عالم الحياة الزوجية - منتدى

عاشِقةُ الرّوح · 16-08-2007, 17:38

بسم الله الرحمن الرحيم

عزيزاتي العضوات حبيت اسرد عليكم قصتي مثل ما وعدتكم ..
اولا قبل ابدأ اشكر كل من تفضل وقام بالواجب وزارني في المستشفى او في البيت
وكل من تفضل واتصل لي سواء من الخارج او من البلد وحتى إلي ارسلوا لي مسجات
مشكورين خواتي العزيزات جميعا وان شاءالله اردها ليكم في افراحكم ..

بحاول اختصر القصة واكتب ليكم قصة حملي وتليها قصة ولادتي ..

اولا قصة حملي : ...

مثل ما تعرفون اي وحده متزوجة تتمنى تكون ام ..
انا الحمدلله ام لطفلين الله رزقني "محمد وفاطمة " والحمدلله
بعد ما الله رزقني الولد والبنت قلت الحمدلله عندي اثنين وخلاص ما ابي احمل وانتظرت كم سنه على بنتي
ولما كبرت البنت وراحت المدرسه كانت تسمع كلام زميلاتها عن خواتهم الصغار وكل يوم تجي وتحكي لي
وتقول لي ابي اخت العب معاها , وضلت على هذا الحال لحد ما انا صار خاطري في بيبي صغير
بس بصراحه كنت بفكر قبل ما تروح المدرسه بكم شهر ان اترك المانع عشان احمل ولكن ما صار حمل
وفي الصيف الماضي قلت بسافر ولما ارجع افكر ثاني في الحمل ولما رحت لمقام السيدة زينب عليها السلام
وطلبت ان الله يرزقنا الذرية الصالحة ويرزق المؤمنين .. ويفرح قلب بنتي قبل قلبي بأخت معها تحبها وتلعب معها .
رجعت من عند السيده وفضلت 4 شهور كل شهر انتظر الحمل ولكن كانت الدورة الشهريه تفاجأني كل شهر وفي موعدها
واخر شي تمللت وتركت الأمر قلت خلاص ما بشغل نفسي بالحمل لان نفسيتي تعبت واانا انتظر
وكل شهر اقول بصير حمل ولكن من غير فائده , ومرت 4 شهور على هذا الموضوع لحد ماجي الشهر الخامس
وتأخرت عني الدوره اسبوع فقلت لزوجي "للحين الدورة ما شرفت مدري شسالفه " ؟؟
المهم قلت له بروح اعمل تحليل حمل عشان اطمن يمكن اكون حامل
فقال لي بتنحرجين اكيد مو حامل نفس كل شهر
بس ما هتميت في كلامه وخاصه ان مر اسبوع ولا نزلت الدورة ,
فقلت اروح اتأكده احسن ويوم ثامن لما وصلت الاولاد مدارسهم
رحت المركز الصحي وعملت تحليل حمل , وطلعت النتيجه بعد دقايق "" حامل "" والحمدلله

اتصلت لزوجي حالا حتى قبل ادخل على دكتوره وخبرته وانا في قمت السعادة
وماني مصدقه وفرح زوجي معاي وبارك لي ..

لما دخلت لدكتوره على طول سألتي قالت " بشري .. شنو النتيجه ؟
وشافتها وقالت لي مبرووووووك حامل ...

الان بحاول بختصر القصة لانها طويله وعشان ما تتعبوا في القرأه هههه

انا بعد ما تم مراجعتي في عيادة الحوامل كل شهر كل مره يقولون لي كل شي تمام
بس ما كانت اجهزتهم زينه . دائما تكون خربانه , كل مره يصادف ان اروح وجهاز إلي تخليه
عشان اسمع دقات قلب الجنين ما يشتغل وتقول لي مافيه البتري ضعيف ومادري شنو !!.
وكل ما اقول لها ان حجم البطن صغير قالت لي زين وحجم الجنين بعد طبيعي ..
ما كنت ارتاح لما اروح الموعد وكنت قبل بيوم لازم اعصب على اولادي ومالي نفس اروح
يعني بالغصب اروح بس عشان اطمن على الجنين ..

