عالم الحياة الزوجية - منتدى

الدبلوماسي · 25-04-2008, 00:26

اربعة ايام اجتماعات صباح مساء
وخلصت ولله الحمد كل اشغالي في جده ، باقي ( الشوبينق )
قلت مبدهاش لازم اروح افضل الاسواق عشان اشتري شوية اشياء
ما اقدر ادخل البيت وما معي هدايا للأولاد ، لازم ارجع للرياض ويدي مليانه
سالت قالو ا مالك الا اكبر اسواق الشرق الاوسط ( رد سي ) تلقى فيه كل شيء
رحت وانا امني نفسي بشراء كل مالذ وطاب
السوق من الخارج شكله يهول من الفخامة والوسع
دخلت المواقف وقرشت سيارتي وجيت عند الباب وعنده شابين احدهم مدرع باعتى اسلحة الدمار الشامل والآخر لابس بدلة زرقاء يجيب على استفسارات الناس
اخترت ابو بدله وسألته ( بكل برائة ) عن المحل اللي ابي اشتري منه اغراضي ( طبعاً محدد الاشياء اللي ابي اشتريها مسبقاً عشان ما اتعب في الدوران )
رد علي بكل أدب ( ممنوع الدخول )
رديت انا :- أفاااااااااااااا ليه ؟؟ افتكرت ان السوق يبي يقفل ومانعين الناس من الدخول
قال :- لانه للعوائل وممنوع دخول الشباب
رديت :- انا ماني من الديرة هذي ، وجاي ابي اشتري شيء للاولاد وبطلع على طوووول
قال :- معليش هذا النظام
قلت :- طيب خلني اكلم المشرف يمكن يسمح لي اذا عرف وضعي
قال :- روح البوابة رقم ( 1 ) هو هناك وان شاء الله يسمح لك
ما قصر دلني على البوابة رقم ( 1 ) اللي تبعد حوالي ثلاثة كيلو ، واخذتها كعابي الى ان وصلت وانا انهت من التعب . طلعت البوابة زحمه وواقف امامها ثلة من الناس ، يوووه كلهم يبون المشرف ؟؟
توجهت على ابو بدله زرقاء ( طلعو كلهم لابسين بدل زرق ) وسالته عن المشرف
قال :- أنا
قلت :- انا جاي من بعيد وابي اشتري شوية اشياء من المحل الفلاني وبطلع على طول ، ماني متأخر
قال :- ممنوع ، الدخول للعوائل فقط ، الشباب مسموح لهم يوم الاحد
قلت :- انا مسافر بكره الجمعه وما اقدر انتظر للأحد
قال :- لو سمحت ، قلت لك ممنوع
قلت :- اجل منت المشرف ، اعطني المشرف خلني اكلمه
قال :- تبي المشرف ، انتظر على جنب والمشرف بيجيك
قلت :- تضحك على من ؟؟ تلطعني على جنب ، ماني جاي من بعيد عشان الطع على جنب ، اقول اعطني المشرف خلني اكلمه ابي اتفاهم معه
تأزم الوضع وصارو الناس يطالعون هذي المسرحية ، والرجل صار يحمر بعيونه ويطالع في رجال الامن اللي واقفين على الباب ( معضلين على قول اختنا حور ههه ) يبيهم يتوطون في بطني
الليله خربانه من اولها ، انا تمسكت برأيي ، ابي المشرف يعني ابي المشرف
قلت :- كلمه في الجهاز الي في يدك خليه يجي
قال :- يابن الحلال لو سمحت ممنوع يعني ممنوع ، تبي المشرف انتظر على جنب وبلاش معابطة
قلت :- انت اللي لو سمحت ، كلم المشرف خله يجي ، يمكن يكون ارحم منكم ويتفهم موقفي
فجأه ظهر المشرف ، طلع من بين زحمة الناس اللي واقفين على البوابة ، وانفتحت اساريري
قال :- تفضل ، اي خدمه
علمته بوضعي وحالتي واعطيته بطاقاتي ( بطاقة الاحوال ، العمل ، الرخصة ، بنك الدم ، الصراف .... )
قال :- احنا ناس نطبق النظام ، والدخول ممنوع
مسكت انا على كلمة النظام ، وسالته عنها
قلت :- النظام ليه سووه ، مو علشان ينظمون الدخول ؟؟
قال :- الا ، وحددو ان الليلة للعوائل ، والشباب يوم الاحد
طبعاً اعطيكم فكرة عن شكلي ( شايبن ما فيني مطمع ، وما حلقت دقني لي ثلاثه ايام ، واللي بعاكسها بتقول ياربي لك الحمد )
قلت :- كل الانظمة فيها استثناءات ، وانا انسان علمتكم وين المكان اللي بروحه وطلبت منكم تدلوني عليه ، يعني هدفي معروف وغرضي شريف
قال :- عندي مية الف شخص داخل السوق ، ماني جالس اراقبهم
قلت :- وعندك مية الف كاميرا داخل السوق تراقب كل شاردة وواردة ، يعني اللي بيغلط بتكفشه كاميراتكم
لازلنا امام الباب والناس الداخلين والخارجين يطالعون فينا
كملت انا :- الحين انت حرمتني وحرمت مية الف شخص من الدخول بسبب عشرة شباب مشاكسين ، وكمان حرمت اصحاب المحلات في الداخل من الفلوس اللي في جيوبنا
قال :- الله يخليك انا مشغول الحين ، وعلمتك بالنظام ، تعال الاحد وانا ادخلك
قلت :- ماني قاعد للاحد ، رحلتي بكره العصر
قال :- طيب بكره ندخلك ، السوق يفتح بعد صلاة الجمعه ، يعني قبل ماتسافر مر علينا
قلت : تصرفني الحين ، وبكره يصير مثل هذا الموال
طلبوه في الجهاز يبونه في بوابة ثانيه ، اظن فيه واحد مزعج مثلي هناك ،
اعطاني بظهره ومشى
وانا رجعت الى فندقي العزيز اجر ذيل ..... الا كل الأذيال
ذيل الخيبة ، ذيل الاحباط ، ذيل الضغط ، ذيل السكر ، كل الذيول جريتها معي
تدرون وش احسن شيء حصل ( ان فلوسي ما صرفتها ) هههههههههههه
ملاحظة :- الدخول في هذا الموضوع للعوائل ، اي شاب ما معه عائلة يعطينا مقفاه

