عالم الحياة الزوجية - منتدى

ksa_10 · 28-05-2008, 13:26

السلام عليكم ورحمة الله وبركاته
أخواني الشباب فقط ..
بالموضوع هذا راح نحسب تكاليف الزواج وراح أذكر الأشياء اللي تطلع لك فجأة وما تحسب لها حساب
بسم الله نبدأ
_______________________________________

وعلى الأخوان مراعاة العادات والتقاليد الدارجة لديكم
( الأسعار حسب الغالب والمتوسط )
أول ما تخطب وبعد ما تشوفها ويوافقون راح تدفع المهر وملزماته

المرحلة الأولى :

مهر = 50000 ريال سعودي
شبكة = 12000 ريال
ذهب لأمها = 3000 ريال

المرحلة الثانية :

وتكون قبل الزواج بشهرين او ثلاثه :

شقة (واذا ميزانيتك كويسه أنصحك تدفع حق سنة وليس ست شهور , حتى ما تتورط بعد الزواج )
استئجار شقة = سنة (22000 ريال متوسط ) 6 شهور (11000ريال ) اضافة الى المكتب راح ياخذ منك 1000ريال سعي + 1000ريال تأمين على الشقة والمكيفات .

المرحلة الثالثة : شهر العسل

حجز تذاكر الطيران + حجز الفنادق فقط (اوروبا اسبوعين تكلفك للفنادق والطيران حول 18000ريال )

المرحلة الرابعه تأثيث الشقه وهي أصعب مرحلة برأيي :

ثلاجه = 2000ريال
تلفزيون = 3000ريال
كنب للصالة = 4000ريال
مواعين مطبخ = 3000ريال ( أنصحك تعطيها للبنت واهلها وهم يشترون فيها اللي يبون )
غرفه نوم = 6000ريال (وانتظر حتى الصيف في موسم التخفيصات )
اسفنج سرير النوم = 1500===> هذا من اللي تنصدم فيه وما تحسب له حساب
فرن = 3000 ريال ( انصحك بالفرن الكهربائي ) .
غسالة = 1500ريال

ملاحظات :
* اذا ميزانيتك تعبانه شوي أنصحك ما تشتري اثناء الثأثيث (مجلس رجال)في الشقه لأنه ما راح يجيك اغراب في الست أشهر الاولى .
يعني ركز على غرفه النوم وعلى المطبخ وعلى الصالة اللي تجلس فيها انت والمدام فقط .

* الاجهزة حاول ما تستعجل بشرائها لانه ممكن تجيك كهدية .

بكذا انت انتهيت من الاشياء الرئيسية للشقه وبالباقي تكمله انت والمدام بعد الزواج
طبعا لازم تحسس البنت ان الباقي لازم يكون على ذوقك انت واياها لا تقولها ما عندي فلوس

المرحلة الخامسة وقرب الزواج :

دبلة للمدام = 3000ريال

فندق ليلة الزواج = تقريبا 2000ريال حسب الفندق وعدد الليالي

صباحة ( هدية صباحية العرس ) = 4000ريال (ساعة او ذهب ..الخ )

توفير مصروف شهر العسل = 10000ريال

ان شاء الله ما اكون نسيت شي

بالنسبة لمصروف شهر العسل هذا لا تاكل همه كثير لو كان ناقص لأنه راح تجيك العانيات والمساعدات يوم الزواج او قبله بكم يوم .

الباب مفتوح للاضافة والتعديل من قبل الاخوان اللي جربوا .

mnxmnx25 · 28-05-2008, 16:19

انا بتكلم عن نفسي بصراحه
زواجي ان شاء الله بعد شهرين وكانت المصروفات كالتالي

50 الف مهر
شبكه ودبله 25 الف
طقم ام الزوجه توني ما شريته بس ما راح يتجاوز خمسه يعني اقل من خمسه ان شاء الله
اسبوعين شهر عسل حجزت تذاكر درجه اولى وفنادق كلفتني بحدود 22 الف

هديه الصباحيه الى الان ما شريت ولا ادري وش اشتري صراحه ولا حجز فندق الصباحيه ولا ادري وين استاجر ياليت نصايحكم

ksa_10 · 28-05-2008, 16:21

انت من وين طيب ؟؟

mnxmnx25 · 28-05-2008, 16:58

انا سعودي اخوي بس ادرس خارج السعوديه حاليا

ksa_10 · 28-05-2008, 16:59

طيب وين بالسعودية حتى نقترح عليك فندق

mnxmnx25 · 28-05-2008, 17:02

الرياض يالغالي
متردد بين الفيصليه او الفور سيزون

صدوووق الود · 30-05-2008, 02:29

أعتقد المبالغ (مُبالغ) فيها شوي بالنسبه لذوي الدخل المحدود

نقول بالنسبه لموظف راتبه من أربعه إلى سته آلاف راح تحمله هذي التكاليف فوق طاقته

يعني وشو له الخساير

بدل مايستاجر بـ 22 يستاجل بـ 18 هذا اذا كان في جنوب الرياض مثلا

وبدل مايدفع مهر 50 ألف يخليها اربعين أو خمسه وثلاثين

وبدل مايسافر أوروبا يخليها في ربوع بلادي أو يروح لدبي أو مصر عشر ايام او اسبوع

بالنسبه لي لازلت في مراحل البحث عن زوجه ومحدد 100000 حد أقصى للتكاليف حسب إمكانياتي

والله يعين ويوفق

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

^^للشباب المقبلين على الزواج فقط^^