عالم الحياة الزوجية - منتدى

باقة مشاعر · 10-10-2008, 00:12

السلام عليكم

دائما احب اخذ بآرائكم و نصايحكم واتمنى القى حل عندكم بأذن الله

انا مخطوبه طبعا ما ملكنا بسبب وفاة احد اقارب خطيبي فأجلنا لي كم شهر

انا حيل حساسه ورومنسيه حيل حيل عاصفة من مشاعر و احاسيس

بهذي الفتره كنت اهدي خطيبي هدايا رومنسيه حيل و معاها كلام رومنسي يذوب الصخر ، بس خطيبي ماهداني الا مرتين ولا هديه فيها رومنسيه ابد و حتى دايم اقول له اني ما احب شيء معين تخيلوا جابه لي انصدمت اكثر من الي فرحت

قلت طيب جايز ناسي ومشيتها هذي المره بس كل مره يسافر دوره او سياحه مع اصدقاءه يقول لي ايش في خاطرك ،تبغين شي من هناك انا انحرج اقول له لا ابيك سالم

وانا من طبيعتي لما حد يقول لي تبغين شي اقول لا ماابغى بس من داخلي ودي بس استحي حيل لدرجة الوالد مااطلب منه شيء الا لضروره ولمحت لخطيبي كم مره ماابيك تسألي ابي الشيء يطلع من طيب خاطرك، وكان يقول لي مابغى اقصر عليكي بشي وراح البسك احلى لبس و انا راح اختارهم لك فترة الملكه هدايا و طلعات بس مدري احس هذا كلام يعني انا مو من حقي اني اخذ اي شي منه و لا هو لان ماملكنا بس تهادوا تحابوا على الاقل اعرف ذوقه احس اني في باله على طول مثل ما انا فكري و عقلي مشغول به واحب اهديه حتى لو ماعندي احط على نفسي بس اخذ له هديه تفرحه ودي يصير مثلي

و مشكلتي الثانيه اني احب الكلام الحلو وهو نادر مايقول لي كلام حلو و ساعات انا اقول له احب اسمع هذا الكلام يسوي الي اقول له عليه اسبوع او اقل و بعدها ترد حليمه لعادتها القديمه حتى المسجات ماعاد يرسل لي مسجات غرام و حب ادري ان الحياة الزوجية ماراح تكون كلها حب بس هم حلو الود يكون بين الطرفين على طول

ودائما يبغاني انا ابتدي يعني اذا طول اليوم ماتصلت فيه يتصل فيني يمكن اخر الليل و يعاتبني ليه و مدري ايش ، احب احس انه يموت فيني و مايقدر يصبر بدون مايسمع صوتي حابه احس بغلاتي عنده ابيه يكون رومنسي اكثر و انا دائما اصارحة و اقول له الي بخطاري اني ابيك تكون رومنسي ابي احس بأهتمام بس مثل ماقلت لكم كم يوم و يرد مثل قبل

تعبت ماني عارفة كيف اتعامل معاه انا صريحة معاه و رومنسيه حيل و ماقصر عليه بالكلام الحلو و لما يكون عندي اهديه قولوا لي ايش الي باقى وماسويته تعبت حيل حيل

والدتي تقول لي لا تحاسبينه الحين اصبري ليما تملكون راح يبان كل شي بس انا مو مقتنعه بكلامها معني وربي احبه موت و اموت بطيبته و اخلاقه بس احس اني اعطي و ما خذ شي لو شي بسيط بس انا ما انتظر يرد لي اي شيء اسويه بس لو ورد او كلام حلو راح افرح حيل

دموع مسجونة · 10-10-2008, 05:14

حبيتي انا مستغربه هذا الاتصال بينكم وانتوا ما ملكتم ؟؟؟ يعني لسى ما كتبتوا العقد ؟؟
اذا ما كتبتوا العقد ترى ما يجوز لكم أبدا

ثانيا حبيبتي انا نفس حالتك بس انا مملكة صار لي شهرين
زوجي نفس حال زوجك احسه مو من النوع اللي يعبر عن مشااعره اهي اهي

تخيلي جاء زارني مرتين ولا جاب ولا هديه ولا حتى ورده انا مرره ضاق صدري حتى نزلت موضوع هنا في المنتدى
وكمان ما يتصل كثير ولا يسمعني كلام حلو وااجد وكمان كملت وسافر في دولة ثانيه وتعالي شوفي الحالة اللي انا عايشتها لاني وربي زييك رومانسيه واحب الرومانسيه ومسجات حلوه ...
بس انا اليي مصبرني اني احسه يحبني بس لسى خجلان مني ما ادري
ما لنا الا الدعاء والصبر .. ادعي ربك واصبري حبيبتي والله يسخر لنا ازواااجنا يارب ويجعلهم لنا يااارب كما نريد

ام بنـــدر · 10-10-2008, 10:45

لاتعبين نفسك وتفكرين كثير

حتى بعد الزواج ماراح

تسمعين كلام زين

واذابيقول
بتكون مره في السنه

كل الرجال كذا

نايف جده جمال ورقة · 10-10-2008, 10:52

اذا تبغين الصراحة مالك حق تكلمية وانتي ماملكتي علية هذا واللة اعلم مايجوز

نايف جده جمال ورقة · 10-10-2008, 10:53

اقتباس:

المشاركة الأصلية كتبت بواسطة ام بنـــدر

لاتعبين نفسك وتفكرين كثير
حتى بعد الزواج ماراح
تسمعين كلام زين
واذابيقول
بتكون مره في السنه
كل الرجال كذا

لاتعليق

الـقـيـصـر · 10-10-2008, 15:02

والله انا رايي من رايي الاخون والخوات اللي قبلي
كيف اتصالات بينكم وانتم لسى ماملكتم

الله يوفقكم ويجمع بينكم بالخير

باقة مشاعر · 10-10-2008, 15:33

جزاكم الله خير على ردودكم الطيبه و النصايح

بس انا في مشكله و انتوا تركتوا المشكله و تناقشتوا بالحرام و الحلال

ادري حرام بس صار ظرف و مانقدر نملك الا بعد كم شهر يمكن تطول الفتره او تقصر الله العالم و بعدين اكلمه بعلم هلي و اشوفه بين هلي الحمدالله وهله على علم بهذا الشيء

وهذا الشيء ما يقلل من قدري و قيمتي

باقة مشاعر · 10-10-2008, 15:36

دموع مسجونة

اشكرك على ردك الطيب و الله يصخره لك و يهنيكم ياربي و يسعدكم

سمرونهـ كيووتـ · 10-10-2008, 15:47

مدري وش بقولك الله يوفقك يالغاليه بس لاتزعجين تفكيرك واجد خليك مرتاحه بس اصبري توكم جديدين على بعض بس اصبري اللين بعد الملكه والله يوفقك

bayan sh · 11-10-2008, 08:38

حبيبتي انا ايام الخطوبة كان خطيبي نفس الشي اكتر حاجة ممكن يعملها يقول احبك

فترة قراية الفاتحة ((الخطوبة )) ماتبين اي حاجة بعد الملكة مرة اتغير خطيبي فانشاالله خطيبك يتغير ويسير رومنسي

بنت أبوي والفخر لي · 11-10-2008, 09:56

يابنتي حراااااااااام حرااااااااااام

واذا تبوون تتكلمووون مايجوز الكلااام بالرومانسيه في ايام الخطوووبه بدوون عقد

بس يكوون كلاااام عااااااااااام فقط

ولا يجي عندك وتعطينه هدايا وشبقيتوا للملكه

ماراح يصير شئ جديد

اسمعي يابنتي اصبري شوي لين ماتملكووون وذيك الساعه قولي له ابيك تصير رومانسي

وبس

اما بالنسبه للهدايا كانك تقولي له تراني اعطيك عشان تجيب لي

اتكلم معك جد والله

خليكي ثقيله وقت الخطوووبه وحتى وقت الملكه بس خففي

وهذي مشاعرك الزايده ياخوووفي تنصدمين زياده بعدين

خففيها ياحلوووه

ولاتتكلمي معاه بعد الملكه عن الرومانسيه الين ما يبدا هو

وبس بالتوفيق ان شاء الله

$اسيرة الليل$ · 12-10-2008, 01:33

اقولك وبختصار انسى شي اسمه رومنسيه مع الرجل000000000عيشي حياتك لاتهتمين بهذي الاشياء اهم شي انه يحبك وتحبنه0000 والله يوفقك ويرقك ويرزقنا الذريه الصالحه00000000

بنت أبوي والفخر لي · 12-10-2008, 11:45

هههههههههههههههههههههههههههههههه

اسيره شكلك تعبااانه حييل من الرومانسيه

لاااحرااام والله بعدين البنت تروووح فيها هههههههههههههههههههههههههههههههه

ياشيخه شوووفي انا وجه نظري تقوول

انوووو لو الرجال قبل الزواج مو رومانسي امكن يتغير ويصير رومانسي

اما اذا كان قبل الزواج رومانسي عااد بعد الزواج لمي عفش الرومانسيه وخبيها احسن لك

booooon · 12-10-2008, 12:13

حبيبتي إذا ما كتبتوا العقد فما يجوز تكلميه أبد ولا تراسليه ولا شي
لأنه ما يمت لك بأي صلة
وبعد كتابة العقد يكون المراسلة والهدايا
على العموم إنتي استمري برومنسيتك وتلميحاتك وإذا قدرتي تتقربي لوحده من خواته
يكون أحسن عشان تساعدك في تغييره
ويارب يجعل حياتك كلها حب ومسرات

الجندل · 12-10-2008, 13:31

للأسف أغلب الرجال بهذه الصفة
اغلب الرجال عندهم جفاف
جفاف بالمشاعر
لأنهم ما تعلموا هذا الشيء
حنا تطبعنا بطبع اهلنا
وللأسف ننقل طبعنا لأولدنا
ولكن اللي يبي يتغير لازم يتعلم
واللي يبي يتعلم لا يستحي.
أقول دليه على هذا المنتدى
ارسلي له العنوان
وخليه يدش ويتعلم ..
وفقكِ الله ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

تعبت ابي خطيبي يفهمني