يسعدكم ربي

عروس الرياض · 25-04-2008, 00:33

والله قهر ............. بس أخوي عادتا الصباح يدخلون الشباب...لو رحت الصباح فيه أمل ..............

* لمياء * · 25-04-2008, 01:10

ههههههههههههههههههههههههههههههههههه

تصدق ضحكت من القهر ....... رحمتك والله ....

بس مافي الا هالسوق .....

وعلى قولك انك ماصرفت الفلوس ..... هذا همكم يالرجال تفرحون بالتوفير خخخخخخخخخخخ....!!

رقة مشاعر · 25-04-2008, 03:54

..

اقتباس:

ملاحظة :- الدخول في هذا الموضوع للعوائل ، اي شاب ما معه عائلة يعطينا مقفاه

ههههههههههههههههههههه

ضحكتني العبارة الاخيرة

حسيت انه جاتك حساسية وكآبة منها

يا ابن الحلال

وربي حنا البنات نغبط الشباب اللي مالين الاماكن والارصفة

وما خذين راحتهم اي مكان ممكن يتكون فيه

والبنت ما تلقى ممشى محترم تشم فيه هواا بدون مضايقات ومعاكسات

واذا كانوا عايلة وجلسوا بمكان معزول اشوي

صار (كتف امي طالع ) على قولة السدحان بطاش

يعني كلنا بالهوا سوا

..

نبـ الروح ـض · 25-04-2008, 04:43

هههههههههههههههههههه
اجل صرت شباب ومافيه الا عوايل
عن جد موقف يقهر بس دايم الخير يخص والشر يعم
والله انه باسك باااس غصب طيب تبي المشرف
طب كان قلت تعال معي ماراح اتأخر
بيقولك انا موفاضي لك
قله احسبني عامل النظافه خخخخخخخ
يالله احنا نحسدكم وانتوا تحسدون العوايل
الله كريم بس ماعلمتنا تقول كانك ماشريت هدايا
مايصير لازم واكيد شريت شئ للبزوره هههههه

في حفظ الله

** عازف ** · 25-04-2008, 14:22

وخرررر

اقولك وخررررر

وخر عن وجهي يامشرف
ياخي وش ذا

حتى في موضوع الدبلوماسي جاي تقول لي للعوائل فقط

هههههههههههههههههههههههههههه

والله ياعم دبلوماسي أسألني عن هالسوالف

تصدق الظاهر لي 3 سنوات مادخلت سوق الا مرة واحده دخلت المملكة وبالقوة بعد عشان أختي غصبتني

لكن أسألني عن أسواق البحرين والا أسواق دبي أفصفص لك محلاتها الحلوووة فصفصه ...

