عالم الحياة الزوجية - منتدى

اوركيد · 02-08-2007, 02:19

كيف الجميع
هو صحيح ماجبت شي غريب
بس على ضمانتي جربو اكلاتي
وحياكم الله بمطبخنا
باشراف الشيف
احلى سنفورة

اوركيد · 02-08-2007, 02:25

الطبق الأول

سلطة الصويا

الكمية تكفي اثنين

حبة طماطم (شيلي لبها عشان ماتكثر موية السلطة اللب اللي هوه الحبوب اللي في النص مو كل الحشوة الداخلية )
حبتين خيار(ضروري مع ان قيمته الغذائية صفر ومافيه اي سعرات )
ربع حبة بصل ابيض (لازم ابيض او اخضر او بلاش .... اصحك تحطي بصل الطبخ )
ربع علبة ذرة جاهزة
عود كرفس

خس امريكي
صويا نابتة(معروفة عندنا باسم (دجر ) تلقيها في السوبر ماركات الكبيرة وهي حبوب بيضاء نابتة البكت ب 3 ريال قيمتها الغذائية جدا عالية استخدمي ربع البكت وفرزني الباقي )طعمها حلو ومهمه في هذي السلطة ولو استغنيتي عنها ضيعتي الوصفة والعيال يحبوها عشان شكلها حلو ..........يعني بالمختصر اشتريها وعلى ضمانتي
بكت شيبس دولتريوس (رقائق ذرة متبلة بالجبنة) افتحي البكت من جنب فتحة بسيطة لخروج الهواء بعدين اضغطي البكت بين يدينك عشان تتكسر حسب رغبتك بس مو مرة تتفتفت

الصوص
في الخلاط:
عصير ليمونتين
4 اوراق نعناع
ملعقتين صغيرة من بكت تتبيلة كنور للسلطة بالخل والثوم(مافيها ريحة ثوم)
زيت زيتون
عشان تختلط اضيفي شوية موية باردة
مقادير الصوص حقت مرتين بسبب الموية انتي خذي نص المقدار والباقي صبيه في فنجال شاهي وغطيه بنايلون وفرزنيه للمرة الجاية (في حال عجبتك السلطة ولو ماعجبتك كبيها ولا تدعين عليه)

قطعي الخضار وسط بحيث ملعقة الأكل تشيل بس قطعتين(الطماطم - الخيار- الكرفس) واضيفي لها الذرة والصويا ونحط عليها الصوص
البصل يتقطع صغار ويضاف للخضار السابقة
قطعي الخس مربعات كبيرة

تترتب في الصحن بالشكل التالي اوراق الخس تحت (مو زينة تتاكل عادي لأن حجمها مو مرة كبير )
فوقها خلطة الخضار المتبلة
اخر شي رقايق الذرة

مافيها ملح لأن تتبيلة كنور شبه مملحة بس احتياطا طلعي الملاحة جنب الطبق (منعا للفلسفة )

اوركيد · 02-08-2007, 02:30

الطبق الثاني
شوربة اللحم

يحبها الرجال
اي يوم تطبخي لحم ارفعي شوي من مرقة اللحم (اللي مالها لون ولا نكهة بس لحم في موية مغلية ) حطيها بعلبة ولمن تبرد غطيها وفرزنيها او بالتلاجة تحت لثاني يوم
تعالي نشوف اش حنسوي فيها
نص بصلة
زيت
فص ثوم
ملعقة دقيق
ملح صيني
ملح عادي
فلفل اسود مجروش( انخليه بالصفاية عشان تتخلصي من بودرته السودا عشان مايغير لون الشوربة)
بقدونس مفروم بالسكين
نص ليمونة
طبعا والمرقة حقت اللحم ( مقدار كوبين)

مقادير العيش بالثوم
انا من عادتي ادخل امطاعم عشان اتفرج على الأكل وطريقة طبخه وتقديمه اهم من اني اكل ومنها شرايح عيش بيتزا هت شوفو طريقتي المعدلة
حبة عيش صامولي مقطعه شرايح بسمك اقل من 1 سم او حبتين تست مقطعه مثلثات
علبة جبنة كرافت صغيرة مبشورة
ملعقة زبدة
فص ثوم مقسوم نصين

