المشاركة الأصلية كتبت بواسطة بدوي يعشق بجنون

الأخت ريم الأحاسيس
أسأل الله العلي العظيم أن يهدي سرك ويشرح صدرك ويخليكم لبعض ويسهل أموركم ياكريم
مشكور أخوي على الدعوة ..الله يشرح صدرك
ريم بقولك شي الله يحفظك
أنت بنيه وأي شيء يجرح شعور البنت...البنت دايم حساسه بزياده بحكم تكوينها وعاطفتها
أنتم لكم فترة سنة تقريبا...ممكن يكون للروتين وعدم التجديد دور....لأني أنا بصراحه أخاف من هالفترة
لاتحاولين تتدخلين بكل شي بحياته هالفترة...لاتنفرينه منك بكثر السؤال
عطيه حريته التامه وعلى قولتهم..........يطير الطير بالعالي ومرد القدرة تجيبه
والله ما اتدخل فيه .. بس هو مايتكلم .. علشان كذا اضطر اسأله ابيه يتكلم
أهم شي لاتشكين فيه بأي شكل من الأشكال...لأن الشك مافيه فايده يعني بيتعبك نفساً ولاراح يغير شي فيه
وإن شاء الله إنه مو راعي سوالف حتى لو معه جوال ثاني...خوذيها مني : الولد اللي راعي غزل بيتعب نفسياً ولاراح يكون مرتاح...ورب البيت من يوم يخطب يحس بدنيته شي تغير ويصير إتجاهه وتفكيره لك لأنك راحته
أحيانا يمكن شاغل فكره سالفة مصاريف الزواج (لأن همها ماتحمله جبال...من جد تعب نفسي ياخذ كل التفكير)
فعلا هو دايم يتكلم عنها .. وأنا مقدرة الوضع جدا أو
يمكن يوم يجي يزورك حد يضايقه ولا ياخذ راحته معك (راحته بحدود الأدب والمعقول)
راجعي نفسك شوي...يمكن حصل منك شي أزعله
ما اتوقع .. بس ابن آدم خطاء .. يمكن أنا اشوف مازعلته وهو زعلان ..الله يقدرني افهمه
أهلك أهلك أهلك نصيحة اخو محب لايتدخلون بينك وبينه إلا بالشي الكبير اللي مايحله إلا الكبار
لا تتصلين عليه لفترة
والله مااتصل نهائي إلا في الشديد القوي .. يعني في الأصول .. لكن كل شوي انط وادق عليه .. لا لا ..
كل يوم آخر الليل يوم تحسين أنها حزة نومه دزي له مسج ديني تطلبين من الله أن يشرح صدره ويحفظه حتى يصبح ومن هالرسائل الدينيه..............أو رساله الصبح بدري يوم تحسين أنه بيروح العمل تسألين الله له التوفيق والحفظ وأن يرده سالم
وقفي رسائل حب شوي
حنا نموت ونتجنن يوم تجينا رساله من هالنوع تحسسنا بإن فيه أحد يحبني حب صادق ويخاف علي

الغالب انا ما ارسل هو يرسل وأنا ارد على رسالته ..وإذا ارسلت ارسل يوم الجمعة فقط بأجرب واشوف
أبحثي له عن ألف عذر ولا تحملينه السبب...حتى يفرجها ربك
آمين الله يفرجها
طبعاً حنا شباب وبنات في فترة الملكه ننشد الكمال العاطفي والرومانسية
الكمال لله سبحانه
فعلا هذا اللي صاير
أنا ما أخلي مسؤليته من هالشي....ولكن لاتدعين مجال للشك أن تكوني أنت سبب
السعادة عالم كبير مفتاحه بين يديك ياسيدتي...
أصبري لك أسبوعين وجهزي له هديه تدرين انه يحبها وتكون شي دايم قدام عيونه أو معه وين مايروح
وأتصلي عليه....قولي له حياتي لو أشتقت لي وش أول شي بتسويه ؟ بيقول لك: أكلمك
قولي له وإن كلمتني ...أنا بقول تعال لحبيبتك لأنها ماتصبر تشوف نور عيونها مشتاق وتعبان
إن والله قفل مخه ولافهم...قولي له متى تحس انك فاضي وتقدر تجي (حددي معه موعد)
ويوم يجي سوي الشويتين حقون البنات والسحر الحلال وقدمي له الهديه
وإن شاء الله بتلقين جواله مفصول من قوة الفواتير بسبب مكالماته لك
أنا ماابيه يتصل كل شوي وتكون المكالمات طويلة ..بس ابي التواصل يكون مستمر حتى لو كان شئ قليل ..ما ابيه يطنش فترة ووقت مايذكرني يتصل ويرسل ..هذا اللي قاهرني ...
وإن شاء الله بأسوي اللي قلت عليه
أسأل الله الكريم رب العرش العظيم أن يجعل بينكما مودة وألفه وأن يجعل قدومك عليه وقدومه عليك ...قدوم السعد
اللهم آمين ولجميع المقبلين على الزواج