عندي موضوع ودي العالم تقول رايها وبصراحة تحيرت وين اكتبه هنا او قسم الاسرة والاطفال

اول شيئ ودي اقول اني متزوج وماعندي اطفال

انا احب الاطفال اولاد بنات كبار صغار واحب اقعد اتكلم معاهم وتعجبني شطانتهم وبرائتهم دلعهم ..

تحصل مواقف كثير يلوموني فيها مع العالم او اولاد اخواتي هذا غير المشاكل مع ابائهم

انا عن نفسي ما ادري اطفال كيف تضربهم وتشد عليهم ..والمشكلة الثانية اني اعصب واحقد على كل احد يضرب اولاده وودي اقوم امسح فيه الارض خاصة اذا ضربهم قدام العالم لو صاحبي ينسى اني صاحبه احسن

انا ما ابي احد يقعد يحلل شخصيتي على كيفه انا ودي اعرف انا مرخي على الاخر زي مايقولوا والادي بينحرفوا بهذا الشكل او العالم الي ماتعرف تربي ؟


بقول بعض المواقف ياليت ماحد يطلع فيها مثالي يقول رايه حسب ما يعتقد وزي مايربي اولاده في البيئة الي عاش فيها او مر بها

مره كنت في الديوانية وكان واحد جايب اولاده اثنين واحد 4 سنوات وشوي والثاني في صف ثالث قاعدين يمزحوا وصارت بينهم هوشة على خفيف وابوهم معصب قاعد يهدر ويا واحد على موضوع بايخ وكل شوي يصارخ عليهم قعدوا واقعدوا عدل شوي ويدف واحد منهم الثاني ويصدم الطاولة الي عليها الاكل وشاي ..

قام الاب العظيم وضرب الصغير 4 سنوات كف سكت كل الي في الديوانيه كف قوي حتى طبع على وجه الولد

انا عصبت وركب الدم في راسي وقعدت اصارخ عليه ياغبي احد يدق جاهل كف زي هذا انت ماتحس وكانت بتصير مضارب بينا بس الشباب هدوا الموضوع

وحقدت عليه بقوة وصرت ارد عليه السلام بدون نفس وما اكلمه ..مره كان يهدر اخو زوجته غلط عليه وهو مارد والعالم في مؤيد ومعارض انا ساكت الي يقول يعنيني فلان وش رايك اذا هو قليل ادب ارد عليه اصير زيه ..قلت ليه هذا انت فاضي بس تتقوى على الجهال وتضرب ولدك كف قدامنا يالخيخا ..وقام على طول بيضارب وياي ..والله وانا ابيها من الله امسحه فيه الارض قدام الخلق زي ماضرب ولده بس ماحصلت وبعدين صار مايجيب اولاده والكل اقول مالك شغل فيه

انا مادري ليش اعصب على طول اجي في بالي والدي التعبان كان يضربني باي شيئ اذا مزاجه مو رايق يروق علي بهوز واير اي شيئ وما حد تكلم ولا اقدر اردها له لانه ابوي يا اصير عاق يا اسكت وامشي

لكن الي زي هذا لا هو والدي ولا له شيء عندي ومانا ملزوم اجامله او اداريه


موقف ثاني ويا ولد اختي انا من زمان كنت ما اروح بيت الوالد العلاقة بيننا تعبانه وبعدين هو قام تمسكن على اخواتي لانه كبر واحتاج المهم حنو عليه شوي وصاروا كل اخر اسبوع يروحوا يتعشوا عنده واختي الكبيرة صجتني صجج تعال تعشى وتعال رحت مع انه الشايب اذا جيت يقول وش الي جابك اقول له مو جاي لك

المهم اولاد وبنات اخواتي اجو الاول كانوا ما يعرفوني اصلا اني خالهم ما اشوفهم ولا يشوفوني شوي شوي وتعودوا وصرت اذا جيت على طول اجوا اسلموا ويقعدوا جنبي

والله وعجبني الوضع العاده اقعد اهدر ويا اولاد العالم صاحبي وغيره وامزح وياهم هالمرة ولاد اختي غير الوضع وحبيتهم وصرت كل اسبوع اروح اشوفهم واحيان اشتري لهم اي شيئ


البنات يستحوا مايقولوا شيء حتى لو سالتهم وش تبي تسكت اما الاولاد يجوا الى عندك

واحد منهم مايجي ويا psp البلاي ستيشن المحمول واول ما اجي على طول شوف خالي وين وصلت ويقعد يستعرض اشرطته والثاني مجنون كوره ساعات احمل في جوالي مقاطع اوريه وياهم خاصة كريستيانو رونالدوا مايسميه الا استكانو راندو هع

