عالم الحياة الزوجية - منتدى

ثلاثيني ومنفصل · 30-03-2009, 09:50

نظرا لان حاولت ابلغ المشرفين بالدخول على الموضوع الاصلي عشان تكبير الخط فانا مضطر لانزال الموضوع بعد تنسيق الخط وان شاء الله مايجي احد بعد يقول عيوني اوجعتني من الخط ماشوف .. ( في حاله قرر المشرف الحذف فامل حذف الموضوع الاخر لصغر الخط فيه )

قبل البدء :

ماكتبت هنا موجه لفئه معينه من النساء المهملات وليس للعموم فمن هي قايمه ببيتها ومهتمه بزوجها نقولها بيض الله وجهتس وكثر الله من امثالك ومن قصدنا هنا غيرك وليس انتي سيدتي .. في موضوعي السابق ( تم .. تك تك .. فنيله علاق ) وجهت النقد لفئه من الرجال وكعاده الرجال ( فديتهم ) لم ياخذو الموضوع بحساسيه فهم على علم ان المقصود هم فئه محدده وليست كل الرجال

*********

لكل مجتمع عادات وتقاليد وملابس تقليديه وكلام وشفرات خاصه فيه وانعكست هالصور الذهنيه في مخيلتنا ورسخت وترسخت واتوقع صعب ازالتها بسهوله ولو بتفجير ديناميت ...

فمثلا مما رسخ في بالنا عن المجتمع المصـــري ( انه شعب وسيع صدر وكلهم يبون يعرسون ويدورون ومجتهدين في سبيل اتمام الزواج ومتطلباته ) .. ولو انهم من تالي يحاولون ابراز وجه اخر للأسر المترفه الهاي كلاس .. وان الشنب عندهم ماله ذيك الاهميه عشان كذا طايحين الجماعه هناك بجلط الشنبات وقد لاتميز الرجل من المرأه الا بالصدور ..

واما المجتمع السوري فمما ينقل لنا من مسلسلات ماقضبنا لهم جاده فالصوره عيت تثبت على شي مره تاريخيه ومره حداثيه ومره اجتماعيه .. ولو اني انظر ان الفرق بين الدراما السوريه والمصريه ان الدراما المصريه تشخص مشكلات المجتمع بينما الدراما السوريه تحاول تلميع صوره المجتمع .. وشوفونا ترانا رياجيل اشناب وحريمنا مطيعات وبناتنا مزايين ( على طاري المزايين من يعرف ايميل حميده بنت ابو حاتم اللي بباب الحاره يسعفني فيه ابيها بموضوع عائلي شوي

) .. ولكن المتفحص للمجتمع هناك يدري ان الاشناب قد ولى زمنها وكذلك النساء المطيعات .. وحتى البنات المزايين نشوفهن في المسلسلات ولانشوفهن في الواقع ( تحس كان هاللي بالمسلسلات محطوطات في مخازن ولايطلعن الا اذا جاء تصوير مسلسل ) ..

وعن المجتمع المغربي بسلامتهم ماحنا باللي شفنا لهم شي لتطوير الصوره النمطيه عندنا وكل اللي رسخ في بالنا .. ان من جاه مره ماعاد فكر يوطوط عند غيره .. ونتذكر الابيات اللي تقول

مشتاق للمغرب ولي قلب حساس *** الله يصبرني على نار شوقي

*********************

اما مجتمعنا السعودي .. فالصراع بين الرجل والمرأه لاينتهي وان كنت اشد على يد الرجال في مجتمعنا ( فديتهم ) ،، وقد تسألني ملقوفتن مـــا وتقولي ( ماهوب على كيفك ياثلاثيني وش هالحتسي )

هنا سانحني لارفع اقدامي واتربع على كرسيي الوثير وامخمخ وانا اكتب لان للرجل السعودي ( يالبى والله عينه ) فيه من الحسنات ماتغطي سلبياته .. ساعدد بعض هالايجابيات ( السلبيات حالات شاذه عشان كذا لاتنقز لي وحده تقول اعرف وحده زوجها سوى والا فعل وترك ) ..

