بسم الله الرحمن الرحيم
اليوم أنا بكتب لكم موضوع خاص بالوالدة الكريمة ( الله يحفظها ) وأبيكم تشاركوني النقاش وتقولون رايكم بكل صراحه
الكل يعرف بمشاكل الأم وحرمة الولد ,, ما أعتقد حد يجهل هالشي
أمي عانت بما فيه الكفاية وصبرت واحتسبت الأمر لله ..
بس من كثر اللي صار قبل والمعاناة والإهانات اللي حصلتها أمي من ورا يدتي ,, أمي صارت تعافها يعني خلاص عافها الخاطر ..
إحنا كنا صغار ما نفهم شي بس لما كبرنا لاحظنا مدى كره يدتي لأمي وربينا ع هالشي إن يدتي ما تطيق أمي وأمي تصبر وتصبر بس أخر شي حتى الصبر ما يفيد وتصير الكارثة وتتعالى الأصوات والشي اللي تضارب عليه يدتي شي تافه واااايد ..
يعني مثلا فمرة يدتي تضاربت ويا أمي وسوت حشرة والقاصي والداني سمعوا الحشرة بس عشان أمي كانت تبي تسبحنا !!!!
لإن كنا يايين من برع ولاعبين بالرمل يعني وسخين من الخاطر ويبالنا سبوح ,,
ويدتي تقول لا بتخلصون الماي <<< مع إن الماي ما بيخلص لإن الديلمة شغالة ..
المهم لما كبرنا صرنا ما نروح ليدتي وااايد بيتها يعني نيلس فالبيت وهي اللي تيينا تيلس عندنا أسبوع أو إسبوعين وبعدين تروح ..
وطبعا لما تيي تيلس عندنا بعد أمي ما ترتاح من المشاكل ..
تتبع أمي وين تسير إذا أمي طلعت وما قالتها تسوي لنا صدعه من الزين ..
هي حرمة عودة ألحين ما ترووم تطلع واايد وتمشي ركبها طايحة وتمشي بعصا من جي أمي يوم تطلع ما تقولها وأمي تبي تاخذ راحتها يعني مب معقول كل ما تروح مكان تسحبها وياها وأنا مثل ما قلتكم خلاص عافها الخاطر ..
وأبوي يوم يشوف يدتي ضيجانة وإلا تشكي من أمي يروح يعصب ع أمي وتستوي المشاكل وأمي تقول لنا أنا ما راح أنسى اللي سوته فيني طول عمري ..
أمي تقول إن يدتي حرمتها من أعز ربيعاتها وشككت فأخلاقهم .. وطعنت بشرفها أكثر من مرة وحرمتها من وااايد أشيا عزيزة عليها .. وطبعا التجريح في الكلام شي أساسي عند يدتي مع إن أمي بنت إختها يعني أهل ليش يدتي تسوي جي ما أعرف ,,
والكل يشهد إن أمي مب مقصرة وياها يوم تيي بيتنا ,,
يعني ع الرغم من اللي سوته يدتي فيها ..
أمي ما قصرت فيها تسبحها وتلبسها ثيابها وتبخرها وتعطرها وتمشط شعرها يعني تهتم فيها وتوصلها الأكل لحد عندها لإنها ما تروم تمشي واايد وأمي بنفسها توديها المستشفى يوم تتعالج ..
أمي تسوي ها كله عشان الأجر ورضا رب العالمين ..
ومن هناك كل ما يدتي تشوف أمي تدعي عليها بصوت خفيف او عالي يعني لازم تضايج بأمي ع الرغم كل اللي تسويه لها بس ماشي فايدة ..
من فترة أمي وخواني الصغارية وإختي كانوا يايين بيتي وخلوا يدتي فالبيت وأبوي قال لهم لا تاخذوها وياكم عشان ما تقدر تمشي وبتتعب ..
لمهم من رجعوا البيت يدتي عرفت إنهم كانوا عندي وزعلت وإحتشرت ليش ما ودوووني وفهموها إنها إذا راحت بتتعب وجي بس ماشي فايدة واليوم الثاني راحت بيتها وهي زعلانه من الكل ..
ألحين أمي تفكر وتقول أنا قايمة بواجبها ع الرغم اللي سوته فيني واللي تسويه بعد وتقول أمي ع الرغم من كل اللي أسويه بعد مب عايبنها ..
وأبوي يقول لأمي إنها مقصرة بيدتي ومن هالكلام وطبعا يدافع عن يدتي وأمي صايرة تفكر واااايد ..
والله يشهد إني ما جذبت بأي كلمة ..
وع فكرة .. أمي هي اللي قالت لي أكتب لكم هالموضوع عشان تشوف رايكم ,,
ألحين أبي رايكم بكل صراحه ..
أترياكم