عالم الحياة الزوجية - منتدى

كلي حركــات! · 05-08-2007, 20:46

السلام عليكم .. ابغي ادش بالموضوع بسرعه..

انا بنت عمري 15 سنه ومن الامارات حبيت اكتبلكم مشكلتي وانشالله انشالله الاقي الحل منكم بأقرب وقت

مشكلتي اني تعرفت على واحد بالجات..وتعرفون كيف تعرفت عليه؟ كنا نتبادل صور يعنى صور عاديه حق

المسنجر وعقب قالي كلمه بس ماقدر اقلكم وش هي الكلمه لانها ماصخه شوي وقلتله انه هالكلمه منقود عند

العرب .. وسكت .. وسالته :انت من اي جبيله؟..وقالي اسم جبيلته..وقلتله اني من نفس الجبيله..((طبعا اسم

جبيلتنا مب مشهوره وايد وااايد)) المهم هو سكت ماعرف وش يقول..وقلتله: انزين يمكن تطلع واحد من الاهل؟

وهو قالي: تعرفين فلان ولد فلان؟ قلتله : اكيد وهو يقربلنا وهو يدي.. عقب سكت..وانا سكت..

وقالي: اوكي عيل انا بطلع مافيني اتوهق..قلتله :لاتخاف مابخبر لاحد.. وتمينا انسولف بس كان واحد حبوب

وطيب.. ومر يوم ويومين وشهور على نفس الحال.. حتى انه كان يرمسني كأني اخته وفي يوم قالي مابيج تتعلقين فيني..قتله:ادري انا ارمسك سوالف لاغير.. ولا مره ماغلط بحقي او

احرجني بكلمه..بالعكس كان حبوب ..وحتى انه كان يقولي:والله اني اول مره اسولف ويا بنت مثل ماأسولف

وياج ((قصده انه كان وايد يخرط عالبنات بس علي انا لا وانا فاهمه قصده)) وقلتله:تدري ليش لاني من اهلك

وسكت.. ومر يوم ويومين وطلب مني احط صورتي.. انا من البدايه رفضت وسالني : ليش؟

قلتله: انا ماحط صوري عالمسنجر واصلا ماعندي صور عالكمبيوتر.. قال: لا انا مابسوي شي بصورج

انا مابصرقهم بس ابي اجوف صورج لاني حطيتلج صوري ..((وهو دوم يحطلي صوره ويفتح الكام ويصور

عمره)).. قتله : اوكي .. وكان كل يوم يدش المسنجر ويسالني عن الصور بس انا دوم اطلعله حجه..

بس مادري شو الي خلاني احط صورتي .. مب بس صورتي.. صوري وايده تقريبا 10.. بدون الشيله بعد..

وهو وايد انعيب بشكلي.. ويوم من الايام قال : انا بعد سنه بتزوج.. قلتله:الله يوفقك..قالي:ابي اتقدملج عادي؟

قلتله:اذا انت تبي تتقدملي بكيفك..قالي:بس اخاف ترفضين..قلتله:ماعرف..قالي:وابوج؟..قلتله:هو للحين مايعرفك

اذا بيعرفك عدل عقب بيقلك اذا كان موافق او لا .. قالي :انشالله يوافق .. وامج؟..قلتله:امي رايها مثل راي ابوي

عقب سكت..وقال:ترى الزواج قسمه ونصيب..قتله : انت تتمصخر ولا من صجك؟ قال : لاوالله من صجي وانا

وايد ارتاح لج .. بس بتوظف وعقب بخطبج..عاد انا سكت مارمت اقوله شي بس قتله :الله يوفقك..

ومر يومين سالته نفس السؤال :انت متأكد من الكلام الي قتله لي اياه قبل يومين؟ قالي:اكيد200 من 100

انا بهذاك الوقت صدقته..وكان يطلب مني الرقم.. وبهذاك الوقت ماكان عندي موبايل .. كنت اقوله:ماعندي..

يوم حصلت على مبايل..بعد اسبوع خبرته بان عندي موبايل.. وصار يتصل فيني بس مايطرشلي مسجات غزل وماعرف شو

يعنى كان يتصلي مره بالاسبوع.. واكثر شي ارمسه المسنجر.. وفي يوم قالي : اني حلمت فيج..بس الحلم خايس

بس حلووو..انا استغربت..حتى سبحان الله انا حلمت فيه بنفس اليوم ..قتله: عيل انا بعد اليوم حلمت فيك..