صفي شرايح العيش في صينية ودخليها الفرن وخليها على نار هادية تتحمس الين تنشف
في صاج البيض حطي ملعقة الزبدة والثومة وشوحيها لثواني وانتبهي للزبدة لأنها لما تسير سمن ماراح تتحمل وقت طويل قبل تحترق (وتصير مؤكسدة وتضر صحيا يعني هيه مو زي الزيوت) ثواني وشيلي فص الثوم وحطي الجبنة المبشورة عليها وحركي الصاج الين تذوب كل الجبنة مع خلطها بالسمن بواسطة ملعقة وبسرعة افتحي الفرن وحطي مقدار ملعقة من هذي الخلطة على حبات العيش المحمسة وافرديها بسرعة ودخليها لثواني الفرن وتتقدم ساخنة جنب الشربة .

نقطع البصلة صغار ونحمرها في شوية زيت نص استواء نضيف الثوم وفوقها ملعقة الدقيق ونحركهم بسرعة عشان مايتكلكع الدقيق (احسن شي بمضرب البيض المقاس الصغير)
اضيفي مرقة اللحم ووالملح الصيني وذرة ملح عادي اقل من المطلوب(بعدين عدلي الملح) وقليل فلفل اسود غطي القدر وخليه خمس دقايق على نار هادية
اخلطي في زبدية صغيرة البقدونس المفروم مع عصير الليمونة وذرة ملح
طريقة التقديم:
اغرفي الشوربة في زبدية واضيفي في النص ملعقة صغيرة من خلطة البقدونس وحركيها تحريك بسيط على الوجه بحيث تفضل فوق
قدميها مع العيش الحب لوحدها
او مع الطبق الرئيسي
او مع العيش بالثوم

مقادير العيش بالثوم
انا من عادتي ادخل المطاعم عشان اتفرج على الأكل وطريقة طبخه وتقديمه اهم من اني اكل ومنها شرايح عيش بيتزاهت شوفو طريقتي المعدلة
حبة عيش صامولي مقطعه شرايح بسمك اقل من 1 سم او حبتين تست مقطعه مثلثات
علبة جبنة كرافت صغيرة مبشورة
ملعقة زبدة
فص ثوم مقسوم نصين

صفي شرايح العيش في صينية ودخليها الفرن وخليها على نار هادية تتحمس الين تنشف
في صاج البيض حطي ملعقة الزبدة والثومة وشوحيها لثواني وانتبهي للزبدة لأنها لما تسير سمن ماراح تتحمل وقت طويل قبل تحترق (وتصير مؤكسدة وتضر صحيا يعني هيه مو زي الزيوت) ثواني وشيلي فص الثوم وحطي الجبنة المبشورة عليها وحركي الصاج الين تذوب كل الجبنة مع خلطها بالسمن بواسطة ملعقة وبسرعة افتحي الفرن وحطي مقدار ملعقة من هذي الخلطة على حبات العيش المحمسة وافرديها بسرعة ودخليها لثواني الفرن وتتقدم ساخنة جنب الشربة .

اوركيد · 02-08-2007, 02:34

الثالث
عصير اصفهاني

ليه اصفاهاني
مدري بس كل ماخترعت شي لازم اسميه عشان مااتلخبط ولي ذكريات حلوة معاه
المهم لكم بالطعم

كمية واحد لتر عصير
المقادير
نص علبة اناناس بعصيرها
نعناع اوراق بس
تفاحة مقطعة بدون تقشير
ليمون كبيرة
ملعقتين تانج منقه
اعصري الليمونة يدويا (لأنها تمرر في الخلاط) وصبيها في الخلاط بدون بذورها مع الناناس ومويته والتفاحة والنعناع وملعقتين تانج منقه وكاستين موية
اخلطي لدقيقتين عشان الأناناس مايبقى منه قطع وكمان قشر التفاح تقدري تاخذي فايدته اللي هيه في قشرته
بعدها صفي العصير عبيه في الجك وزيدي الموية وعدلي السكر

