عالم الحياة الزوجية - منتدى

شيهانه كويتية · 25-05-2008, 12:22

سؤال لكل تميسيح عزوبي .. يتسدح بالملحق ؟
هل تنام على بطنك ؟ او تخم الوسادة بالليل ؟ او تعفس الكنب وتعضه وتسعبل عليه وانت نايم .. او تنام على الكنب وانت تقرأ الجريده ....او تنام ويطلع سرك ستر الله سرك.
إذا كانت الاجابة بنعم فإن
كل هذه اعراض لرغبة جامحه وكامنه بالزواج وان ما تلاحقت عمرك راح يجي اليوم اللي يقول فيه الوالد لك :
" الله لا يبارك في الساعة اللي جبنا فيها شغاله ".
عزيزي العزوبي : <<< عبارات اسبوع العزوبيه <<< على غرار اسبوع الشجره.
لا تتخذ قرار الزواج إلا وانت
في حالة هدوء تااام بعيدا عن الاثارة والعواطف الجياشه ..
مو تشوف فيديو كليب بعدها تطمر لأمك وانت مشبك اصابعك ومميل رقبتك وتقول ( دوروا لي ابي اعرس ) ، ابي اكمل نصف ديني .
مع اني ما ادري عنك ونصفك الاول فما بالك بالنصف الثاني.
يا نصفي الثاني معقوله تنساني
ومن يوم تقول الوالده خلاص بندور لك ، تصير ذاك الشاب الحبيب الرحيب السمح اللي بااااله طويل.. ما يتأفف إذا وصلهم مشوار ، و يوصلهم للزواجات بكل رحابة صدر .. ويسألهم اول ما يركبون طالعين من العرس ومنتهية لياقتهم من المطامر.. هاه بشروا ؟
عسى لقيتوا نصفي الثاني >>>>> تكفى يا وائل كفورى ..
قبل ان تتخذ قرار الزواج .. رح صلح شاهي وجب لك مركى وتعال اسمع وش باقول لك . لأن الموضوع طوووويل وانصح اللي فاتورتهم عاليه يقطع الخط ويقرأ .<<<شايله همكم
ستقتصر الاستشارات على الشباب .. و يمكن ما اقدم استشارات للنساء خوفا من انكم تقولون ( ملكعه ) وفيها مدري شنو فيها ..
واتهم بالزندقه والدشاره بعد هالايام الواحد ياخذ حذره يقولون ان المشمش كاثر والطماط راخص. <<<<<< ما يحب السياسه.
راح اركز على الشباب .. إلا اذا الحيتوا يا البنات اني اعطيكم استشاره مجانية.<<قومي بس قزمي
اولاً : مرحلة ما قبل الزواج :
كيف تعرف انك استويت عزيزي الشاب وحان قطافك من بنت الحلال :
7
7
أ : علامات الرغبة في الزواج عند الشاب :
من خلال ملاحظتي للشباب والتغيرات الفسيولوجيه التي تحدث لهم خلال الفترات العمريه .. فقد سجلت الملاحظات التالية:
1 - إذا بديت تحب الاغاني وتسمعها بمخمخه وتتخيل انك تقول الكلام لوحده .. فاعرف انك ( قاضي ) فتلاحق عمرك وشف لك بنت حلال ، بشرط توافر الشروط الاخرى فيك ( وظيفه مناسبة ، ومبالغ مالية لمواجهة مصاريف العرس ) >>>> التقسيط متاح بدون كفيل في مؤسسة مباري للعرس على النوته ,كذلك إذا صرت تتابع الفيديو كليب وتفتح فمك ولو يناديك ابوك ما ترد عليه.
2 – إذا بديت تشوف الرجال طالع من الصيدليه ومعه كيس مو واضح اللي داخله وتقول بينك وبين نفسك ( اخ وش هو شاري للمدام ) يا حظه ؟ اكيد بيسون شيء . >>>>>>> يمكن شاي صيني للتخسيس لا يروح بالكم بعيد.
فاعرف انك ( وصلت لمرحلة ) واستحقيت لقب( اعزب رايح وطي )بكل جداره وبدون منافس.
3 – إذا بدت تلفت انتباهك القدور والدلال وادوات المطبخ فاعرف انك ستكون زوج حبوب تغسل المواعين وتلبس مريله عليها صورة فيل.<<مدري ليه فيل يلا نكمل مشوارنا
4 – إذا بديت تقول يا زين بيروت والـ إل بي سي والمستقبل ؟ فاعلم اخي الاعزب انك لو انتظرت سنتين سوف تصدّي صواميل ظهرك وتصير بلا مستقبل.
5-إذا بديت تمشى بالسوق وتتمنى ان البنت اللي قدامك يطيح اللي هي شايلته علشان تصدم فيها وتقول ( ليمون نعناعه ) فاعرف انك على مشارف انك تكون ( انلحست في مخك ) وشهار ما يقبلك ولا منتسب .
6 – إذا بديت تطلب من صديقك تلفون الباندا وتقول ( هاه فيه شيء جديد )؟ << رسائل نصيّه .
فاعرف ان نظرك بدأ يضعف وتبي تثبت لنا انك تشوف بشاشه صغيره فتلاحق عمرك لا تصير المدام تقودك بالاسواق.
7 – إذا بديت تعطّر بعطور نسائيه وتقول ما فيها شيء( العطورات ليست حكرا على احد )
.. فاعرف انك بديت ( تخق ) لذلك اكرب عمرك واعرس.
لذلك عزيزي الشاب اذا ظهر عندك الاعراض اعلاه كلها او بعضها فاخطب وخلص امورك ..

