شوفي يا خطيرة ترى نحن النساء دايم نخرب على نفسنا بدون ما نشعر

ويوم تطيح الفاس بالراس نحمّل الرجل كل المسؤولية وننسى تماماً إن هذا نتاج شغل يدينا !!

أفعال كثير وتصرفات أكثر تصدر مننا تنخر في أساسات حياتنا الزوجية

وإذا كان الأساس ضعيف ومش قد الحمل الكبير اللي جاي ينهد على رؤوسنا وفي النهاية ما حد خسران غيرنا !!

وواضح جداً فين الغلط اللي حاصل ومخرب حياتكم هنا !!

كل ما زعلتي طلعتي من نفسك ورحتي بيت أهلك وجلستي بالشهور !

شيء طبيعي يتركك بالشهور أنتِ طالعة بنفسك وبكامل رغبتك يعني مو هو اللي طاردك

ولا حتى هو اللي رماك عند باب بيت أهلك !!

وهذا أكبر غلط يدمر حياتنا الزوجية تدمير ساحق !!

يا أختي ازعلي ونزلي كل اللي بخاطرك بس لا تتركين بيتك مهما كانت الزعلة كبيرة !!

أعطيه على راسه ويعطيك على راسك بس ببيتك وبابكم مسكر عليكم ولا أحد يدري أو يدخل بينكم !

تناقشي معاه قولي كل اللي مضايقك بس بينك وبينه ولا تعتبين برى عتبت البيت ولا حتى شبر !!

لا تتركين بيتك إلا لو كنتي بايعة نهائي ولا عاد لك رغبة ترجعين له ولبيتك ولشيء ما يقبل التهاون فيه !!

مو كل ما زعلتي وتضايقتي رحتي بيت أهلك وتنتظرينه يجيك يراضيك !

لو تبينه يراضيك كانت جلستي ببيتك هذا مفهومي ومفهوم كل رجل وقت الزعل !!

ومهما طول عليك وما جاء يعتذر على غلطه خليك ثابته على موقفك جالسة ببيتك وما تبادرين بالصلح !!

إذا كان الغلط 100 % عليه أبداً لا تبادرين بالصلح لكن برضه لا تقطعين أي مجال للصلح !

تعاملي معه بشكل عادي وأدي كل حقوقه وطلباته لكن تعابير وجهك فيها الزعل

ومعاملتك جامدة حبيتين عشان يحس بزعلك !!

لا تغلطين وتقولين ما يراضيني لو إيش ما سويت !

وتقومين تروحين وتراضينه أنتِ على غلط هو اللي ارتكبه !

لأنك كذا عودتيه إنه ما يبادر لأنه عارف إنك حتجينه وما تقدرين تتحملين بعده !

وبعدين شخص كان من أبدع ما يكون معاك وبعد ولادتك يتغير من الباب للطاقة شيء غير منطقي !!

اللي بيتغير يتغير من الشهور الأولى مو ينتظر بعد سنة عشان يتغير !!

وإذا تبين الصراحة وبدون زعل من أسلوبك في الكتابة باين إنك صغيرة بالسن

ولسه فيك طيش وعدم صبر وما لك في طولة البال ولا في ( الدحلسة ) ولا لحس العقول !!

وبرضه واضح إن فيك تسلط وحب تملك واذبحي الرجل ولا تعاملينه بهالطريقة !!

على فكرة ترى أغلبنا نحن النساء إن لم نكن الكل فينا هالطباع المتسلطة وحب التملك

وإن كنا ما نشعر بها وعشان كذا ما نعترف بها ولا نفكر فيها وفي نتايجها !!

لا تقولين ما فيني هالطباع لأنك ما تحسين فيها بنفسك لكن هو يحس والدليل في طريقة تعامله معاك !!

يا أختي أنا مجربة كل شيء ومريت بكل شيء وأعترف إنه بما إني امرأة فيني هالطبع البايخ

وهذا شيء طبيعي جداً فسبحان الله خُلقت المرأة كمربية فبدون ما تشعر تصير متسلطة ومتأمرة !!

عن نفسي أحاول أعمل كنترول رغم إنه يفلت معي أحياناً بس نتدارك الأمر ولله الحمد سريعاً !!

الشيء الثاني أو الثالث اللي مخرب عليك حياتك ومن كلامك اعتمادك الكبير على أهلك

زعلتي رحتي بالشهور لأهلك جات الإجازة سافرتي مباشرة مع أهلك أي شيء تبينه ركضتي لأهلك !!

طيب لين متى وأهلك في حياتك ؟!!

لا تقولين ما يسفرني !!

عساك ما تسافرين وتجلسين الاجازة كلها ببيتك وبين أربع حيطان برضه ما تسافرين مع أهلك !!

