عالم الحياة الزوجية - منتدى

أميرة العفاف · 27-10-2007, 02:53

بسم الله الرحمن الرحيم ..

أعذروني لأن الموضوع صار من غير تخطيط .. يعني ما في تفاصيل وايد ..

بس أن شاء الله تستمتعون ويانا ..

بداية السالفة صارت عقب صلاة الظهر ..

صليت الظهر .. ونزلت تحت .. عسب الغدا ..

واثناء ذلك شفت ذيك الغيوم الكثيفة من صوب الشرق ..اللي تطير العقل ..

المهم قعدنا نتغدى ..

أنا وامي وابوي وجدي ..وحرمة اخوي .. والباقي في دواماتهم ..

وقاعدة أكل عيش مشخول مع سمج مقلي ..ودقووووس حااار وليمووون ...(( أعتبروها صورة ))

إلا يقولون والله أمس كا ن في مدينة الذيد .. مطر غزير لمدة ساعتين

ومع سقوط البرد..... واللي ما يعرف معنى البرد ..يعني ( مطر مثلج )

ولا اتنهد لهم بذيك التنهيده اللي خاصة بكسران الخاااطر ..

قالوا خير أن شاء الله ...

قلت ياريت ابن بطوطة يصير لي .. ولد عمي ولد خالي ولد جدي .. المهم من لحمي ودمي ..

قالت زوجة أخوي : وشو تبين في بن بطوطه الحين ..

قلت: كااان رحااالة .. من مكان لمكااان .. وأنا أحب الترحال .. والبرور والعراقيب والجبال.والوديان والسدود ..

قالت : ألحين هو ميت من زمااان شو تبين فيه يكون من لحمج ودمج ...

قلت على الأقل بيكون فينا عرق الوراثة .. حد ترحالي في البيت .. يطلعنا ويودينا

عاااد أبوي .. ما هنت عليه .. أنتظر بن بطوطة يرحلني ..

قال يالله عليه ..

وانا ماشالتني الأرض من الفرحه ..

قلت هاا ؟؟ اكيد ..؟؟

قالت امي يالله نتوكل على الله ..الجو حلو والغيوم تبشر بالخير ..

وانا ما صدقت .. (الله يرحم بن بطوطة ) انقذني ..

وانااا وررر .... فوق .. أجهز عدة الرحلة ..

الكاميرا على رأس القائمة ... عباية البر ( عباه كتف ) وطبعا عباة الراس ..

تلفوني .. ورحت دورت على بطارية احتياط لاني دوم اتوهق وبطارية الكاميرا تفضي ..

لا والشيء الغبي اللي حطيته ويا عدتي .. لعبة أونو .. ألحين صدق غباء من معاه بلعب مع أمي ولا ابوي ..

ولا يمكن ألقى بعير متطور في البر يلعب وياي ..

وتوضيت .. ( بصلي في البر .. منو قدي ..)

ونزلت .. وكلي سعاااااااادة ..

لقيتهم متذبذبين .. بين نعم ولالا ..

وانا اغرورقت عياني بالدموووع .. وقلت زين من البداية قولوا يا هيه يا لا ..

مب تخلوني أفرح وبعدين تترددون ..

وقعدت جنبهم وانا مبرطمة ..

شكلي كسرت خاطرهم للمرة الثانية ...

قالوا يالله بنسير البر بس ما بنتأخر لأن جدي العزيز قال يبغي ينام عقب الغدا .. وقال مب ياي وياكم ..

وماله خلق بروور ..قلت يالله .. وسبقتهم للسيارة .. علشان أكسر خاطرهم أكثر ..( شريرة )

واثناء ما أنا أنتظرهم .. تفلسفت وصورت هذي الصورة ..

يعني مسوية فيها مصورة احترافية ..

وبعدين رحت عند السيارة ... والجو سبحان الله هوااا وغباار .. وغيوم ..وبراد .. كله في بعض ..

وقفت لين ما وصل ابوي .. وركبنا السيارة بعد ما حطينا الشاي والحصير والماي ...

بس بصراحه ما صورت .. لأنهم كل مرة يعلقون علي .. ويقولون لي ..

أنتي عشتي اول عمرك في الهند خذتي منهم حب التصوير ..
عاد أهل الهند مشهورين بثلاث ( زيت الشعر \ والتصوير \ والفلفل )

وعشتي أول شبابك في أمريكا .. خذتي منهم حب التصوير ..
وعاد اهل امريكا مشهورين بثلاث ..أو بالأصح ثلاث اشياء دوم متعلقة فيهم ..
( الكاميرا / الجاكيت مربوط بالخصر / الشمسية ...فجأة مطر وفجأة شمس )

المهم .. طلعنا نحن الثلاثي ..من البيت ..وتوكلنا الله ..

