عالم الحياة الزوجية - منتدى

مفارق وطن · 26-12-2008, 11:28

السلام عليكم ورحمة الله وبركاته

ابدخل في الموضوع على طول

انا متملك من بنت بعيده عنا واهلي ماعمرهم شافوها الا وقت الملكه وصار لي شهر ونص طبعا كان فيه نظره شرعية وقبل النظره استخرت وعشان اكون صادق ماحسيت لا براحه ولا بضيقه فقلت في نفسي اكيد ان فيها خير دام ما تضايقت المهم وقت النظره شفت البنت واعجبتي مره رغم اني مادققت في الجمال مدري ليش يمكن عشان ابوها كان معانا واشغلني وهو يكلمني المهم قلت تم وصارت الملكه وكان فيها زفه وحركات ويوم دخلت وشفت البنت انصدمت من الجمال ماكان نفس الجمال اللي كنت اتوقعه رغم انها مو شينه بس مو الجمال اللي في بالي وكانو اهلي حاضرين وبعد الملكه سالتهم قالو والله حلوه وماشالله عرفت تختار بس في نفسي ما اقتنعت قلت اكيد بيجاملوني حتى لو انها شينه بس هم يقولون ترى المكياج مره زياده عشان كذا والا البنت حلوة ماعليها المهم بعد الملكه صار بيننا مكلمات يوميا وارتحت للبنت من ناحية اخلاقها مررررررره ودايم مهتمه فيني وتخاف علي مره وتحبني حتى اني اذا سمعت منها كلمه والا حركه تضايقني تقوم تبكي واقول لها ليش وتقول والله مابيك تشوف فيني شي مايعجبك المهم بعدها رحت زياره وقبل الزياره قلت لها لاتحطين مكياج زيادة وفي نفسي عشان اعرف هي حلوة والا لا ويوم جيت الزياره نفس الوضع ماني مقتنع مره في الجمال رغم انه ماعليها عشان ما اظلمها بس مو نفس اللي كنت اتمنى وبعد الزياره الى الحين صار لي شهر مارحت وماحس بالشوق اللي يقولون انه يصير بعد الملكه مدري وش اسوي صراحه قمت اوسوس واقول لو اطلق بس حرام وش ذنب البنت تتطلق في اول حياتها بدون ذنب وهي المسكينه خطب فيها اكثر من واحد حتى من اقاربها ولا اختارت الا انا وفي نفس الوقت اقول حرام اعيش طول حياتي ماني مبسوط في احلى شي في الحياه اللي هو الزواج

واخر حل كلمت قريبتي وقلت لها قالت والله البنت حلوه ماعليها وش فيك توسوس لايكون عين وقالت بعدين مو مهم الجمال مره في الزواج اللي يهمك انها طيبه وتخاف الله وتحفظك في بيتك وقالت لي اذا مره مره منت مقتنع احسن لك واحسن للبنت تطلق الحين لان حتى البنت ماتبي تعيش معاك وانت ماتحبها

طبعا انا العين ما اقتنعت فيها لان لو فيه عين كان كرهت البنت مره بس انا ما كرهتها انا بس جمالها اللي ماعجبني

هذا قصتي كامله ووالله والله ماكذبت عليكم في كلمه

ابيكم تعطوني حل اطلق والا وش اسوي واذا كان لا هل الحب والشوق بيجي والا لا بعد الزواج ياليت المتزوجين يفيدوني لاني مقهور ماحس باي شوق والحب مو مره اكثر السالفه رحمه وطبعا البنت مابينت لها اي شي بالعكس مبين اني اموت عليها رغم اني احس براحه وقت المكالمه الله يخليكم اسعفوني

سلام

تمساح له ذيل · 26-12-2008, 11:48

اقول ..... تعوذ من بليس ترى بليس يحب يزين هالامور ويخرب على المؤمنين .......

مدري بس يمكن انك كنت تتوقع شيء مثل اللي نشوفه في التلفزيون من مذيعات وممثلات افلام؟؟ وإذا شكي في محله (انك تتوقع تكون زوجتك مثل اللي في التلفزيون والافلام) ترى هذي الامور كلها زائفة وخيال على الشاشه الفضيه ....

