عالم الحياة الزوجية - منتدى

cـــj · 03-12-2007, 12:47

اقرا القصه للأخير ماله داعي اكتب ساعه قصه هالوليد وماتكلف على عمرك تقراها ربع ساعه
تعبت وانا اكتب <<<< ماعنده لصق وكبي يالطش بضميرررر <<< الله يخلف بس
بسم الله واعوذ بالله من الشيطان الرجيم
القوصيصه
أنا بصراحة إنسان متلحط من يوم ولادتي .. انولدت في أسرة داجة .. بس حنـّا بزود دجتنا غير شكل .. من قوة الدجة .. كانت أمي تبيع عسكريم ثلج في أكياس عند الاشارات .. قبل الموية الصحة .. وقبل المناديل .. إيييييييييه يالدنيا
وكنت أقوم كل يوم .. اشوف أمي وهي تغرف التوت من الطشت .. وتحطه بوسط أكياس وتدعسّه في الفيزر .. ودموعي تقطر أربع أربع
حالتنا بصراحة .. مزرية .. فقررت إني أدور وظيفة .. حاولت أدوّر وظيفة والحمد لله ورحمة الله وبركاته لقيت وظيفة في منجم ذهب حسيت إن الدنيا بدت تبتسم لنا .. ما صدقت عيوني رجعت مسرع للبيت أبغى أبشر الوالدة إني صرت رجال ينشد بي الظهر وإني لقيت وظيفة
دخلت البيت .. سألتهم وين أمي ؟؟قالوا إنها عند إشارة في عتيقة<=== يلعن أم الكفاح
رحت لمها .. وألقاها هي وعسكريمهاكنها شغالة ماسكينها في مكتب التسول
وأجي بكل حيلي وأشووووت الطشت اللي فيه العسكريم وأصاااارخ وأقول يماااااااه أبشرتس لقيت وظيفة !! يمّه خلاص ما عاد فيه عسكريم ما عاد فيه تسّلف من بقالة أبو أذان يمه خلاص!!
شلت أمي ورحنا أنا وإياها للبيت .. وهي مفهّية ما تدري وش السالفة !! فهمتها الموضوع .. دعت لي بالتوفيق وحطت لي نجمة <=== ياشين تلايص
المهم بدا دوامي من اليوم اللي بعده .. كنت متحمس للدوااام من جد .. من قوة الحماس نايم عند باب المنجم أحتريهم يجون .. وجايب معي فوطة وأمسّح الباب
وأول ما جو اللي يداومون أول من دخل أنا .. وأدخل مسرررررع .. وأطق على صدري وأقووووول هيييييييييه .. واتفلت عليهم في المنجم تفلت ما راح ولا جاء وأزبط أبو أبو أبو المنجم واقعد أصفصف وأعدل بوه <== أنت مشتغل بمنجم والا بوفيّة
والله وتروح الايام يعني أتقنت شغلي حبوني كل الل يشتغلون ..مدري عشان ثوارتي والا عشان شغلي .. والا عشان وسامتي <== افطن ياتوم كروز
وكلهم يحاولون يحتكون فيني وأنا ما أعطيهم وجه <== ياشين الثقة
المهم يا طويلين الأعمار الصناعية .. إني أعجبت المدير وهذا أهم شي .. فقرر إنه يرسلني للخارج .. وقال لي إن فيه دورة مناجم في هونغ كونغ أتعلم هناك أكثر عن المناجم .. وأشوف وأتعلم زوووود
المشكلة أمي الحين تبي توافق وإلا لأ ؟؟ رحت لم أمي لقيتها تربط أكياس ثلج يوم شافتي حطت الطشت ورا ظهرها وقعدت تلّفت وتصفرّ مسوية إنها ما سوّت شي هي وهكالجدايل اللي تسنهن سيور سيكل وأنا أقول بقلبي .. ابد ماهي مخلية عنه شغل اللحوج لو تموت
فاتحتها بالموضوع .. قلت يمه .. جعلي معدم هالخشة .. اليوم في الدوام .. اتفقوا إنهم يخلوني أسافر برّا عشان أكمل تخصصي في الوظيفة <== ماجستير تحفير قالت أمي وشوووووو
والله ما تروح لو أرجع أبيع ثلج عند الاشارات <== تكفين ياللي مخليته الحين
قلت يمه هذي دورة ماهي مطولة وبعدين مدتها تقريبا شهر يعني وافقي بس وخليني أتوكل على الله ولا نضيع هالفرصة
وافقت بس بشرط إنها تروح هي وأخواني معي للمطار .. وتوصلني إلى باب الطيارة يلعن أم الفشيلة يا شيخخخخخ
المهم .. يوم جاء موعد السفرة وهي تلبّس أخواني .. استغفر الله وإنا إليه راجعون يحومون تسبد الحمار