المهم اخر مره رحت كان في 15_7 يو م الاربعه هذا اخر موعد لي في عيادة الحوامل
فقلت لدكتوره اني للحين ما عرفت نوع الجنين وابي اعرف
بعد ما شافت ضغطي ووزني والسكر تقول ان كل تمام بس قبل هذا الموعد كان وزني نزل كيلو
ولما رحت هالمره رجع الكيلو يعني ما زاد اكثر من كيلو إلي فقدته من قبل ..
وبعدين سوت لي سونار عشان تشوف نوع الجنين
ولكن قالت ان ما راح يبان زين عشان الجنين كبير في الشهر الثامن ..فقلت لها اوكي انا مواقفه ..
واي شي يجي من عند الله الحمدلله . مع اني كان نفسي في بنت ..
مع اني كنت مصمم تسوي السونار , طبعا ما كان يبان زين فقالت يمكن بنت ..

بعد ما كملت عشره ايام من الموعد وفي يوم السبت الاسود ,

سميته يوم الاسود عشان كانت اخر حركة للجنين في هذا اليوم ..للاسف
كنت انا في الشقه داك اليوم وكنت داخله الشهر التاسع وفجأة حسيت بحركة للجنين قويه
في اسفل البطن حتى اتذكر قلت لزوجي , وبعدين ما انتبهت انه ما يتحرك يوم ثاني
بس كانت تجي لي تقلصات في اسفل البطن واحس ان الجنين يتحرك بس من فوق
وهو كان هالوقت مات في بطني وانا ما ادري
وفي اليوم الرابع من الوفاة تنزلت علي افرازات لونها بني
والألم اسفل البطن يزيد فقلت للبنات في المنتدى ونصحوني اروح المستشفى اطمن على الجنين
بدأت الألم يجيني من الصبح وانا ما رحت المستشفى إلي بعد صلاة المغرب ,تقريبا 7 _30

هذه كانت قصة حملي مختصره وسوف احكي إ ليكم عن معاناتي في المستشفات مع الولاده ..