شيل هالفكره من راسك واحمد ربك انه جمالها مقبول (حسب كلامك انها مقبوله , إذا هي مب جميله جدا) لانه الجمال ليس المعيار الوحيد اللي تاخذ البنت علشانه؟؟؟

فيه الحب , الاخلاق , اهتمامها بشريك مستقبلها ,,,,, الخ
وباين عليها انها بتسوي اي شيء علشانك , لذلك ارى انك تتعوذ من ابليس ووسواسه لانه ياما في بنات حلوين بس هم الشر بعينه (ربك إذا اخذ شيء اعطى شيء) وانت في حالتك الله اعطاك بنت تحبك وتخاف على مشاعرك

روح طفلهـ · 26-12-2008, 11:54

يعني انت يهمك الجمال ...؟؟

اخووي باين من كلامك عن البنت انهاا اخلاق وتحبك وراضيه فيك ايش فايده الجمال لو كانت اخلاقها شينه وماعندها لاسلوب بالتعامل ومغروره وو...الخ

وبعدين الكل قال لك انهاا حلووه مو شينه ...يعني لازم تكوون ملكه جمال وحلوووه وبمواصفااات معينه ..طيب نفرض اخدت وحده زي ماتبغى وجميله لكن اخلاقها سيئه كيف بتكوون حياتك معها ؟؟

اخوووي خدها نصيحه مني الجمال مو كل شئ اهم شئ الراحه النفسيه وانك مرتاح مع الشخص اللي امامك...

ولو انت مو مرتااح اترك بنت النااس من بدرري قبل الزواج ...

/

الله معاكـ،،،

Bo Turky · 26-12-2008, 14:45

اقتباس:

المشاركة الأصلية كتبت بواسطة روح طفلهـ

يعني انت يهمك الجمال ...؟؟
اخووي باين من كلامك عن البنت انهاا اخلاق وتحبك وراضيه فيك ايش فايده الجمال لو كانت اخلاقها شينه وماعندها لاسلوب بالتعامل ومغروره وو...الخ
وبعدين الكل قال لك انهاا حلووه مو شينه ...يعني لازم تكوون ملكه جمال وحلوووه وبمواصفااات معينه ..طيب نفرض اخدت وحده زي ماتبغى وجميله لكن اخلاقها سيئه كيف بتكوون حياتك معها ؟؟
اخوووي خدها نصيحه مني الجمال مو كل شئ اهم شئ الراحه النفسيه وانك مرتاح مع الشخص اللي امامك...
ولو انت مو مرتااح اترك بنت النااس من بدرري قبل الزواج ...
/
الله معاكـ،،،

كلام جميل يأخي الجمال مو كل شي ,,, الدين الدين الدين ثم الأخلاق , دع المظاهر وأبحث عن الجوهر ـتجربةشخصية

all_love · 26-12-2008, 15:56

ماعليه اخوي بكون صريح معاك
بالاول مبين انك خبل
من خلال كلامك وجمالها مهو الي ابي وبطلقها ابي وحده مره ملكة جمال يعني سوالف ورع مع انك يمكن كبير

الشي الثاني زوجتك جميله مقارنه بالبنات الثانيات والدليل ان خطابها واجد وتراها سعوديه مهو لبنانيه ولا تركيه دير بالك
يعني المقارنه مهو مع البنات الي بالتلفزيون والسينما وهوليود مع صديقات خواتك وهن قارن ولاحظن الفرق

واسف اذا ازعلتك اني اشوف انك رقله بس هذا الصحيح
وسامحني

ام براهيم · 26-12-2008, 16:49

والله ماخربكم الا هـ الدشوووش والقنوات الفضااائيه

ولا انتم من زينكم احمدو ربكم راضييين فيكم

طيب سؤال انت شين ولا حلو؟

عشان اشوف اذا شين والله انك قوي عين تبي وحده حلوه وانت شي

انا اذا لا عاد شي راجع لك

عموما ترى الاخلااااق اهم شي

وش ينفع الجمااال ..

ياما حلوات جميلات مره وتطلقو مانفعهم جمالهم

ياشيخ اتقي الله انت تبي تعيش مع جمالها ولا مع اخلااقها وقلبها

ياكرهي لكم ياالرجال قسم مايملا عينكم الا التراب

واحمد ربك هاذي هي تخاف عليك وتسأل عنك واذا زعلت تصيح وش تبي اكثر من كذا

لو كانت جلوه وجميله مثل ماتبي كان شافت نفسها عليك

والخيره فيما اختاره الله

الله يوفقك

وسوري ع الازعاج والكلام الي بدر مني ...

