عالم الحياة الزوجية - منتدى

صدوووق الود · 26-06-2008, 13:17

انا شاب مقبل على الزواج يمكن صجيتكم من كثر ماقلت هالكلام

وحتى الآن مالقيت الزوجه الي اتمناها

وبآخر سنتين جمعت تقريبا خمسين ألف من رواتبي عشان ما أضغط على نفسي
في بداية حياتي الزوجيه

المهم عندي استشارة قد تكون اقتصاديه اكثر من ماتكون في الحياة الزوجيه
بس اكيد مرتبطه بالموضوع

جاني عرض من أخوي الأكبر اني اشاركه في شراء فله وابيكم تشيرون لي بالحل الصحيح في وضعي

يقول هو اخذ قرض من البنك وتزوج بالخمسين وطبعا هو بيعطيني الدور العلوي بـ 350 ألف الباقي
تقسيط على 15 سنه

البنك راح يعطيني ثمانين ألف يبقى الخمسين الي جمعتها طبعا ماتكفي للزواج باخذ من بنك التسليف

30 ألف هذي ثمانين ألف

اتمنى ان الصوره تكون واضحه

الي محيرني هو

هل ثمانين ألف تكفي للزواج ومصاريفه والاثاث وووو .... الخ

مع خصم اقساط البنوك راح يبقى من راتبي أقل من ثلاثة آلاف هل تكفي لمصاريفي مع زوجتي

انا خايف اقدم على هالخطوه وماني قدها واتورط بعدين يمكن الباقي مايكفينا

وفكرت كثير اني لو جلست في اجار نفس الشي راح ادفع بس بدفع في شي ماهو ملكي
والبيت راح يكون لي طول العمر

الي ماوضحت له الصوره يامكانه يسأل

افيدوني جزاكم الله خير

رينالدينو · 26-06-2008, 13:24

لو كان تصميم البيت عاجبني وله مدخلين منعزلين ليش لا
بالنسبة لراتبك انت ومصروفاتك
ولا تنسى ان الراتب بيزيد كل سنة

الله يوفقك

كان زمان شاب · 26-06-2008, 13:32

اخي ربنا يوفقك وتحصل بنت الحلال
وبعدين عصرت مخي وطلعت بالاسئلة التالية اذا اجبت ممكن اعطيك رائ :
هل راتبك فية زيادة سنوية؟
اذا ماكفاك راتبك في المستقبل هل تستطيع ان تؤجر الدور العلوي ا؟
لو اجرت الدور العلوي وسكنت في شقة موقتا هل يزيد لك شيء من ايجار الدور العلوي؟

صدوووق الود · 26-06-2008, 13:33

المدخل خاص للدور العلوي الخاص فيني وفي حي جديد وراقي في الرياض
عند قصر الامير خالد بن سلطان في ظهرة لبن

العرض مغري بس خايف من بكره مدري ليش

صدوووق الود · 26-06-2008, 13:36

اقتباس:

المشاركة الأصلية كتبت بواسطة كان زمان شاب

اخي ربنا يوفقك وتحصل بنت الحلال
وبعدين عصرت مخي وطلعت بالاسئلة التالية اذا اجبت ممكن اعطيك رائ :
هل راتبك فية زيادة سنوية؟
اذا ماكفاك راتبك في المستقبل هل تستطيع ان تؤجر الدور العلوي ا؟
لو اجرت الدور العلوي وسكنت في شقة موقتا هل يزيد لك شيء من ايجار الدور العلوي؟

هلا اخوي اشكرك على تفاعلك

الراتب يزيد سنويا غير الترقيات

نعم بامكاني ااجر الدور العلوي واستأجر برى بس تعرف الاجارات برى غاليه يمكن يجيني عشره
اذا أجرته بـ 27 الف واستأجرت بـ 17

كان زمان شاب · 26-06-2008, 13:45

اخي استخير الله واشتري مع اخوك
وبعدين ترى بداية الزواج تكون المصاريف قليلة يعني ماعندك اطفال واكيد تستطيع تعيش مادام عندك زيادات وترقيات واذا لزم الامر اجر الدور العلوي واستاجر شقة حتى تشعربان راتبك
يغطي مصاريفك والله يوفقك

روآآبي · 26-06-2008, 14:46

انا اشوف العرض جيد ... المهم ان في الاخير فلوسك راحت في بيت (ملكـ)
واللي بيبقى من الراتب بيكون جيد لك ولزوجتك .. خاصة انك ماحتكون ملزم بايجار بيت .. + الزيادة السنويه للراتب اللي ممكن تحصل عليها

