عالم الحياة الزوجية - منتدى

شــوااقــهــ · 10-09-2008, 21:04

السلام عليكم

هذه الدورة منقولة من أحد المنتديات النسائية وحبيت أنقلها لكم لأهميتها لتعم الفائدة ...

دورة كيف تكسبين محبوبك للمتزوجات والمقبلات على الزواج؟؟؟

لكل متزوجة لكل مقبلة على الزواج لكل فتاة أرادت الإستفادة

هدفها:

كسب الزوج الحبيب بطرق عملية سهلة وبسيطة

أدواتها:

ورقة وقلم ومتابعة وإرادة وتنفيذ

[SIZE="4"] خلونا نبدأدورتنا بــ ((الــــــحـــب))[/SIZE

إحنا كحريم وكبنات وكأناث عموما الحب هو الغالب علينا ومتملكنا حبنا للأهل للوطن للأحبه..

بس كثير من المتزوجات يجهلون حبهم للأزواجهم .. فعشان نكون على بينة كلنا .. راح نعرف (( الحب))

الحب عندنا نوعين:

1. حب مطلق

يعني تحبين بدوون حدود وبدون شرووط وبدوون قيوود .. مطلق عام

2. حب مشروط

يعني كأنك تقولين لزوجك ( راح أحبك بس اذا اشتريت لي حاجه معينة انا ابغاها)

لو جينا للنوع الاول:: الحب المطلق::

هذا هو الحب المطلوب منك كزوجة تحبين زوجك حب مطلق.. ولا تخلين اي عائق يواجهك بالحياة يمس شيء بسيط من ذاك الحب...

يعني اتفقتي معاه انه يجيب للك شغله مهمه.. ولما رجع للبيت قال للك ::

يووووه نسيييت

مثل هالموقف لاتخلينه يأثر في حبك اويخليكي تكرهينه... أنتي يمكن تكرهين التصرف نفسه.

لكن ماتكرهين زوجك.. وفي فررق اكيييييد... لأن في قاعدة تقوول :: فرق بين الفعل والفاعل!!

إحنا نكره أفعال أو تصرفات معينة اصدرت من قبل اشخاص لكن ماانكره الاشخاص أنفسهم..

اكيــــــــد من خلاال حياتكم .. صاادفتو او سمعتو فلانه تقول ::

( بديت اكره زوجي لأنه مهمل في بيته)

والمفروض انها تكره اهماله مو تكرهه هو...

عموما::

أبي كل وحده فيكم تقول وترد بينها وبين نفسها

( أنا احب زوجي لذاته.. وماراح أخلي أي تصرف طارىء يهز شيء من حبي له)

الطيبون للطيبات والخبيثون للخبيثات

سمعنااها كثيير.. هي قااعدة قراّنيه مثل مثل دايما نردده (( الطيور على أشكالها تقع))

تعرفونه أكييد .. وفيه قاعده روحانيه تأكدها (( الأرواح المتشابهه تلتقي))..

لو جينا لحياتنا.. وأعطيكم على نفسي مثل :: أنا وسط أهلي واستحقهم ويستحقوني... لييييش؟؟

لأن إحنا أكفاء ومتشابهين كثيرا..

ارتبطت بزوجي لأنه هو اللي يناسبني... بس من أي ناحية؟؟؟

نناحية أرواحنا تتشايهه........

أنتي وزوجك ... ارتبطتو بعض لييش؟؟ لأن أرواحكم متشابهه.. أنتي تستحقين هذا الزوج... وهو يستحقك..

مستواكي ومستواه متشابهين من أي ناحية؟؟؟ ناحية المستوى الروحاني نفسه عشان كذا صار بينكم

تجاذب...

هذا التشابهه يلغي الفوارق.. إحنا دايما نركز على أن هذا الشخص .. وسيم وغني... ألخ يعني لازم يااخذ

وحده من مستوااه المادي!!! ونتفااجأ أنه أخذ وحده مستواها المادي أقل منه...

وسمعنا كثير(( انا جميلة وجامعية ومن عايلة لها مركزها)) ونشووف انها تزوجت من شاب عنده ثانويه

عادي بحياته الاجتماعيه..

