عالم الحياة الزوجية - منتدى

تمساح له ذيل · 28-10-2008, 01:13

السلام عليكم ورحمة الله ...

بدخل في الموضوع على طوووول لانه هالموضوع صج صج متعب قلبي وفكري

انا شاب عمري 24 سنة ... الحمدلله كل الامور عندي من احسن مايكون او على قولتهم 10 على 10

قبل لا ادخل في موضوع المشكله بقولها لكم بكل صراحه ....... انا ماعمري في حياتي كلمت بنت غير امي وخواتي بسسسسسسسسسس لانه من يوم طلعت على هالدنيا وانا اطبق المثل اللي يقول "كما تدين تدان" يعني ماحبيت ولا عمري تجرأت اكلم بنت او اغازل بنت ماتحق لي شرعا لانه حاط في بالي انه هالشيء حرام وانا اخاف رب العالمين لانه هذا اعتداء على حرمات الناس ......

بالمختصر ,,,, انا شاب عنده خبره (صفر) في الرومانسيه واسلوب التعامل مع البنات

قبل 3 شهور (في الصيف) ملكت على اميرة روحي ,,,,, البنت اللي عرفتها من طفولتي وكنت العب معها يوم كنا صغار بس بعد ماتعديت عمر الـ 15 سنة صرت ما اشوفها بحكم انها ماتحل لي بس في يوم من الايام يوم كان عمري 19 سنة شفتها بالصدفه في بيتنا مع خواتي ومن هذاك اليوم صارت اميرة روحي ..... الحمدلله اللي الله حقق لي هالحلم وانا سعييييييد جدا بانها صارت زوجتي رسميا

طبعا من عادات اهلها انه البنت ممنوع تشوف زوجها إلا بيوم الدخله انا احترم رايهم هذي بنتهم ولهم الحق انهم يخافون عليها ( ولو اني سرقت كم نظره وهم مايدرون ههههههه )

المهم انا حاولت بشتى الطرق اني اجيب رقم زوجتي بس علشان اكلمها على اساس تكون فيه علاقه واهتمام ..... بعد شهرين من الملكه طلعت رقم تلفونها وخزنتة عندي في الجهاز ,,,, وصرت انتظر الوقت المناسب علشان اتصل عليها ..... وصحيح .... الوقت المناسب كان في عيد الفطر (اي قبل شهر تقريبا)

وكلمتها اول مكالمه في حياتي يوم العيد علشان ابارك لها ,,,, والله حتى لدرجة اني اول ماسمعت صوتها قلت يمكني غلطان بس سألتها إذا عرفتني وقالت لي نعم عرفتك وهي تضحك

المهم اني هذاك اليوم ماطولت في المكاله (تقريبا 3 دقايق ويمكن اقل بعد) لاني صج كنت متوتر توتر شديييييد لاني اول مره اكلم بنت ومش عارف وش اقول وكيف الاسلوب !!!

واول اسبوع بعد العيد كان بينا مسجات بالجوال بس ,,,, بعد اسبوع من اول مكالمه كلمتها بالجوال (المره الثانيه) ونفس الشيء كنت متوتر بس اقل من اول مره واستمرت المكالمه 3 دقايق تقريبا .....

بعدها باسبوع كلمت المكالمه الثالثه (طبعا كان فيه مسجات بينا) واستمرت المكالمه 5 دقايق تقريبا (فيه تحسن)

اللحين هنا المشكله

لي اسبوعيين ماسمعت صوتها؟؟؟ مع اني ارسل مسجات بشكل شبه يومي ومافيه اي رد منها؟؟

اتصلت بالجوال قبل اسبوع 4 مرات ومافيه اي رد؟؟
وقبل يوميين اتصلت مرتيين بعد نفس الشيء؟؟؟

حاولت بطريقتي اشوف اخبارهم عن طريق اهلي وكل شيء تمام عندهم والامور بخير

بس انا اللحين تعباااااااااااااااااااااااااان نفسيا

مب عارف شنهو الخطا اللي سويته؟؟
هل لانه ماعندي اسلوب في التعامل مع البنات؟ ولا اني قلت شيء غلط ........... والله اني مب عارف وراسي خاطره ينفجر وصرت افكر في البنت 24 ساعه , قلبي يحرقني ابي اعرف ليش مافيه اهتمام منها فيني او حتى رسااااااااااااااااله بس علشان يرتاح قلبي ....