المهم نرجع لايجابيات ربعنا ونسدح بعضا منها هنا كود نصحي قلوبا كانت غافله وعشان تعرف كل مهمله ان هالذيب اللي عندها عباره عن جوهره تمشي على الارض بفنيله علاق وسروال .. وقد اخترت هالوقت لكتابه هالموضوع عشان يستغلن الفرصه مع وقت خروج ازواجهن من الدوام لتصحيح ومعالجه ماكان من تقصيـــر ..

للرجل السعودي شجاعه ومرجله قلما تشاهد عند غيره .. برغم الجلافه اللي قد يصفه الكثيرات بها الا انه وقت الصدق خذ ولد .. فزوجته مصونه محافظ عليها .. ملبى جميع طلباتها .. ولو كانت مرهقه له .. قدر الامكان يسعى ان يعف نفسه عن اموال زوجته ان كانت موظفه او ذات دخل مادي .. فهو من يعول اسرته ولايطلب من زوجته اي مقابل لعلمه الموكد ان القوامه له هو وهي واجب شرعي عليه .. ( وهذا يندر ان نشوف مثله في باقي المجتمعات )

ايضاً فزعة الرجل السعودي لايضاهيها فزعه في كل شي سواء في العمل الخيري او الجهادي او حتى في التعامل اليومي .. وان الله احياكم وشفتوا الحريم يسوقن عندنا شوفوا لابنشرت بنت ولا تعطلت سيارتها وش راح يصير .. شرط لتسكر شوارع بسبب ان الشباب مسكرين الخط يصلحون كفر لاحد البنات .. او يحلفون على بعض من يوديها لبيتها لان سيارتها متعطله .. وعلى حسب المخلوقه تكون الفزعه .. فاللعوامل العمريه والتضاريسيه لها دور كبير في تحديد نوع الفزعه .. ولك ان تتخيل لو صار قدامك بنشر لفرفوره عمرها 19 والا 20 سنه فمن الطبيعي انك تبي تبي تحرق البريك حرق عشان توقف وتفزع لها ( والله يلوم اللي يلومك على هالشي ) ..

والرجل السعودي هو اللي يصرف دم قلبه عشان زوجته تكشخ لكل الناس الا له هو

.. فراتبه يطير عند فستان لحضور زواج فلانه ولحفلة خطوبه فلانه ولهديه مولود فلانه ولشراء عطر ولا روج ولا عباه .. وتشوفها وهي طالعه لمناسبه او عزومه ( ضاربتن عمرها بالشيطان الرجيم من مكياج وعطورات تشق الجبهه ) واذا دخلت بيتها طقمت ببجامه القطن ونفشت الشوشه اللي ماحلاها ربي ..<<<<< فارقني هالزول اللي ماحلاه الله ..

وان تزوج يدور الوناسه وسعه الصدر والاهتمام عند غيرها راحت لاهلها تصيح ( تقول وش فيني عذروب انا يوم يتزوج علي ) ..

تقول احداهن مابي اقوله كلام حلو عشان مايتعود ( نعنبوا بليسك وهو كيس رز ولا سكر يبي يخلص ان قمتي تقولينه لزوجك كل يوم ) والثانيه تفخر انها ماتحط من راتبها في بيتها ريال واحد وان زوجها يتحمل الدين ويضطر للسلف عشان يوفر متطلبات البيت ولايطلب منها ..

وسالفه اخرى سمعتها من زميل توه معرس جديد يقول القهر إذا جلست تتدور بالأنترنت وتحاول تتثقف عاطفيا وجنسياً وتشوف وتتعلم وتسأل وش افضل الطرق وش اخر االحركات ـ

المهم يقول انك اذا جيت تسوي حركه جديده مع زوجتك ثم تقلب عليك وتتطالعك كذا بنص عين

وتقول لك

ووييييين عسى ماشر انهبلنااا <<<<<<<< هذا والله التحطيم

أيها الرجل السعودي برغم مانتعرض له من حملات شرسه داخليه وخارجيه فعلينا التكاتف لكي تحقق مطالبنا في العيش كباقي البشر ننعم بالرومنسه ونقضي على تعدد الزوجات نهائيا ( لان كلن لاقي راحته عند زوجته ) ولكي ايضا نقضي على العنوسه لأننا سنبادر للزواج مبكرين ومن يطق الورع 15 وحنا مزوجينه فرفوره بعمره بنطرب معها باول حياته .. فعلينا تشكيل حمله وطنيه زوجيه تحت شعار ( بيجامه قطن ) وهي اشبه ماتكون بحمله ( كفايه ) في مصر وحمله ( لكي ماتنضربش على قفاك ) .. لكي يتعدل واقعنا الحالي لما هو اجمل .. هذا الموضوع ليس هجوما على المرأه بقدر ماهو محفز لها للاهتمام باهم رجل في حياتها فهو حبيبها وولي امرها وابو عيالها ..