دايما ننهي استغرابنا بأنه ((نصييب)) هو نصيب والله كاتبه فعلا .. لكننا غفلنا عن مسالة تشابه الأرواح...

يعني من اليوم ورايح لو شفتو حالات متشابهه قولوا (( هذا نصيب وتشابهه ارواح والله سبحانه وفق بينهم))

وفي بنات تزوجو من ناس أكبر منهم او اغنى منهم او اكثر وجااهه.. الخ لكن متوى الزوج هو هذا نفسه

مستواها.. وحريم تطلقو من ازواجهم وتزوجوا حريم غيرهم وهكذا... طيب وش الحل؟؟؟!

هم حلين::

1. تتكيفين مع الوضع الحالي.. وتحسنين من طرق التعامل.. وتمشين معانا لاّخر الموضوع..

2. أنكم تنضجون مع بعض عشان تحققون سعادة أكثر وفهم اعمق..
إذا ولا حل أعجبك... أطلبي الطلاق ... هاااااااه وش قلتي؟؟!

قرري من الحين..

تبين تستمرين؟ إذا جاوبتي بلا.. لاتنتظرين واطلبي الطلاق.. بس تأكدي أن هذا نصيبك وهذا مستواك وماراح

تلقين افضل منه من الناحية الروحانية....

ألا اذا قررتي انك تنضجين.. وانا انصحك انك تنضجين معااه في نفس الوقت..

وإذا جاوبتي بنعم.. اشتغلي على نفسك من الحين واسعي عشان تحسنين وتعدلين من علاقتكم..

الواجب الأول:::

خذي ورقة ... واكتبي عليها من فوق( ورقة المفاهيم) وبعدين اكتبي الجملة الجاية ::

سأطبق جميع الواجبات والتمارين........

الشررط الأول::: السعادة تبدأمن الداخل:::

وشلووووون تبدأمن الداخل؟؟

يعني لاتظنين ان لما يكون عندك فلوس وصرتي غنية يعني لازم تكونين سعيدة..

او لما تكونين صاحبة أعلى الشهادات اذا لازم تكونين سعيدة..

او لما تكونين صاحبة مركز مرموق يعني لازم تكونين سعيدة..

او لما تكونين اّ ية في الجمال يعني انتي سعيدة...

المال والوجاهه والمناصب والجمال ماهي الا وسائل تعين بس ماتصنع السعادة... أنتووو معااي؟؟

بإختصار إذا ماكنتي سعيدة من الداخل ماراح تحصلين على السعادة في الخارج...

خليني اهمس في اذنك اختي العزيزة واقول للك(( اذا ماكنتي سعيدة من الداخل ماراح تقدرين تسعدين

زوجك ولا اعياللك ولا اي احد من اللي حوولك.. لأن فاقد الشيء لايعطيه))

عشان كذا أقوللك خلي البداية منك وفي نفسك.. تعلمي وشلوون تكونين سعدة حتى لو ماكنتي

سعيدة..

حريم كثير هم في الأصل مو سعيدين.. فلما تصير لهم مشكلة مع ازواجهم أول شيء يسوونه يلقوون اللوم

على ازواجهم وانهم السبب في عدم سعادتهم او تعاستهم..

عشان نتعلم وشلون نكون سعداء عشان نسعد .. أوتتعلمين اشلوون تسعدين بضم التاء عشان تسعدين

بالفتحة على التاء...
تــــــــــــــــــــــــابـــــــــــعــــــــــو ا مــــــــــــعــــــــــــــاي الـــــــــفـــــــــقـــــــرة الــــــــجــــــــــايــــــة

شــــــــــــوااقــــــــهــ

asasd · 10-09-2008, 22:48

للاءسف اصبحت التعاسة شى من يوميات اغلبية المتزوجين
بس اكيد كل من الزوجين سبب فى عدم السعادة
مستنياكى تكملى الموضوع

شــوااقــهــ · 10-09-2008, 23:27

اقتباس:

المشاركة الأصلية كتبت بواسطة asasd

للاءسف اصبحت التعاسة شى من يوميات اغلبية المتزوجين
بس اكيد كل من الزوجين سبب فى عدم السعادة
مستنياكى تكملى الموضوع

غــــــا ليتي ::

أشكرك على مرورك

المشاهدات 19 ولااحد رد غيرك كنت ناويه اكتفي بهالقدر بس...

