عالم الحياة الزوجية - منتدى

الحائره 1000 · 19-03-2009, 13:34

السلام عليكم ورحمة الله وبركاته

هذا اول موضوع اشارك فيه في هذا المنتدى ومع الاسف انه موضوع با الشكل هذا بس الشكوى

على الله وش اسوي اتمنى منكم تعطوني ارائكم والله اني اعتبركم اهلي واخواني . ولاقلت سالفتي

لاحد من اهلي الى الحين ابي ارائكم اول انا مطلقه وام لطفلين وبعد طلاقي توفى زوجي اللي هو

رحمه الله . بعد وفاته تبهذلت كثير مع اولادي فهم لازالو صغار وانا كذلك كان عمري 27 المهم صبرت

واحتسبت بعد وفاة طليقي تقدمولي ناس كثيرون ولكني كنت ارفض لان الاغلب كانو طمعانين فيني

لاني اسكن في منزل ملك ولاغلب كانو يطلبوني مسيار ولكني ارفض . المهم تقدم لخطبتي شاب يبلغ

من العمر 42 متزوج وظيفته كويسه شرطت عليه انه يدفع لي اجار في البيت اذا كان راغب يسكن عندي

او يسكني في شقه وانا ااجر بيتي لكي يستفيدو اطفالي وافق على ان يسكن عندي وان يدفع لي اجار

تزوجته وكان معي اخلاق وذوق شي مايوصفه عقل يحبني ويحب اولادي وكان يعدل بيننا والحمد لله

ماعمري قلت له شي الا يقول لي سمي وحاضر كنت احمد ربي في كل صلاة انه عوض صبري خير

والله كنت اقول بيني وبين نفسي عيالي لو ابوهم موجود ماسواا لهم ربع مايسويه الرجال هذا الله يجزاه

خير لفت انتباه اهلي بأسلوبه معي وانتباه كل الناس والكل يدعي له . بعد ثلاث اشهر من الزواج رغبت

في الحمل وهو راغب ذلك ايضا ولذهب للدكتوره واعطتني مقويات لكن مانفع شي وبعدها مليت عالجت

اربع شهور ومليت قلت اتركها لرب العالمين ولا ابي اعالج بعد اليوم خلاص . بعد سبع شهور من الزواج

بدء الرجل يتغير للاسوء بلا اي اسباب اكلمه مايرد علي بأسلوب زين اقول له يافلان انت تغيرت يقول لي

انتي طبيبه تشخصين حالتي صرت اسكت واحاول بقدر الامكان اني اريحه قلت يمكن متضايق من العمل او

شي . على فكره ما استلمت ولاريال واحد من الاجار اللي كنا متفقين عليه في بداية الزواج كل ما قلت له

الشرط اللي بيننا يقول لي ما كملنا سنه اذا كملنا سنه اعطيك الاجار .المهم صار لنا الحين 11 شهر تغير

في الشهر الخير تغير كامل صبحت دمعتي هي ونيسي تغير علي انا بس اطفالي علاقته معهم كويسه

المهم جا عندي يوم السبت اللي راح في يومي واو ما دخل كان وجهه اسود ومتغير مره مره ومتضايق

واذا تكلمت قب فيني سكتت سألته عسى ماشر قال فكيني ولاتقعدين تكثرين هرج خلاص مافيني شي

واخذ ولدي الصغير للبقاله ولعبه في الملاهي وانا معهم وكان عادي مع الاولاد بس انا لا اذا جت عيني

بعينه ينزلها على طول . رجعنا للبيت ونمنا ولاكلمه كلمني ونام وانا جلست طول الليل دمعتي غرقت

الوساده اذكره اول واشوفه الحين واقول سبحان الله يارب اذا هي عين زيحها عننا . صحيت الصبح بدري

وجهزت الفطور وصحيته وفطرته وقهويته وطلع يوم بغى يطلع التفت علي قال تبين شي ياحياتي اجيب معي

رديت قلت لا الله يعافيك ما ابي الا سلامتك وطلع ..هو المفروض يرجع للبيت الساعه 3 العصر رتبت البيت

وجهزت الغدا وجهزت الشاهي والقهوه وتلبست احلى لبس وجلست انتظر زوجي يجي من الدوام

وانا جالسه انتظر سمعت نغمة رساله جت على جوالي يوم شفته والا مكتوب على الجوال رساله صوتيه

وشفتها والا هي منه قلت الله يستر انقبض قلبي قبل لا اسمعها . المهم فتحت الرساله وسمعتها تدرون

