عالم الحياة الزوجية - منتدى

روووح الغالي · 06-03-2008, 12:41

السلام عيكم
انا عجبني تفاعلكم مع المشاكل اللي تنطرح وتبذلون قصارى جهدكم لحلها
واتمنى انكم تساعدوني بمشكلتي لان فعلا محتاجه لكم
انا متزوجه من 3سنين وعندي طفل
مشكلتي مع زوجي الله يهديه
ابحاول اقولكم كل اللي عندي وابيكم تحكمون بكل عدل
من تزوجت وحياتي كلها مشاكل وكل مشاكلنا حول الفلوس
وابطرح بعض المشاكل علشان تقدرون تحكمون
اخر مشكله صارت بيننا
انا صار لي يمكن خمس شهور او اكثر ابي كوايه بخار وكل شهر يقول الشهر الجاي
لحد ماصار الالسبوع اللي فات رحنا لمحلات الاجهزه
ودخلنا كل المحلات وبالنهايه قال ماعجبتني ولا اشتراها<بالله وش رايكم>وترى الحين ماعندي الا كوايه محترقه من تحتوقيمه كوايه البخار250 <ياربي ماادري وش اسوي فيه>
تخيلو كل مابغيت شي يرفض ولا يجيبه
وفي الاجازه بين الترمين كنت طفشانه من بعد الامتحانات
قلت له خلنا نسافر قال تبين نروح لدبي <انا من تزوجت خاطري اسافر خارج السعوديه>
لما قالي طرت من الفرحه
ولما شافني متحمسه للسفره قالي ادفعي 2000 ريالوهو راتبه 6000 شهريا
<تخيلو كني خويه ماني زوجته>
انا لما قالي كذا عصبت ورفضت ادفع قلت اذا بتسافر بي سافربي على حسابك
طبعا زعل لاني قلت هلكلام
انا تعبت نفسيا وصرت كل يوم انام وانا ابكي طبعا هو مايدري ولو درى مايهمه
وبعدها قعدت اترجاه واتطلبه
قلت احس نفسي مخنوقه احس بنفجر تكفى سافر بي اي مكان
وبعد ايام من الترجي قال بسافر بك لجده خمس ايام
قلت اوكيه قمت وجهزت الشنطه وهو طلع بعدها دق علي وانا قاعده اظبط الاغراض
قال خلاص بنخليه بكرى<يعني ماراح يبقي شي من الاجازه>
المهم انا جاني احباط المهم لما سافرنا جلسنا 3ايام ورجعنا <تخيلو قاعده اجهز الشنطه عالبالي اننا بنطول بالنهايه يوم رايح ويوم جاي ويوم جلسنا بجده>
لكن يوم صار فيه سفره لاصدقاءه انواع الحماس راح حلق وضبط نفسه وجاء عندي وقالي جهزي الشنطه انا يوم شفت حماسه لسفره اصدقاء عرفت اني مااعني له شي لان بسفرتنا ترجيته بالنهايه كل يوم يقول بكرى نمشي ومن حماسه لسفره اصدقاءه قالي ابسافربك الرياض الاسبوع الجاي ولما جاء الموعد قالي كسل نسافر<من جد يقهرني>
وغير كذا لما اقوله اشتري خضروات وفواكه ودجاج ودي اطبخ يقول مو لازم اصلا انتي ماتطبخين بس تتكلمين مع انه ماجرب
وهو مسكني جنب اهلي تخيلو اهلي يخلون لنا من غداهم يعني اذا رحت عندهم العصر الاقي امي مسويه لي غدا كل يوم تخيلو والله اتفشل يعني اكلي عند اهلي دايم احس اني صرت عله عليهم مع انهم ماعمرهم قالو شي ويفرحون بي
وهو ياكل برا عند اصدقاءه انا بصراحه متضايقه من هالشي
وصار فتره امي ترسل لنا غداء انا وهو وياكل عادي لكن بعد فتره قالي قولي لامك لاترسل لنا غداء
وفوق كل هذا جاف معي لابعد الحدود
اقصد بمعاملته معي بالبيت ماكني زوجته كني اخته
والله اني البس واتزيين له لكن ماعمره جاء هو باسني وقرب مني يعني اذا كنا جالسين عند التلفزيون او قالي كلام حلو او يعلق على لبسي
لكن اذا بغى شي بالفراش قرب مني بكل صمت وجلس يلمس بدون اي كلمه
وانا دايم اقرب منه اجي اجلس بحضنه وهو قاعد عند الكمبيوتر فيقولي بعدي شوي ابقراء <انواع البرود>
وبالفراش انا اتكلم واعلق وهو مايتكل ابد
يعني لو هو مشبعني عاطفيا كان اتغاضى عن مشاكله عند الفلوس
تكفون وش رايكم انا عن جد تعبانه لدرجه صار عندي القولون العصبي من الوضع اللي انا فيه
انا لو يحس فيني ويكفيني عاطفيا كان تهون على ولا تقولون كلميه لان اكثر من ثلاث مرات كلمته وترجيته وقلت اسلوبك معي مايصلح ودي احس بالامان وانا بحضنك
لكن لاحياه لمن تنادي
وش رايكم انا افكر انفصل عنه لاني اشوفه مستحيل يحاول يغير نفسه على كثر ماكلمته مافكر يحاول
ادري طولت عليكم لكن ماعندي الا انتم بعد الله يسمعني ويعطيني حل

بنت - نجد · 06-03-2008, 13:21

اختي الغاليه..