لعيونك ياعسل ابكمل...

تحياتي..

شـــوااقــهـ

المهندسه دلوعة زوجها · 11-09-2008, 00:04

يسلموووووووووو

طارق55 · 11-09-2008, 00:37

راااااااائع

شــوااقــهــ · 11-09-2008, 00:46

في نظرية ملخصها( إيفاء حقوق 4 جوانب في الحياة) والجوانب هي:

الجانبالروحاني

الجانب الأجتماعي

الجانب العقلي

الجانب النفسي

خلونا نفسر النظرية بإختصار شديد...

تفسيرها:

اللي بيعطي كل جانب من الجوانب اللي ذكرتها حقه بيكون سعيد بأذن الله...

طيب الحين راح نوضح كل جانب وبشكل سريع::

الجانب الروحاني:

هو جانب معانية عميقة جدا.. متصلة بالروح.. مثل الإيمان والتوكل والإنتماء والقيم الأجتماعية..

الجانب العقلي::

متعلق بالجانب الثقافي والعلمي والنفسي...

الجانب الجسدي::

متعلق بالجانب الفسيولوجي البدني الجسماني...

الجانب الأجتماعي::

هو المتعلق بالأسرة والعائلة والمجتمع..

تذكرنا هالجوانب بأيفاء حقها يقول الرسول صلاة الله وأفضل سلامه عليه::

((إن لربك عليك حقا وإن لأهللك عليك حقا فأعط كل ذي حق حقه .. وفي رواية (( وغن لجسمك عليك

حقا))))

عشان تحققين وتوفين كل جانب حقه .. وشو المطلوب منك كزوجةأو كأم...

المطلوب::

نقسم الأعمال اليومية على الجوانب الأربعة.. ساعة لربك ولعبادتك .. ساعة للرياضة والنوم .. وساعة للتعلم

والقراءة.. ساعة للأهل والأولاد والعايلة.. لاتنشغلين بشي عل حساب شي وبأذن الله بتكونين من السعداء

ملاحظة::: مااقصد ساعة بمعنى ساعة وانما وقت كاف لإيفاء كل جانب حقه لكن بشرط مايطغى على

وقت جانب اخر...
*
*

بكذا نكون خلصنا الشرط الأول لتحقيق السعادة الزوجية...

الشرط الثاني::

أنتي المسؤوولة عن أسعاد نفسك:::

خلونا نتفق من هنا على انك انتي المسؤولة عن سعادتك محد غيرك..

لاتعيشين في دائرة الإسقاطات التي يعيشها الشخص الغير سعيد..

(( مب أنا المشكلة.. المشكلة ان زوجي.. أهلي.. المدير.. السحر.. الشيطان.. الخ هالإسقاطات..

السعداء هم الذين تحملو ا مسؤلية اسعاد انفسهم

تذكري أختي الغالية.. انك لما تبغين سلعة غالية .. او شغلة باهظة الثمن.. راح تسعين بكل ماأوتيتي

من قوة عشان تحصلينها وبالتالي تقدرين تتصرفين فيها...

خلي سلعتك الغالية (( السعادة)) اللي تحتاج الى جهد وتضحيات وصبر عشان نحققها.. وتحملي مسؤلية

السعادة بنفسك ولاتلقين الحمل على الزوج ويصير هو المسؤوول عن كل شي حتى سعادتك::

قاعدتنا الأولى كانت :: السعادة من الداخل:: <<< خللك متذكرتها على طوول..

الشرط الثالث::

عشان نغير في الغير .. لازم أبدأ التغيير من نفسي أول::

خلوني أذكر لكم قصة قصيرة تتعلق بهالشرط..

