هاني حبيبي لا جيت اداريك =يغلا من النفس والرمش وهدابه
اذكرك يالغالي وذكر لياليك = وذكر لحظات الهنا وحتى ثيابه
وذكرك تتخبى بظهري وخبيك = ومك تدور بصبر اعلن غيابه
وذكرك تبكي تبيني اسليك= تخبرني يا هاني سريع الاجابه
وذكر زيارات المرض وعجزي اداويك = رفعت امري لمجري السحابه
وذكرك مره كنت اعشيك = وتقول احس الالم كشر بنابه
حتى الطبيب الي بطبه يداويك = يبكي ودمعه مثل وبل السحابه
شفته بعيني الموت قرب يخاويك=والموت في قلبي اعلن مصابه
يا موت تكفى تراني ابغنيك = هذى الابو وداه حزنه وجابه
هذى حبيب القلب يرضيك = يرحل وانا بعده حياتي كئابه
الموت حق وكل نفس لها فيك = موعد وحزه ما نفعها مهابه
لو ينهديلك عمري اليوم لهديك = وعيش مثل المحب اشكي صبابه
وفجئه يجيك الموت يا هاني وينهيك =واخاف عقلي يضيع صوابه
عمك يغسلك وانا احتري فيك = ابغى ادفيك من البرد وعذابه
ماني مصدق العمر انتهى فيك = لا وا عذاب القلب وكبر مصابه
اكبر الم للقلب يوم كنت اواريك = وعزاي ان الطيب مقدم زهابه
يا ليتني اقدر اظمك وغطيك = وحميك بيدي من القبر وترابه
منهو حبيبي في ظلمة القبر يحكيك = عن قصة الاقزام والثلج وبياضه
مهما يجي بعدك محدن يساويك = يا فرحة القلب واول عذابه
كل ما دخلت البيت وختك تناديك = يضيق علي البيت رغم اتساعه
امك ترى يا هاني حسبها فيك = من طال عمره لازمن له نهايه
هاني وانا بوك تراني بوصيك = تشفع لامك من الحشر وعذابه