صدقيني صفة البخل بالرجال صفه صعبه لكن مو مستحيل تتغبر لكنها شغله لازم تكون بالتدريج

يمكن انت بالبدايه غلطتي وعودتيه تصرفين او توفرين له

لكن ممكن جدا تعودينه او تحسسينه انه هو الرجال ولازم تصرف

وممكن تقولين له خلنا مثلا نروح شوي نتمشى بالسياره بس لو خمس دقايق بعدين

وانتم تتمشون قولي له حاسه راسي ابي كفي

اليوم الثاني قولي فيه غرض ضروري خلنا نوقف دقيقه عند اي محل لاغراض البيت وخوذي غرض واحد بس

بعدين شوي شوي لين يتعود بدون ما يدري على الصرف

وانتي اختي وشطارتك

وبالنسبه لجفافه بالعواطف بنفس الطريقه وانشالله اختي اكون افدتك لو بالقليل

دمتي بخير

دفى همسه · 06-03-2008, 14:46

ماعندي تعليق بس اتصور انك من الحريم الي يلحون شوي

الرجل الحر · 06-03-2008, 15:14

أختي الكريمة
شوفي عن تجربة أقول نسبة كبيرة جدا من الرجال يتغيرون مع الوقت و هذا شيء مطمن لك على المدى البعيد بإذن الله
لكن مشكلتك الان لابد لها من حل وبرأيي أقول عليك أولا بالدعاء بأن الله يهديه ثم عليك بالاستمرار في الحديث معه بدون إلحاح حتى لا يمل و يصير ينحاش من البيت لكن عليك من الاستمرار بحكمة يعني نفذي له طلباته و أبسطيه ثم اطلبي منه ... و الله يوفق بينكم على خير
و على فكرة هذا حال أغلب الحريم مع أزواجهم

هذه جنتي · 06-03-2008, 15:16

يبدو لي ان زوجك في مقتبل العمر وتنقصة الخبرة ..
اقرئي مشكلة رانيا محمد ..(ارجو كم ساعدوني...)اقرئي ردي بخصوص الجانب المادي
ايضا ممكن تستفيدي من اراء الاعضاء..

م-سيف · 07-03-2008, 08:18

الله يعينك ...

مشكلة البخل مشكلة ....

زوجك لازم له المزيد من النصح منك ...

خذي الامور بهدوء ...

ناقشية على هداوه بدون تعصيب ... في اوقات روقانه ...

اكتبي كل ملاحظاتك في ورقة ... وراتبيها .... الاهم فالمهم ....

ووحده وحده .. أبدأي بالامور الصغيره .... وستنحل كل مشاكلك بحول الله ....

قد يكون لا يعرف كيف يعبرر عن عواطفه ... علميه !

غلاب · 07-03-2008, 08:48

عزيزتي ممكن مع الايام يتغير طبعه
ولاتكوني السبب بخراب بيتك وطلاقك لاسباب لها حلول كل مشله ولها حل البعض من الرجال وايضا النساء عنده برود وغير مبالاه بالعاطفه والجنس وبالحياة بصفه عامه وهذا من جهل الشخص وليس التعمد لفعل هذا الشي التمسي له العذر وبالنسبه للمصاريف والطلبات ايضا التمسي له العذر يمكن ظروفه الماديه صعبه ولا تتوقعي ان راتب 6000 او اكثر انها ممكن تكفي لائجار منزل ومصاريف منزليه ومصاريف سياره وملابس وغيرها بهذا الزمن التعاون بين الطرفين ظروري بالحياة الزوجيه لاتفكري بيومك فكري بالمستقبل وباولادك وببيتك وبزوجك كيف راح تغيريه الي الاحسن ولا تجعلي من الامور الصغيره عقد ليس لها حلول غير الانفصال والطلاق ... تحياتي

* متفائلة * · 07-03-2008, 11:42

اختي انصحك ان تتغاضي عن سلبيات زوجك اقبلي زوجك مثل ما هو علشان تعيشي
بالنسبة للحرمان العاطفي للاسف ااغلب الخليجيين حارمين زوجاتهم من الكلام الحلو
لانهم جافين بطبعهم ومو رومانسيين مو عارفين قد ايش الكلمة الحلوة تأثر على المرأة الله يهديهم
اما بالنسبة للطلبات اذا مضغوط وما يقدر فا اعذريه لازم تصبري وما تحمليه فوق طاقته وانتي ذكرتي
راتبه جدا عادي يعني اتحمليه بس اذا كان ما يعطيك علشان بخيل فا اسأل الله ان يعينك لان البخل
داء ماله دواء
اختي شيلي من بالك فكرة الطلاق لا تنسي طفلك ضحي علشانه انتي حاولي غيري زوجك ادعي
بصلاتك انه يسخره لك واستغفري الله كثير وراح تفرج بأذن الله تعالى