طبعا اول شيء كالعادة لازم نمر شيشة البترول ..

طلع علينا 65 درهم ... مسكينه سيارتنا ..عطشانه ..

وكملنا الطريج .. نحو البر الغالي على قلبي .. شوفوا هذيل المصففين على الجسر فوق ..

هذا تصويت لأفضل منشد ..( ماشي شغله )

وبدأت الغيوم تزداد كثافه ...واسوداد ( يا فرحتي )

شوفوا أثر مطر امس على العراقيب ..

عاد لما صورت الصورة هذي وبالفلاش ..

امي فرحت وقالت شفت برق .. بيي مطر ..

عاد أنا خيبت املها وقلت أمي هذاالفلاش ..

يحليلهاا .. قالت وانا على بالي برق ...

قلت خلاص عشان خاطرج ما بصور بالفلاش

يتبع >>>>>

أميرة العفاف · 27-10-2007, 02:55

نكمل ...

وشوفوا هذي المنطقة روووعة .. احلى منطقة .. بس للأسف سيارتنا ما تساااعد ..

نخاف نغرز ونتوهق بدون انقااااذ ..

طبعااا الجو صار روووعة

والغيوم مرة تغطي الشمس ومرة تطلع ..

لازم الشمس حتطلع بكرة ( غبااار أدري )

وأثناء ما أنا منهمكة بالتصوير .. (حلوة منهمكة )

امي عطتني استكانه جاي بالزنجبيل .. بس ما حبيت الزنجبيل ..

لو نعناااع احلى ..(تتشرط)

بس شربته غصب ..توهقت فيه..

ومرينا من عند طريق جديد قالوا خل نستكشفه ..

طحنا بين مزااارع

وعااااااااااااد لقيته

*
*
*
واقف بشموخ ..

*
*
*
*
رافع راااااسه .

*
*
*

*
بطوله و بعرضه ..

*
*
*
بجماااله ..

*
*
*
وشعره الناااعم ..

*
*
*
*
ولونه الأبيض ..

*
*
*
ما شاء الله عليه ( خافت تصكه بعين ..)

*
*
*
*
صدق هو خقاق ..( مغرور)

*
*
*
*
*
وحيوااان بعد ..

*
*
*
*
بس احبه ..

*
*
*
*
*

ما شاء الله ...( تف تف تف عليه وعلى ام(ن) جابته ..

قربت منه ...

ومدري ليش حسيته مكسووور الخاااطر .. وحززززين ..

قلت بسير عنده وبحتويه يمكن يفضفض لي ..

وانا خوافة ..وبعيد(ن) عنكم عندي فوبيا المتحركاات .. ( يعني كل شيء يتحرك)

قلت لأمي تعالي قربي وياي خليني اجيسه ..

قالت خبلة انتي .. ( توها تعرف )

انتي غريبة عنه .. لا يعضك وتوهقينا في هالبر ..

عاد خوفتني ..

ولا كنت بخليه يشتكي لي همه .. بس يالله الله يعينه على ما بلاه ..

وطبعا اللي يجاوره في الزريبة .. وااااايد .. بس هو الخيل الوحيد

و هذا البعير الوحيد .. بس شو ...مسوي نفسه ثقيل ومتعود ع التصويييير .. ولا قرب حتى ..

وطبعاا شفت انواع أخرى من حيوانات الحظيرة كرمكم الله ..

بس ما صورت لأن المزارع كان واقف واستحيت أصور عنز وبقر ..

شو بيقول عني .. عمرها ما شافت عنز وبقر ..

بس بقول لكم شو شفت علشان تكونون في الصورة وتستفيدون ثقافيا ..( تحب الثقافة وتدخله كل مكان )

اللي شفتهم ..

ألحين بتسوي لكم درس في الحيوانات وأسماء الذكر والانثى منها واسماء مواليدها ( كرمكم الله )

شفت الثور وحرمته البقرة وولدهم العجل ...( بس بصراحه كانت البقرة ما شاء الله حلوة .. نفس اللي نشوفهم على علب الحليب )

شفت التيس وحرمته العنزة وولدهم السخل ..

وشفت الخروف .. والنعجة وولدهم الحمل ..

وشفت البعير .. (والناقة كانت غايبة .. وولدهم الحوار او القعود .. في المدرسة ..) المهم أسمائهم ..

اما الخيل المسكين .. بصراحه مدري ذكر ولا انثى .. بس انثاه اسمها الفرس .. وولدهم المهر ..

خلصنا درس العلووووووووم ..ههههه

ولقيت عندهم .. مصنع أعلاااااااااف ..

طبعا كانوا قاعدين يغطونها علشان المطر ..

