عالم الحياة الزوجية - منتدى

ثلاثيني ومنفصل · 27-03-2009, 04:33

تحلم البنت من طفولتها انها تصير ام وتدهر المواعين وذيك السله الورديه وصحونها البلاستيكيه وكل وقتها تقريبا وهي بالبيت مقابلتن مواعينها وكل وحده منها هي وخواتها مصممه لها خيمه صغيره وهذا بيت فلانه وهذا بيت فلانه ولاتشوف إلا عبي تسحب هذا طالعه من بيتها مسيره ومعها قهوتها وهذي جايه .. وعيالها عرايس وان ماحصل ( لفه لها مخده ولا قطعه قماش صغيره وقالت هذا ولدي ) .. وتكبر شوي ويكبر حلمها فبعد الولاده وانها تكون ربه بيت تبدا تحلم انها تصير مدرسه وتبدا يوميا برنامج اخر ( تجيك من مدرستها ثم نسفت الشنطه واخذت طباشيرها <<<< اللي لاطشتهن من الفصل ثم ادهرت على جدران البيت ولايقعد باب ولا جدار الا يكتب عليه ( الماده _ الموضوع )

ودفاتر تحضيرها اكثر من دروسها .. والمصيبه تشوفها تشرح ومنفعله وتكلم طالبات ( هي وحدها من يتصور وجودهن ) والاغرب انك تشوف بدفتر الدرجات اسمها مدرج من ضمن الطالبات .. <<< يسلملي هيك تواضع

تكبر شوي ثم تبدا تغيرات فيسولوجيه .. ومرحله مفترق طرق .. ويبدا الحلم لديها وهو حلم الزواج والاستقرار مع فارس احلام ترسم شخصيته من خلال ( اوتوغرافها ) <<< قديم
كل يوم تصور هالفارس ورجولته ومواقفه معها ووسامته وشلون ياخذها ويطير بها على الفرس الابيض <<<وهذا اللي نكبنا

وعلى غرار الفتاه ينشأ الولد بعيدا عن عالم المواعين والعبي فتكون بداية حياته واختلاطه بالمجتمع قاسيه نوعاً ما .. تبدا بهوشات وفلعات وغالبا نوعيه الشله في البدايه هي من يحدد شخصيته القادمه ..

وهي غالبا تنحصر في بلادنا الى ثلاث فئات ( دوافير ، ناعمين ، زاحفين ) ..

احد هذه الفئات هو من سيكون شريك البنوته ( ام اوتجراف فوشي ) ..
تبدا البنت في رسم حياتها الورديه في وسط كلمات العشق والهيام وتتصور في داخلها ان هاللي تبي تاخذه .. بيصبحها بحبيبتي ويمسيها بحياتي .. وتتخيله وكيف هي وياه على شط البحر وهو يتغزل بها .. وكيف يمطرها بالقصيد والخواطر الغزليه ليل ونهار .. ويجي اليوم اللي انتظرته من طفولتها ويزفونها لابو الشباب ..

وكلنا يالشباب نكون مبرمجين اول العرس على نظام معين وتختلف مقاومه هالسيستم من شخص لشخص .. احدن يهنق وتخرب برمجته من اول شهر .. و أحد برمجته تدوم فتره اطول .. وفئه اخرى قليله كل ماخرب عندها السيستم راحت تسوي ( اب ديت ) .. وهالنوعيه نادره مثل ماذكرت .. وتبدا بعد هالمرحله الورديه مرحله الفنايل العلاقي وسراويل السنه بالادهار .. ويبدا البرنامج اليومي بالتغير .. وهو نوم الى المغرب ,ثمن يقوم يتزبرق ويتسنع ويكملها بالاستراحة إلى أنصاص الليول. وتخف الكلمات الرومنسيه والغزليه الى ان تختفي تماماً ..