بلا مبالغة 3 سنوات ما أتذكر إني تسوقت من سوق سعودي والسبب إني شااااب

يعني المفروض آكل لي تبن وانثبر في بيتنا والا اذا بغيت اتسوق ارووح اطق امها مشوار 400 كم وجوازات
وسع صدرك انتا سعودي واحمد ربك ان الاستراحات الى الآن مسموح للعزاب بدخولها...

فارسM · 25-04-2008, 15:09

يقولون عوايل وكأننا مو عيال عوايل . الله المستعان يجي الاجنبي لابس جينز ويدخلونه وانه لابس ثوب ويرجعونك يعني انت لابس ثوب التخلف . والله العظيم انا على فكره عمري 40 سنه وعندي اطفال وتايب عن الغزل ومره تواعدنا انا وصديق لي اردني الجنسيه تواعدنا نتقهوى في الفيصليه على الساعه 11 ورحت قبله ومنعوني من الدخول واثناء وقووفي عن الباب جاء صديقي ودخل قدامي وهو قاعد يغمز لي بعينه ويضحك وكان دائما يقول لي ان الجينز احسن من الثوب . طبعا تهاوشت مع السيكورتي ورجع صديقي ورحنا مكان ثاني . الله المستعان

نديم الشوووق · 25-04-2008, 16:00

عااااااااااااااادي عزيزي نحن في مملكة الأنسانيه!!

شوف في مثل هالمواقف مالك الا حل من هذووول:

_1تخلي وجهك قوووي مع اي طقة بنات داخلين السوق وتطلب منهم بس يدخلوك

معاهم وداخل لا تعرفهم ولا يعرفونك!!

2_او تشوووف أحد من هالبائعات اللي بجوار هالمجمعات وتقومها من مكانها تضبطها بخمسين ريال بيدها

وتضبط كشختها وتاخذها بيدها وتدخل

3_او تعمل لك لووك أجنبي لبناني مثلا" وتتميلح قدام السكيورتيه وتطق الحنك معاهم بأنك صاحب محل

بالسوووق وبدك تشووف محلاتك وتشييك عليها!!

4_او تتخفى بلوووك بنقالي عامل نظافه وتشيل بيدك عصاة مكنسه وتحط علبتين زيت فرامل على شعرك

وتروح وتدردب راسك عند البوابه وتدخل كأنك تكنس الأرض

5_او تتنكر بزي رجال الهيئه ....بس مشكله يبي لك عسكري...محلوله نفس البنقالي اللي استعرت

بدلته لبسه لبس عسكري وادخل انت وأياه للسوق!!

الحلول كثيره يا أخوووووي بس أنت الله يهديك تهووول الأمور ونحن في مملكة الأنسانيه!!

ملحووووظه مهمه:

وربي داخل الموضوع وأمي معااااااااااااي وهذي هي خشتها جنبي...تتميلح

عذبة الخاطر · 25-04-2008, 23:01

ادري دبلو وانت تكتب الموضوع شكلكــــ جذي

بصراحـــــــــــــه مو دفاع عن الشباب،،لكن مانلومهم لو كل واحد يسافر ويهج والسبب كل ماراحوا مكان عوايل وعوايل ليش بياكلون العوايل،،وهو يعني من وين مو ولد عايله

المغازل بكل مكان ،يعني البنت لا بغت تتسوق تاخذ محرم معاها وانتهى الموضوع،،يعني الشاب ان ماغازل بهالمجمع بيغازل بغيره،،خخخخخخخخخخخخ

عندك مثلا هالصوره،،<<<<<<<<<<<<<<

يعني حرااااااااااااااااااام!! حتى بالمشي

الله يكون بعونكـــــــــــــــــم!!

حظي حلو · 25-04-2008, 23:08

في مثل يقول ولاد الحرام ما خلوش لاولاد الحلال حاجة

وبناء على هالمثل يكرشونكم من الاسواق الصالح والطالح مايفرقون بينهم ...

بس ان جيت للحق جدة مليانة اسواق ما تمنع دخول العزابية ابدا ,,,,

تضل في اسواق موجودة في السعودية مفتوحة طول الاسبوع عائلات وعزاب ولا تفرق..