وقالي: صدق؟ قلتله : والله بس بعد شوي ماصخ ماقدر اقولك.. عقب قالي انا بطلع عقب نص ساعه بدش

وبقولج شو حلمت فيج.. قلتله اوكي اترياك..بعد نص ساعه دش المسنجر وقالي عن الحلم.. وانا استغربت واايد

((يعنى الحلم عني وعنه بس ماصخ)) وسكت.. وهو تم يقولي : بس حلوو الحلم ياسلااام.. ابيه يتكرر..

وانا سكت ماعرفت شقله..عقب قالي شو حلمتي فيني.؟ قلتله عن الحلم بس نصه وغيرت شوي يعنى جذبت عليه..

بس لو تدرون تقريبا الحلم مالي نفس حلمه.. بعد جم اسبوع قالي : انا مابدش المسنجر لاني اهتديت..

قلتله : اوكيك شي جميل انك تهتدي ..((وصار اسبوعين مادش المسنجر)).. بس والله احس اني ماقدر احس

عمري مب طبيعيه .. حتى اني قبل ارقد افكر فيه !! واصيح !! ..ماعرف شو صارلي.. اول مره يصيرلي جيه

بعد اسبوعين اتصل فيني.. وتم يسولف وياي وقالي : انا اختربت مره ثانيه وبدش المسنجر من اليوم.. وتم يضحك

عقب تم يدش المسنجر بس مب وايد نفس قبل..وبعد كم اسبوع اتصل فيني وانا كنت طالعه ويا امي..

رديت عليه ((امي كانت بمكان ثاني)) من جيه رديت عليه قال:السلام عليكم..رديت السلام..اشحالج؟قلت بخير

قال: اقلج تعرفين صاحب هالرقم؟ قلت : انا ماعرفه مول.. وقالي:لاتجذبين علي قوليلي الصراحه.. ورفع صوته

علي.. قلتله : والله اني ماعرفه ..وقال: لاتحلفين بالله..قلتله:زين شقول عسب اتصدق؟ عقب سكت..قتله منوها؟

قالي: ربيعي وهوبروحه يعرف رقمج وخبرني عنج..وانا مستغربه..قتله : هو يقص عليك اوكي اناماعرفه..

قال:اوكي بخليج احد دخل الغرفه باي.. وصكيت.. وتميت اطرشله مسجات بأني انا ماعرفه وجي..

بس هو مايرد على مسجاتي.. وطرشتله اخر مسج وكتبت(( انا اعرف ان الولد اكيد مايثق ببنيه يرمسها))

وهم مارد علي وصارلي شهر كامل مارمسته ولااتصلت فيه ولاطرشتله مسج وهو بعد نفس الشي.. بس خلال

هالشهر والله اني صرت مثل المينونه كل ماادش غرفتي اصيح اصييح واايد .. حتى وانا يالسه بالصاله ويا اخواتي اصيح..

وانا بروحي مستغربه من عمري واقول انا اصيح عشان واحد؟ اول مره يصيرلي جيه .. بعد شهر اتصل فيني

رديت عليه..سلم وسأل عن اخباري.. وعقب قالي:وينج من زمان مانجوفج؟ قلتله تتذكر اخر يوم يوم رمستك؟

قالي : اممممم هيه.. قلتله: شو للحين امصدق اني ارمس اربيعك؟ قالي : مادري قتله :من خبرك قلي الصراحه..

قال: وحده..وقتله شسمها.؟ قالي: لا واحد .. قلت : زين منو هو؟ قالي: لالا امزح وياج كنت امسولج مقلب..

المهم نسيت السالفه وسولفت وياه وردينا نفس قبل .. بس ابوي قطع النت خلال شهرين تقريبا..وانا ماكان عندي حل الا اطرشله مسجات عشان يرد علي..

وكنت كل يوم اطرشله مسجات.. وكل يومين..عسب ماكون ثجيله عليه..وهو بس مره طرشلي مسجين ورا بعض..

ومره طرشتله مسج وكتبت((لو انت ماتحب وحده اتطرشلك مسجات عادي خبرني)) اتصل فيني بنفس الوقت..