تعالو نشوف التقديم
قوالب التلج في الصيف حطي حبات عنب مع الموية قبل التجميد وجمدي واستخدميها لعصيرات الفواكه
بعد ماتصبي العصير في الكاسة صبي شوية عصير فيمتو مركز(حق رمضان) صبي في ملعقة الأكل ومباشرة صبيه في وسط الكاسة بشويش تلقيه يرسب في اسفل الكاسة ويحمر لك العصير من تحت ومن فوق اخضر وحبة ثلج بالليمون وبارد على قلبك

اوركيد · 02-08-2007, 02:36

الطبق الرابع

معجنات ست الحبايب (لأن امي تحبها الله يخليها لنا)

عيش مدور زي حق الهمبرجر بس صغار
صدر دجاجة مربعات صغيرة
ربع بكت خضار مشكل او جزر وكرنب مبشور
بهارات حسب رغبتك
بصل اخضر
نص مكعب ماجي
صويا صوص حسب الرغبة
مايونيز او جبنة كاسات
جبنة موزارلا او شرايح جبنة (اوريكم كيف تستخدموها تراها الذ من الموزارلا )

في صينية بايركس صغيرة اقطعي كل حبة عيش لنصين وياما تفرغين حشوتها او تجنبيها بالضغط المهم تكون الحبات مفرغة من جوه
في الصاج نحمس البصل الأخضر وحبة ثوم (ماندقها نقطعها نصين عشان نشوحها شوي بعدين نشيلها من الخلطة)بعدها نحط مكعبا ت الدجاج ونقلبها ونحط صويا صوص (لو ماتحبي المزة الحالية بلاش منها)ونغطي ونتركها على نار هادية تستوي لخمس دقايق بعدين نحط الخضار (سواء البكت او الخضار المبشورة)ونبهر ولازم نص مكعب ماجي
نجيب كل حبة عيش وندهنها بالمايونيز او الجبنة ونحشيها من الخلطة ونصفها في الصينية بحيث تكون فتحة الفطيرة لفوق كملي الكمية ولاتكثري (شعبنا يبغون يدخلون على المين ديش سريع) جيبي شريحة الجبنة وهيه مربعة وجيبي سكين الملوخية ابو سكينة واحدة وقعطي الجبنة اربع مربعات وكل مربع مثلثين سار عندك ثمنية مثلثات حطي على كل فطيرة مثلث او اثنين من الجبنة ....... وخلاص
قبل تقديمها دخليها الفرن تسخن شوي وتذوب الجبنة وبالعافية

سلطان2005 · 02-08-2007, 11:55

ما شاء الله عجيب

الله يعطيكم العافيه

عذبة الخاطر · 03-08-2007, 00:21

يم يم،،روعــــــــــــــــــــــــه

انا عشقي ورق العنب،،

يعطيكم العافيه

موفقين

عسل دافي · 03-08-2007, 03:36

روعه جوعتيني يميميم

الاوركيده · 03-08-2007, 16:46

حماس قووووووي

عصاقيل نمله · 03-08-2007, 23:06

دعوووووووووووواتي لكم بالتوفيق
يعطيكم العافيه

يم يم بصراحه ورق العنب شكله مشهي

تسلمووووون

دروبـ · 04-08-2007, 22:55

مشكورين حبايبي ع التشجيع الحلوووووووو
وانتظروونا بالاكلات الدسمممممممممه

دفى همسه · 08-08-2007, 00:15

فاقدتك لك مده ماتطلين

قلت ادورك بالمطبخ هههههههههه

يالله ان شالله تكونين بخير ياقلبي

تحياتي

ضحكة الدنيا ^_* · 08-08-2007, 05:41

يا مــــرحبا ..

كيــــف مطبخكم اليوم ...

ان شااء الله كل شي تمام ..

الاكل جاااهز للمساابقه ...

اتمنى التوفيق للكل ..

بنوتة الحنان · 08-08-2007, 09:32

روعه حبيبتي..
الابداع رايته هناا..
ربي يوفقكم حبيباتي ويسعدكم ياارب
واكلات هنيه لكم حبيباتي
بانتظرالاكلات الدسمه
سلمتم يامبدعات ورائعات والله

@هناء@ · 08-08-2007, 14:36

وااااااااااااااااااااااااو

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

ياناااااااااس ياعااااااالم لحقوووووا مطعم الحق ماتلحق