المصيبه انه يظل يطلب من زوجته انها ( ماتغير السيستم حق شهر العسل ) .. نعنبوا بليسك الحرمه غيوره اهتم بنفسك وبتشوفها تسابقك في كل مايبهرك مالت عليك .. وبتسوي كذا حتى ترتقي لمستواك أوعشان ما تعرس عليها ..
اشوف بعض الرجال واقول بنفسي ( ياحظ زوجته بالجنه ) .. لصبرها على قذراته وسوء خلقه .. نعنبوك والله لو اني حرمتك لاذبح نفسي .. ولا تخيل شلون هالمسكينه يجمعها معه بيت واحد فما بالك بسرير واحد .. <<< حامت تسبده

لا وفوق هذا يمكن بعضهم ماعمره بحياته نادى زوجته باسمها .. اما ناداها ( هيه ، هيش ) <<<<مصطلحات سعوديه لنداء الزوجه ..شلون تبي زوجتك تحترمك وتغنج لك وانت تناديها كذا ؟

وان وداها بيوم سوق ولا محل بدل ماهو معها يشور عليها ويسولف معها اثناء تسوقها كانه ذاك اليوم رايق و ذابحته الرومانسية قال إلى قضيتوا تراي واقف برا أحتريكم .. <<<وفيها منه بعد انه موديها السوق عشان تشري شي تلبسه له ولا يلبسه هو لها .. (بعذرها المسكينة يوم تشتري بيجامات من تخفيض دبنهامز أو ماركس و سبنسر لان مافيه امل تلبسهن ) ويمكن خبرك فيهن يوم تقاوسهن بالبيت بعد ماشرتهن ) ..

تبونها ركبتها بيضاء ونعومه مابعدها نعومه ورقه ورومنسيه وجسمها مثل هيفاء وانتم الاصابع اظارفها شبر , وسبوت الرجلين يدخل بها الاصبع .. صح ان الركب السود صارت علامه مميزه بس ماهوب من زينكم انتم عاد ..
<<< معليش يابنات بس ترا من يشوف قناه بدايه يحسب انه عند محل حواج ولا عند عطاره ابا الخيل ، اخبر الخلطات للتفتيح والتبييض اما خلطات تصغر الخشم هذي جديده ولا سبقكن عليها احد .. لا وتبيها قبل عرسها باسبوع والله لو اوباجي مايمديهم صغروه باسبوع !!

تحمل غثاكم وتشيل ابنائكم في احشاءها 9 شهور ثم تولد وتسهر وتربي وانتم مابين شلة المقهى وشله البلوت .. وتطالبون بالمزيد بعد ، ودي اعرف او اسمع مره بحياتي ان فيه سعودي صلح الرضعه حقت ولده او بنته بنفسه او بدل له حفاظات !!

البعض ( واقول البعض لان ماودي احط بذمتي شي لان اعرف رجال ضد هالشي ) البعض تكرف زوجته في عملها ودوام وتعب وحاله وبطاقه الصراف بمحفظته .. نعنبوا بليسك استح .. مالت عليك هيك رجوله ..

اذكر واحد من عيال جيرانا الله يذكره بالخير .. وهالولد مقرود من طلع على وجه الدنيا .. حتى ولادته مالله يسرها مثل باقي الخلق ..
تسولف لي امي عن ولادته ..وتقول أن أمه يوم جابته وشافه دكتور الولاده رجعه لبطن امه وقال لها ياعمه اتمنى انك تصرفيه في مكان ثاني هذا مكانه مو هنا . انا مرت علي عاهات واشكال غريبه لكن مثل ها المخلوق الفضائي ماشفت .طبعا الممرضات اول ماشافوه اغمي عليهن وفيه وحده بعد ماشافته قدمت استقالتها على طوول وقالت يلعن ابوها هيك شغله اذا فيه اشكال مثل هيك بتعيش في مجتمعنا ..

من تحمله بالاخير تحملته امه ( الله يخليها له ولو انها بغت تطلع روحها بولادته ) هالحبيب له 5 سنين معطي امه مواصفات لو طلبها من مصنع حريم ماطبقوا له هالمواصفات اللي هو يبي وسمعت انه حتى مقاسات الخصر معطيها امه .. ولاتروح تخطب من احد الا معها ( المتر ) تقاوس كانها خياطه ..( ليه كل التعجيز وشهو عشانه ؟؟ )

نقاط على الهامش :
-

لاتقارنون السعوديه بغيرها ترا والله مايملى العين الا هن ( جعلهن يسلمن والله يصلحهن ويهديهن ) ..

