عالم الحياة الزوجية - منتدى

ksa_10 · 07-05-2008, 12:16

السلام عليكم ورحمة الله وبركاته

صباح ومساء الحب للرومانسيين والحالمين

بالبدايه أقول الله يعين واحد يدور عروس , راح يكون تحت ضغط نفسي رهيب جدا جدا

ناس رفضوه , وناس سألوا عنه , وناس يتهربوا منه .... الخ .

وتدور الاسئلة براسه : ليش رفضني ؟ وش ناقصني ؟...الخ .

كثير منا تكون له شروط ( أبسط حقوقه ) ولكن بعد دخوله في معترك الضغط النفسي يتنازل تدريجياً عن أغلب شروطه , وما يتحسف الا بعد ما يطيح الفاس بالراس

يظلم نفسه ويظلم بنت الناس معه .===> وش ذنبها المسكينه انها مو مزاجك !!!

عموماً

نصيحتي لكل شخص نوى الزواج , لا تتنازل عن اي شرط تبيه في زوجتك ( نحيفة , سمينة , جميلة , سمراء, بيضاء ...الخ) .

النصيحة الثانية عند الرؤية الشرعية

بسم الله :

قبل ما تشوفها أكيد راح يكون عندك تصور مسبق عن البنت

أنصح أي شخص أنه يكتب شروطه الأساسية بورقة قبل ما يدخل على البنت ويشوفها

مثلاً :
أبيها بيضاء
أبيها نحيفة ما تكون سمينة
أبيها جميلة

_______________________

بعدين أبيك تحط هالنقاط وما تجاوب عليها الا بعد الشوفة :

التطابق مع شروطي الاساسيه

الراحة النفسية من شكل البنت

أهلها وأشكالهم وارتياحك لهم ( هل يصلحون خوال عيالك) .

عيوب البنت
_________________________

اذا كان اهلك راح شافوا البنت علمهم شروطك وقلهم لا توصفون لي البنت , ولكن اسألهم هل هي تناسب شروطي اللي يعرفونها والا لا ( لأنك تبي تشوفها فخل الحكم لك بدون تأثير منهم ) .

لأنه يا شباب الحريم ينظرون نظرة غير نظرتنا كرجال

الحريم يركزون على الملامح ( لازم خشمها كذا , وعيونها كذا , وافمها كذا جسمها كذا ..الخ )

اما الرجال لا , نظرتهم الشكل العام مع بعض ( يا حلو يا شين ) يا اسود يا ابيض

بعد كذا اذا رحت وتوكلت على الله ورحت تشوف البنت

أنتبه ثم أنتبه أنه يكون بالمجلس أكثر من رجال واحد معك , وأنصحك تطلب منهم أنه يكون رجل واحد فقط ( والعوايل الواثقه بجمال بنتهم تخلي اصغر الاولاد هو اللي يدخل مع أخته ) وبالنهايه هالشي من مصلحة بنتهم .

لأنك راح تكون محرج منهم , وكل واحد يناظرك بعين , وأنت خجلان من الجو العام اللي صاير .

الشي الآخر : أول ما تشوف البنت تأكد من أول نظرة انها مو حلوة , لا تستغرب هالشي

السبب لأنك راسم لها صورة ملاك في عقلك الباطني , فطبيعي أنها تكون مختلفة عن اللي في بالك

صد عنها , همن أرجع شفها النظرة الثانية راح تكون مختلفة عن أول نظرة شفتها فيها .

أهم ما بالموضوع عزيزي الخاطب :

أرجوكم ركزوا على هالنقطه :

عليك أتخاذ القرار وأنت في مجلسهم وأنت تناظرها

ولا تشاور أي مخلوق حتى أهلك وخواتك وأمك في البنت

يا أبيض يا أسود

ولو كنت متردد , أنصحك ما تظلم البنت , وقرر أنك ما تبيها وأدع الله يرزق البنت بمن هو أفضل منك .

مهب عيب انك ترفض البنت , العيب أنك تظلمها طول عمرها .

أتمنى البنات ما يزعلون من كلامي , ولكن هذا من مصلحتهم , المفروض اللي ياخذها يكون مقتنعه 100% من جمالها

(والا لا ياخذها ويوريها الويل والجحود زي ما حنا شايفين بالمنتدى 0 وشلون ألفت نظر زوجي ووشلون..الخ)

بالنهاية أرجع لبيتكم وصل الاستخارة وافتح الورقه اللي فيها شروطك الاساسيه

أول ما تكتب : أكتب الاشياء اللي سبق قلناها

وتخيل نفسك تطبق السلبيات والايجابيات

تأكد من شي :

أذا كنت معجب بالبنت راح تتغير شروطك 100% وداخلياً تقول موافق حتى لو هي مو مثل شروطي .
واذا كنت متردد او فيه نقطه ما حبيتها فيها ( كلونها , أو جسمها ) فاستخر الله ولا تاخذها .