اختكم ام محمد وفاطمة

عاشِقةُ الرّوح · 16-08-2007, 17:49

بسم الله الرحمن الرحيم

الان اكمل لكم الجزء الثاني وهي "قصة ولادتي "
وصلنا المستشفى في ال 7_30 مساء واول ما وصلنا دخلنا على طول لقسم طوارئ الولادة
بعد دقايق دخلت وكان قسم الطوارئ زحمه من الحوامل والكل واقف ولا في مكان حتى للجلوس
وكل وحده كانت تعاني من شي انا انتظرت يمكن ربع ساعة لحد ما جي دوري
بعدين الممرضه قاست ضغطي ودرجة الحرارة , وسألتني اشكي من شنو ؟
بعدها قالت لي انتظر برا شوي تقريبا 45 دقيقه وانا انتظر وجي دوري ودخلت على الدكتوره
كانت فلبينيه ومعها دكتوره بحرينيه مساعده لها ,, سألتني اذا كان يتحرك قلت لها شوي
مو مثل قبل بعدين طلبت مني اروح على السرير عشان تسمع دقات الجنين وحركته اول ما شغلت الجهاز
وخلته تنتظر صوت او حركه ماشافت اي حركه ولا دقا ت القلب حوالى عشر دقايق على هالحال
وكل شوي تقول لي متأكده كان يتحرك ؟!!
بدأ اخاف وقلبي يدق , وعيني بدأت تدمع , وكل شوي اطالع في وجهي وشافت دموعي في عيني
بعدين قالت لي خليني افحص تحت , فحصت وكان عنق الرحم مفتوح 3 سانتي يعني مستعده للولاده
وكان فيه طلق خفيف , بعدشوي الدكتوره نادت على زوجي
عشان اتقول له لانها خافت علي اعرف واني بروحي وابكي , بس ما تدري اني صبوره والحمدلله
وضلت الدكتوره الفلبينيه تتكلم مع الدكتوره الثانيه عن الحاله وطلبت منها تنادي على زوجي عشان يخبرونه
انا زاد الخوف اكثر لما نادت على زوجي لانها ما قالت لي في غرفة الكشف وكان قلبي حاس ان
الجنين فيه شي او انه مات ,,ما قدرت اتكلم ولا اصيح (ابكي ) اتكلمت مع زوجي بالانجليزي
طبعا ما فهمت كل كلامها . وزوجي كان يتكلم معها بس عرفت ان الجنين ماااااااااات
بنتي كانت في الغرفة موجوده مع ابوها وهي على وشك تصيح وهي تسألني ماما شنو قالوا لك ؟
شنو في البيبي ؟ وكأنها حاسه ان صاير شي , كسرت خاطري وكنت خايفه من انها تعرف وتضايق
وتحزن ,, بعد ما كانت فرحانه تنتظر البيبي ..
كان كل همي ان افرح بنتي بهذا المولود إلي كانت تنتظره من شهور.
بس بعد هذا الخبر تضايقت وحزنت , كنت وانا قاعده على الكرسي كأني في بحر مو على الارض
مثل الغريق ماني عارفه اصيح ولا اتكلم ولا ارد على اسألت بنتي ودموعي في عيني واقفه والدكتوره البحرينيه
اطالعني بشفقه تتكلم وهي متأثره معي وزوجي يكلمها واحس ان قلبه يتقطع ومصدوم بالخبر مثلي .
كانت مفاجأه لينا ولا كنت متوقعه انه ممكن يكون الجنين مات في بطني ,
طلبت منا الدكتوره عمل تحليل دم عشان تطمن عليّ ,
اخذت دم وحللوه وانا انتظر , طلعت نتيجه وحده والثانيه بعد ساعتين , قالت لينا انتظروا للحين ما جهزت النتيجه
طول هالوقت من وصولنا لحد الساعه 11 واولادي تعبوا وفاطمة تبي تنام وكانت كل شوي تقول ماما جوعانه
اكثر من 3 ساعات وهم معنا فقلت لزوجي خذهم بيت ابوك اقرب من بيت اهلي
ولما نخلص نروح ليهم , وطول هالفتره وانا دموعي على خدي وفطوم تسألني ولا خبرناها طبعا انه مات
بس محمد عرف من ابوه وضل كل شوي يصيح (يبكي )
خفت على فطوم تعرف وتتأثر كثير فطلبت من زوجي لا يخبرها الان ..
المهم اخذهم على بيت ابوه 20 دقيقه ورجع وانا انتظر النتيجه الثانيه لدم ,
طلعت النتايج زينه والحمدلله ماصادني تسمم .
خافوا انه صادني تسمم بس الحمدلله .. لان الجنين توفى من كم يوم وفضل في بطني ,,
الحمدلله على كل حال ,الله رحم بحالي وحفضني ,,

الحين نبدأ مرحلة ثانيه من الشقاء

احنا طبعا رحنا مثل ما قلت ليكم 7_30 ولا خلصنا الي 12 مساء لكن ما كان فيه سرير عشان ارقد عشان الولاده
كان فيني طلق وجاهزه للولاده فقالوا ان المستشفى مافيه سرير فاضي وبحولوني على مستشفى اخر
(مستشفى جدحفص للولاده ) اتصلت الممرضه عشان تسأل اذا فيه سرير لمريضه قالوا لها مافي الان
خبرتنا وانصدمت مره ثانيه قلت لها يعني ارجع البيت وانا عندي طلق ,
زوجي ما سكت قال انتظر لما نشوف حل . ولا بنرجع البيت هالقوت .
بعدين شافتني تعبت من القعده قالوا لي ادخل في غرفة استقبال الحوامل على السرير في قسم الطوارئ
وهناك في الغرفه معي وحده حامل في السرير الثاني وعليها جهاز التخطيط , وتسمع دقات قلب جنينها
وانا منكسره ودموعي على خدي , كل وحده تسمع دقات قلب جنينها ومطمنه عليه وإلا انا قلبي يتقطع
وحزينه
ومن وقت ما عرفت انه مات وانا دموع عيني ما نشفت ,
زوجي كان ينتظرني برا وانا داخل ومعي وحده اخرى حامل
تصبرني وتواسيني وتدعي لي ان الله يعوضني . خففت علي شوي
الله يسهل عليها يارب ونسمع عنها كل خير