وش مرسل لي ؟؟؟؟؟!!!!! قال لي كذا با الحرف الواحد وبهواش بعد اسمعي يا بنت الناس الحياة بيننا

اصبحت مستحيله وانا الحين بكامل قواي العقليه اقول لك انتي طالق ؟؟ انا بغيت اموت احس قلبي بيوقف

دموعي احتبست جواا عيوني اطرافي صارت بارده وترتعد اردد وش السالفه وش فيه انا وش سويت وش

السبب يبس ريقي ماقدرت ارفع لساني من الثقل ماقدرت حتى اتكلم رحت على طول ودقيت عليه يعطيني

مشغول . دقيت على امي وقلت لها تعال لي بسرعه انا تعبانه جت عندي امي . واول ماشفتها بكيت

وحضنتها قلت لها انا تطلقت بس ما ادري وش السبب ما ادري وش سويت وانا اتكلم مع امي حسيت

بدوخه وطحت على الارض خذتني امي للمستشفى وبعد التحاليل والفحوصات اتضح اني حامل ؟؟؟!!!!

سبحان الله سبحانك ياربي 11 شهر ما حملت ويوم اتطلق اطلع حامل ..زالمهم قالت لي الدكتوره حملك

ضعيف جدا جدا واحتمال ينزل ... ارسلت له رساله صوتيه قلت له اني حامل الله يعافيك رجعني انا

ماسويت لك شي عطني سبب للطلاق رجعني الطفل احتمال ينزل واكيد يمكن يسوون لي تنظيف اوشي

لازم توقيع منك وش اسوي بعمري ليه تخليت عني . رد علي انتي حامل او مو حامل رجعه ما ارجعك لو

تحبين السما خلاص كل شي انتهى كلمت اهله وقلت لهم وانجنو من تصرفه لكن قالو لي مابيدينا شي

لانه رافض يتناقش معنا مره . ما ادري وش اسوي ياربي امي قالت ماراح نقول لابوك واخوانك لانه يمكن

يرجعك ماله داعي الشوشره نصبر شهر ونشوف . ادعو لي الله يخليكم انا بحاجه للحمل هذا هو الوصله

بيني وبين زوجي الدكتوره اعطتني موعد الاربعاء الجاي قالت اذا الحمل مافيه اي تقدم لازم نسوي لك

تنظيف ادعو لي الله يخليكم ان الله يثبت حملي ويرد لي زوجي وترجع حياتي مثل اول يارب . نسيت اقول

لكم ان زوجته بين فتره وفتره تكلمني وترسل لي رسايل على جوالي تهزئني فيها واذا قلت له قال انتي

ماعليك منها لانها مقهوره منك تسوي كذا اسفههيها بس اخر رساله جتني منها قبل شهرين كانت

تحلف تقول والله لاطلقك منه وتشوفين والا ما اكون بنت ابوي . قلت له يا فلان شوف زوجتك وش مرسله لي

قال ما عليك منها ليه بنات الناس لعبه علشان اطلقك بلا سبب انا ماتزوجت علشان اطلق ؟وكنت اتطمن اذا

قال لي كذا . ما ادري وش اللي غيره وش اللي اقلبه علي ليه كذا وين الخوف من الله مع العلم انه راعي

صلاة وصيام. ليه طيب اصحوني دلوني نورني ادعولي انا نفسيتي مره زفت ولا ادري وش اسوي ولا اكل ولا

من يوم الاحد واناعلى ها الحاله الله يجزاه خير كل من يدخل ويقرا موضوعي ويدعي لي الله مايتمنى ويرزقه

الفردوس الاعلى يارب يارب محتاجه لكم اخواني لاتخلوني الله يخليكم........

دلوعو · 19-03-2009, 13:55

الله يرحم بحالك..

انتي قلتي سبب الطلاق بنفسك .. زوجته الاولى..

ليش من البداية رضيتي تاخذين واحد متزوج وتخربين بيته.. اكيد من الي تقدموا لك عزابية ومطلقين وارامل..

المهم الحين صار الي صار..وانتي مالك إلا الدعاء.. ادعي اذا كان رجوعك لزوجك صلاح لك وللي في بطنك الله ييسره لك.. وإذا كان رجوعك له شر لك وللي في بطنك الله يصرفه عنك..

وانتي الحمدلله عندك عيالك وعندك بيتك والله يستر عليكي..