وقال: لا عاادي .. بس انا اكثر شي اكون مشغول وبعدين انا توظفت فمت اشتغل.. واكثر شي اكون ويا الربع..

وقمنا انسولف..وندق سوالف.. بس هو مايدش المسنجر وايد نفس قبل يعنى مرتين بالشهر وبشهرين.. واخر

مره رمسته البارحه..ظفته بأيميل ثاني((ايميل بنت)) وسويت عمري بنت يعنى متعرفه عليه بالجات.. المهم هو

سالني عن اسمي قلتله اسمي (***) قالي عاشت الاسامي..وسالت انت من وين كم عمرك ..بس ماقالي الصدق..

يعنى كان يجذب.. عقب قالي من وين يايبه الايميل قتله من الجات..قالي : المهم اخبارج؟ قتله اوكي اوكي..

عقب سالني نفس السؤال من وين يايبه ايميلي؟.. قتله من الجات وانا اعرفك من زمان..قالي اوكي انتي امنو؟

قتله انا صاحبه الرقم ..... كتبته رقمي.. عقب استغرب وقالي هاي انتي؟ وتم يضحك وغير السالفه على طول

وتم يسولف .. وسالته سؤال انت تعرف فلان ولد فلان ؟قال : هيه..قلت :زين شو يقربلك انت ولد منو عسب اعرفك بالضبط شو تصيرلنا..؟

قالي : ماني بقايل .. قلتله: اوكي ليش في شي؟ قالي : لا بس جيه مابي اقول.. وتميت اسولف..وقالي : برب..قتله خذراحتك..

ظفته بايميل ثاني.. ودش علي قال : مرحبا منو وياي؟ قلتله انا منو غيري .. قالي انزين برب.. مارديت عليه..

احس انه يحاول يتهرب مني حتى انه وعدني انه بيتقدملي بعد مايتوظف.. بس ماجوف سوا شي!!

ومرات احس اني كرهته .. بس والله انقهر قبل لأرقد اتذكره واتذكر سوالفنا واللحظات يوم كنت ارمسه..

والشيطان وايد ايزين لي اياه .. صفاته نفس صفاتي ((يعنى يصلي يخاف ربه)).. من نفس الجبيله.. بس اكبر عني بخمس سنوات..

وكل المواصفات الي احبها بالريال فيه.. والله انا مقهوره ماعرف شسوي ارمسه مره ثانيه ولالا؟

خبروني انا حيرانه .. اذا هو اتصل فيني ارد عليه ولالا؟ ..ارمسه ولالا؟ اسوله طاف ولا لا؟

والله اني ميتـــــــه قهـــر ليش سويت بعمري جيــه وانا بعدني صغيره.. عطوني حل دخيلكم..

والسموحه

بكرى أحلى · 05-08-2007, 21:06

حبيبة قلبي ..

مرة قصتك حلوة .. بس تعرفين ؟
أنتي أحسن وحدة شفتها بحياتي ..
و تعرفين بعد ؟
انتي بنوته زي أختي .. وأخاف عليها
والله العظيم ترى هذا ولد يلعب ومايستاهل حبة حب من قلبج ..
وانتي ذكية .. اكتشفتيه يجذب عليج يوم شكك في نفسج انك تكلمين ربيعه !!
وش تبين بواحد طول الوقت يجذب عليج ؟
بالحب يجذب عليج
بالخطوبة يجذب عليج
بالماسنجر يجذب عليج
بالموبايل يجذب عليج ومشكك في نفسج بعد !
واحد مشكلته الفراااااااغ
و وناسته يشوفج تصيحين وتذرفين دموع أربع أربع عشانه .. مايستاااااااااااهل دمعة وحدة أصلاً