في رجل نوى انه يغير العالم.. وقعد على هالحال 20 سنة.. لكن ولاشي تغير

قرر يغير دولته.. حاول وحاول.. اسنين ولكن ولا شي غير دولته..

فقال خلني أغير مدينتي.. وفعلا بدأمحاولاته بالتغير لمدة 5 سنوات .. لكن ولاشي تغير..

قال خلاص أبغير في الحي اللي انا اسكنه.. عل وعسى يتغير شي حاول وحاول وحاول .. ولكن ولا شي

تغير...

انتقل بعدها يبي يغير في بيته.. واستمر في محاولاته سنين.. لكن ولاشي تغير...

في الأخير أدرك انه لازم يغير من نفسه وهذا الي سواه..

*
*

وانتي عزيزتي بتنتظرين كم سنة عشان تكتشفين هالحقيقة؟؟

حقيقة انك لازم تغيرين من نفسك؟؟؟ اكيييد لا... من منا يضمن عمره؟؟

عشان كذا ابي كل وحدة تقول::: انا ماأقدر اغير زوجي او اولادي او اهلي او صديقاتي لكني قادرة ان اغير

في نفسي.. يمكن لو غيرت نفسي.. بيتغيرون تجاهي...

الواجب الثاني

تذكرون ورقة المفاهيم الي كتبنا فيها الواجب الأول؟!

اكتبو فيها الحين.. اللي اتفقنا عليه( الشروط الثلاثة للسعادة الزوجية)...

خلوني قبل لاأنزل ورقة المفاهيم.. ورقة أعمال يجب انجازها .. مثال لجدول الاعمال الاسبوعية..

( هو للتوضيح.. تقدرين تغيرين فيه على راحتك)........ أعطيكم ملخص للي فات في نقاط...

1. الحب مهارة مكتسبة.. يحتاج الى مجهو وهو اهم ماتحتاجين...

2. فرق بين الفعل والفاعل..

3. السعادة تبدأمن الداخل..

4. انت المسؤلة عن اسعاد نفسك.

5. زوجي هو نصيبي.. وهذا مااستحقه..

6. تغيير الاّخرين يبدأ من أنفسنا..

ســــــــــــــؤال صـــــــــــغير

لو كان زوجك جاف في تعامله معاك.. وشو المفروض تسوينه كزوجة محبة؟!

كيف تتغيرين ذاتيا.. وتغيرين واقعك للافضل..

الجزء هذا راح يكون عبارة عن تمرين حلو وبسيط..

هو تمرين فكري له مفعول عجيييب.. ومن فوايده:

1. يخرج الشحنات السلبية من العقل الباطن.

2. يثبت الأفكار لأيجابية.

4. يجلب القدر المطلوب لك.

5. يزيد الثقة بالنفس.

6. ينبه الى امور معينة وغيرها مكبوته.

*

*

وشلووووووووون نبي نسوي هالتمرين؟؟!

الطريقة جدا سهلة مثل ماذكرت لكن تتطلب الصدق.. وتفضلوا:

1. اكتبي( أنا أحب.. **اسم زوجك**... وهو يحبني)) وتلفظينها.

2. أكتبي اول ردة فعل في بالك بعد ماتلفظينها.. أي ردة فعل.. سواء كانت أيجابية:: انا فعلا كذا.. او سلبية:

لا لا يحبني ولا شي.. او محايدة: ** ياليت**.. او مالها علاقة :: ** كأني ماأتصلت في امي اليوم**؟؟؟

يعني أول ردة فعل في عقللك...

3. كرري الفعل 5 مرات .. يعني أكتبي نفس الجملة الأولى وبعدها اكتبي ردة الفعل الاول... لحد ماتكملين

ال5 مرات.. لكن لاتحللين حاجة..

4. اكتبي الحين(( .. ** اسمك** .. تحب..** اسم زوجك** .. وهو يحبها)) وتلفظيها

5. اكتبي أول ردة فعل..

6. كرري 5 مراات.

7. اكتبي(( انتي** الخطاب موجه للكي** تحبين.. * اسمه* وهو يحبك)) وتلفظيها

8. اكتبي اول ردة فعل.