والله اني امس احس بضيقه في صدري من هالموضوع وياليت لو تقولون لي شاسوي!!!
انا فكرت اني اوقف عن ارسال مسجات بس اخاف تفكر اني مب مهتم فيها وانا والله محترق

علموني شاسوي في مصيبتي

روآآبي · 28-10-2008, 01:28

لا تشيل هم ممكن ترسلها بسؤال واضح وصريح
((انتي متضايقه مني ؟؟))

وممكن اذا البنت طالبه تكون انشغلت مع الدوام

البرنسيسه روز · 28-10-2008, 01:31

هي اا اقوللان زوجتك حليلتك شرعا بس من كلامك كأنكم تقربون لبعض انا اقول لو تخبر وحده من خواتك اللي يعزون عليك وتخليها تعرف الاسباب منها ويمكن البنت مثلك مستحيه ارجو ان اكون افدتك بس هذا اللي عندي

شاي بنفسجي · 28-10-2008, 01:38

كرر الاتصال

عاشقة نيمو · 28-10-2008, 01:48

سوري على اللي بقوله بس من جد تخلف يعني وش الي ما تكلمها ولا تكلمك الا 3 مرات من ملكتوا ؟؟؟ يا اخي هي حرررررررررمتك وحلال علييييييييك شرعا ودامكم ملكتوا يعني في عقد نكاح بينكم صح او لا ؟؟

حاول تواصل اتصالاتك لها ومسجاتك واذا ما نفع تقدر تخبر حد من خواتك
والله يوفقك

الفرندقس · 28-10-2008, 01:50

ارسل المسجات عاااااااااااااادي وكأنه ما فيه شي

ويمكن انها تكلمت بالموضوع مع وحده من صديقاتها ونصحتها انها ما ترد عليك لعدة اسباب :

الاول : الثقل صنعه

الثاني : ما تبي تبين لك انها عااااادي بل يمكن ان صديقتها قالت لها انه اذا تكلمتي معه يفكر انك خربانه .

بعدين ليش ما تكلم ابوها او اخوها بعقلانيه وتقول ابي اكلم زوجتي

لنت تدري انك الحين لو مت هي تورثك

وتدري انها الحين مسؤله منكبالمصروف

وتدري انها مسؤله منك بزكاة الفطر

وتدري انك انت الحين ولي امرها

واشياء كثيره ما يسع المقام لذكرها

الله يوفقكم ويتمم على خير و يرزقكم بالذرية الصالحه

تمساح له ذيل · 28-10-2008, 02:18

مشكووورررين على اقتراحاتكم ..... بس يعني حتى لو مشغوله على الاقل بتشوف الاتصالات وترد علي على الاقل على الاقل بمسج ..... مب تعطيني طااااااااااااااااااااااااااف!!!!

انا من النوع اللي صبره طووووووووووووويل بس اللي خلاني اتضايق من الموضوع هو اني ماعندي خبره في مثل هالامور ولا اعرف كيف اتصرف في مثل هالمشكله خصوصا انها اول بنت اكلمها في حياتي ...

الله كريم ,,, مافيه الا نحاول اكثر في الايام الجايه , وعسى ربي يفتح قلبها لي

عذبني حبه · 28-10-2008, 02:35

ليش ماترسلها مسج واتبينلها انك متضايق من اللي قاعده اتسويه << طبعا اذا كانت قاصده

لان لا احنا ولا انت تدري ايش السبب

او ممكن تخلي اختك اتكلمها قدامك وشوف هي بترد ولا لا !!