ابعدي عنه .. مايستاهلج
15 سنة بنت كبيرة وتفهمين الصح من الغلط

منيب هينة · 05-08-2007, 21:10

اتركيه افظل لك مثل ماقالت لك اختي بكرى احلى

هذا لعااااااب

لاتظيعين نفسك اتركيييه

دروبـ · 05-08-2007, 21:20

حبيبتي
مثل ماقالت اختي بكرى احلى ، ومنيب هينه
هذا لعااااب ويتسلى فييييييج

متفائلة بالخير · 05-08-2007, 21:23

حبيبتي انتي بعمر حساااااس وخطير ولازم تديري بالك وتبعدي عن قصص الماسنجر
والشااااااات والشباااااااااب لانها كلها قصص فاضية مالها معنى وكل الشباب على
الانترنت بتسلوا مو اكثر..عشان هيك احذفي كل الشباب من ماسنجرك وابتعدي عن
الشاااااات لانه راح يدمر حياتك..
اشغلي وقتك باشياء مفيدة بالقران بالصلاة بالطبخ وابتعدي عن الشات والماسنجر
وقرفهمممممم صدقيني بتضيعييييي وبتخسري تعليمك واشياء كثيرة..
تقربي لله بالصلاةةةةة وتأكدي انه هذ ا الانسان يتسلى فيكي مو اكثر
بعدين لسه عمره 20 يعني مو مؤهل لا لزواج ولا لشي..
الله يوفقك ويستر عليكي

كلي حركــات! · 05-08-2007, 21:23

اقتباس:

المشاركة الأصلية كتبت بواسطة بكرى أحلى

حبيبة قلبي ..
مرة قصتك حلوة .. بس تعرفين ؟
أنتي أحسن وحدة شفتها بحياتي ..
و تعرفين بعد ؟
انتي بنوته زي أختي .. وأخاف عليها
والله العظيم ترى هذا ولد يلعب ومايستاهل حبة حب من قلبج ..
وانتي ذكية .. اكتشفتيه يجذب عليج يوم شكك في نفسج انك تكلمين ربيعه !!
وش تبين بواحد طول الوقت يجذب عليج ؟
بالحب يجذب عليج
بالخطوبة يجذب عليج
بالماسنجر يجذب عليج
بالموبايل يجذب عليج ومشكك في نفسج بعد !
واحد مشكلته الفراااااااغ
و وناسته يشوفج تصيحين وتذرفين دموع أربع أربع عشانه .. مايستاااااااااااهل دمعة وحدة أصلاً
ابعدي عنه .. مايستاهلج
15 سنة بنت كبيرة وتفهمين الصح من الغلط

صح انا مرات اقول لنفسي جيه .. ومرات اقول انه صادق ..واني ظلمته .. بس انشالله احاول مارمسه وابتعد عنه بأقرب وفت..

وثاااانكس خيتوووه تسلمين وماقصرتي

em tala · 05-08-2007, 21:25

ترى هذا ولد يلعب ومايستاهل حبة حب

كلي حركــات! · 05-08-2007, 21:30

اقتباس:

المشاركة الأصلية كتبت بواسطة منيب هينه

اتركيه افظل لك مثل ماقالت لك اختي بكرى احلى
هذا لعااااااب
لاتظيعين نفسك اتركيييه

انشالله احااول .. وشكرا اختي

متفائلة بالخير · 05-08-2007, 21:31

اقتباس:

المشاركة الأصلية كتبت بواسطة كلي حركــات!

صح انا مرات اقول لنفسي جيه .. ومرات اقول انه صادق ..واني ظلمته .. بس انشالله احاول مارمسه وابتعد عنه بأقرب وفت..
وثاااانكس خيتوووه تسلمين وماقصرتي

حبيبتي انتي ما بتحبيه ولا شيءءءء..انتي تعلقتي فيه لانك تعودتي على الحكي
معاه بس مو اكثر وبكرا بتنسيه..لازم تبتعدي عن الشات والماسنجر لانه بداية
للضياع والخراااااااااااااااااااااااااااااااااب..واسألي مجربةةةةةةةةة
اهتمي بتعليمك ودينك وابتعدي عن هالكلام الفاضي وانتظري نصيبك بوقته..وتأكدي
انه معظم الشباب ما بياخدوا بنت كانوا يتكلموا معها على الشات..
موفقة

كلي حركــات! · 05-08-2007, 21:32

اقتباس:

المشاركة الأصلية كتبت بواسطة احلى سنفوره

حبيبتي
مثل ماقالت اختي بكرى احلى ، ومنيب هينه
هذا لعااااب ويتسلى فييييييج

مرات احس انه جيه .. بس القهر اني اتذكر كل اللحظات الحلوه الي مريت وياه والمواصفات الي تعيبني فيه.. احاول قد ماقدر اني مارد عليه ..