9. كرري 5 مرات بعد.

** التمرين هذا تسوينه لما تكونين بروحك.. في خلوة وبدون اي مقاطعات ( لاتلفزيون.. لاتلفون.. لاشرب

شاي.. الخ) يعني تقعدين تسترخين على الاّخر تفضين نفسك من اي عمل.. وتبدين في التمرين..

وإذا صار وجاء واحد من الأطفال يرغب حاجة.. او زوجك وصل وقاطعك.. يعني حدث شي قطع التمرين

عيديه من الأول...

اتفقنا؟

الشيء الثاني التمرين لازم تسوينه لمدة 14 يوم متواصلين .. اذا نسيتي يوم تبدين من جديد..

يعني لو بديتي التمرين لمدة 10 ايام ونسيتي يوم واحد .. تعيدين التمرين من جديد..

في اليوم اذا صار انقطاع.. تعيدين التمرين نفسه.. يعني في اليوم الأول كتبتي وكررتي بدون اي انقطاع..

جيتي اليوم الثاني. وبديتي في التمرين لكن رن التلفون فجأة وقطع عليك.. عيدي الخطوات من رقم 1.

واضح؟؟

**لاتحللين ردود الأفعال.. اكتبيها بس.. وعقب حلليها لما تخلصين ال14 يوم..

** اذا حسيتي ان المعلومات سرية تقدرين تتخلصين من الورقة التمرين في نفس اليوم او لما تخلصين مدة

14 يوم..

** احتمال تاخذ الجلسة الوحدة 10__ 15 دقيقة......كثييييييييير؟؟ اكييييد لا...

مثال للتمرين... للتوضيح اكثر:

الزوجة اسمها ( نورة) ... الزوج اسمه...( منصور)..اللون العنابي>> ردة الفعل

1. انا أحب منصور ومنصور يحبني

>>بس يتصرف وكانه مايحبني..

2.اأنا احب منصور ومنصور يحبني

>>كان يحبني في بداية زواجنا

3. انا أحب منصور ومنصور يحبني

>> بس أتمنى لو تتحسن علاقتنا

4. انا احب منصور ومنصور يحبني

>>>أوووووووه وش هالتمرين

نورة تحب منصور ومنصور يحب نورة

>> يالــــــــــــــــييييتـــــــــــــــ

نورة تحب منصور ومنصور يحب نورة

>> يارب ساعدنا هههههههه

انتي تحبين منصور ومنصور يحبك

>>> كلاااام فااااضي

وهكذا اتمنى انه وضح لكم التمرين..

الجزء الثاني:: كيف تكسبين زوجك * طرق عملية *؟؟!

إذا لقيت الموضوع اعجبكم ولقيت تفاعل من الاعضاء كملت ولااكتفي بهذا القدر...

تحياتي:

شــــوااقـــهــ

قلب محترق · 11-09-2008, 02:20

كمل تكفى

قلب محترق · 11-09-2008, 02:23

بالله كملي ارجوك

" أم جنى " · 11-09-2008, 02:41

بارك الله فيك

شــوااقــهــ · 11-09-2008, 03:27

المهندسة دلوعة زوجها

طارق

قلب محترف

ام جنى

نورت صفحتي بمروركم

اخي قلب محترف صح ان المووضوع منقول بس انا قمت بكتابتة ولم اقم بالنسخ مباشرة والله على مااقول

شهيد لانه يتطلب حذف بعض الاشياء الي

ماله داعي ذكرها وتوضيح بعض الاشياء يعني صبرك علي شووي

الجزء الثاني بعد صلاة الفجر ان شاء لله

تحياتي..

شـــوااقــهــ

شــوااقــهــ · 11-09-2008, 05:52

صباح الخير...

نستكمل دورتنا .. ونبدأ الجزء الجديد... بطرق عملية لكسب الزوج الحبيب....

مــــــــــــــســـــــتــعــديــــــــن؟!