وناخذ لنا جمس حوض .. ونروح للمطار شنطتي وأخواني في الصندوق وأنا وأمي بجنب السواق في الغمارة .. وكل شوي ملتفت على هالصلعان اللي في الصندوق اللي متعلق على الباب .. واللي معه قوطي بايسن منشبه بقزازة ليموزين .. واللي يتفل على قزازة اللي جنبنا .. يالله وصلنا للمطار .. يوم وصلنا وينزلووون حسبي الله عليهم .. ويدلون يدفدفووون العربيات حقات الشنط
دخلت المطار وهم وراي بعربايتهم .. قصيت البوردنق باس (بطاقة الصعود) .. يوم تجمعوا علي أمي وأخواني .. وأنا وأودعهم وهم متماسكين ... ويغنّون حقت إلين خلف <<< يا مسؤول الأمن العااام لا تمضي له على الباسبووووورت وأنا أشر لهم يعني الى اللقاء وأقول بقلبي .. جعل هالجمس يقلب فيكم ما يسلم منكم الا أمي
ركبت الطيارة .. وأول مرة اركب طيارة في حياتي .. والتفت يمين يسار أبي أحد يحتسي عربي .. كلهم عيون متمططه .. وحتسيهم تسنه واحد ياكل عولك ما تدري وش هو يقول
.. المهم إني تكيت معهم في الطيارة .. وأطق نومة .. إلين وصلنا <<--أخت الين خلف هذي
نمت والله كل الخط .. نزلوني في المطار وأنا ما أدري وش السالفة ؟ ما أعرف من الانجليزي الا وات أز يور نيم وأحسب إنه السلام عليكم بعد !! يوم دخلت مطار هونغ كونغ .. ويجي لمي واحد .. قال لي أنت حمود << بالانجليزي طبعاً
أنا مدري وش يقول بس إني لقطت كلمة حمود .. وأقضب يده وأنا تاكتن العبرة خااايف وأمشي معه ما كلمته ولا كلمه .. طلعنا من المطار ركبني في سيارة مضلله .. قلت له خييييير فك التضليلة أول .. قال شي مدري وشو بس حسيت إنه يقول " اركب لألعن جد جدك "
ركبنا ودخلت المعهد اللي فيه الدورة .. وإثرهم كلهم بزاااااااارين ما به إلا أنا له دقن وشعر صايرن بينهم تسني طلحة مولعين به صار الموضوع كله مقلب من مديري والدورة لولده أصلا وخاف عليه .. قال خلني ألزقها في ظهر هالسبيكة وكان مسمى هالاجتماع .. كيف تصبح طفلا مهذبا ؟؟ وأنا هذا كبري
جلست مع هالبزارين .. يقولون إنها جلسة تعارف .. وطبعا هم من مختلف الدول .. وأنا سفيركم هناك.. المهم إني فهمت إنها جلسة تعارف .. وأتورط مدري وش أقول أشوفهم بزارين ويفتّون فت لغة .. وأنا ما عندي الا وات إزر يور نيم ..
أحتري أحد يقولي شي أبقولها له والله وكل واحد يقول أسمه والدور كل شوي يوصل لمي .. والعرق كل ما له يزيد .. يوم وصلني الدور واطلع من مخباتي قلم .. واكتب لهم المهم عرفوا إني من جنب القدة .. وما عندي ما عند جدتي .. دخلوا مع بعض وقاموا يسولفون .. وأنا محد عطاني وجه
.. ودي اطلع الكاميره حقتي .. بس اشوف كاميراتهم فيهن شاشات وانا معي ذيك الكاميره المستطيلة شاريها من البطحا بعشرة عقب المكاسر مع الفيلم والحجار علي
عقبها ودونا لم الفندق .. ومركبيني قدام.. وودي ألعب معهم و أوسع صدري .. بس ماااش شكلي ما يساعد .. ويودونا لم قرية .. تبعد عن هونغ كونغ .. يمكن 3 ساعات على باص .. وكلهم نايمين الا انا .. كل ما نعس راعي الباص قومته <== شوية غثيث
بس وش أقولكم يلعن أم العيششششششششة .. ناس من جد عايشين بسطة وسعة صدر .. شفت في هالثلاث ساعات اللي ما قد شفته في حياتي كلها ..
