عالم الحياة الزوجية - منتدى

عزيز العريس · 10-12-2007, 07:56

سؤال حيرني كثيراً ..
فبعد أن يدفع الخاطب المهر ويؤثث بيته وبيت عروسه ..
وبعد أن يتحمل مصاريف من هنا ومن هناك .. كلها بسبب الزواج ..
في الأخير سيختار القصر أو القاعة المقام فيها حفلة العرس .. ويدفع عربوناً ..
حتى يحين موعد الزواج ويكون قد تكلف بقيمة الكوشة وبوفيه الرجال والنساء إضافة إلى المفاطيح ..
ولا أنسى الطقاقة .. وكروت الدعوة .. وغيرها ..
وفي الأخير يكون أكثر المعازيم ربما قد أتوا من قبل أهل العروس .. !!
فيكون العريس الغلبان قد ملأ بطون معازيم أهل عروسه من راتب عدة أشهر من عمله ....
شقاء عدة أشهر ذهب في بطون معازيم أهل العروس ورقص نسائهم عبر أحسن الطقاقات ,,
من دون أن يشارك أهل العروس بأي تكاليف ....!!!!!!!
فهم الذين طلبوا المهر .. وعزموا الناس وأحبابهم .. وعشوهم .. ورقصوهم ..
ويأملون لابنتهم شهر عسل مميز .. وربما ألمحوا بهدايا يأتون بها من الخارج .. طبعاً على كيس العريس ..
وفي الأخير يريدون أن يتمم الله على ابنتهم بزواج هانئ لافيه ديون ولا منغصات .. !!!!
هنا ... السؤال ...::
هل للعريس الحق في أن يطالب بمشاركتهم المادية على الأقل في تكاليف العشاء ..؟؟
وأقول مشاركة فقط مع العريس وليس تحملها كلها .. وأن تكون عليهم تكلفة الكوشة على الأقل
خصوصاً إذا لم يزف فيها سوى ابنتهم ..؟؟!!
قال لي عريس من الحجاز : أنه إذا كان العريس يتكفل بكامل نفقات حفلة الزواج
فإنه يدفع نصف المهر فقط .. وإلا فيأتي أهل العروس للزواج كغيرهم من المعازيم من دون أن يكون
لهم أي معازيم من قبلهم ..
.... حقيقة .. وجدت أن الأمر مقبول هكذا ....!
مارأيكم ؟

روآآبي · 10-12-2007, 08:29

اولا

لاتبدأ تفكر بهالطريقه من قبل حتى ماتصير عروستك في بيتك

اجل بعد الزواج بيتضاعف هالنوع من التفكير اذا انت بتبدأ على هالحال

ثانيا

حسب كل قبيله
في قبايل ينقسم الزواج بين الاثنين وخاصة ايجار القاعه والعشا
واذا مااشترك احد الاطراف ,, مايكون له من كروت الدعوة الا شي يسير

وفي قبايل العريس عليه الذهب والزواج وفرش الشقه والعروسه ماعليها شي
ويختلفون حسب العادات
طبعا افضل شي انه تنقسم المصاريف بين العائلتين

بس مانقدر نقولك شي ,,,
االوالد والوالده هم اللي يفتونك اذا يصير عندهم هالشي او لا

اذا هذي عاداتكم ... اجل العروسه واهلها مالهم ذنب

وحتى لو كانت هذي عاداتكم انت مو خسران شي لو اقترحت هالفكره امام والدها يمكن يشيلون عنك

وانت توكل على الله وربي بيعينك باذن الله

المرفهة · 10-12-2007, 08:44

مبروك أخي والله يتمم لك بخير
وماشاء الله أختي سحايب ماقصرت
كفت ووفت
يفضل إنك تتكلم مع اهل العروسه بوقت كافي وتبلغهم
برغبتك في ان تتقاسم العائلتان نفقات الزواج
والله ييسر امورك يارب

(من جديد ) · 10-12-2007, 08:45

اولا يااخي معازيم اهل العروسة هم معازيمك
والعرس جزء كبير منه وجاهة اجتماعية
الناس ماحتقول بس عرس فلانة حتقول عرس فلان ولد فلان وضيفوا الناس

والناس كثير ماتعمل اعراس مبهرجة لاجل الوجاهة الاجتماعية
الوجاهة مو ببلاش

ثانيا
حاليا الوضع اختلف ببعض المناطق وعلى حسب العوائل
حتى بالمصريين مثلا الزواج نصفه على اهل العروس ونصفه على اهل العريس
خصوصا لو كان بمكان راقي وغالي
وعدد الدعوات يتوزع على الاسرتين يعني اللي يبي يفوشر يفوشر من عنده بدون ماتصير ان فلان دفع زيادة وفلان مادفع
وحتى الطاولا تتقسم على حسب القروش

هناك اعراف مختلفة حاليا
بعض الاسر مثلا يدفع العريس الصالة والذبائح
لكن الكوشة والمصورة وزينة الطاولات والبهرجة الاضافية تدفعها العروسة واهلها

وفيه اعراس العروسة تدفعها كامل من عندها يعني الزوجي يدفع المهر وياثث سكن الزوجية وحفل الزواج على العروسة واهلها

المواضيع هذه تخضع للاعتبارات الاجتماعية وللاعراف وللتفاهم بين الزوجين واسرتها
وكثير من العوائل خصوصا بالوقت الحالي تراعي حال العريس وظروفه
لكن الواحد يمد رجله على قد لحافه
ولا يبي بنت مثالية من بتاع كله وهو مستخسر يدفع اكل لمعازيمها
يروح يخطب وحدة ماعندها معازيم احسن له

عزيز العريس · 10-12-2007, 09:13

صباحكم هيل وزعفران ..