أول الطرق:: حبي زوجك حب مطلق::

تذكرون لما تكلمنا في بداية الموضوع عن الحب.. وذكرنا أنواعه.. ومنها .. الحب المطلق:::

جاء الدور عشان انطبق هالحب المطلق..وشلوووون؟

يعني حبي لزوجي لازم وركزو على كلمة لازم.. يكون حب مطلق بدون قيود ولاشروط..

حبي زوجك مهما صدر منه.. يمكن تزعلين.. تعصبين.. تنقدين.. تحزنين.. معه وعليه بس ولا شي...

يأثر على حبك له.. ولازم تأكدين هالشي له..

مثال على ذللك::

زوج وقف أمام ( المرايا) :.. وقال لزوجته :: تخيلي لو أنا أصلع؟؟

ممكن تجاوبه زوجته( اسم اله عليك توك صغير) أو ( خل عنك الوسواس وإذا صلعت يحلها الف حلال وياكثر

عمليات زرع الشعر الرخيصة والفعالة).. بس الزوجة الذكية واللي تحب حب مطلق بتجاوب (حتى لو صلعت

ياحبيبي ماراح يتغير شي.. راح تكون حبيبي مثل ماأنت الحين)

*****
مثال ثاني :

في يوم رجع الزوج من الدوام.. وسأل زوجته :: وش بيصير لو ماعطوني ترقية؟... زوجته ممكن تجاوبه

( لازم تاخذ الترقية.. احنا محتاجين للعلاوة المالية اللي بتطلع من وراها)

واللأسوء انها تجاوبه بـ( وشووو!! من بكرى تروح تقابل المسؤوول وتطالبة بالترقية)

بس المفروض ان الزوج يسمع ( أبو فلان.. ولا عليك ياغالي.. هم الخسرانين.. راتبي وراتبك بيكفينا وبيزيد

بإذن الله)

شفتوووووووو الفرق؟!

كذا نبيك تكونين مع زوجك.. وكذا نبغى حبك له.. يكون حب مطلق..

كلنا سمعنا عن زوجات تخلو عن ازوجهم يوم فلسوا!! او يوم انسجن وتخلى عنه المجتمع..

وتأكدوا ان مثل هالزوجات.. ماعرفو معنى الحب المطلق ولامارسوه...

للمرره المليون اكرر:: حبي زوجك حب مطلق::

حبيه اذا احسن وكافئيه بالأحسان...حبيه اذا ساء وكافئيه بالغفران والمسامحه.. حبيه اذا اعطى وكافئيه

بالشكر... حبيه اذا قصر .. وكافئيه اذا ستر...

وحطو في بالكم خواتي.. ان اللي تحب زوجها ماتتكلم عن زوجها بالشينة مثل مانقول في العلن وقدام الخلق

... ولاتكشفي له سر......... وكلامها عنه كله بالخير...

إذا الحب المطلق سر الوجود

الواجب الثالث

اكتبي في ورقة المهمات:: (( أخبر زوجي إني أحبه وإني سعيدة ومحظوظه لأنه في حياتي))

الواجب الرابع

اكتبي في ورقة الأعمال: ( أضم زوجي وأحضنه.. وأقول له اني اسعد أمرأة في العالم... ومادري شكنت

باأسوي لو ماكان نصيبي))

أتمنى أنكم تطبقون الواجبات

الفقرة الجاية :: انتبهي! زوجك دايماا يختبرك

***********

تاابعوني

ثاني طرقنا:: انتبهي الزوج دايما يختبر::

من الحاجات اللي لازم تنتبه لها الزوجة:: ان الزوج يختبر حب زوجته له كل يوم تقريبا ... بوعي..وبدوون وعي

أعطيكم مثاال

تعطلت سيارة البيت اللي يستخدمها السواق عشان يودي الزوجة والأولاد.. اضطر الزوج في ذاك اليوم انه

يوديهم لبيت اهلها وفي الرجعه ترجع مع سواق بيت اهلها...

وهناك قالت ام الزوجة:: يابنتي لازم تصلحون سيارتكم.. مب زين كذا تضلون بدون سيارة..