فيه نقطه حبيت اختم فيها كلامي :

نصيحة أخوية :

كل ما كانوا أهل البنت دقيقين جداً ويسألون عنك ( ويطلعون مريرك) ,

كل ما كانت البنت غاليه عليهم وتستاهل أنها تكون زوجتك

أما ذا تمت الأمور بسرعة عجيبة ورهيبه ,ولا سؤال ولا شي

فعليك التأكد من خفايا الوضع , فلا تقول أنهم واثقين فيني وبأخلاقي

ما ابي أوضح لأن الكثير من البنات راح يزعلون من كلامي

تحيااااااتي

المــسـتشــار · 07-05-2008, 12:26

شكرا على الموضوع

ابوتماااام · 07-05-2008, 15:04

جزاك الله خير اخي الكريم كفيت ووفيت كلامك سليم وماعليه غبار

روآآبي · 07-05-2008, 21:53

موضوع جميل ونصائح اجمل بالرغم من تحفظي على بعض النقاط
لكن بشكل عام هدف الموضوع واضح واتمنى الشباب يسفيدون من خبرة اخونا الكريم

واحب انوه .. بان اخذ الشروط بيسر ومرونه هو افضل من التمسك الشديد بكل المواصفات المرغوبه

فروووووحه · 08-05-2008, 00:40

عفوا عندى سوال واتمنى الاقى جوابه لو كان هناك رجل خطب من خارج نطاق العائله ورفضوه وبعد كذا خطب من العائله والعائله لانها عارفه ولدها ماتاخرت بالرد يعنى يومين وقالتله موافقين وهو طلب يشوف البنت علما بان البنت معروفه بالعيله كلها انها ملكه جمال احلى بنات العيله وهو اكيد انه شافه بالغلط بحكم الزيارات العائليه اللى بين الاسرتين وبعد اهل البنت ماوافقو عليه ماتشرطو علما بان اى احد بمكان اهل البنت اقل شى يطلبونه بيت لبنتهم بس كان كل ماسال الولد عندكم شروط ايش رايكم فى كذا وكذا الاب يقول البنت بنتكم وبس هل تعتقد ان الخاطب هذا بيسترخص البنت مع ان البنت غااااااااااااااااااااااليه عند امها وابوها وعند نفسها..........ارجو الرد ولك جزيييييييييل الشكر

تحياتى
فروحه

صدوووق الود · 08-05-2008, 01:45

صار لي ثلاث شهور ادور وتعبت واهلي تعبوا معي شفت ثلاث بنات ولا صار نصيب

أثرت نقطه اخوي انك اذا ما ارتحت لاهلها وهذي صارت معي مره البنت اعجبتني لكن
سبحان الله ما ارتحت لأبوها واستخرت وسألت عنه الجيران وطلع ظني في محله

حاليا بديت اتنازل عن بعض الشروط ومنها الشعر الطويل

اكتشفت اني كل ماحصلوا الاهل البنت الي تنطبق عليها شروطي يلقون شعرها قصير
او شي ينقص والحلو مايكمل

المشكله الي مقلقتني اني اذا حصلت البنت الي في بالي كيف اتأكد ان اخلاقها عاليه
وصاحبه عقل راجع تقدر تتحمل مسؤولية زوج وبيت
يعني حنا يالشباب مع احترامي للجميع نركز على الشكل وننسى
امور ثانيه أهم من الشكل

دعواتكم ان ربي يرزقني بزوجه صالحه تعوضني صبري

مع صادق الود

عبود الشحي · 08-05-2008, 02:21

تعرفو ليش؟؟
بعضهم يختار الجمال والفلوس لاغير مب مهم اخلاقه لو واحد سكير بس حليو بيوافقو

الحرف الناطق · 08-05-2008, 05:24

بارك الله فيك ,, معلومات أكثر من قيمة

ولا تنسى أن تظفر بذات الدين تربت يدآك

ksa_10 · 08-05-2008, 14:55

اقتباس:

المشاركة الأصلية كتبت بواسطة فروووووحه

عفوا عندى سوال واتمنى الاقى جوابه لو كان هناك رجل خطب من خارج نطاق العائله ورفضوه وبعد كذا خطب من العائله والعائله لانها عارفه ولدها ماتاخرت بالرد يعنى يومين وقالتله موافقين وهو طلب يشوف البنت علما بان البنت معروفه بالعيله كلها انها ملكه جمال احلى بنات العيله وهو اكيد انه شافه بالغلط بحكم الزيارات العائليه اللى بين الاسرتين وبعد اهل البنت ماوافقو عليه ماتشرطو علما بان اى احد بمكان اهل البنت اقل شى يطلبونه بيت لبنتهم بس كان كل ماسال الولد عندكم شروط ايش رايكم فى كذا وكذا الاب يقول البنت بنتكم وبس هل تعتقد ان الخاطب هذا بيسترخص البنت مع ان البنت غااااااااااااااااااااااليه عند امها وابوها وعند نفسها..........ارجو الرد ولك جزيييييييييل الشكر
تحياتى
فروحه

لا أبداً أختي فهمتيني غلط انا ما اتكلم بمرحلة بعد الزواج او قبل نجاح الزواج

هالكلام ما يشمل زوجين يعتبر زواجهم ناجح ( لاتحكم على الزواج الناجح قبل مرور سنه )

أنا هذي خلاصة تجربتي وما راح أقول تجاربي اللي أحتفظ فيها لنفسي

المقصود بالكلام هنا أيام الخطبة , أنا أقول في بعض الأمور تكون فيها ريبه وشك وتدعو العاقل بأنه يتأكد ويسأل من البنت وصحتها واخلاقها .( مثل ما للبنت وأهلها حق أنهم يسألون عن الرجل )

لما اهل البنت يشترونك ويشترون أخلاقك ما يعني هذا أن البنت فيها عيب دائماً , لا طبعا

وهذي بنظري تحسب للبنت و بقدرها وبحترمها وكذلك أهلها لأنهم شروني وقدروني .( هذي ميزة للبنت لعلمك )

ولكن يمكن تكون الدعوى فيها غش ويبغون يتمون الأمور بأسرع وقت ؟؟ الله لا يبلانا

واحنا كلنا بجتمع واحد , وصارت سواليف غش وتدليس ومعروفة بين الناس وفيه شباب صاروا ضحايا غش

لو كانت البنت فيها عيب , وأهل البنت يبي يزوجونها , ما راح يسألون عن الرجال , ويتمون الزواج بأسرع وقت ممكن حتى ما يدري الخاطب .

أكرر كلامي أنه دعوى للتريث والتمعن والسؤال

الحياة مهب لعبة , لا تستحي أن تسأل عن زوجتك .

تحياتي

ksa_10 · 08-05-2008, 15:07

اقتباس:

المشاركة الأصلية كتبت بواسطة صدوووق الود

صار لي ثلاث شهور ادور وتعبت واهلي تعبوا معي شفت ثلاث بنات ولا صار نصيب
أثرت نقطه اخوي انك اذا ما ارتحت لاهلها وهذي صارت معي مره البنت اعجبتني لكن
سبحان الله ما ارتحت لأبوها واستخرت وسألت عنه الجيران وطلع ظني في محله
حاليا بديت اتنازل عن بعض الشروط ومنها الشعر الطويل
اكتشفت اني كل ماحصلوا الاهل البنت الي تنطبق عليها شروطي يلقون شعرها قصير
او شي ينقص والحلو مايكمل
المشكله الي مقلقتني اني اذا حصلت البنت الي في بالي كيف اتأكد ان اخلاقها عاليه
وصاحبه عقل راجع تقدر تتحمل مسؤولية زوج وبيت
يعني حنا يالشباب مع احترامي للجميع نركز على الشكل وننسى
امور ثانيه أهم من الشكل
دعواتكم ان ربي يرزقني بزوجه صالحه تعوضني صبري
مع صادق الود

بس ثلاث شهور هههههههههه

الله يعينك

توك يا حبيبي وشكلك راح تتنازل عن شروط كثيرة

الشي الثاني

أخوي فيه شروط سهله , وفيه شروط تعجيزيه

يعني أنت تبي شعر طويل ===> طيب اذا اخذتها أنت خلها تطول شعرها يعني هذا مهب عيب

انا اقول تمسك بشروطك اللي تبي تذل بنت الناس فيها

كثير من الشباب يبي بنت بيضاء البشرة مثلاً , همن مع لعجلة يقبل ببنت أقل بياض ويتندم طول عمره والمشكلة أنه يبي يتعب بنت الناس معه

نفس الشي للي ياخذ قصيرة أو سمينة أو اهلها ساكنين برا ديرته ...الخ .