أسعد الله حياتكم على هذي الردود السريعة والمتفاعلة .. لكن أستغرب أنكم جميعاً وضعتوني أنني المقصود

في الموضوع مع أني تساءلت بشكل عام ..!! ماشاءالله فطنة حريم

عموماً لي عودة إن شاءالله قريباً مع ردودكم لأن الزملاء الآن في العمل ينادوني على القهوة والقدوع ..

( يمكن أجيبلهم طاري عن الموضوع ) وإلا أقول ماله داعي تماسيح وبيتفلسفون وبيكرهوني بالزواج ..

احساس عابر · 10-12-2007, 12:10

حسب كل منطقه

رمال البحر · 10-12-2007, 15:57

عندنا ماعلى أهل الزوجه أي شيء كله من الزوج المهر الشبكه تأثيث الشقه أو البيت وحفل الزواج

وأهل الزوجه مايشرطون حفل يعني كله وكرمه يعني اذا الزوج ميسور ووده يحط عرس كبير يحط محد راده واذا يبي سكاتي يخليه سكاتي وتكون عزيمه صغيره منه في بيت اهل الزوجه

يعني مانضغط على العريس وبنفس الوقت مانشارك في حفل الزواج

الوسـام السعودي · 10-12-2007, 22:52

عندنا كل شيء على الزوج .. المهر و الذهب و شنطة العروس و تكاليف الزواج و السكن اثاث السكن ... صار لي موظف سنه ، و جالس أوفر لكن الوالد و اخواني الكبار ما راح يقصرو معي بإذن الله ...

الله يوفق كل شاب و فتاه و يسهل عليهم أمور الزواج

عزيز العريس · 10-12-2007, 23:47

مرحبا بالجميع مرة أخرى ..

حسب ماتوقعت أن الأمر يختلف مع كل منطقة أو قبيلة أو عائلة ..

الأخت سحايب مافهمت وش قصدتي في كلامك هذا :

اقتباس:

لاتبدأ تفكر بهالطريقه من قبل حتى ماتصير عروستك في بيتك

اجل بعد الزواج بيتضاعف هالنوع من التفكير اذا انت بتبدأ على هالحال

ومشكورة يالمرفهة على الدعوة وأسعدني ردك كثير يامبدعة المنتدى ..

أما خطرفة كلمات فماشاالله عليك أحس أنك قدامي وتصارخين بوجهي .. شوي شوي يااختي انا قاعد اسأل بس ..

احساس عابر ورمال البحر والوسام السعودي .. مشكورين على الرد والله يوفق الجميع ..

بس بصراحة أنا أرى كعريس مبتدئ >>>>>>>> ناوي يصير خبرة

أرى أن العريس يكون عليه إيجار القصر ووجبة العشاء .. أما حفل النساء ومايحويه من الكوشة وطقاقة

والتكاليف الثانية من المفترض أن يكون مقسوم مابين الأهلين أهل العريس وأهل العروس ..

خصوصاً إذا لم تكن هناك زفة للعريس ..

فإذا كان أهل العروس يريدون زفة لابنتهم فعليهم تكاليف الكوشة والباقي ..

يعني العريس يدفع شي هو مو متهني فيه مثل الزفة .. أم العروس أكيد يبغى تنبسط ببنتها ..

طيب هي تتحمل وتتدفع .. يمكن العريس وده بالزفة لكن أهله رافضين ..

فما رأيكم من هذي الناحية ؟؟

لو أهل العريس رفضوا الزفة لابنهم من دون رغبته .. وأهل العروس يريدون الزفة لابنتهم من دون عريسها ..

هل عليهم مطالبة العريس بقيمة الكوشة والطقاقة ؟؟!!

تحياتي واحتراماتي ،،،

الوسـام السعودي · 10-12-2007, 23:57

والله نصيحتي لك .. أنا مثلك و الله أفكر في هذي المواضيع .. نصيحه لك حاول تتحمل كل التكاليف ، و بإذن الله الله يبارك لك في مالك و يسهل حياتك ... و لما تقول هذا الكلام لأهل الزوجه أو لها يمكن يأخذو منك موقف ...

هذا الزواج مرهـ في العمر .. حاول تخليه يمشي بأفضل طريقه ..

