عالم الحياة الزوجية - منتدى

روح الرومانسية · 19-11-2007, 09:37

كنا أنا و زوجي نتابع مسلسل باب الحارة و كنت أقول لزوجي ان باشر آخر يوم من رمضان لانه عندي احساس انه ما راح يكمل ثلاثين يوم هذي السنة و كنت طول السهرة مو مرتاحة بالقعدة لاني كنت أحس بثقل مو طبيعي بالحوض , حاولت أغير القعدة و لكن بدون فايدة بعدها استسلمت و رحت أنام أحسن لي و بعد ساعتين قمنا للسحور و كنت أقول لزوجي و هو ياكل الظاهر ان هذا آخر سحور لك لانه أحس ان بعد باشر عيد (قمت أسحر زوجي بس لاني ممنوعة من الصيام)
أذن الفجر و رحت أصلي و مازال احساس الثقل بس مع شوية ألم و بعد الصلاة و قراءة القرآن رحت أنام بس ما قدرت صرت أتقلب يمين و يسار و مع هذا ما قدرت أنام و بعد شوي صار الالم يزيد رحت الحمام و شفت افراز فيه شوية دم رحت قلت لزوجي قال لي تعالي نامي لا تخافين بعد ساعتين بنروح للدكتورة و اطمنا (كان عندي موعد في هذا اليوم عند الدكتورة) سمعت كلام زوجي و رحت أنام بس أبدا ما قدرت مع اني تعبانة و فيني النوم بس كأنه النوم طار من عيني , رحت الحمام مرة ثانية و كانت المفاجأة الا أشوف ماي فيه دم يسيل مني و بعد شوي صار يدفق ساعتها خفت وايد و رحت لزوجي و قلت له الظاهر ان حبيبنا أو حبيبتنا يبغي أو تبغي يعيد معانا ما يبغي ينتظر بعد العيد (و فاز زوجي بالرهان لانه كان مراهني اني راح أولد في العيد أو قبله أما أنا كنت أحس اني راح أولد بعد العيد)
المهم طنشنا موعد الدكتورة و رحنا مباشرة للمستشفى و كنت أحس بالالم يزيد علي كلما مر الوقت , وصلنا الطوارىء فحصوني و بعدين خذوني قسم الولادة غيرت ملابسي و حطوني في غرفة انتظار للولادة لان الرحم مفتوح 4 سم بس و الماي صار يدفق مني بشدة , راح زوجي يجيب أمي بس للاسف ما خلوه و لاخلوها يدخلون علي و كنت أحس بالخوف خاصة بعد ما سمعت صراخ واحدة كانت تولد قبلي كان فيلم رعب
خاصة اني كنت لوحدي في الغرفة وبعد ساعة زاد الالم وصار ما أقدر أتحمله و صرت أصرخ بصوت عالي من الالم و بعد شوي جت الدكتورة و فحصتني و كان الرحم مفتوح 6 سم , يعني لولا صراخي كنت راح أولد وحدي و هم ما يدرون , المهم خذوني غرفة الولادة و الالم كل ماله يزيد علي كنت أحس اني راح أموت من الالم و ان بطني راح تنفجر و ظهري راح ينكسر , و بعد 6 ساعات من الالم و العذاب ولدت و سمعت صراخ حبيبتي فطوم و قالت لي الممرضة و هي ماسكاتها جبت بنوته قمر سبحان الله كانت بيضاء و شعرها كثيف و أسود , خذوها ينظفوها و يفحصوها و يخذوا قياساتها و بعدين جابوها لي ما شاء الله عليها قمر و كانت ساكتة و تطالعني بعيونها الحلوة فديتها و بعدين أخذوها لزوجي و أمي , كل اللي شافوها في هذا اليوم قالوا انها نسخة مني و بعد كم من يوم قالوا انها تشبه أبوها و الحين يقولوا انها تاخذ مني شوي و من أبوها شوي و هذا أحسن شيء , على قولة أم زوجي أبوها حلو و أمها حلوة أكيد بتطلع قمر ...
أما الظروف اللي ما خلتني أدخل النت بعد ما ولدت لاني بعد الولادة صابتي آلام فظيعة في أسفل الظهر و الدكاترة طمنوني و قالولي لازم اتحسي بآلام بعد الولادة كم من يوم , و مر اسبوع و الآلام تزيد علي لا أقدر أتحرك و لا أجلس زين حتى في النوم ما أقدر أقلب و تجيني آلام حادة يوم أقوم من الفراش حتى روحة الحمام و انتوا بكرامة صارت صعبة جدا خاصة اذا كان عندي امساك , وصار فيني اكتئاب من هذي الآلام كنت حابة أعتني ببنتي و أنا مبسوطة و فرحانة فيها لكني كنت أعتني فيها و أنا مكتئبة و ميتة من الالم
المهم صبرت اسبوع اثنين ثلاثة و الالم ما راح فرحت للدكتورة و فحصتني و قالت لي ان عظام الحوض و فقرات أسفل الظهر (العصعص) عندي مفكوكة من تأثير الدفع أثناء الولادة (خصوصا ان الدفع عندي كان وايد وايد وايد صعب و جسمي صغير ما يتحمل), و قالت لي مع الوقت راح تعود لمكانها و عطتني مسكنات للالم و أدوية و الحين الحمد لله تحسنت شوي عن أول لكني أبغي الالم يروح نهائي لاني كثير خايفة يظل معي على طول , فرحت للدكتورة أمس و طمنتني ان مع الوقت راح يروح الالم و عطتني مسكن للالم و نصحتني بتدفئة المنطقة المصابة و ان شاء الله خير
و يا خواتي اللي عندها فكرة عن هذا الموضوع يا ليت تفيدني و اطمني لاني نفسيتي كثير تعبانة من هذي السالفة
أشوفكم على خير