وحنا على الخط .. جتنا إشارة ووقفنا .. وأقعد أتفرج الناس كني توني مولود .. إلا يوم جا واحد مسرع .. وهو اللي يصدم واحد راعي هوندا مع ورى.. وأنزل من الباص ويتجمعون الناس .. وأروح لم اللي صادم راعي الهوندا .. قلت له خير ؟؟ ما تشووووف ؟! لا تقعد تصرف وتقول ما شافته .. والا سامحوني والا صلحووووها وجيبوا الفاتورة .. ما نبي الا وكاااااالة .. والله ما نتنازل لو تموت <== قطيت مع راعي الهوندا وأقعد أنافخ والله ويركبون سياراتهم ويمشون بس كنت الحق اللي صادم واقوله وين علينا تبي تزبــن ؟؟ قال لي كلمة مدري وش هي .. يوم ترجمتها طلعت " انقلع لا أغيـّـب شمسك "
وبالأخير .. طلع مشهد من فلم يسوونه .. وأنا قاعد أهايط ومسوي حقّاني .. مشينا وكل اللي معي في الباص البنات والعيال .. قالوا والله إنك بطل ياحمود .. جد مدري وش يقولون بس رافعين اصابعهم الدبية على فوق .. ويصفقون لي .. أنا خقيت .. وأسدّد لراعي الباص حبة بقس سريع !! سريع !! وأقوله : سق زين لالعن أبو شكلك <<= مايحب يتميلح أبد
وصلنا لم القرية اللي أقولكم .. و ودّونا لفندق اللي نسكن فيه .. دخلنا الفندق ويجون البنات ويشيلووون شنطتي ..ويقولون لا والله ما تشيلها ياحمود حنا نبي نشيلها أنا ما ادري وش يقولون أحسبهم يبي يسرقوووونها وأقعد اسطّرهم والزخهم واحد واحد في وأقول فكوّووووووا .. وارجّف والديهم .. الين وخروا .. جت وحده عااااقلة وحست إني مدري وش الطبخة وفهمتني بالاشارات <== يعني الاطرم اصرف مني في ذلك الوقت .. وقلت بكيفكم وتأسفت من اللي سطرتهم وندخل الفندق واشوووفهم يبدلون ملابسهم وشورتات وحركات طبعا الوضع مختلط بنات وعيال وأنا قاعد اتفرج وقالوا لي البس مثلنا
.. وما دروا إن امي ما عطتني الا قارورة فيكس وفنيلتين وسروالين طوال وكوت وفنيلة أم رقبة وفنجال مرة تقول يمكن يلقطك مر .. والااش .. وكنادر كورة .. وشماغي ومحلفتني اني أربطه اذا جيت اطلع بالبراد لا يجيني لفحة هوا .. وهذولا معزمين الا يبوني البس زيهّم .. قلت لهم : لا ما ابي ألبس .. عزموا علي والله وأطق سروال النص اللي علي من مبطي مع أم رقبة وأنزل لهم .. مسوي كاشخ .. وهم أول ما شافوني .. تسدحوووووا من الضحك ويحسبون إني استهبل .. ما دروا إني الحين باز(ن) بهاللبس اللي علي
.. والله ونتعشى وهم يضحكون ,, وانا احسبهم معجبين واتلفت وأقول الله يلعن أم الوسامة في المنجم يحتكون وهنا بعد خلصنا من العشاء .. جو يشيكون على أعمارنا .. عشان يوزعونا على حسب العمر حطوني لحالي في السطح .. يقولون كبير مرة أنت نمت وقمت من بكرة .. صار فيه محاضرة عن التهذيب .. وأشوفهم يقولون .. لازم نقول بسم الله قبل الاكل واذا خلصنا الحمد لله .. ونطيع ماما وبابا <== متاكد انه بهونغ كونغ والا برماح
.. لا المهم انهم يقولون رددوا ورانا وأنا في اخر القاعة واهز راسي على قدام وأردد باخر قوتي .. راح الاسبوع الاول والاسبوع الثاني وانواع الفلة معهم صح إني مدري وش يقولون : بس حفظت جملة اذا سمعتهم قايلينها ادري انهم يعني يبي يروحون .. وبعض الاحيان يقولونها بسرعة ولا اسمعها زين .. واذا ابعدوا لحقهتم
.. بس المشكلة الوحيدة في هونغ كونغ الأكل .. من جينا وأنا ما غير آكل تونة .. ريحتي تشمها وانت في الدور الارضي .. هذا اذا صرت انا في غرفتي اللي في السطح .. يعني حوسة من ناحية الاكل .. لا ومن زين الطبايع عندهم أكله اسمها تشلبي يحسبووون إني حمار .. يقولون إنها لحم بقر والله لو إني ولد بيّاعة عسكريم