أتمنى لك الحياة الزوجيه السعيدهـ

رمال البحر · 11-12-2007, 03:59

اذا يبون لبنتهم زفه وانت ميسور وافق وادفع

واذا انت مومتوفر لك أموال زايده لاتكلف على نفسك وتدفع _ هم الله لايهينهم يسوون لبنتهم زفتين بعد مو زفه

(السفيرة) · 11-12-2007, 04:14

هذه الامور تتم حسب اعراف المجتمع وتختلف من مكان لاخر

وعلى قد لحافك مد رجلك

мόόη Ļίģħт · 11-12-2007, 05:39

اول شي مثل ماقالوا الاخوان تختلف حسب المناطق والعوائل .. وبعد حسب المادهـ للعائلتين

الزوج ملزوم بالمهر والتأثيث ..

والعرس حسب الاتفاق بين العائلتين .. اذا كانت عائلة الزوج ميسوره تتكفل بالزواج ..

والعكس اذا اهل العروس يحبون الفشخرهـ .. يحطون الزواج كبير ويدفعونه على حسابهم مما قميعوووووو

واحيانا يتشاركون العائلتين ..

والغالب ان الزواج على اهل العريس من أجار القاعه والبوفيه<< الاشياء الاساسيهـ

واهل العروس عليهم الزفهـ والكوشه والتصوير<< فاضيلها المعرس يدفع؟!! يلحق على أيه والا أيه !!!

تصدق هالموضوع دايم نفتحهـ ايام الكليهـ وكل وحدهـ تجيب من راسها راي

اللي تقول على العريس والثانيه تقول على العروووس.. ودايم نختلف ونسكر الموضوع

عالعموم اذا رسيتوا على بر عطوني خبر

تـ ح ـــياااااتي

عزيز العريس · 11-12-2007, 07:41

الشكر لكل من رد ..

عروس جديدة .. ياجعلك ماتصيرين قديمة .. قولي آمين ..

أعجبني ردك كثير ..

واللي كتبتيه - أقصد طبعتيه - بالأحمر هو اللي أنا مقتنع فيه خصوصاً إذا ماكان العريس بينزف ( مو ينزف دم ينزف لعروسه )

اقتباس:

والغالب ان الزواج على اهل العريس من أجار القاعه والبوفيه<< الاشياء الاساسيهـ
واهل العروس عليهم الزفهـ والكوشه والتصوير<< فاضيلها المعرس يدفع؟!! يلحق على أيه والا أيه !!!

اقتباس:

تصدق هالموضوع دايم نفتحهـ ايام الكليهـ وكل وحدهـ تجيب من راسها راي
اللي تقول على العريس والثانيه تقول على العروووس.. ودايم نختلف ونسكر الموضوع

طيب الأغلبية وش تتفق عليه عادة ..؟!!

اقتباس:

عالعموم اذا رسيتوا على بر عطوني خبر

وانتي شدخلك تعرفين ...... أمزح ..

ياحليلك .. تبين تفهميني أنك ماتقصديني بالموضوع وتتكلمين بشكل عام

وخربتيها آخر شي وقلتي إذا رسيتوا على بر خبروني خخخخخ

.... مشكلة لو كانت كل العرايس متنحات مثلك خخخخخخ

عموماً .. ابشري لو رسينا على بحر حتى راح أعلمك .. >>>>> خربها مثلك ههه

بس بصراحة أحس إني أنا اللي مارسيت للحين .. لأن الجماعة مقتنعين بأني راح أسوي اللي يبون

لأني - من البلاهة - هزيت راسي بالموافقة على الكوشة مع أني ماراح أنزف ..

بس تدرين ليش ..؟ والكلام للجميع ..

كل هذا الهم عندي بصراحة لأني ماأبي أحد ياخذ عني فكرة التردد والبخل ........... فقط هذا هو الموضوع ..
لأني حمداً لله من البداية كريم فوق اللزوم معها بس على شي يستاهل .. مو كوشة بكم ألف علشان خمس دقايق

وللعروس بس .. أخليها لأشياء أهم وأبقى ...

تشاو ...

Rawwaf · 11-12-2007, 10:41

اقتباس:

المشاركة الأصلية كتبت بواسطة رمال البحر

عندنا ماعلى أهل الزوجه أي شيء كله من الزوج المهر الشبكه تأثيث الشقه أو البيت وحفل الزواج
وأهل الزوجه مايشرطون حفل يعني كله وكرمه يعني اذا الزوج ميسور ووده يحط عرس كبير يحط محد راده واذا يبي سكاتي يخليه سكاتي وتكون عزيمه صغيره منه في بيت اهل الزوجه
يعني مانضغط على العريس وبنفس الوقت مانشارك في حفل الزواج

وأنا أقول ليش العنوسة ضاربه فوق

كل شيء على الرجل...يعني من وين يبي يدبر عمره

يجب تدخل المسؤولين في التخفيف على العريس .. من تخفيف المهور ونحوه.

احترامي

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

أهل العروس .. هل عليهم المشاركة في حفلة الزواج .. مادياً ؟