المهم وصلت الساعه 2 الفجر وزوجي ينتظر يردون عليه وانا في الغرفة داخل ..
اخر شي نادوا عليه وقالت له الممرضه ان فيه سرير فاضي في مستشفى جدحفص ,
واخذني من طوارئ السلمانيه الى المستشفى المذكور وانا الطلق يزيد كل شوي
رحنا وفي عشر دقايق وصلت وقت ما نزلت من السياره ما كنت اقدر امشي زين
والطلق يزيد وزوجي ماسك يدي وشايل الشنطه وكل الاوراق

ودخلت المستشفى واخذني على غرفة التبديل بعد ما استأذنا من الممرضه المسؤوله.
خلتني انتظر نص ساعه لان كانت هناك وحده غيري على وشك ولاده خلصت معها وانا انتظر نص ساعه اتألم وقاعده على الكرسي , حتى كان فيه اسره فاضيه في نفس الغرفة ولا قالت لي روحي على السرير ..
وفي هالوقت زوجي كان ينتظرني برا اخر شي نادت علي وقالت لي ابدل ملابسي وعطتني قميص مفتوح من الخلف (خاص للولاده )
وانا ابدل و هي تسأل اخذت مني كل المعلومات المطلوبه مع انها موجوده في اوراق التحويل من قسم الطوارئ .

تعبت جدا اكثر من 6 ساعات في قسم الطوارئ وبعدين انروح مستشفى اخر ويتعبونا مره ثانيه سين وجيم
وانا الطلق يزيد وماني قادره حتى اتكلم دموعي على خدي وكل شوي تقول لي اخذي نفس
اخر شي اخذتني غرفة الولاده الساعة 2_20 وخلوا علي المغذي الساعه 2_30 بعدها فحصتني وقالت ان
الولادة بتتأخر لانه مفتوح 3 سنتي , كل هالألم من الساعه 8 مساء الى 2_30 الفجر وتقول لي 3 سنتي
يعني ما تغير فقالت بتتأخرين في الولاده وخاصه ان الجنين ميت ياخذ وقت ,

بدل ما تطمني خوفتني زياده ,, وفضلت اصيح وادعي ان الله يسهل علي ويسهل على جميع الحوامل
ويرزق كل محروم كل ما اتذكر احد ادعي له سواء من اهلي او اصدقائي وحتى حوامل المنتدى العزيز ما نسيتكم
وكان مكتوب دعاء لتسهل الولاده في ورقه في غرفة الولاده وكل شوي اقرأهذا
الدعاء وانا ابكي وارجع اخذ نفس ,
وبعد ساعه اتصل زوجي من برا يسأل عني قالت له الممرضه للحين ما ولدت
وهو مسكين برا بنتظرني ويبي يطمن علي خايف علي , ورجع اتصل الساعه 4 الفجر
يسأل عني مره ثانيه وانا الطلق زاد اكثر واكثر وعلى وشك اولد ,
ربي سهل علي في الولاده وولدت الحمدلله كانت الساعه 4_50 الفجر وقت ولادتي ,,
كنت خايفه اطول اكثر في الولاده ولكن بس ساعتين ونص من دخلت غرفة العمليات وولدت والحمدلله..
الله ما يترك عبده وانا كنت في حالة ما يعلم بها إلا الله سبحانه , الحمدلله والشكر الله اني ولدت طبيعي وفي وقت اقل من إلي توقعته,,

كل هذا وامي ما تدري بس اختي عرفت اني رايحه المستشفى ولا كانت تدري اني بولد
بس صممت تعرف شنو كان فيني من زوجي وانا طلبت منه ما يخبرها الان ,
بس هي صممت تعرف وخبرها وقامت تصيح ولا نامت ديك الليله لما عرفت ,

بعد ما ولدت طلبت منهم اني ابي اشوف بنتي قطعت الحبل السري القابله ونظفتها شوي وخلتها على بطني
رفعت راسي لها نظرت لها وابتسمت في وجها بس ثواني واخذوها ,كانت كالقمر المنير جميله جدا وبيضه وكان جسمها نحيف ما كان وزونها طبيعي ,وبعدين ما حسيت بروحي نمت على طول لانهم عطوني ابره منوم