بس خلني اقول لك وش تسوي بالخطبة
يتبع....

شكاك · 25-05-2008, 12:34

÷هههههههه انتى مشكلة

شيهانه كويتية · 25-05-2008, 12:43

ليش؟؟

noon212 · 25-05-2008, 12:46

بليييييييييييية يجااااااااازي شيطانك ماتقوليله يقراء كتاب تحفة العروووووس وثاني شهر يخطب مثلي

شيهانه كويتية · 25-05-2008, 12:48

ثانيا : اثناء الخطبة :
هناك بعض التكتيكات التي تساعدك على الظهور بمظهر جيد في عيون مدام المستقبل وعيون اهلها
1 – انضبط وابدأ صل بالمسجد . واجعل المحافظة على الصلاة تحول دائم من الخطبة إلى آخر عمرك.لان اهل البنت يبي يسألون شيبان المسجد ويقولون تعرفون فلان .. لذلك صل وابد ( طلطل ) بوجيه المصلين كأنك تدور اخوانك.<<<< ما احب هالحركه.
2 – لا تتهيبل وتروح تتسلف سيارة زميلك ( الفخمة ) وترزها عند باب اللي انت خاطب منهم ، وتتكلف باللبس بحيث تظهر كأنك طايح من الجدار ومجبّص كلك.. صاير شاقص ومشصّب وما تلتفت إلا كلك كانك ضبعه في Discovery channal
لأن الخطيبة مصيرها تعرف ان السياره مو سيارتك وبالتالي تطيح من عينها .. يا اخي إن رضت فيك كما انت وإلا بكيفها .. تلقى نصيبك وتلقى هي نصيبها .. وخل عنك فلم احمد زكي( أنا لا اكذب ولكني اتجمّل )<<< تراه ودى ناس كثير بداهيه.
3 - اثناء الشوفه لا تستحي ابدا و قز البنت من راسها لرجليها ولا يهمك ابوها واخوانها لأن الشرع ( يدعمك ) وان قالوا شيء .. قل لهم حديث الرسول صلى الله عليه وسلم
" فلينظر اليها وتنظر اليه فأنه احرى ان يؤدم بينهما "
مع ان الشوفه ما هي إلا مؤشر للراحه النفسيه إلا انها ( لا تعكس) الصورة الحقيقية لشخصية الفتاة .
لأن البنت غالبا في الشوفه ما تتكلم وحتى لو تكلمت فهي تتكلم بتكلف .
وكما قال الشاعر
( لسان الفتى نصف ونصف فؤاده **** فلم يبق الا صورة اللحم والدمِ )
<<<< اضيع مع اللحم في الضحايا خصوصاً الكبده يا بعد كبدي..
لا يروح بالكم بعيد.
وإذا ماعجبتك البنت من النواحي الشكلية..لا تقول لنفسك " تزوجها والحمد لله ..اهم شي جمال الروح وإذا حسيت شيء بقلبك لا تجامل وقل لهم ما الله كتب .
4-في الخطبة ان صار فيه مكالمات بعد ما يوافقون عليك .. فلا تصير لصقه وعلة وريد كل دقيقة داق على البنت .. ( وينكم فيه ) ؟ وش سويتوا اليوم ؟ ما اشتقتي لي؟
وش تسوين ؟ انت على السرير وإلا في المقلط ؟ << امحق من سؤال ؟
ليش تلفونك مشغول ؟ من كنت تكلمين ؟
لانك بعد فترة وجيزه بتطيح من عين البنت وانت تميلح . ويمكن تحسف انها وافقت عليك ، وتفسخ الخطبه.
5 - لو ( كتبت كتابك ) على البنت قبل بفترة وبديت تأثث بيتك .. لا تاخذ البنت إلا علشان تختار غرفة نومها بـــس ، وإلا باقي الاثاث اختاره انت وإلا خلها هي اللي تختاره كله ..
لانكم إذا بديتوا تطلعون مع بعض تختارون الاثاث .. فراح يطلع الاثاث مشكل تشكيلة عجيبه والوانه كأنها
( شرّاب تكرونيه عند الحرم )..
لانك جاملتها في اختيارها وهي جاملتك واخترتوا ( حلول وسطيه ) وسويتوا
comprise تسويه ولهذا طلع الاثاث ملخبط .
وقبل ما تأثث قرر وش راح يكون ستايل اثاثك
( كلاسيك ) او ( مودرن ) او ( سعودي )
.. ولا تقعد تخلط بالاثاث .. كلاسيك مع سعودي مع مودرن فيطلع بيتك شوربة كوارع.
كذلك اضبط ميزانيتك على مستوى معين من الأثاث بمعنى .. ما تشتري لي لوحه بــ 3000 الاف والكنبات بـ 5000 الاف .. يعني ما فيه توازن وتروح تشتري لوحه ثانية من ( حلة بن دايل ) بــ 20 ريال ، ومن ايكيا بــ 150 ريال .. فيصير بيتك كأنه
( حراج ابن قاسم )
من كل بحر قطره.
فتصير مثل اللي بيتهم طين وعندهم
( رولز رويس ).
خلى مستوى الاثاث كله متناسب مع بعض .. واسعاره متناسبة ايضاً ويمكن تأجيل شراء
بعض الامور إذا حسيت انك بديت ( تطفّر ).<< لانه شي اساسي
6 – اياني وياك تظهر بشكل مثالي في الخطبة بل خلك على طبيعتك ، بحيث تقول للبنت هذا اناااا ..
مو تصير حبيّب بالخطبة وصدام بعد الملكة.