- ادري ياشباب فيكم اللي عكس النظريه وخربت برمجة مدامه الرومنسيه والعاطفيه وهو برمجته مازالت نقوله اصبر واحتسب ومالك الا اجر وترا الشرع محلل لك اربع ويمكن يكون في الثانيه مايثير الغيره في الاولى ويحفزها ..

- تاكد ان كل شي تبينه من زوجتك هي تبي مثله فلا تطالبها بالكشخه وانت سردادي مردادي بالبيت بفنيلتك النص كم وسروالك .. اهتم بنفسك بارك الله فيك واحرص على الزين يجيك اللي ازين منه ..

- ابتعد عن المقارنات خاصه مع الممثلات والمطربات ( ترا لو بنطبق هالنظريه ماقعد بالسعوديه حرمه في ذمة رجلها للحين ) ..

- وانتم يابنات ترا قناة بدايه والخلطات اللي فيها تبي تجيب العيد فيكن .. اركدن شوي .. وترا الرجل السعودي ورغم العيوب اللي مايخلى منها انسان(الكامل وجه الله سبحانه ) تراه مامثله احد لا في فزعته ولا في رجولته ولا في شهامته ومن تكلمنا عنهم فوق اتمنى انهم قله .. وعشان كذا سلطنا عليهم الضوء .. عشان يلتفتون لحالهم .. اخواني ترا الأنثى معطاء جرب تعطيها حنان و بترد لك أكثر .. ..

تحياتي

اخوكم : ثلاثيني منفصل

مرايه · 27-03-2009, 05:03

يسلم فمك ثلاثيني ومنفصل ......كلام ميه بالميه ...

وكل اللي نشوفهم بالقنوات ياليت انهم يطلعون من دون مكياج .....كان بتتغير النظره لهم ....فعلا المكياج اختراع رهييييييييييييييييييييييييييييب

بارك الله فيك

ثلاثيني ومنفصل · 27-03-2009, 05:06

اقتباس:

المشاركة الأصلية كتبت بواسطة مرايه

يسلم فمك ثلاثيني ومنفصل ......كلام ميه بالميه ...
وكل اللي نشوفهم بالقنوات ياليت انهم يطلعون من دون مكياج .....كان بتتغير النظره لهم ....فعلا المكياج اختراع رهييييييييييييييييييييييييييييب
بارك الله فيك

ومشكوره لطلتك وحضورك مرايه .. هالمكياج من اول احسبه للخش بس اثاري فيه مكياج الحين حتى للجسم .. يجي بسطل مثل سطل البويه ..

وصدقيني نعرف ان اللي بها القنوات انهم ماعندك احد .. ولكن ليت قومي يعلمون

العنـــــــوود · 27-03-2009, 05:22

ههههههههههههههههه

حلوووه سالفه ولد جيرانكم

بصراحه هذا الموضوووع ازين موضوع قريته الي الان...

من جد يحكي الواقع طبعا مو كل الرجال بس الاغلب ينطبق عليهم المثل رضينا بالهم والهم مارضي فينا

تجي تلاقي ابو الشباب شايف حاله ورافع خشمه فوق ويتامر وهو لو تناظر بخشته حامت كبدك من شكله

احلااااام الاغلب من البنات تضيع بمجرد الزواج,, تحلم برومنسي حنون هادي ومن تتزوج تنصدم تلاقي شين وجاف في اسلوبه يسمع بالرومنسيه وهو مايعرفها

وفوق هذا كله مو مقدر صبرها عليه وكانه هو اللي متجمل عليها من جد شئ يقهر بس بالاخير مابليد حيله مالها الا الصبر وربي يعوضها بالجنه

يعطيك الف الف عافيه علي هيك موضوع وتسلم الايادي

ثلاثيني ومنفصل · 27-03-2009, 05:28

اقتباس:

المشاركة الأصلية كتبت بواسطة @ ريم الغلا @

ههههههههههههههههه
حلوووه سالفه ولد جيرانكم
بصراحه هذا الموضوووع ازين موضوع قريته الي الان...
من جد يحكي الواقع طبعا مو كل الرجال بس الاغلب ينطبق عليهم المثل رضينا بالهم والهم مارضي فينا
تجي تلاقي ابو الشباب شايف حاله ورافع خشمه فوق ويتامر وهو لو تناظر بخشته حامت كبدك من شكله
احلااااام الاغلب من البنات تضيع بمجرد الزواج,, تحلم برومنسي حنون هادي ومن تتزوج تنصدم تلاقي شين وجاف في اسلوبه يسمع بالرومنسيه وهو مايعرفها
وفوق هذا كله مو مقدر صبرها عليه وكانه هو اللي متجمل عليها من جد شئ يقهر بس بالاخير مابليد حيله مالها الا الصبر وربي يعوضها بالجنه
يعطيك الف الف عافيه علي هيك موضوع وتسلم الايادي

وتسلمين لطلتك ريم .. خالص مودتي

ضيم السنين · 27-03-2009, 06:14

مع انك تنقز من سالفه لسالفه

ضيعتني معاك ونا اقرا

الا اني فطست ضحك على الجدران والتشخمط ذكرتني بعمري

ثلاثيني ومنفصل · 27-03-2009, 06:26

اقتباس:

المشاركة الأصلية كتبت بواسطة ضيم السنين

مع انك تنقز من سالفه لسالفه
ضيعتني معاك ونا اقرا
الا اني فطست ضحك على الجدران والتشخمط ذكرتني بعمري

المناقز لابد منه .. لان فيه حقب تاريخيه عدينا عليها واجيال واشناب ودداسن وغبره ثايره .. فاطظريت اكتب باختصار ثم ننقز للمرحله اللي بعدها لكي لانطيل على الساده القراء الكرام ..

اطلاله تشكرين عليها .. وترا القراءه فن مثلها مثل الكتابه ... القارئ الجيد يجيد ربط الاحداث في الموضوع

دمتي بود

ضيم السنين · 27-03-2009, 06:31

اقتباس:

المشاركة الأصلية كتبت بواسطة ثلاثيني ومنفصل

المناقز لابد منه .. لان فيه حقب تاريخيه عدينا عليها واجيال واشناب ودداسن وغبره ثايره .. فاطظريت اكتب باختصار ثم ننقز للمرحله اللي بعدها لكي لانطيل على الساده القراء الكرام ..
اطلاله تشكرين عليها .. وترا القراءه فن مثلها مثل الكتابه ... القارئ الجيد يجيد ربط الاحداث في الموضوع
دمتي بود

لرجعوني الاردن مرتن اخرى تطلع علي القاريء الجيد

<جورجي> · 27-03-2009, 06:46

هههههه
يعطيك ربي العافيه

مشـاعرٍ إنسان مهجوره · 27-03-2009, 06:48

ضيـم نصيحه لا عاد تردين على المواضيــع >>>>> متعبه عمرك وكتابه ومانفهم شي غير
انتس تتميلحين ولارجعوني للاردن مرتن.. مرتن.. ثانيه ..... الله يعطيك العافيـــه

رصيــف شاعر الحارهـ يخب...

اخــي الفاضـل...
تحكي عن وقائع تحصل في هالمجتمع

ويعطيك الف عافيه على هذا الموضوع

سؤالي ..؟؟؟؟

بما إنـك انســان لديـــك هذا الوعي في التعامل وتعرف الكثير عن الحياه الزوجيـــه وتمتلك معلومات كثيره وهامه للغايه
ليــــش انفصـــلت ... وانت في بداية عمــرك ... ثلاثيني يعني .؟؟؟؟؟

لك كل الاحترام والتقدير....