بس لما كنت اروح المواعيد اثناءالحمل كل مره اروح لهم يقولون لي ان وزنها طبيعي ,
طلع وزنها في الولاده 1,660 كيلوفقط ,, تصورا هذا وزن طبيعي ؟

المهم طلبت من زوجي انه يعرف سبب الوفاة , بعد ما اخذوني برا غرفة العمليات لزوجي شافني
وباسني في جبهتي ومسح على راسي وقال لي الحمدلله على سلامتك والله يعوضنا انشاءالله
وبعد شوي جت الممرضه وجابت له البنت ولما شافها قام يبكي , ما قدر يمسك نفسه قلبه وجعه من شافها
وخاصه انها صغيره وضعيفة البُنيه ,, بعدها اخدوني على غرفة ثانيه ارتاح شوي قبل ما ياخذوني على جناح الولاده
كنت تعبانه والنومه في عيني بس ما قدرت انام وكنت انتظر زوجي يجيب امي بعد ما خرجت لجناح الاستقبال الوّلد ,
جاء زوجي ومعاه امي وخواتي الكبار ووانا هالوقت كنت انتظرهم يجون لي
وخاصه ان امي ما كانت تدري عني ,
ومع اني كنت محتاجه لها هالوقت , بس ما قلنا ليها إلي بعد ما ولدت
ووصلوا واخذوني بالاحضان وانا ما اقدر لا اتكلم ولا حتى ابكي
حسيت ان دموعي نشفت طول الليل وانا ابكي وعيوني متورمه من كثر ما بكيت وكنت دابله ..

اما بخصوص سبب الوفاة قالوا ان الحبل السري ملتف عليها بس انا مو مصدقه ان هذا السبب
وخاصه ان الطفله طلعت صغيره والمشيمه بعد صغيره وظاهر ما كنت تغذيها في الفتره الاخيره
ولا كان وزنها يزيد , والحين قررت اني اروح عياده خاصه عشان فحص بعد الولاده ولا اسلم نفسي
مره ثانيه في مستشفيات حكوميه , تعقدت منهم ولا اثق في دكاترتهم .
صراحه تعبت جدا وعانيت في الحمل وفي الولاده بعد,الحمدلله رحمة الله موجوده ,

ربي سهل علي وحفضني ورحمني برحمته الواسعه ومسح على قلبي وصبرني ,
صحيح اخذ مني بنتي ,لكن بتكون لي ذخر تنتظرني في الجنه وانا ما اعترض على كتبت الله
والله بعوضني ان شاءالله ,, وبيرزقني ويرزق كل المحرومين .

خواتي نصيحه مني اي وحده منكم تحس بأي اعراض اثناء الحمل تروح المستشفى لا تسكت عن روحها .. وتطمن على جنينها

واسفه على الاطاله
انتظر ردودكم

اختكم ام محمد وفاطمة

blue ocean · 16-08-2007, 18:04

تعرفي اختى عاشقه انك انتى كنتي سبب اشتراكي في المنتدى اول ما دخلت دخلته ضيفه اسبوع وكنت كل يوم اتابع اخباركم واتابع موضوعك مع البنات تبع الشهر الثامن والتاسع لحد ما قريت الي حصل ساعتها دخلت لانه نفس اعراضك جاتنى ونصحوني بعد البنات اروح المستشفى وفعلا رحت وولدت اليوم الثاني ..تمنيت انه يكون معايا تلفونك عشان اكلمك وفكرت اكثر من مره ابعثلك رساله خاصه بس ترددت لانى لسه جديده وما بتعرفينى وما حبيت ازعجك
عوضك الله خير يا اختى العزيزه وهذه طير من طيور الجنه وشفيعك يوم الحساب الحمدلله على كل حال والحمدلله على سلامتك

عاشِقةُ الرّوح · 16-08-2007, 18:16

يا هلا بيك اختي العزيزه بلوووو في صفحتي
وانشاءالله ربي يعوضني ويرزقني خير والحمدلله على سلامتك انتي بعد