بالنسبة يا عزيزي للاخلاق أتمنى أنك تركز معي بهالنقطه

شرع الله البكارة أنك تتاكد من شرف البنت

بعد كذا البنت أنت تربيها , والعود على أول ركزة

ولا تبحث عن ماضي البنت ووش سوت ووش فعلت

أنت عليك من اليوم والمستقبل وبس

وصدقني البنت اللي زوجها طبيعي مستحيل تخون وتغامر بحياتها علشان اشياء تافهه

أنت أهم ما عليك أنها تحترم والديك واهلك , وطبعاً تحترمك , ومحافظة على صلاتها ودينها

والباقي سهل وهو راجع لك أنت

اذا شفت فيها صفات شينة فأنت من يغيرها

مثلاً شفت البنت راعية نقل كلام , وهرج زايد
انت اللي تقومها وتعدل من تصرفاتها خصوصا ان البنت عجينة تعدلها مثل ما تبي بالحق

لا تنهى عن خلق وتأتي مثله .......... عار عليك إذا فعلت عظيم

ويا ليت أيميلك يا عزيزي

ksa_10 · 08-05-2008, 15:12

اقتباس:

المشاركة الأصلية كتبت بواسطة ســحايب

موضوع جميل ونصائح اجمل بالرغم من تحفظي على بعض النقاط
لكن بشكل عام هدف الموضوع واضح واتمنى الشباب يسفيدون من خبرة اخونا الكريم

واحب انوه .. بان اخذ الشروط بيسر ومرونه هو افضل من التمسك الشديد بكل المواصفات المرغوبه

والله أنا معك يا اختي , ولكن الأهم عندي أنه كثير من الشباب يتندم على شي , والمصيبة أنه يذل ويتعب بنت الناس

أنتي سمينة , أنتي دبه , أنتي سمراء , أنتي قصيرة !!!!

طيب أنت شايفها وراضي ؟؟ ليش تعذب بنت الناس معك ؟

وانا ما قلتها ألا خوف على البنات

بالنسبه للتنازل عن الشروط أنا بردي السابق نصحت اخوي صادق الود بهالشي مثل قضية الشعر

وأكرر أنه فيه شروط زائلة , واذا اعرست شفت أن ما لها معنى .

شاكر لك مرورك وردك الأجمل مشرفتنا الكريمة

ksa_10 · 08-05-2008, 15:14

مع الشكر لمرور الاخوان جميعاً

تـنـاهيـــــ عشق ـد · 08-05-2008, 16:06

مع اني بنت لكن انا الي اشوفه ان اهم شي النظره الشرعيه بالنسبه للشاب او البنت
لاان بهالنظره يمكن يكون ارتياح ويمكن يكون لا
وعشان بعدين ماينظلمون اثنينهم وهذا الحاصل عند الكثير
يعني يستحي مثلا يقول ما ابيها وبعدين يظلمها
او هي مثلا ما ترتاح له وفي النهايه تنظلم معاه
انا اشد على ان النظره الشرعيه مهمه مهمه مهمه لدرجه كبيره
وانا مستغربه ان البعض ما يقبلون بالنظره الشرعيه ليه ما ادري ؟

roOo7 · 09-05-2008, 01:47

نصيحة أخوية :

كل ما كانوا أهل البنت دقيقين جداً ويسألون عنك ( ويطلعون مريرك) ,

كل ما كانت البنت غاليه عليهم وتستاهل أنها تكون زوجتك

أما ذا تمت الأمور بسرعة عجيبة ورهيبه ,ولا سؤال ولا شي

فعليك التأكد من خفايا الوضع , فلا تقول أنهم واثقين فيني وبأخلاقي

ما ابي أوضح لأن الكثير من البنات راح يزعلون من كلامي

\

يسلم ربي عقلك .... ويكثر من امثالك ^_^

حنونة محتاجه حنين 1 · 09-05-2008, 03:01

هلا وغلا
كلامك صحيح بـــس على الرد بسرعة !
طيب وين الاخلاق والجوهر قبل المظهر
اوكي عجبت اخلاقها امك هل هي نفس تفكيرك
انا في رايي انه الشكل شي مو مو كل شي
واساسا اذا حبها وحبته بشوفها ملاااااك
ولا ياخذ وحده لا يطاق يناظرها ولا ياخذ سمرا وهو يشوف البياض اساس الجمال

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

&&نصايح قبل الرؤية الشرعية لخطيبتك &&