وشاكره لج

كلي حركــات! · 05-08-2007, 21:35

اقتباس:

المشاركة الأصلية كتبت بواسطة متفائلة بالخير

حبيبتي انتي بعمر حساااااس وخطير ولازم تديري بالك وتبعدي عن قصص الماسنجر
والشااااااات والشباااااااااب لانها كلها قصص فاضية مالها معنى وكل الشباب على
الانترنت بتسلوا مو اكثر..عشان هيك احذفي كل الشباب من ماسنجرك وابتعدي عن
الشاااااات لانه راح يدمر حياتك..
اشغلي وقتك باشياء مفيدة بالقران بالصلاة بالطبخ وابتعدي عن الشات والماسنجر
وقرفهمممممم صدقيني بتضيعييييي وبتخسري تعليمك واشياء كثيرة..
تقربي لله بالصلاةةةةة وتأكدي انه هذ ا الانسان يتسلى فيكي مو اكثر
بعدين لسه عمره 20 يعني مو مؤهل لا لزواج ولا لشي..
الله يوفقك ويستر عليكي

انا ايامي اتروح اكثر شي حق النت.. ماروم ابتعد عنه بس الحمدالله محافظة على صلواتي..
وانشالله يصير خير
شكرا

امرأه وبس · 05-08-2007, 21:48

واضح من خلال سردك لقصتك انك بنت ذكية جدا جدا وعقلك كبير وماينخاف عليك ...

حبيبتي واضح من تصرفات الشاب انه متمرس باللعب والضحك على البنات ... وصدقيني

هو لما قال لك الحلم الماصخ ماكان حلم حقيقي حلم فيه بل كان يستدرجك حتى

تضعفين ويقدر ياخذ منك اللي يبغى بس الظاهر انه حس انك بنت عفيفة ومحترمة فأبتعد

عنك ...

ياقلبي خليك بنت قوية ولا تذرفين الدموع على شخص منحط وسافل ... وأنا متأكدة

انك قد ثقة أهلك فيك وماراح تخيبين أملهم ...

ابتعدي عن هالشاب السافل وأعتبري اللي حصل لك درس يقويك ويعلمك .. وأنا

متأكدة انك قدها .. وحاولي تبتعدين عن الشات اللي ياما ضاعوا بسببه حريم متزوجات

وعندهم عيال فما بالك بالبنات المراهقات ...

وأتمنى لك حياة مليئة بالسعادة والرضى ...

كلي حركــات! · 05-08-2007, 22:04

متفأله بالخير و امرأه وبس شاكره لكم واايد واااايد والله لايهينكم.. تسلمون خواتي

فـــارس الشرقية · 05-08-2007, 22:07

طبعا كل اللي ردوا قبلي ماقصروا بارك الله فيهم وفيك .

بضيف شي واحد بس

انتي تقولين انك محافظة على صلاتك .. واحب اذكرك ( ان الصلاة تنهى عن الفحشاء والمنكر )

الله ينور لك ولنا طريق الخير والصلاح

متفائلة بالخير · 05-08-2007, 22:19

اقتباس:

المشاركة الأصلية كتبت بواسطة كلي حركــات!

انا ايامي اتروح اكثر شي حق النت.. ماروم ابتعد عنه بس الحمدالله محافظة على صلواتي..
وانشالله يصير خير
شكرا

حبيبتي انتي ممكن صار عندك ادمان على الانترنت لكنك بتقدري تتخلصي منه
بالتدريج..صدقيني انا مررت بنفس عمرك وعاااااااااانيت من الانترنت ومشاكله والشات
وقرفه والحمد لله الله رحمني وتبت وحياتي صارت احسن واسهل نوعا ما..اما لما كنت
ادخل الشات والماسنجر نزلت علاماتي وانقلبت حياتي وصرت عصبية جدا وتعلقت
باوهام وكانوا والديني الله يحفظهم يزعلوا علي ويغضبوا كثيييييييير هدا غير
غضب الرحمن..
موفقةةة والله يبعدك ويبعدنا عن الشات والماسنجر ومشاكله امييييين يا رب
وحبيبتي بتوقيعي ضفت رابط للثبااااات والتوبة من الشات ..يا ريت تستفيدي منه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

مشكلتي اني تعرفت ع واحد وووووو