ولما رجعت الزوجة للبيت واقعدت مع ابو العيال قالت له:: (امي تقول لازم تصلحون السيارة)

ممكن هذا الزوج يختبرها عشان يعرف وزن كلمته عندها.. فيقول لها( انا اشوف ان نأجل الموضوع شوي على

الأقل لين الشهر الجاي اضمن أن توفرت السيولة المادية وتوفرت عندي........ أشرااايـــك؟)

الزوجة لما ترد عليه بس عاد امي قالت) >>> ماراح تنجح

لأن ردة فعله بتكون ياأما بيعصب من خلال رده : ( يعني كلامي ولا كلام الوالدة؟)

...... أو بيكبت.. وطبعا ردة الفعل المكبوته تكون أشد خطورة.. فانتبهي عزيزتي الزوجة..

وتذكري :: طاعة الزوج مقدمه على الوالدة وغيرهم شرعا وعرفا..

[B] الواجب الخامس

أكتبي في ورقة المفاهيم اذا وضعت زوجي في المقارنة مع احد سوف يكون هو الأول)..

الطريقة اللي بأضيفها عقب ان شاء لله:[/B]

كوني مستمعه جيدةن

ستكمل طرق كسب الزوج الحبيب.. وذكرت طريقتين::

حبي الزوج حب مطلق

كوني ذكية في اختبارا ت زوجك..

ثالث طريقة كوني مستمعه جيدة:::

يجي وقت على الأنسان.. يبي من يسمعه.. وهاذي حاجة اساسيه له.. فما بالك بالزوج اللي محتاج اكيد

لإنسانة تحبه وتفهمه وتسمعه لامن بغى يتكلم وتأكدي عزيزتي ان الزوج لو مالقى اللي يفهمه في محيط

بيته.. راح يدور عن ذاك الشخص.. ويمكن عن زوجة ثانية أو عن علاقة ثانية!لاتستغربين ولاتستبعدي هالشي

لذللك انتي اللي لازم تفهمينه وتسمعينه...

نسمع عن حريم متزوجات من سنين وتلقين الوحده تقول:: انا مافهمته لحد الحين::

وانا اقولها متى بتقررين تفهمينه؟!او وش كنتي تسوين طوول هالسنين؟؟

والصراحه اللي مافهمت زوجها مهما كانت مدة زواجها.. اسمحو لي أقولها:: انتي ماتسمعينله عشان

تفهمينه:::ت

درون خواتي.. ان السماع والانتباه واجب عليك كزوجة؟

لأنه ليس من الأدب ان الزوج يتكلم سواء في موضوع مهم او غير مهم.. ويتفاجأ بالزوجة سارحة في عالم

ثاني مثلا! او منشغلة بالطفل اللي بيدها او المجلة او اي شي ثاني

لذللك خواتي::

متى ماطلب منك زوجك النتباه... انتبهي له واسمعيه.. ولاتنشغلين بشي

الا بعد ماتستأذنين::

يعني اعتذري منه وقولي له: ( ممكن حبيبي نأجل الموضوع لوقت ثاني.. أو بعد ماأخلص الشغله اللي في

يدي)

على شرط لما تفضين.. ترجعين تسألينه عن الموضوع نفسه....... معاااي؟

وتأكدي عزيزتي...ان الزوجة الي ماتسمع زوجها وتفهمه راح تواجهه متاعب عاجلا او اجلا..

لأن الأستماع فن.. تعلميه عشان تحافظين على زوجك للأبد طيب وشلووون اسمعه..

بسيييطه...

لما يدخل اسأليه عن شغله.. اسأليه عن طموحاته واهتماماته...

ابو فلان ! وش اللي تتمنى تحققه؟

وشلون كان شغللك اليوم؟

والأمثلة كثيرة...

لكن انتبهي عزيزتي الزوجة لاتكثرين من الأسئلة

يعني لو سألتيه وتجاوب معك.. استمري معاه لحد ماينهي كلامه..

واذا ماتجاوب وقفي ولاتسألينه.. لأنه يمكن يكون تعبان اوماعنده رغبه في الكلام او مشغول باله

في موضوع معين..