الحائره 1000 · 19-03-2009, 14:19

اختي الكريمه انا ما خربت عليها يوم تزوجته.. لانه متزوج متزوج سواء انا او غيري لان زوجته مريضه ولا تنجب فأكيد انه راح يتزوج عليها واهله لما جو اخطبوني قالو ان سبب زواج ولدهم انه يبي اطفال وزوجته مريضه ماتنجب ولايبي يطلقها وهي عارفه انه بيتزوج عليها

شـمــوخ · 19-03-2009, 14:26

ياختـي الله يكون بعونتس .. بس تصرف زوجتس صراحه غريب .. أحسه يتصرف بدون شعـور منه ..
.
يعني معقوله كل هالحب كان بينكم وبالأخير يطلقتس بسهوله وبدون مبرر ولا سبب مقنع ..؟!!
.
مادري ماودي احط بذمتـي شيء .. بس يمكن عين أو أعظم من العين .. والله اعلم ..
.
وخير.. وراه مايدري أبوتس وأخوانتس ..؟ هذه مواضيع إذا مايقف فيها رجال مايمشي حالها ..
..
خل أبوتس أقل شيء يعرف عن الموضوع ويجلس معاه ويتكلم معاه بخصوص الموضوع ويعرف وش السبب .. مستحيل الرجال يطلق بدون سبب وخصوصا مثل أخلاق زوجتس .. إذا فيه سبب يقنعكم او تقنعونه .. وإذا مريض يعالجونه اهله ..
.
والله يثبت حملتس ويكون بعونكم

الحائره 1000 · 19-03-2009, 14:51

ابوي رجال كبير ومريض واخواني من ابوي . احنا قلنا اذا في امل رجعه ارجع له ولا من شاف ولا من دري هذا القصد قصدنا مانبي فضايح.والمشكله الحين انه غير جواله.يعني اذا احتجت له في مستشفى في ليل او عمليه اوشي او الجنين الله لا يقولها ماثبت اكلم مين او اروح لمين . ياربي غفرانك ما ادري وش اسوي.

احلى عالم مع الاهل · 19-03-2009, 15:01

الله يهدي بالك ويجبر بخاطرك

قحطاااني ماااركه · 19-03-2009, 15:05

لا حول ولاقوة إلا بالله ... يأ أختي واضح من البدايه أن الزواج من طرفه كان نزوه والحب والإحترام اللي عطاك كان مقابل الجنس والمتعه وبعد ما وصل لمرحلة التشبع وطاح اللي براسه طلقك يعني وين الجديد بالسالفه !! كل يوم تمر علينا العشرات من هالقصص نصيحتي لك تطلقي ولا تتزوجين إلا زواج شرعي مستوفي جميع الحقوق ...
أتمنى لك التوفيق والله يعوضك خيررررررررر

قحطااااني ماااركه

الجوهرة 14 · 19-03-2009, 15:09

هذي يمكنها مسوية لك عمل اذا كانت ماتخاف الله حسبي الله عليها ونعم الوكييييييل
الله يفرج لك من عندة فرجا عاجلا غير آجلا يارب العالمين المتني قصتك

قحطاااني ماااركه · 19-03-2009, 15:23

اقتباس:

المشاركة الأصلية كتبت بواسطة الجوهرة 14

هذي يمكنها مسوية لك عمل اذا كانت ماتخاف الله حسبي الله عليها ونعم الوكييييييل
الله يفرج لك من عندة فرجا عاجلا غير آجلا يارب العالمين المتني قصتك

لالالالالالالالا تظلمين المسكينه السبب الرئيسي الرجل ما كان صادق في زواجه يبي متعه وسعة صدر لا يبحث عن الإستقرار ولا عن أطفال بحكم إنه متزوج من قبلها بس لقى زواج مسيار ما فيه نفقات ولا سكن وبعد ما أخذ اللي يبي طلق بكل برود ويوم قالت له انها حامل ما فرقت معاه ولا هو قابل نقاش اصلاً بذمتك وش تفسرين هذا .. بس أنتم يالحريم ان قال لكم واحد كلمتين حب تسدحتوا وطرتوا فيه عشق وهيام وهو مجرد نزوة رجل غرضه من الزواج متعه وليالي حمراء ..

تحيااااااااااااااتي

الحائره (فاتن) · 19-03-2009, 16:27

ياعمري والله تقطع قلبي عليك

شكلك بنت حلال وطيبه والا الحرمه اللي يطلقها زوجها بدون سبب تعافه نفسها لو كانت

تحبه وجايبه منه عيال !