شوفوا كيف حلووو ..ولا التصوير الأحلى ..(احم)

والله كان بخاطر اتسلق الأعلاااف هذي .. وأصير مثل هايدي .. بس ما باليد حيلة

يتبع ....

أميرة العفاف · 27-10-2007, 02:57

بعدها .. قلنا ندور على مسجد ونرجع البيت ..

ما شاء الله مصلانا جخ ( كشخه )

مدري ليش كل مصلى أروح له لازم أصور السقف ..( ؟؟)

ترى الساعة السادسة لخطبة الجمعة .. مب تقولون عندهم ست صلوااات

طبعا لقيت هذا العزيز في زواية من الزواياا .. ولا يخلو منه لا بيت ولا مسجد اماراتي ..

وطلعنا وتوكلنا على الله .. ورجعنا لديارنا سالمين والحمد لله ..

وهذي اشجار السواك ..طول طريق العودة للمنزل ..

والحمد لله وصلنا بيتنا ..

وهذي كانت رحلتنا السريعة ..

صحيح كانت مملة شوي لان عددنا قليل وما لقيت حد العب وياه اونو ..

بس موعودة برحلة اخرى الأسبوع القادم .. عاااد عسى الكل يرضى ويجون معانا ..

والله يرحم ابن بطوطة اللي كان سبب بعد الله سبحانه وتعالى ..

في أني اكسر خاطرهم ويجبرون بخاطري ..وياخذوني للبر ..

واعتذر طولت عليكم ....((وايد ( قرقر))) بس كانت عوضا عن الصور الناقصة ..

أميرة العفاف · 27-10-2007, 02:57

وهذي الورود اهداء لكم .. من حديقتنا

**فـــهـــد** · 27-10-2007, 05:00

يسلمووووووووووووووووووو يااميره العفاف صور رووووووعة ويوم في حياااااااتك جميل جداً الله يسعدكم..

ومشكوووووووووورة على الوردة الجميلة

انتظروا يوميات سفري لامريكا ان شاء الله بعد اسبوعين

.¸¸.ღ روح ღ.¸¸. · 27-10-2007, 05:20

رحله روعـــــــــــــــــه والله اموت بالبر..
تسلمين حبيبتي اميره
والله يعطيك الف عافيه على الإهداء ..

وننتظر يوميات فهد بامريكا الله يوفقه يارب

.........

زمـــــرد · 27-10-2007, 07:54

بسم الله ماشاء الله خرجتك روووعه
تسلمي أميره .........
وحركة بن بطوطه والله حلوه بجربها عسى تنفع << أخاف أخذ على راسي .. يالماصله تتمنين أجنبي يكون قريبك هههههههههههههههههههههههههههه

والله ماتنلامين إنه وقع قلبك وطار لب عقلك ... إسم الله عليه يجنن
<< تحب الخيل بعد ههههه

تسلمي أميرة وربي يسعدك وتخرجي مثلها وأحسن
تقبلي سلامـــــــي

وفهووووود عجل علينا
<< فضوليه

دمتم بخير

ابن الأميرة · 27-10-2007, 08:54

ماشاء الله تبارك الله
الله يوسع صدوركم بالعافية
وإن شاء الله الجايت أكثر
ولا تنسين تآخذين معك اونوا خخخخخخخخخ
========================
وااااااااااااو جنااااااااااااان روووووووووعه شوقتيني للطلعه
بإبداعك وتصويرك
===================

أميرة العفاف · 27-10-2007, 09:21

اقتباس:

المشاركة الأصلية كتبت بواسطة **فهد نجد**

يسلمووووووووووووووووووو يااميره العفاف صور رووووووعة ويوم في حياااااااتك جميل جداً الله يسعدكم..

ومشكوووووووووورة على الوردة الجميلة

انتظروا يوميات سفري لامريكا ان شاء الله بعد اسبوعين

مشكوووور اخوي حياااك الله تواحدك ويانا ..

وأنن شاء الله ننتظر يومياتك في أمريكاا .. عاااد هناك يااخوي .. لو ترقد على الأرض وتصور النملة

ولا حد يصد صوبك ..

مب عندنا .. نستحي نطلع الكاميرا إلا الكل يطالعك ..لا ويخبرون بعض ...

وماأوصيك ثلاث اشياء مهمة في أمريكا وعن تجربة ..

الكاميرا .. والجاكيت .. والشمسية اللي طولها شبر .. تنخش في الجيب ..ما تتوهق فيهاا كل مكااان ..

والوصية الرابعة كانت تنفع أيامنا .. بس ألحين مدري .. ماأوصيك فيها ..

قبل لما يسألون من وين انتوا نقول سئوديا أريـبـيا ..يحطونا على راسهم ..( مسوين انتحال شخصية )

بس ألحين الله أعلم ..