الواجب السادس

اكتبي في ورقة المهمات: تدربي على الاستماع والانصات وذلكك بعدم المقاطعه او الانشغال بشي

اخر حين التحدث مع الزوج...

يـــــــــــــــتــــــــــبــــــــــع

تحياتي

شــــــــوااقـــــهــ

(مايميزني لقب) · 12-09-2008, 16:19

يسلمــــــــــــــــــــــــــــــــــــــــــــــ ـــــــــــــــــــــــو ياقلبي والله يعطيك العوافي
وننتظر الباقي لا تطولين علينا حبيبتي!!!!!!!!!!!!!!!!!!!!!!!!!!!!!!!

روعةالانوثه · 12-09-2008, 19:13

مشكوره ياقلبو
بس اذاكان الزوج لايتحدث كثيرا كيف اسمعه وافهمه؟؟

شــوااقــهــ · 12-09-2008, 20:47

مايميزني لقب

يسلمووو على مرورك اللي اسعدني ولعيونك اكمل الباقي

روعة الانوثة

اسعدني مرورك

بالنسبة للرجل اللي مايتكلم هذا مشكلته مشكله

حبيبتي حطي باللك الناس اجناس فيه الغبي وفي الذكي وفيه اللي مايسكت ابد وفيه اللي محطوط

على الصامت زي ابوكم

حبيبتي اول شي احمدي ربك زوجك مايتكلم كثير اهوون بكثير اللي زوجها ثقيل طينته وكلامه وتفلسفه

مايخلص >>بس تهزي راسك صح صح كلامك وانتي بينك وبين نفسك تقوولين اووف اسكت

ثاني شي هذا زوجك وهذا نصيبك تقبليــــــــــــــــــــــــــه كما هو عشان ترتاحين وتريحين راسك

ثالث شي حاولي انتي تتكلمين معاه تفتحين مواضيع تناقشينه مثلا تشوفين الاخبار اليوم

وتقولين يووه اليوم شفت الاخبار وفيه خبر مرره ضيق صدري .... واكيد بيسأللك

شوفي وش اهتمااماته مثلا يحب الاجهزه

فيه مشكله بلاب توبك او جواللك رووحي لمه قولي حبيبي شف وش فيه وش راايك حاولت اني اسوي

فيه كذا وكذا وحاولي تااخذين وتعطين معه تكثرين الكلام... اخذه منك اسأليه طيب علمني وش سويت

وهو بيستانس بيقعد يتفلسف عليك...

مثلا يحب الكورة

اقوللك وحده من صديقاتي مااتطيق شي اسمه كورة تزوجت واحد مهبول كورة وش سوت صارت مثله

راحت تشجع فريق غير فريق زوجها واذا تبارو ا الفريقان شوفي البيت انواع الضحك صار مايشوف المباريات

الا بالبيت لانه صارت ممتعه مرره ..

رابع شي>>>طريقة مجربه

حاولي كذا مدة معينه كل يوم تحاولين تفتحين موضوع معاه تسولفين واذا حسيتي انه شررد

او مل منك اسكتي فجئه ... تشوفين راح يرفع عيونه عليك فجئه بيساللك وش فيك قولي لابس حبيبي

شكله فيه شي شاغل بالك حبيبي صح ... هو طبعا ماراح يقوللك شي بيقول لا لا مافيني شي

واصحي ترجعين تكملين السالفه قومي سوي اي شي..

استمري كل يووم تحاولين انتي اللي تبدين تتكلمين مده من الزمن كذا اسبوعين عشر ايام

بعدين فجئه انشغلي عنه بأي شي واذا قعدتو تقهون اسكتي وحاولي تطالعين اي شي

رااح يفقد سواليفك وبتلاحظين انه شوي شوي بيحاول يتكلم معك >> اصبري عليه شوي

ان شاء اكون افدنك

تحياتي

شـــــــوااقـــــــهــ

شــوااقــهــ · 12-09-2008, 21:28

نـــــــــــــــــوااصــــــــــل

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

دووررة كيــف تــكــســبــين زوجــكــ حــبيــبكـ