~ كبرياء انثى ~ · 26-04-2008, 02:00

اهم شئ اخوي الدبلوماسي عسى
بس اشتريت هدايا للعيال وامهم
الي هي المسكينه الي ارتفع ضغطها
لودورت لك حجه عند الباب وسحبتها معك قلت هذي زوجتي

تحياتي

الدبلوماسي · 26-04-2008, 07:16

اقتباس:

المشاركة الأصلية كتبت بواسطة عروس الرياض

والله قهر ............. بس أخوي عادتا الصباح يدخلون الشباب...لو رحت الصباح فيه أمل ..............

صباح اليوم التالي كان جمعه
وما فيه محلات تفتح صباح الجمعه الا محلات التميس والفول وكبدة الحاشي
ما تشوفين انه ظلم لما تحددين فترة للشباب وفترة للنساء وفترة للشياب ههههههههههههه
من متى كنا في السعودية نضع اوقات لكل فئة في المجتمع وكأنهم لو التقو في وقت واحد بيتذابحون ؟؟
يسعدك ربي يالعروس ( صرتي عجوز وباقيه عروس ههههههه )

الدبلوماسي · 26-04-2008, 07:23

اقتباس:

المشاركة الأصلية كتبت بواسطة ليال الحب

ههههههههههههههههههههههههههههههههههه
تصدق ضحكت من القهر ....... رحمتك والله ....
بس مافي الا هالسوق .....

وعلى قولك انك ماصرفت الفلوس ..... هذا همكم يالرجال تفرحون بالتوفير خخخخخخخخخخخ....!!

زين انك رحمتني ، ليتهم رحموني مثلك ( ارحمو من في الارض يرحمكم من في السماء )
وفيه اسواق كثيرة ، لكني انا ابي هذا السوق ، وش المانع ؟؟ المفروض انه ما يمنع احد دام انه ماسك ادبه ويبي يشتري
السوق فيه رجال امن منتشرين في كل مكان ، هذا غير الكاميرات اللي مركبينها في كل ركن من اركانه
اما من ناحية التوفير ، ما انكر اني تهللت اساريري لما رجعت وقريشاتي في جيبي ، هي الميزة الوحيدة اللي طلعت بها من هالفلم الهندي ههههههههههه
يسعدك ربي

الدبلوماسي · 26-04-2008, 07:28

اقتباس:

المشاركة الأصلية كتبت بواسطة رقة مشاعر

ههههههههههههههههههههه
ضحكتني العبارة الاخيرة
حسيت انه جاتك حساسية وكآبة منها
يا ابن الحلال
وربي حنا البنات نغبط الشباب اللي مالين الاماكن والارصفة
وما خذين راحتهم اي مكان ممكن يتكون فيه
والبنت ما تلقى ممشى محترم تشم فيه هواا بدون مضايقات ومعاكسات
واذا كانوا عايلة وجلسوا بمكان معزول اشوي
صار (كتف امي طالع ) على قولة السدحان بطاش
يعني كلنا بالهوا سوا

تصدقين يارقة
والله اني احسد الاجانب اللي عايشين في بلدنا
شوفيهم في الاسواق والمنتزهات ، جنب بعضهم وما صار لا مشكله ولا هم يحزنون
احنا السعوديين مشاكل من قبل ما نطلع من بيوتنا ومن بعد مانطلع الى ان نرجع لها
كل حياتنا اصبحت شك في شك
من جد كتف امي طالع ههههههههه
يسعدك ربي

الدبلوماسي · 26-04-2008, 07:33

اقتباس:

المشاركة الأصلية كتبت بواسطة Ms Slide

هههههههههههههههههههه
اجل صرت شباب ومافيه الا عوايل
عن جد موقف يقهر بس دايم الخير يخص والشر يعم
والله انه باسك باااس غصب طيب تبي المشرف
طب كان قلت تعال معي ماراح اتأخر
بيقولك انا موفاضي لك
قله احسبني عامل النظافه خخخخخخخ
يالله احنا نحسدكم وانتوا تحسدون العوايل
الله كريم بس ماعلمتنا تقول كانك ماشريت هدايا
مايصير لازم واكيد شريت شئ للبزوره هههههه
في حفظ الله

اي والله رجعت وانا ما اشتريت شيء هههههههههههه
لما وصلت الرياض اخذتهم ووديتهم محل ابو ريالين واشتريت لهم كم هديه
بدل ما اصرف 400 ريال في جده ، صرفت 40 ريال في محل ابو ريالين بالرياض وانتهت المشكله
يسعدك ربي

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

الدخول للعوايل ، اللي ما معه عائلة يقلب وجهه