مره جى هذا ابو البليستشن مسوي مناحه قاعد يبكي ساعة الا ربع يبغى شريط وابوه قال له لا عندك اشرطه وماسكت جا لي ووجه يلمع من الدموع و مخاخيط قلت خلاص بشتريه لك ورحت وياه وشريت له

يوم ثاني اتصل زوج اختي وقعد يهدر انت خاله وادري انك تعزه .....الخ ..وانا ما شريت له مو بخل لكن ما ابيه يتعود كل شيء يقول ابيه ..قلته انا ما اشوفه الا في الاسبوع مره جيت وهو يقعد يبكي حول الساعة وامه تضرب فيه اسكت واسكت جا لي قال ابي الشريط اخذته له وقلت له اخر شريط زين قال زين ..

والثاني مجنون كوره ودائما يقول ابي كورة كاس العالم وابوه مو راضي مافي كوره مره جا لي وقال ابوي مو راضي و ....الاسبوع الي بعده شريت له ومن اولها شات الكوره في وجه اخته ..وصارت هدره ويا اختي ليش شريت وليش انت بتخربه بها الشكل


واخر وحده هي المشكلة واحد من اولاد اختي ضرب اخته جهال ويتضاربوا تقوم اختي الي هي امه وتضربه بالمعلقة الخشب (ملعقة كبيرة ) وتضرب فيه وتقول اذا ضربتها مره ثانيه بوريك وهو يبكي وقول بضربها وهي تضرب فيه رايح بقوه

والكل ساكت انا صبرت شوي ابد هو يقول بضرب وهي تضرب فيه اناعصبت وانفجرت قمت سحبته وقعدت اصارخ بقوه في وجهها وش فيك انتي هذا جاهل يقول الي يقوله بتقعدي تضربي الى بكره بتكسري عظامته ماتبيه يضرب اخته ونتي تضربي فيه بها الشكل ..قعدت تقول ماسمعته وش يقول هذا وهو بعده ويرادد كيف اذا كبر قلت لها اذا كبر بصير زيي ويا هذا اقصد والدي سكتت وقعدت تطالع مستغربة شوي وقالت هذا ولدي مالك شغل فيه قلت لها انتي زي ابوكي مرضه

ومن يومها ماتكلمني ولا اكلمها صار لنا يمكن حول التسعة شهور مع انها اكبر وحده في اخواتي حتى اكبر مني

كلمتني اختي الثانيه وقعدت تهدر الاولاد الان مو زي الاول لازم تشد عليهم ولازم يخافوا منك والله ما يسمعوا الكلمة ....الخ

اسلوبك ماينفع انت مرخي معاهم بزياده واذا كبروا ماراح يسمعوا كلمتك و و و ....



انا ما اقتنعت جهال يلعبوا ويتضاربوا يلعب بالكوره وكسر شيئ خير انشاء الله ليش تضربه وبعدين الي بيضرب يضرب جاهل ابو اربع وخمس بعصى او كف يطيح اسنانه ؟

بعدين انا وياي ما اشوفهم اسووا شيء ويسمعوا الكلام ليش اعصب واصارخ عليهم على اتفه شيء ؟

سؤالي الان الاطفال كيف تتعامل وياهم ابو اربع وخمس وحتى ست او بشكل عام اذا سوى شيء تضربوهم ؟؟


وحقيقة انا اسف طولت عليكم

http://arb3.maktoob.com/vb/arb228631/#post4393555

المشاركة الأصلية كتبت بواسطة خيانه عيني عينك والله انك فله ياحظ اولادك فيك ماشاءالله <<تقول ليت الابهات زيك ان شاءالله يجيك عيال هادين مثلك تبي الصراحه انا مااحب البزران ياخي غثيثين يجيبوا الهم ولايسمعوا الكلام يعني صراحه انا ماعندي اسلوب ع طول كف اخوي عمره 13سنه وانا17 دايم مضاربه ومايفك بيننا غير ابوي الله يحفظه بس عاد ابوي فله قلبه مايطاوعه يضرب بناته بس يضرب هالمسكين اخوي بعقال باي شئ جنبه لانه صراحه يستاهل ماغير يأذي فينا وماله شغله غيري انا واختي لكن عيال خلاتي الصغار في واحد منهم احبه موت اصلا اول مااشوفه يجيني جري يجلس علي اما الباقين وانا ماشيه اخبط فيهم للسانهم طويل ومافيني شدهـ اتحملهم بس الضرب القوي لامأايده لانه بصراحه يهبل فيهم بيجننهم زيادهـ وبيحقدوا ع اهلهم وراح يتذكرونه لاكبروا 000000000 ملاحظه\ حبيت اقولك لاجيت تبي تسحب طفل من اهله لما يضربونه اسحبه عندك وانت ساكت مولازم تتكلم ع ابوه ولا ع امه لانك كذا بتقلل من قيمتهم قدام ولدهم وهم معصبين يعني شئ طبيعي بتتهاوش انت واهله وبتشوهـ صوره الاهل بنظر الطفل ان اهله مايحبونه وانهم ماغير يكفخونه خله جنبك ولاتتكلم

