضميها وقوليلها انك تحبينها والله هالشي يخفف عنها
.
.

اتمنى تلقين حل وتتشافى اختك

أمـيـرة الـعـطـا · 20-07-2007, 01:54

الله يجزيكم خير .. ويجعله في موازين حسناتكم آآمين ..

انا كنت ابغى اخفف شوي عن نفسي .. واشوف آرائكم ..

امــــــــا حل المشكله ... !

انا شخصياً يئست ..

ريمـــآ · 20-07-2007, 11:01

لاتيأسيـن اذا امك وابوك مو معك ربي معك دايما ادعي واستغفري
انتو خوات ولو انكم تفضفضون لبعض على كل صغيره وكبيره هذا يخفف
اقعدي معها سولفي تكلمي قولي انك مثلها متضايقه من ابوك
بس انك تصبرين وتحاولين تساعدين نفسك
وقولي يمكن ربي يعوضها بزوج يغنيها عن كل الدنيا
بس لازم تساعد نفسها اول وماتستسلم ادري انه شي يالم ويقهر
وهي شكلها اختارت انها ماتحس بشي وماتعتبر نفسها عشان كذا تقلدك
اذا قلدك قوليلها ليش تقلديني انتي لك شخصيه غير وانا غير وشخصيتك حلوه
حاولي تمدحينها كثييييييير
ادري انك انتي محتاجه بعد احد يساعدك ويطيب خاطرك لكن مدام ربي ساعدك
وماصرتي زيها دايما انتي صيري لها الاب والام وكل شي
حتى انتي راح يعوضك ربي اذا ساعديها
لاتقولين مشكلت امي وابوي .. هي مشكلتهم لكن مو المفروض انتو تدفعون الثمن
لازم تساعدين اختك بكل ماتقدرين
ومو لازم تقرين لها كتب انتي تكلمي معها عادي
وعطيها من حنانك وحبك حتى تتشافى ولو قليل
.
.
اعتذر عن الاطاله لكن كثير رايت نفس المشكله
الاقي كثير من البنات يتعرضون للاساءه الجسديه والمعنويه من الاب
ويصابون بمرض نفسي و .. و.. و... الخ
وحقيقه هالشي يؤلمني ومايغير القدر الا الدعا
مالك الا الدعا ومساعده نفسك ومساعدت اختك
اما ابوك .. صدقيني سيندم عاجلا ام اجلا
لن انساك من الدعا اختي ...
ومراح انساك من دعواتي

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

مشكـــــــــــــلتي ,, هي ,, اختي !!