ويشرفني ان اتعرفك عليك وبرسل لك مسج على الخاص قريب

ربي يرزق كل محروم انشاءلله ويسهل على كل حامل
اختكم
ام محمد

قطرة ماء · 16-08-2007, 18:24

حمد لله على سلامتك اختي عاشقة الروح وهنيئا لابنتك الجنه وهنيئا لك انتي ايضا
والله مو قادرة انا اصيح والله مو شايفه الحروف في الكيبورد زين من كثر ماترورغت عيوني من الدمع آآآآآآآآآآه ه ه
الله يعوضش خير خيه وهذه رحمة من الله لكي ولها تغمدها الله بواسع رحمته
الله يصبرك خيه ويحفظ الك زوجك واولادك واهلك ويخليك لهم ويخليهم لك

دمتي في رعاية الباري

em tala · 16-08-2007, 18:43

عوضك الله خير يا اختى العزيزه وهذه طير من طيور الجنه وشفيعك يوم الحساب

blue ocean · 16-08-2007, 18:49

تسلمين اختى العزيزه المهم سلامتك والحمدلله على كل حال

@ كوكو شانيل @ · 16-08-2007, 18:51

الله يصبرك ويعوض صبرك خير

عاشِقةُ الرّوح · 16-08-2007, 18:54

تسلمون والله خواتي الكريمات على الكلام الطيب ما تقصرون

والله انا كنت اكتب القصة وقلبي يتقطع وخاصه اني اليوم 16 من ولادتي
ولسه الجرح طري وما نسيت لحظة ولادتها كيف كانت ,
الله سهل عليّ لحظة ولادتها والحمدلله ,
ما تعبت كثير في ولادتها كثر الحمل ووحمي صعب , الحمدلله على كل حال
بس تعبوني في المستشفى وانتظاري كل هالوقت , غير مواعيد الحمل وكلام الدكتوره كل مره واجهزتهم الفاشله , كنت اطمن على بنتي اكثر ولا طلعت بهذ الوزن ويمكن تعيش ..
الحمدلله على كل حال وربي يعوضني ويرزقني بدل الي راحت ,
هذي طير من طيور الجنه الحمدلله ..

اختكم عشوووقه

روح الرومانسية · 16-08-2007, 19:58

الله يصبرك اختي أم محمد و يعوضك خير ان شاء الله
و لا تحزني كثير ترا بنتك طير من طيور الجنة و بتشفع لك يوم القيامة
و الله يخلي لك عيالك محمد و فاطمة و يرزقك اخوان و خوات لهم قريبا باذن الله

صدى الأشجان · 16-08-2007, 21:58

والله يا اختي يا ام محمد سمعت كثيير عن التسيب والاهمال واللا مبالاه خصوصا في السلمانيه

ولاتنسي رحمة الله واسعه والله يعوضك انشالله وبنتك راح تشفع لك يوم القياامه

milissa · 16-08-2007, 23:57

الله يصبرك و يهون عليك اختي و يعوض عليك فعلا عندك حق المستشفيلت الحكومية اغلبها ما تسوى و ما يهتمون كثير بس الحمد لله على سلامتك و ان شاء الله ترزقين ببنت امورة في القريب

نسايم حب · 17-08-2007, 01:46

الف سلامة عليكي اختي
والمهم الاول والاخير هو سلامة وقومتك لزوجك واطفالك سالمة
وربي يعوضك عما فقدتي خير ويجزيك خير الجزاء
وهذا بسبب اهمال المستشفى مع الاسف اصبح هذا واقع المستشفيات الحكوميه
الله يحفظ اطفالنا ويبارك فيهم ويرزقك جميع المحرومااااات

rimo2007 · 17-08-2007, 02:40

ام محمد حبيبتي الله يعوضك يا قلبي وانشاء الله فطومه بيجيها اختها انشاء الله وبتكون بصحه وعافيه يارب وما تشوفين شر ابدا

الأنس · 17-08-2007, 11:54

الله يصبرك انت وزوجك و اولادك و يعوضك كل خير ان شاء الله عن قريب
و هاي البنت رح تشفع لك ان شاء الله يوم القيامة
و ديري بالك على حالك و على اولادك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

هذه قصة حملي وولادتي