ترى ممكن يكون ببداية زواجكم متضايق من تواجد أهلك المستمر بينكم

لكن بعد كذا تعود وصار مبسوط عايش حياة فري بلا مسؤولية وأنتِ ما كأنك زوجة لسه أهلك وبيت أهلك !!

يا أختي أهلك خليهم على جنب لهم حق الزيارة والسؤال والتدخل في الأشياء الكبيرة جداً جداً فقط !!

وبعدين لما تطلعين من نفسك لبيت أهلك كيف تنتظرينه يرجعك ؟!!

زي ما طلعتي من نفسك ترجعين من نفسك وما لك حق تمنين عليه برجعتك !!

بالعكس المفروض تحمدين الله إنه قِبل برجعتك وما ركب راسه ومنعك من الرجوع وجاب غيرك ببيتك !!

وطلقك غيابي ورما لك ورقتك عند بيت أهلك وريحك واستراح !!

حبيبتي لا تغالطين نفسك عشانك أنتِ وعشان بنتك وبيتك ولا تعطين للشيطان مجال يدخل بينكم

ترى وربي ما حد خسران غيرك أنتِ وبنتك !!

ولا تقولين تزوجني عشان يرضي أبوه لو كان الكلام هذا صح ما كان الأدمي طيب معاك لين ولدتي بنتك !!

كان من أول يوم وهو شري ومعاندك وكارهك وكنتي حتلاحظين هالشيء مو ينتظر لبعد سنة !!

وبعدين مسألة الجماع أنتِ لك أربع سنين متزوجة سنة منهم حمل ونفاس

وثلاث سنين ما بين زعل وخصام وتركك لبيتك بالشهرين والثلاث

فشيء طبيعي يكون الجماع كل بعد شهرين وثلاث !!

وترى زيادة المشاكل ما تعطي مجال للتقارب والرغبة في الجماع ولا حتى لحدوث انتصاب !!

فدخيلك دخيـــــــــــــــــلك طولي بالك واجلسي مع نفسك بصفاء تام وبدون أي مؤثرات خارجية

وراجعي كلامي وراجعي حياتك قبل ولادتك وبعد !

ولا ياخذك الكبر والعناد والعزة بالإثم وخلي في بالك شيء واحد

كيف أنقذ حياتي الزوجية وبيتي ونفسي وبنتي وأرجع أكسب زوجي من جديد وأكسب حبه !!

كيف أقلل جرعات الزعل ولو حصلت كيف أسيطر عليها وما أخرج من بيتي أبــــــــــــــــــــــــداً

كيف أتناقش معاه بهدوء وأقوله إيش مزعلني منه بدون ما أنرفز وأنرفزه

وكيف أخليه يقولي إيش مزعله مني بدون ما أزعل وأدافع عن نفسي وأخليه يطلع كل اللي بداخله

كيف نرجع نعمل أساسات قوية وثابتة لحياتنا الزوجية بعيد عن أهلي وأهله

كيف أتفق معاه إنه ينبهني لأغلاطي وأنبهه لأغلاطه أول بأول بدون ما نترك فرصة للتراكمات النفسية

كيف أعطيه حريته وراحته وأعامله كرجل مسؤول عن نفسه وعني مسؤولية كاملة

وكيف يعطيني حريتي وراحتي ويعاملني كزوجة لي حقوق وواجبات ولحظات تتلخبط فيها هرموناتي

وممكن أشطح بس برضه يتحملني لفترة وتعدي وبعدها كيف أعوضه

يا أختي الحياة الزوجية أخذ وعطاء

والزوج محتاج لأبسط عطاء منك يشبعه ويحسسه إنه رجل كامل الأهلية ومقبول بكل أحواله !!

عشان يعطيك عطاء يغطيك من راسك لأخمص قدميك ويشوفه برضه قليل في حقك !!

هدي وطولي بالك وراجعي نفسك والحقي على بيتك وزوجك

وبلاش موضوع طلاق أمه وأبوه وكانوا وما كانوا أو يشك فيني أو ما يحبني ولا يرغب فيني

فلو ما يحبك ما حد يقدر يمنعه يطلقك خاصة إنك طلبتيه بنفسك وبرضه ما طلقك !!

ولو ما يحبك ما كان طيب معاك أول سنة زوجية وبعدها تغير معاك

وحطي الكلمة هذه حلقة في اذنك :

ترى الرجل إذا مو مرتاح من تعاملك وأسلوبك معاه يبدأ يعاندك وينرفزك ويرفع ضغطك ويطنشك تماماً

حتى لو كان داخلياً يحبك ويموت فيك إلا إنه يدوس على قلبه وينتقم منك بطريقته الخاصة

لين يشكك إنه يكرهك وما يحبك ويتمنى بعدك وانتقامه هذا لأنه قهران منك ومن أسلوبك معاه !!

فهدي أعصابك وروقي وإن شاء الله ربي يهدي سركم ويوفقكم وترجعون حبايب

.

.