محرقيه كوول · 07-03-2008, 12:47

البخيل ماديا بخيل عاطفيا هاذي قاعده مشكله زوجك يبيلها وقت وصبر ولازم يكون عندك عزيمه علشان تغيرنه ولا تستلمين لاضعف الحلول الا وهو الطلاق

وعليك بالدعاء والصدقه

ابيك بجنون · 07-03-2008, 13:34

الله يكون بعونك حبيبتي
بصراحة اتوقع انك بتعانين كثير ومشكلة البخل مشكلة مو سهلة صدقوني وماتروح بسهولة او بالتدريج ولا قصدي اكبر همك بس هذا الواقع
ومع الاسف في مجتمعنا البنت بس تصبر وتتحمل وتحاول تغير من زوجها لحد مايشيب راسها وتجيها كل الامراض ومو شرط يتغير بعد...........
لكن الرجل اول مايحس ان البنت مضايقته او مو مرتاح معاها علطوووووول يطلقها او يتزوج عليها وخلاص تنتهي معاناته
ولاعنده ادنى استعداد انه يتحملها او يغير منها............

الله يصبرك بس

روووح الغالي · 08-03-2008, 08:20

اقتباس:

المشاركة الأصلية كتبت بواسطة بنت - نجد

اختي الغاليه..
صدقيني صفة البخل بالرجال صفه صعبه لكن مو مستحيل تتغبر لكنها شغله لازم تكون بالتدريج
يمكن انت بالبدايه غلطتي وعودتيه تصرفين او توفرين له
لكن ممكن جدا تعودينه او تحسسينه انه هو الرجال ولازم تصرف
وممكن تقولين له خلنا مثلا نروح شوي نتمشى بالسياره بس لو خمس دقايق بعدين
وانتم تتمشون قولي له حاسه راسي ابي كفي
اليوم الثاني قولي فيه غرض ضروري خلنا نوقف دقيقه عند اي محل لاغراض البيت وخوذي غرض واحد بس
بعدين شوي شوي لين يتعود بدون ما يدري على الصرف
وانتي اختي وشطارتك
وبالنسبه لجفافه بالعواطف بنفس الطريقه وانشالله اختي اكون افدتك لو بالقليل
دمتي بخير

الله يجزاك خير اختي وابجرب انشاء يفيد

روووح الغالي · 08-03-2008, 08:21

اقتباس:

المشاركة الأصلية كتبت بواسطة دفى همسه

ماعندي تعليق بس اتصور انك من الحريم الي يلحون شوي

الله يسامحك

روووح الغالي · 08-03-2008, 08:23

اقتباس:

المشاركة الأصلية كتبت بواسطة الرجل الحر

أختي الكريمة
شوفي عن تجربة أقول نسبة كبيرة جدا من الرجال يتغيرون مع الوقت و هذا شيء مطمن لك على المدى البعيد بإذن الله
لكن مشكلتك الان لابد لها من حل وبرأيي أقول عليك أولا بالدعاء بأن الله يهديه ثم عليك بالاستمرار في الحديث معه بدون إلحاح حتى لا يمل و يصير ينحاش من البيت لكن عليك من الاستمرار بحكمة يعني نفذي له طلباته و أبسطيه ثم اطلبي منه ... و الله يوفق بينكم على خير
و على فكرة هذا حال أغلب الحريم مع أزواجهم

جزاك الله خير اخوي واتمنى يتغير بس هو ماكان كذا معي يعني اول زواجنا اي شي ابيه يجيبه لكن الحين لاوالله تعبت منه...........

روووح الغالي · 08-03-2008, 08:25

اقتباس:

المشاركة الأصلية كتبت بواسطة هذه جنتي

يبدو لي ان زوجك في مقتبل العمر وتنقصة الخبرة ..
اقرئي مشكلة رانيا محمد ..(ارجو كم ساعدوني...)اقرئي ردي بخصوص الجانب المادي
ايضا ممكن تستفيدي من اراء الاعضاء..

الله يعطيك العافيه وانشاء الله اقرئ الموضوع

روووح الغالي · 08-03-2008, 08:27

اقتباس:

المشاركة الأصلية كتبت بواسطة م-سيف

الله يعينك ...
مشكلة البخل مشكلة ....
زوجك لازم له المزيد من النصح منك ...
خذي الامور بهدوء ...
ناقشية على هداوه بدون تعصيب ... في اوقات روقانه ...
اكتبي كل ملاحظاتك في ورقة ... وراتبيها .... الاهم فالمهم ....
ووحده وحده .. أبدأي بالامور الصغيره .... وستنحل كل مشاكلك بحول الله ....
قد يكون لا يعرف كيف يعبرر عن عواطفه ... علميه !

من ناحيه الفلوس هو يحس انه يصرف لذلك مايقتنع باللي اقوله

اما من ناحيه العواطف مااظن انه فيه احد بالدنيا مايعرف يعبرعن عواطفه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

هل هذه حياه زوجيه صحيحه..؟؟؟؟؟؟