بس انتي مهتمه يرجع لك وهو بهالاخلاق

لاتفكرين ان طيبه مع عيالك علشانك هو يمكن يبي فيهم الاجر لانهم ايتام

وبرضو علشانه فاقد العيال بحياته

انا ودي والله ادعي لك انه يرجع لك بس هل بيكون برجعته خير لك ؟؟

واحد مايندرى عن تصرفاته وتفكيره اهوج مايؤمن ابد

لكن انا بدعي لك الله انه يزين لك أمورك بما فيه الأفضل لك

اللهم ان كنت تعلم ان رجعت زوجها لها فيها خيرآ لها ولابنائها اللهم ارجعه عاجلآ غير آجل

وان كنت تعلم ان عودة هذا الزوج لزوجته فيها شر لها ولأبنائها فـ أبعده عندها وابعدها عنه

اللهم آمين

الله يفرج همك ويرزقك خير منه
او يسخره لك

ويحفظك ويحفظ ابنائك ويقلب حياتك سعاده واستقرار

تأكدي ان الخيره فيما يختاره الله

قومي صلي وادعي ربك وتوكلي عليه

ولاتقعدين تحرمين نفسك النوم والأكل

اللي الله كاتبه بيصير بلا حول ولاقوة منك ولا من احد

وطمنينا عنك
احنا هنا كلنا معك

متكحله بدم خااين · 19-03-2009, 17:05

الله يكون بعونك يمكن ساحره الرجال خليه يروح لشيخ احسن
واخلي ذمتي من هالحكي مجرد انك تشوفي حل يمكن يفيدك هالشي

شـمــوخ · 19-03-2009, 20:06

ممممممم
.
زواجكمـ مسيار يالحائره .......؟
.
إذا هو مسيار .. بتراجع عن ردي الأول وبغير كلامي .
.
بس أعتقد الأخوه فهموا غلط أو انا فهمت غلط ..؟

الحائره 1000 · 19-03-2009, 20:23

احلى عالم مع الاهل ـ جزاك الله خير ياقلبي . اخوي قحطاني ماركه اشكر لك مرورك اخوي بس انا زواجي كان شرعي مو مسيار زواج مستوفي جميع الشروط عندي ليله وعندها ليله انا مارضيت ابدا ولن ارضى اني ارخص نفسي واتزوج مسيار .
اختي الجوهره 14ـجزاك الله خير يا قلبي على دعواتك وان احس كذا مثلك شكل الرجال مسحور والعياذ با الله لانه معروف عن عائلتها الشي هذا الله يكفينا الشر انا ما احط بذمتي بس مو معقول ترسل لي رساله وهي واثقه من نفسها وتقول والله لاخليه يطلقك والا ما اكون بنت ابوي ؟؟؟؟!!! وش معناها هذي ؟؟الا إن الموضوع فيه إن حسبي الله ونعم الوكيل الله ياخذ حقي منهم الظلمه . الحائره فاتن ـ ياعمري انتي يازين كلامك بلسم ماشاء الله الله يجزاكي كل خير يارب ادعو لي الله يخليكم انا ما ابي الطلاق صح تطلقت بس نفسي با الرجعه يارب ارحمني وارحم ضعفي وضعف عيالي يارب مالي غيرك يا الهي ارحمني يا رحمان وثبت حملي يارب ....متكحله بدم خاين ـ اشكر مرورك يا قلبي بس اختي وشلون اقول له رح لشيخ وهو مغير جواله انا ما اعرف له رقم غير رقمه ولا ودي اكلم اهله احس اني ذليت نفسي كثير صعبت علي نفسي والله ... وحتى لو قلت له ماراح ياخذ على كلامي ابد ..يامن رديت موسى لامه يامن رديت يوسف لابيه يامن رديت نظر ابو يوسف له من علي يا رحمان ورده لي يارب رجع لي زوجي يا الهي ياحي يا قيوم وارزقني الحمل الثابت يارب العالمين وسخر لي زوجي ونور بصيرته يارب

يارب

الحائره 1000 · 19-03-2009, 20:26

اختي شموخ لا والله اختي زواجي مو زواج مسيار ولله الحمد انا ما اقبل بهذا الشي زواجي شرعي بكافة الحقوق الزوجيه من مبيت ومصروف وكل شي ولله الحمد لا انا ارضى با المسيار ولا اهلي يرضون لبنتهم انها تنهان وتتزوج مسيار..

كيان انسانة · 19-03-2009, 21:03

احتمال كبير ان زوجته الاولى مسويه بلىىىى

حاولي يروح لشيخ يمكن يطلع في سحر تفريق

الله يعينك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

في نفس يوم طلاقي اكتشفت اني حامل سبحان الله العظيم