استخير اهم شي .. وتوكل على الله

صدوووق الود · 26-06-2008, 14:47

اقتباس:

المشاركة الأصلية كتبت بواسطة كان زمان شاب

اخي استخير الله واشتري مع اخوك
وبعدين ترى بداية الزواج تكون المصاريف قليلة يعني ماعندك اطفال واكيد تستطيع تعيش مادام عندك زيادات وترقيات واذا لزم الامر اجر الدور العلوي واستاجر شقة حتى تشعربان راتبك
يغطي مصاريفك والله يوفقك

ماقصرت ياغالي
الله يعينا على هالدنيا مصايفها ماتخلص
الاتزيد اذا ربك وفق ورزقنا الله زوجه صالحه تحممل هالظروف وعندها حسن تدبير راح تمشي الامور
بالنسبه للزواج راح تكفي ألف؟

صدوووق الود · 27-06-2008, 17:09

اقتباس:

المشاركة الأصلية كتبت بواسطة ســحايب

انا اشوف العرض جيد ... المهم ان في الاخير فلوسك راحت في بيت (ملكـ)
واللي بيبقى من الراتب بيكون جيد لك ولزوجتك .. خاصة انك ماحتكون ملزم بايجار بيت .. + الزيادة السنويه للراتب اللي ممكن تحصل عليها

استخير اهم شي .. وتوكل على الله

راح اكون ملزم بدفع قسط بس الي محليها انه في ملك
برضوا لازم اكون مقتصد في المصروف
لأن الباقي من الباقي من الراتب مايحتمل
زيادة المصاريف
في ناس قالوا أجل فكرة الزواج فتره
لين تركد واعتقد اني أجلت بما فيه الكفايه
اشكرك اختي

very love · 27-06-2008, 17:49

استخير حبيبي ومبدأيا واحد يحط ماله في بيت والله ونعم ومادام الراتب يزيد فربك يزين الامور واستخر قبل أي شي

a.and.a · 27-06-2008, 18:05

بدون تفاصيل

مد رجولك على قد لحافك

وكل شيء يبقى تمام التمام واحسن كمان

صدوووق الود · 27-06-2008, 19:02

اقتباس:

المشاركة الأصلية كتبت بواسطة very love

استخير حبيبي ومبدأيا واحد يحط ماله في بيت والله ونعم ومادام الراتب يزيد فربك يزين الامور واستخر قبل أي شي

الله يجملك يابعدي
الآن مختلفين في نفطه انه يبي يبعني
الشقه المستقله الي بالدور الثالث
وأنا أبي الدور الثاني ماني مقسط هالسنين عشان شقه
والخيره فيما اختاره الله

تــــووفي · 28-06-2008, 00:22

صحيح ان 80 الف ماتكفي للزواج

بس ماله داعي المبالغه في حفل الزواج

حلو يكون بسيط .. وهي كلها ليله

حلو انك تملك بيت ملك خاص فيك

طبعا اهم شيء يكون فيه عقد يثبت هالشيء

وانا من رايي تشتري البيت والزواج ماراح يكون بين يوم وليله

وبتفتك من الاجار لانه هم

وراتبك مثل ماقالوا ان شاء الله انه يزيد

وبالتوفيق يااارب

زعيم المحللين · 28-06-2008, 00:46

ما ادري اخوي .... بس اعتقد .... راتبك بيكفيك بعد الزواج ... ان شاء الله ...

وكلها سنه او سنتين وبيكون صافي راتبك فوق 4000 ....

فمن راي تتوكل على الله ... لانه مخلوف .... ببيت ملك ....

بالنسبة لنكاليف الزواج .... تقريبا من 80 الف حتى 120 الف .... انت وصرفك وووضعك ...

بس مبدئيا دام معك 80 الف .... فماشاء الله عليك امورك ... ممتازة ...

اكيد بتلقا عونه من اخوانك وبني عمك ....واصحابك ...

وانا اخوك العرس رزقه معه ... والله يتمم عليك بخير ....

دمـــــــــــــــــتــــــــــــــــــم

صدوووق الود · 28-06-2008, 10:15

اقتباس:

المشاركة الأصلية كتبت بواسطة a.and.a

بدون تفاصيل

مد رجولك على قد لحافك

وكل شيء يبقى تمام التمام واحسن كمان

ونعم بالله
لاهنت يالغلا

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

الزوجــــه أو البيــــت