سحورهـ · 28-10-2008, 02:35

متابعه

عبق الورد · 28-10-2008, 02:52

يمكن ماعندها رصيد ههههه سوري خيو بس حبيت اضحكك شوى
اكيد بتتغلى عليك انت ارسل لها مسج وقلها لو غلطت عليك بشي قليلى
والله يهدى سركم ويوفقكم مع بعض
< برايفت احب راس الوالد والوالده على تربايتهم الصح لك
حفظهم الله ورعاهم

يعشقني · 28-10-2008, 03:25

لاتوقف اتصالات ومسجات.. وكلم كل من يعرفها .. والله يوفقكم

ابي اتزوج حبيبتي · 28-10-2008, 03:55

الصراحه انا من وجهت نظري ولاحد يزعل يمكن البنت شافتك مهتم فيها زياده عن اللزوم قامت تثقل عليك

بالعربي تبي تعلقك فيها شوي وانت تأكد من الموضوع بالأول خل اختك تكلمها على انه عادي وتسلم عليها

هاذا اذا ردت ولا قفلت اختك اتصل انت اذا ما ردت عليك معناه تقصد ارسلها رساله نصها يقول ( شفيك ماتردين علي ليكون زعلتك بشي اول اتصالاتي تضايقك طمنيني عليك لو برساله واوعد اني ماراح ازعجك بتصالاتي اذا اتصلاتي تزعجك)

طبعن لك الحريه انك تضيف لنص او تغير شوي بستشارة ناس عزيزه عليك وتفهم بهالأمور

واذا ردت سلم عليه وقول لها وينك اشغلتيني عليك وشفيك ماتردين عسى المانع خير واسمع عذرها واذا اعتذرت اقبل العذر وسامحه بالطف وماكن شي صار وبعدين

يالحبيب اثقل على البنت ولاتكثر مسجات ومكالمات

ولاتبين لها انك رايح برحله يعني ميت عليها تراهم كذا اذا شافوك تحبهم واجد وماتصبر على فرقاهم يشيخون عليك وانت خلاص ماتقدر تسوي شي لي انك من البدايه بديت غلط

وطبعا هاذي وجهت نظري ومن خبرتي وشكرا

اتمنى اني فدتك بشي

غلا أمه وأبوه · 28-10-2008, 05:33

لاتخاف هذا دلع بنات!@

لخبطة مشاعر · 28-10-2008, 05:41

أخوي ما عليك خذ الهرج

لا تقول لها أبداً "عسى ما أزعجتك" يعني لا تعطيها شي تتعذر فيه و بعدين تصدق و تركب راسها

أنت أرسل لها رسالة تبين فيها أنك قلقان عليها وتطلب منها تطمنك بأي شيء يعني تكلمك أو ترسل لك رسالة

و بعدين هل أهلها موافقين أنك تكلمها، لو موافقين مالها عذر لكن لو هم معارضين ممكن أنهم منعوها من الإتصال وهذا تخلف لكن الشكوى لله

إذا ردت على رسالتك كان بها، أما إذا ما ردت فـ لا تصير خفيف

لأن بعض الناس عامة مو بس البنات لو شافوا شخص ميت عندهم قاموا يثقلوووون

و حاول برضو تتعلم بعض الرومانسية والحكي الحلو و حاول كمان تلقى مواضيع تسولف مو شرط يعني حب و غزل تكلم عنكم وعن وش تحب و وش تكره

آسف عالإطالة وأتمنى أكون أفدتك

تحياتي
ا

الباحث عن الإستقرار · 28-10-2008, 06:17

إن بعض الظن أثم

أحسن النيه والظن فيها

ويمكن أهلها اعرفوا وارفضوا أنها تكلمك

ماتدري وش الأسباب

أنت خل أختك تكلمها وتسألها عن الأسباب

أنت لاتكلمها يمكن تسبب لها إحراج أو مشاكل مع أهلها

ولاتستبعد شيءابداً دام أخذت رقمها وأهلها رافضين الشيء

ممكن حتى توصل ياخذون الجوال منها

ماأتوقع هذا ثقل مو معقوله ثقل يكون كذا

والله يوفقك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

ملكت على اميرة روحي ..... لكن!