وجهة نظر

دانة اهلها · 26-12-2008, 17:28

وربي انقهررررررررررررررت من قريت الموضوع وانا اللي اسجل على طووول

بغض النظر كلامي صار قاسي او لا بس بتكلم اللي يريحني واشوف انه صحيح من زاويتي

يارجال خاف ربك كل هالحوسه عشانها مو جميله مره وش تبيها تطلع .............!؟

ياليتها جايتك جميله بقووه ومطلعه عينك بغرورهااا واخلااقهاا

مو اهم شي الجمال ............وانت شايفها في النظره الشرعيه ومعجبتك وقتهاا

ليش ترجع بعدين وتقول ماعجبتني اجل وش فايده النظره الشرعيه ..؟

قسم بالله انتم يالرجال ماتراعون اي مشااعر .., ماتراعون ان البنت حسااسه بمشااعرهاا

هذا جزاءهاا كل شوي تبكي عليك وانت توهمهاا انك تموت فيهااا

على العموووم انا عندي انهاا افضل شي اذا ماعجبتك تنفصل عنهاا اللحين احسن من انك تورطهاا تجيبهاا

وبعدين تقول مابيهااا

ودي اعرف على ايش انتم يالرجال شايفين انفسكم المشكله انكم اقل من العادين ونسبه قليله فيكم الحلوين

مو الجميلين بعد ........ وغير كذا لكم وجه تتشرطوون

مثل ماانتم تبوون جميله مثل اللي تشوفونهاا بدشوووش والقنوات الفضائيه حنا بعد نبي مثل مهند

بس دايم انتم المتغطرسين والبنت الله يكون بعونهاا ونتحملكم ...............

نصيحه من اختك الشكل الخارجي مو مهم مثل اخلاقها وحبها لك .. مصيرك بتمل من شكلهاا وبيصر جمالهاا عادي

انت لو تشوف الجوانب الحلوه في خطيبتك وتترك سالفة الجمال اللي لعب الشيطان براسك

بتكون بخير وبتحبهاا اكثر والدليل انك تقول اذا كلمتها ارتاح معهااا ...

سامحني اخوي اذا غلطت بس بجد رحمت البنت ووش ذنبهاا ..

على العموم الله يوفقكم ان شاء الله وتمووت فيهاا لدرجه ماتفارقها ولا دقيقه ............

مفارق وطن · 26-12-2008, 18:39

اشكركم على تفاعلكم معي اللي فادني كثير لكن انا والله ماجيت هنا وقلت السالفه الا من بعد ماضاقت الدنيا بعيني والمشكله السالفه ذي مايمديني استشير فيها صديق او قريب لانها خاصه قلت مالي الا هنا يمكن تفيدوني

المهم انا ماعندي مشكله بكمل بس ابي اعرررررررررررف بعد الزواج بتتغير حياتي وانبسط والا ببقى على هالوضع

وادعو لي بس

سلام

ناطر اتزوج · 26-12-2008, 18:47

و الله الجمال مو كل شي و انا اخوك
المهم اخلاقها و طيبتها
ادري انك سامع هالكلام واايد بس هذا صج اللي بريحك طول حياتك

أنسة دلـــوعة · 26-12-2008, 19:22

يعني انت تشبه تووم كرووز ولا مهند !! ......عشان اشووف لك حق تتشرط ولا لا
وانت مشالله عليك جاه وجمال ولد عز البنات يتحاذفوون عليك لهالدرجه عشان تتشرط !!

اقوول احمد ربك لا يبلااك فيه شي اسمه نظره شرعيه خلاص مالك حق تتكلم وتقوول شي بنات الناس مو لعبه بيدك دامها ماعجيبتك كان من البدايه الغيت كل شي مو اللحين
اهم شي الاخلاق صدقني عن تجربه ماتنفعك خشه تنااظرها وسلووك سيء ينكد عليك حيااتك
انت تقول موشينه وهذا اهم شي يكون شكلها مقبوول اقل شي تقدر تناظر فيها لانها لو شينه انا بوقف بصفك لانه اهم شي التقبل من الطرفين

انا اول ماتملكت وربي انصدمت شلوون وافقت عليه مو مصدقه ابد (مو شين هو )لاني شاايفته يوم الشوفه مرره غير ومتضايقه مرره ماعاد لي خلق
وبعدين فكرت قلت انا الي موافقه كان من البدايه رفضت و ياخذ غيري بس وش ذنبه انكد عليه وانكد على نفسي
هذا زوجي خليني اتقبله عشان انبسط واعيش حياتي وارتااح زي غيري مااحرم نفسي من شي ولااحرمه.....
.والله اللحين لو يخيرووني من جديد مااخذ غيرره يسوى الدنيا عندي ومافيها يكفي ينااظر خاطري ويداريني
ويسوويلي كل الي ابي وش ابي بأكثر من كذا !!
لو ماخذه واحد حلوو وقليل ادب مايراعيني ولا يقدرني وش بينفعني فيه!!

