وعليكم السلام ورحمة الله وبركاته

"بارك الله لكما وعليكما وجمع بينكما على خير "

ألف مبروك الملكة والله يتمم لكم على خير

سولف لها عن يومك , ايش شفت وايش صار , عن شغلك , أحلامك, آمالك في الحياة , كيف متصور الحياة بتكون بينكم, ايش يهمك في الزوجة, ايش تصورك للحياة الزوجية, كم طفل ودك ربي يرزقك ,الاكلات الي تحبها , بعد خمس سنين كيف تتصور حياتكم بتكون عليه, طموحك في العمل , الرياضة الي تحبها , أحداث العالم من أول الحروب لنهاية الوضع الاقتصادي وسعر كيلو الطماطم ..الخ الخ

وفي المقابل اسألها عن كل الي ذكرته ورأيها وأحلامها و و و

يعني السوالف ماتخلص ..مو لازم كله حب ورومانسية ..حاول تصادقها وتكلمها كانها خويك

تصير كل يوم شي جديد ...مو لازم شي كبير ...اي حدث صغير عادي ...مرت جنبك سيارة عجبتك ,غداكم , شفت قطوة خخخ اي شي

وهي اسألها بشكل مباشر بعد ماتتكلم قولها وانتي ايش رأيك ؟ طيب ايش رايك في هالسالفة

افتح الجريدة خاصة على صفحة المحليات واختار اي موضوع تشوفه وافتح سالفة حتى لو الإعلانات

التلفزيون عندك مليون موضوع فيه من اول المسلسلات لو تتابعها هي للأخبار <---هذي بروحها كل يوم سالفة جديدة


والبرامج الثقافية حتى الموضة والمكياج اسألها وخلها تتكلم <--حتى لو انت مو من هواة هالخرابيط

اسألها عن ترتيبات جهازها وايش عجبها في السوق

ايش قرأت انت مؤخرا لو انك من هواة القراءة والسؤال تطرحه عليها

عندك شاعر المليون كان مكسر الدنيا خله سالفة بينكم وايش عجبها وهل تحب الشعر الخ الخ

ايش اكلت كيف نامت ؟ حلمت فيك ؟ حلمت فيها

جيب كتاب شعر واقرأ لها كم بيت يفرحوا قلبها , اطلب منها تقرأ لك اي شي بحجة صوتها ينعش روحك

لاتتحرج تتكلم معها في الامور العادية ومع الكلام ماراح تاخذ عنك فكرة سيئة...قولها طفشان بسبب كذا وكذا واليوم الي بعده فرحان بسبب او تعبان علشان الخ الخ


بالعكس بتتعرف على الأنا الداخلية الحقيقية لك وانت بعد بتتعرف عليها وهذا الي بيقربكم من بعض أكثر


ولاتنسى الجانب الرومانسي وكم هدية وورد ودلع <--وقتها تكلم براحتك عن الاسعار بتشوف انك اكيد مو بخيل



الحمل الاكبر عليك انت كشاب انك تفتح باب الحوار وتحافظ عليه بحكم خجلها وحيائها منك

في هالمشاركة عندك اختيارت تفتح مواضيع شهر لقدام