cـــj · 03-12-2007, 12:48

المهم فليتها وكل يوم وانا مطلع لهم لعبة يعني وسعت صدرهم ووسعوا صدري بس اللي يضيق صدري أدري إني اذا رجعت للسعودية ابشوف هاللحوووج أخواني .. وكل واحد منهم عليه وجه اطول من الثاني من الوصخ .. كنهم عيال بنشري مسافر وحاطهم بداله .. اتنهد واطرد احلام اليقظة
وارجع لهالوجيه السفرة .. يا حليل حمّاماتهم .. بزابيزهم صغار وتكنولوجيا وحركات أول مرة دخلت بالحمام حقهم دخلت الظهر ما طلعت الا عقب المغرب نمت وانا مدري .. حمام(ن) ما عندك أزين منه ماهو مثل حماماتنا استغفر الله وإنا اليه راجعون ما به الا بلكتين تبوبز فوقهن ونشارة خشب تغسل بهk والا انهارهم ومويتهم يالله من فضلك اطلق من برادة أبو أذان راعي البقالة ولا ملزقها في البيارة وماد بزبوز على الشارع .. ويالله اشرب !! وهنا تشوف هالتكنولوجيا اللي مجتمعه مع الطبيعة والوجيه السفرة ..
المهم ذاك اليوم .. قاعدين ( المجموعه ) يسولوفون عن وظايف ابوانهم .. واللي يقول ابوي .. سفير واللي يقول ابوي في البرلمان .. واللي تقول أمي برفيسورة في الجامعه .. وانا اللي يحمّر وجهي وش أقولهم الحين .. والزخ والديهم بأرنب على مستوى قلت أمي : ذا هوسبتال تيتشر بزعمي ابقولهم انها دكتوره في المستشفى مشت اشوى مشوها لي واللي شك بكيفه اهم شي الاغلبية والا انا داري انها عند الاشارة هي وثلجها ايه صح قبل لا انسى .. ترا عندهم زينّا سواقين التكاسي اذا وقفوا عند الاشارة افتحوا الباب وتفلوا
والله وأقولكم .. أيام عشتها .. فلة تتعبون وانتم تقولون فلة
لكن تبون الصراحة .. ناس من جد عايشة لا حقد لا كره .. وكل يساعد الثاني .. صح كل واحد بحاله بس اذا احد احتاج للغير ما يقصرون .. واذكر مرة به عجوز ودها تقطع الشارع ولا فيه احد لمها واتذكر الحكمة اللي تقول " مساعدة الناس غاية لا تدرك " <= وأمسك يدها واقطع بها الشارع
خلصت الأيام سريعه .. وجاء موعد رحلتي .. ويجتمعون البنات والعيال يبون يودعوني ويتماسكون واتذكر أخواني هم ونخاريرهم وصعاريرهم .. واربط بين المشهدين وأقول يلعن ام الفرق اللي ماهو شوي
هنا .. اللي اسمها ستيلا واللي اسمها كلارا واخواني فرج وجمعان
والله ويودعوني بالدموع .. وانا راحل للمطار .. خشيت المطار .. و القى على الماصات عجوزين قاعدات يسولفن احسب انهن يتهاوشن بغيت افكهن ياااااخي حتسيهم تقول باقي شوي ويتقاضبون ..
ويكررررررونها ضحك واثرهم شايفين صديقتهم جايه من بعيد داقه الديرمانة هم يوم شافوها جايه ويدلون يصفقون ويقولون " هلا هلا باللي جاااااا باللي جااااا " العجوز اللي جايه يوم سمعتهم يصفقون وهي اللي تخربها وتدلي تصفق معهم وتدق رقبه وانا اقول والله اللي ماهو عجزنا الوحده اذا صار عمرها 40 خبطت كل شي صار يوجعها حتى شعرها
والله ويجي واحد حسيت إنه يبي شي .. واروح لمه قلت بغيت شي يالحبيب .. اللي فهمته انه يبي ورقة .. قلت وانا اخووو وضحى وأشق له من الجواز ورقة !! صرت شاق الورقة اللي فيها الختم الأول .. ولا دريت يوم جيت أركب الطيارة .. ويناظرون وجهي .. دقن .. وواحدن تسن به خرعة .. يوم دلاّ يدور الختم حق الدخول .. اسألني قال لي وين الختم قلت وانا وش دراني مديرنا قايل لي رح بدال ولدي حسبته يقول وش جايبك !! شكّوا إني من حقين كيف الحال وهم اللي يكلبشوني وعلى طول للسفارة
دخلت السفارة السعودية في هونغ كونغ والقاهم متجمعين قالوا وش اللي أنت مسوي صحيح داخل بجواز مزور
واقعد اشيل واحط واقسم لهم قالوا بس هذا شكله ملكع وناوي شر وانا والله لو تشوفون وجهي قسم بالله ان تدرون انه ماعندي ماعند جدتي حتى الطرطعان بالعيد يشبونهن لي عيال الحارة
وقالوا هذا تسفير لغوانتنامو إلين يتأكدون من هويتي وهل أنا صادق والا الدعيع <== ينعن ام هيك كوميديا
والحمد لله جت على ما نتمنى وطلعت صادق واجتمعوا فيني حقين السفارة وتسامحوا مني وانا اقول انقلعوا بس ما عاد فيها سموحة الخلا مير الخلا ويتطلبوني ويعطوني وسام الصدق والكرم وشي مدري وشو الظاهر وأبد وارجع للسعودية .. مقلد بالأوسمة .. محققا كثيرا من الانتصارات <== اجل الانتصارات ياهتلر
وألقى أمي وأخواني في المطار مع راعي الجمس يحتروني واجي مسررررررع واخم الوالدة في المطار ويتجمعون علي اخواني الصغار ونخمخم بعض بمشهد مأساوي بالنسبة لي وارجع للبيت عقب العز اللي عشته هناك والبسطة ووساعة الصدر هناك أقوم على صوت الانهار والشلالات وهنا اقوم على صوت فرامل سيارة البلدية
THE END <<<< هاذي فله حسيت اني اشوف تومن جيري
طبعا ملطوووش مع القليل من المخلخل والكشنه
عـــــز للطش