على فكره منقوووووووووووووووول لعيونكم ..

تحياتي
شيهانه كويتيه

عاشق خدودها · 25-05-2008, 13:40

شيهانه موضوع بجد حلو للي لسه مش متزوج

نيال العزابيه بموضوعك

مشكوره يا طيبه

شيهانه كويتية · 25-05-2008, 14:49

العفو...اخجلتو تواضعي ..

فهد1977 · 25-05-2008, 15:57

جالس اتذكر يوم كنت اعزوبي اذا كنت اسعبل على المخده اولا ههههههههه
تحياتي لك يا مبدعه

شيهانه كويتية · 25-05-2008, 17:12

هههههههههه ياعساها دوم هالضحكه..

أم الفواطم · 25-05-2008, 18:02

موضوع راااااائع وكلام سليييييم ,,,,,

سلمت اناملك .

»∫ روْحُ البيلسَـــآن∫« · 25-05-2008, 18:12

هههههههههههههههههه
ملقوفة ايش اسوي موضوع مرة حلو

النوخذة عبدالله · 25-05-2008, 18:41

خااااااااااااااارج الموضوع

خخخخخخخخخخخخخخخ

شيهانه كويتية · 26-05-2008, 04:39

يعطيكم العافيه ..ماقصرتو

مببدع · 26-05-2008, 08:17

اقتباس:

كيف تعرف انك استويت عزيزي الشاب وحان قطافك من بنت الحلال

هههههههههههههههههههههههههههههههههههه

متزوج ..

بس المشكله اخق مع المماليح

ربي يسعدك شيهانه

شيهانه كويتية · 26-05-2008, 08:22

هههههههه الله يسعدك مع ام العيال..يامببدع.

لاهنت وسلمت على مرورك العطر

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

حصريا للتماسيح العزاب...فقط