خلك عااقل وفكر زيــــن هذا زواج فيه بكرا مسؤليات ومشااكل يبيلها ناس قد المسؤليه يبيلها وحده تحترمك وتناظر خاطرك يبيلها وحده تحفظك ببيتك فأحرص على هالشي
لاتحسب انك بس بتقعد طوول اليوم تنااظرها وتناااظرك

lamo0o · 26-12-2008, 20:12

حرام وربي الجمال مو كل شي

ذكرتني يوم خطوبتي كنت بخرب على نفسي بسبة كلامهم الفاضي .. حرام عليك انتي احلا منه وليش ماخذته
بس لما فكرت فيها .. الجمال مو كل شي .. اهم شي اخلاقه ودينه وتعامله معاي..

انا شفت وحده عن تجربه اخذت واحد حلو واتطلقت منه وبعدها تزوجت واحد ثاني اسمممممممرر (( غامق شوي في اللون)).. وشوفها مبسوطه معاه وتحب التراب اللي تحت رجوله..

اذا كانت المسأله تقاس بالجمال كان محد اتزوج..

هذا رأيي وانت حر .. مااعتقد واحد بعمرك وعلى وجه زواج ومسؤوليه يبيله نصايح اكثر من كذا..

ماتدري يمكن لاتزوجتها تحببك في نفسها وبعد كذا تشتاقلها وتتمنى انت رضاها ..

توكل على الله وتزوج ..

والله يوفق الجميع..

мόόη Ļίģħт · 26-12-2008, 20:34

اقتباس:

المشاركة الأصلية كتبت بواسطة أنسة دلـــوعة

وبعدين فكرت قلت انا الي موافقه كان من البدايه رفضت و ياخذ س وش ذنبه انكد عليه وانكد على نفسي
هذا زوجي خليني اتقبله عشان انبسط واعيش حياتي وارتااح زي غيري مااحرم نفسي من شي ولااحرمه.....
.والله اللحين لو يخيرووني من جديد مااخذ غيرره يسوى الدنيا عندي ومافيها يكفي ينااظر خاطري ويداريني
ويسوويلي كل الي ابي وش ابي بأكثر من كذا !!
لو ماخذه واحد حلوو وقليل ادب مايراعيني ولا يقدرني وش بينفعني فيه!!

خلك عااقل وفكر زيــــن هذا زواج فيه بكرا مسؤليات ومشااكل يبيلها ناس قد المسؤليه يبيلها وحده تحترمك وتناظر خاطرك يبيلها وحده تحفظك ببيتك فأحرص على هالشي

لاتحسب انك بس بتقعد طوول اليوم تنااظرها وتناااظرك

كلامكـ صحيح

والله يولف بين القلوبـ

عنادي عيناوي · 26-12-2008, 21:19

الله يهديك اخوي جمال هب جمال وجه بل جمال روح واخلاق

تعوذ من ابليس يمكن اذا طلقتها اليوم بيك يوم تندم علي سويته

يمكن ربي يرزقك بنت فائق في جمال ما ماترتاح وياها نادر ما تحصل هل الزمن بنت او ريال زينين

اقرا قران واستغفر وفكر عدل تبه اخلاق وحرمه تصونك ولا تبه جمال الله يهديك

وليد الوطن · 27-12-2008, 04:25

كل ما ذكره الأخوة و الأخوات عين الصواب.
شعورك أخوي طبيعي في هذه المرحلة و كثير من الشباب يراودهم الشك و التردد و قد يكون هذا نابع من خوفهم أنه قد يكون هناك "بنت أنسب و أحلى و أكمل" لكن الكمال لله وحده و مهما درت الأرض فلن تأخذ إلا نصيبك. أعتقد أنك محتاج كلام يشجعك و يرفع معنوياتك لأنه واضح من كلامك أنك مرتاح للمواصفات الأخرى للبنت.

بالنسبة للشوق و الحب فهذا أمر لذته الحقيقية عندما ينشأ عفويا من غير تكلف و لن تصل لمرحلة الحب الصادق إلا بعد أن تكون صادقا مع نفسك و مع خطيبتك فتمسح من ذهنك كل المهاترات و تنظر لها على أنها فعلا فتاة أحلامك و تقنع بجمالها. تذكر أن الجمال دائما في عين الناظر فكلما زادت قناعتك بها و زاد حبك لها كلما أصبحت البنت أجمل و أجمل في ناظرك.

وفقك الله و يسر لك ما فيه الخير.

تحياتي

روانـ · 27-12-2008, 05:19

انا نفس حالة مفارق وطن ..............بس اللي مو عايش الوضع ما يحس

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

ابي فزعتكم يالمتزوجين تكفوووووون