دروبـ · 04-12-2007, 04:01

هههههههههههههههههههههه كشخه وناسه عشت المشهد خخخخخخخخخخخخخ
روووعه تسلم عزوووووو ع اللطش

cـــj · 04-12-2007, 17:26

اهلين وسهلين ومرحبتين

مشكوره على الرد <<<< مستناس في احد عبره

دلوعه البدر · 04-12-2007, 20:25

هههههههههههههههههههههههههههههههههههههههههههههه
هههههههههههههههههههههههههههههه
والله فلللللللللللللللللللللللللللللله
يسلمووووووووووووووووووو
عززززززززززززوووووووووووو
على هيييييييييييك فلللللللللللللللله
في انتظااااااااااااااااااااااارررر لطششششششششششك الجديد

remass · 05-12-2007, 03:15

قرات البداية وما فيني اكمل صفحتين يا مفتري ..
لما اروق ارجع اقراهم ...
بس ادعوا لي بقدم على وظيفة عشان كذا مدوووشه ما فيني اقرا..

cـــj · 08-12-2007, 00:43

اقتباس:

المشاركة الأصلية كتبت بواسطة دلوعه البدر

هههههههههههههههههههههههههههههههههههههههههههههه
هههههههههههههههههههههههههههههه
والله فلللللللللللللللللللللللللللللله
يسلمووووووووووووووووووو
عززززززززززززوووووووووووو
على هيييييييييييك فلللللللللللللللله
في انتظااااااااااااااااااااااارررر لطششششششششششك الجديد

خخخخخخخخخخخخخخخخخخخخخخ

والله انك فله

يالله حيها منووووووره

قلت لكم ابي راعي رسمي <<<<< تعقد من هالاعلان خخخخخخخخخخخخخخخخخخخ

cـــj · 08-12-2007, 00:48

اقتباس:

المشاركة الأصلية كتبت بواسطة remass

قرات البداية وما فيني اكمل صفحتين يا مفتري ..
لما اروق ارجع اقراهم ...
بس ادعوا لي بقدم على وظيفة عشان كذا مدوووشه ما فيني اقرا..

مفتري خخخخخخخخخخخخخخخخخخخخخخخخ

خلاص اشربي عصير فجل صدقيني بتروقين

الله يوفقك بس أول راتب لي <<<< قاط معك

.•:*:•.Lavender.•:*:•. · 08-12-2007, 14:42

ههههههههههههههههه

يعطيك ألف عاااافيه ,,,,

كوميديا على اللآلآلآلآلآخر ,,

cـــj · 09-12-2007, 12:27

ولكمممم يالله حيها

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

حمود في هونغ كونغ روايه من الادب البيزنطي <<لايكثر