أميرة العفاف · 27-10-2007, 09:25

اقتباس:

المشاركة الأصلية كتبت بواسطة نور دربي

رحله روعـــــــــــــــــه والله اموت بالبر..
تسلمين حبيبتي اميره
والله يعطيك الف عافيه على الإهداء ..
وننتظر يوميات فهد بامريكا الله يوفقه يارب
.........

الله يعافيج .. مشكووور ةعلى مرورج صفحتي ..

والله كلنا نموت على البر من كثر ما أحنا محرومين ..

كل بلادنا برور .... ومع هذا محرومين منه ..هههه

أميرة العفاف · 27-10-2007, 09:26

اقتباس:

المشاركة الأصلية كتبت بواسطة زمـــــرد

بسم الله ماشاء الله خرجتك روووعه
تسلمي أميره .........
وحركة بن بطوطه والله حلوه بجربها عسى تنفع << أخاف أخذ على راسي .. يالماصله تتمنين أجنبي يكون قريبك هههههههههههههههههههههههههههه

والله ماتنلامين إنه وقع قلبك وطار لب عقلك ... إسم الله عليه يجنن
<< تحب الخيل بعد ههههه

تسلمي أميرة وربي يسعدك وتخرجي مثلها وأحسن
تقبلي سلامـــــــي

وفهووووود عجل علينا
<< فضوليه

دمتم بخير

هلا هلا بزمد .. حياج الله في رحلتنا ..

عاد الله يخليج دوري لج رحالة بس تكون حرمه علشان ما تتكفخين وانتي تتمنينها تكون قريبتج ..

شغلي الذكاء الأجتماعي .. لمصالحج مثلي ..ههههههههه

ومشكووورة على مرورج

أميرة العفاف · 27-10-2007, 09:30

اقتباس:

المشاركة الأصلية كتبت بواسطة نادي الهلال

ماشاء الله تبارك الله
الله يوسع صدوركم بالعافية
وإن شاء الله الجايت أكثر
ولا تنسين تآخذين معك اونوا خخخخخخخخخ
========================
وااااااااااااو جنااااااااااااان روووووووووعه شوقتيني للطلعه
بإبداعك وتصويرك
===================

مشكووووور وحياك الله في رحلتنا ...

ولا يهمك ما بنسى الأونو .. أصلا أنا خليته في السيارة .. حق الطوارئ .. بس بإذن الله ..

ناوية المرة اليايه على الكيرم .. باخذه وياااااي .. على الأقل الكيرم

يمكن لو شرحت لأمي وابوي يفهمونه .. بس الأونو مافي أمل ..

حياكم جميعا على مروركم اللي زاد من فرحتي برحلتي ..أشوفكم ع خيـــــــــــــــر ..

أختكم أميرة

خبير الحياة الزوجية · 27-10-2007, 23:44

مشاء الله طلعة صراحة مميزة حتى الجو منعش مشكوووووووووووووووووووره اميرة على هاليوميات

بصرحة الحين بيبتدي التحدي بالتصوير اليومي بس كل هذا شي واستكانة الشاي بالزنجبيل شي

ثااااااااااااااااااني شكلها مغري صراحة تقاطرت سعابيلي علية خخخخخخخخخخخخخخخخخ

تحياتي لك ودمتي بود

ام لطفلين · 28-10-2007, 04:37

وااااااااااااااااااااااااو ،،،
يومياااات خطيييييره وربي <<<<تحب البر ،،
والله وسعتي صدورنا يالغلا ،،
<<<<ودها تسولف مع جدك >>>تحب الشياب ،،،
وربي انك توسعيين الصدر ،،،
يسلمووووووو حبيبتي عاليوميات الرووووعه ،،

أميرة العفاف · 28-10-2007, 05:52

اقتباس:

المشاركة الأصلية كتبت بواسطة خبير الحياة الزوجية

مشاء الله طلعة صراحة مميزة حتى الجو منعش مشكوووووووووووووووووووره اميرة على هاليوميات
بصرحة الحين بيبتدي التحدي بالتصوير اليومي بس كل هذا شي واستكانة الشاي بالزنجبيل شي
ثااااااااااااااااااني شكلها مغري صراحة تقاطرت سعابيلي علية خخخخخخخخخخخخخخخخخ
تحياتي لك ودمتي بود

مشكووووووور اخوي خبير ... حياك الله في الموضوع ...

بس الله يخليك لا تتحداني في التصوير .. لني مب قدها ..

خصوصا للبر ... ترى طلعات الرجال غير تماما .. واحلى بكثير من طلعات الحريم ..

بس الحمد لله ..موعودة الأسبوع الياي بطلعة بشوف شو بيصير .. لو شفته يسوى بسدح الصور ..

ولو ما يسوى .. الله يعوضنا خير عنها ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

رحلتنا السريعة ( مصورة )