اختي كحلها سايل

ليش كل هذا ماقلت شيء

على كل انا بانتظار مشاركتك وقت ماتهدئين وتروقين

تحيتي

المشاركة الأصلية كتبت بواسطة طالبه الرحمه والله انا مااأيد ضرب الاطفال بتاتا عمر التربيه ما اتيي بالضرب >>انا لما كنت صغيره كنت اروح بطق وارجع بطق والحين هالشي مأثر بنفسيتي واايد واحس اني كله ابي حنان واني ماستانست بطفولتي مع اني لما كبرت اهلي مامدو يدهم علي وبالعكس كل اللي ابيه احصله بس حاجة الطفل لما صغير لو ماحصلها تتم في خاطره ليما يكبر حتى مره حلفت لامي اني ماراح اضرب اولادي لو ماصار واللي بيضربهم باكسر يده بالعكس انت ماغلطت وماعليك منهم هذولا يهال يمشون بالطيب والحنيه مو بالضرب

المشاركة الأصلية كتبت بواسطة خطرفة كلمات العكس انت الطبيعي ضرب الاطفال لا مبرر له وعنف اسري انت طبيعي وصح وهم الغلط وماعليك منهم الله يرزقك اطفال وبتشوف ان الضنا غالي وان لو يدك انرفعت على وليدك ضناك ماتقدر تنام الليل زوجي تربى على الشدة وانضرب كثير وهو شديد على عياله لكن مايقدر يرفع يده عليهم حتى لما يشد مايتحمل ينام الا وهو مكلمهم ومصالحهم وهم يحبونه ويحترمونه انا مااضرب واكره الضرب لكن احيانا امسك الي يجنني منهم بشدة وبعدها اقول له ليش تخليني اعصب عليك وانا احبك وانا زعلانة منك هو نفسه الطفل مايتحمل ويعتذر او يهذا وسيلة الضرب وسيلة فاشلة للتعامل وتدل على نقص الحوار بين الاسرة وووسيلة عاجزة كيف تستعرض بقوتك على طفل مايقدر يقاومك او تفشله وتهز شخصيته بين الناس انت استمر بمبادئك وشوف عيالك اش بيصيرون وشوف عيالهم

المشاركة الأصلية كتبت بواسطة Amal121 الصراحة لو انك اخوي بقول لك مالك دخل بعيالي اذا كلمتني بالأسلوب الي ذكرته مع اختك وبزعل منك ومارح أكلمك لأن اسلوبك كان جداً غير محترم مع اختك الكبيرة وأنصحك انك تروح تعتذر منها وتطلب مسامحتها لك

اختي عسل بوظبي

هذا الي صاير وما ادري وش قصتهم العالم الكل يقول انت وانت يمكن لو كنت اضرب ماحد تكلم لي بهذا الشكل

والله شكيت في نفسي اني فعلا ما انفع اربي حتى اخواتي قاموا يلمحوا ..احسهم ماخذين الموضوع تكسير كلام ويا اولادهم اذا قلت قول نعم اذا قلت لا يعني انا ما عرفت اربيك ؟

عجل ولد يشاهد كورة وما يجي الا ولابس شورت وفانيلة مره المانشستر ومره جلسي وكل كلامه عنها وما يلعب بليستيشن الا كورة ومسكين متحسر ماعنده كورة يلعب فيها ولا حتى يخليها في غرفته ؟ ليش ابوه مو راضي ؟هذا ابوه وش قصته يبي امشي كلامه وبس ؟



المشكلة اني ما اعرف اسكت او اتكلم بشكل احسن لاني انفجر من اساليبهم ودائما تحصل مشكلة اذا ولد انضرب قدامي

الله يسهل لك حملك ..وقومك بالسلامة ..ويتربى في عزكم انشاء الله

وشكرا على مرورك ونقلك

تحيتي

اختي كيان انسانه

انا ما اشوف نفسي غلطان لو تشوف قدامك رجال ينضرب بتروح تساعده تشوف جاهل مسكين ينضرب وتسكت ولو من ابوه ما باقي الا يقتله واحنى ساكتين ..

اعتقد حتى اهل الاول عانوا من هذي الاساليب لكن في عقول متحجرة كل همها تبرمج ماتربي

شكرا لمداخلتك ومرورك

تحيتيي