ضيم السنين · 27-03-2009, 07:03

اقتباس:

المشاركة الأصلية كتبت بواسطة مشـاعرٍ إنسان مهجوره

ضيـم نصيحه لا عاد تردين على المواضيــع >>>>> متعبه عمرك وكتابه ومانفهم شي غير
انتس تتميلحين ولارجعوني للاردن مرتن.. مرتن.. ثانيه ..... الله يعطيك العافيـــه
رصيــف شاعر الحارهـ يخب...
اخــي الفاضـل...
تحكي عن وقائع تحصل في هالمجتمع
ويعطيك الف عافيه على هذا الموضوع
سؤالي ..؟؟؟؟
بما إنـك انســان لديـــك هذا الوعي في التعامل وتعرف الكثير عن الحياه الزوجيـــه وتمتلك معلومات كثيره وهامه للغايه
ليــــش انفصـــلت ... وانت في بداية عمــرك ... ثلاثيني يعني .؟؟؟؟؟
لك كل الاحترام والتقدير....

منت ملاحظ كل ماخشيت موضوع خليتوني اقلبه مناقر؟ وش تبون

كان خاطري مارجع ارد عشان ماحوس واطلع عن مسار الموضوع

بس مشكله انك جلف وتحسب اللي يروح للاردن وصل للقمر قصدي واضح للعقلاء اما انت مسكين ماغير انت و وحده هنا تخشون المواضيع تنسون التعقيب ع الموضوع وتناقشوني بردودي

بس مادري من لاعب عليك وقايلك ظريف ترا هالاسلوب سامج ولعاد تحتك تراك دبلة تسبد وجبت لي الحموضه كل شوي ناقز لي

لا تنسخ ردي وتصمخني اكتفي بالقراءة فقط جزاك الله خير

ثلاثيني ومنفصل · 27-03-2009, 07:51

اقتباس:

المشاركة الأصلية كتبت بواسطة مشـاعرٍ إنسان مهجوره

سؤالي ..؟؟؟؟
بما إنـك انســان لديـــك هذا الوعي في التعامل وتعرف الكثير عن الحياه الزوجيـــه وتمتلك معلومات كثيره وهامه للغايه
ليــــش انفصـــلت ... وانت في بداية عمــرك ... ثلاثيني يعني .؟؟؟؟؟
لك كل الاحترام والتقدير....

اخي الكريم سارد على هالجزئيه وهي سؤالك وان كنت ماحب يكون فيه مشاحنات بين الاعضاء في موضوعي ..

لا اعلم ليه دايم اللوم على الرجل في الانفصال .. تذكرت الان موقف شفته في قناه بدايه كتبت وحده انا زوجي طلقني وانهالت بعدها الدعوات على الزوج المسكين بالدعاء بكل مصيبه على وجه الارض .. هل كل النساء ملائكه لاتخطي وقائمات بواجبهن على اكمل وجه وحبيبات وطيبات ولا يبحثن عن المشاكل .. قد تكون حكيما في تعاملك مع هذه المشاكل ( مره ومرتين وثلاث واربع ولكن لن تصبر الى مالا نهايه ) .. وتصل بعدها الى طريق مسدود يكون الانفصال هو الحل المناسب به ..

اشكر لك حضورك اخي الكريم

وردمدني · 27-03-2009, 08:46

لافض فوك ياثلاثيني
من زمان كان بودي رجل ينبه الرجال ويوضح لهم الصورة
يعني الاخ يبيها نانسي عجرم وهو عاجز انه يصير عبادي الجوهر!
اسلوبك جدا ممتع وكلامك رااااااااااااااائع
اسأل الله ان يرزقك الزوجه الصالحه اللي تهنيك وتسعدك

مشـاعرٍ إنسان مهجوره · 27-03-2009, 09:59

لا تنسخ ردي وتصمخني اكتفي بالقراءة فقط جزاك الله خير.....

يعطيك الف عافيه وجزاك الله خير

لكِ كل التاحايا القلبيه والاحسان

مشـاعرٍ إنسان مهجوره · 27-03-2009, 10:04

ثلاثيني منفصـــل شكرا لك اخوي كان مجرد سؤال فضولي لاغير

يعني استغربت رجال هذي سكسوكته وحرمته ماتحطه بعيونها

اتمنى لك التوفيق والله سكسوكتك حلوه
نصيحه
*احلق شنبك مكينه رقم 1 او نص
صدقني ستظهر وسامتك اكثر وستصبح رجل عصري انيق

بالتوفيق لك كل الاحترام

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

تم .. تك تك .. فنيله علاق