blue moon · 19-11-2007, 13:21

الف حمد لله على سلامتك

بابلية · 19-11-2007, 13:40

الحمدلله على سلامتك ومبروك المولودة فطوم

((((( فاتنة ))))) · 19-11-2007, 14:25

تربى بعزكم ودلالكم........

والي اعطاكي يخليلك.........

الحزن الحائر · 19-11-2007, 14:48

حمد الله على السلامه والف مبررووووووووووووووووووووووووووووووك

loran · 19-11-2007, 22:47

الف الف مبروك تتربى بعزكم

cendrella · 20-11-2007, 01:24

الف الف مبروك تتربى بعزكم

layla80 · 20-11-2007, 03:56

الف الف مبروك اختي و عقبال باقي الاخوات الحوامل
و عقبال احنا المحرومات بالذرية الصالحة
آمييييييييييييييييييين يا رب العالميييييييييييييييييييين

نسايم حب · 20-11-2007, 04:05

الف مبرووووووووك اختي روح الرومنسيه
تتربى فطومة بعزك وعز ابوها واهلهاااا

وماتشوفين شر عن الالم ان شاء الله بيروح مع الوقت ادهني ظهرك وخلي زوجك يدلك لك
وتغذي كويس واشربي حلبة وكلي تمر
ترى انا اقول لك الكلام عن تجربة
التمر والحلبة مافي زيهم
انا ولدت من اسبوعين ولاعندي احد ينفسني لاني ولدانه بغربه انا قايمة بحالي
داومة على التمر واغلي حلبة واشربها والحمدلله الالم كل يوم عن الثاني يخف اكثر واكثر

روح الرومانسية · 20-11-2007, 05:06

مشكورات حبيباتي و الله يبارك فيكم و يرزق كل محروم ان شاء الله

روح الرومانسية · 20-11-2007, 05:18

مشكووووووووورة حبيبتي نسايم حب على النصائح و الله يبارك فيك و في عيالك ان شاء الله
و الله معك حبيبتي يعينك و يساعدك و انتي في الغربة لوحدك
وراح أعمل النصائح اللي قلتيها لي ان شاء الله و أبشرك بنتائجها

شما المنصوري · 20-11-2007, 05:30

الف الف الف مبروك حبيبتي والحمد الله على سلااامتج وسلااامت البنوته وتتربى بعزكم انشاءالله
والله يااختي خوافتيني وااايد لانه انا من الحين عندي الو بالفقرات العصعص الله يستر

روح الرومانسية · 20-11-2007, 05:44

مشكورة حبيبتي شما و الله يبارك فيك ان شاء الله
و لا تخافي حبيبتي ان شاء الله ما عليكي شر و يقومك انتي و طفلك بالسلامة ان شاء الله

شما المنصوري · 20-11-2007, 07:48

حبيبتي روح الرومانسية
حبيت اسأل وين ولدتي ابي مستشفى ؟؟

الدنياحلوووة · 20-11-2007, 08:48

الف الحمد لله على سلامتك ويخليلك فطوووووم تتربى بعزكم ان شاء الله

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

هكذا كانت ولادتي