وانا بالرغم من كوني رجلا سبق لي الزواج وقد جاوزت الثلاثين لازلت افضل ان اعيش بين ملصقات صور شاديه وليلي طاهر ( ايام عزها ) وشمس البارودي اللي ماليه جدارن غرفتي وان اعيش الرومنسيه واحلم بها من خلال متابعتي ( لسنوات الضياع وغيرها ) على ان اقتل الحس الرومنسي لدي على يد مخلوقه مـــا تصبحني بتكشيره وتمسيني بتكشيره وهات هات ( عملت استفتاء بين زملائي واصدقائي عشان نشوف اسامي زوجاتهم بالجوال لقيناهم مسمين زوجاتهم بالجوال كالتالي _ هات _ عطني _ الزعوله _ نوره مشاكل _ المباحث العامه _ غلطه عمري _ توهيقه _ حصان ابليس ) .. هذه التسميات من المؤكد انه تعكس واقع يومي تعيس .. والشخص يتزوج ليستقر ويبني حياته المستقبليه مع شريكه تقدر اخنياره لها وتكون قدها وقدود ..

فلنشرع في هذه الحمله وللنساء اقول مره اخرى هذا الموضوع ليس هجوما بقدر ماهو محفز لتحسين الاداء والسعي للأفضل

*** بعد البدء

لو خيرت بين نساء الارض جميعا فلن اختار غير المرأه السعوديه

ابو قحفية · 30-03-2009, 10:06

يعطيك العافية اخوي

مدري ويش فيهم الربع على الخط

الموضوع الاصلي الخط فيه هاااااااااااالكبر كل كلمتين بسطر

مدري

إليسا · 30-03-2009, 10:35

اقتباس:

مشتاق للمغرب ولي قلب حساس *** الله يصبرني على نار شوقي

للتصحيح
اشتقت للمغرب وانا توني جاي **** الله يصبرني على نار شوقي
الشاعر الكبير عـبدالله الفيصل
كلامك صحيح و100% هههه بجامه قطن لا وإذا قامت تفلسف فالمنتدى وتقول سويت لزوجي وفعلت وهي خبر خير
الله يهديهم بس
يعطيك العافية على وسعت الصدر

هــــنوووف · 30-03-2009, 10:38

ههههههههههههههه أكثر شي موتني ضحك هالمقطع

^
^

وان الله احياكم وشفتوا الحريم يسوقن عندنا شوفوا لابنشرت بنت ولا تعطلت سيارتها وش راح يصير .. شرط لتسكر شوارع بسبب ان الشباب مسكرين الخط يصلحون كفر لاحد

البنات .. او يحلفون على بعض من يوديها لبيتها لان سيارتها متعطله ..

وعلى حسب المخلوقه تكون الفزعه .. فاللعوامل العمريه والتضاريسيه لها دور كبير في تحديد نوع الفزعه ..

ولك ان تتخيل لو صار قدامك بنشر لفرفوره عمرها 19 والا 20 سنه فمن الطبيعي انك تبي تبي تحرق البريك حرق عشان توقف وتفزع

..( والله يلوم اللي يلومك على هالشي ) ..

^
^

ثلاثيني

عوافي على مواضيعكـ المميزة

هههه تكتب من قلب وبواقعية بعيد كل البعد عن الدبلوماسية

عقبال مايسمعون منكــ مناصرات بجامات القطن <<< خخخخ أنا مطلعة نفسي منهم

موضوع شيّق جدا

ثلاثيني ومنفصل · 30-03-2009, 10:58

اجل وحده زوجها رومنسي وعاطفي ويطلب منها الكلام الحلو ( ياعمري وياروحي ) وهي ترد عليه تقوله :
والله لا قايلة لك يا عمري ولا يا روحي.. الحب أحبك ..مانيب كاذبه بس هالكلمات يالله أقولها لعيالي إذا صخنوا <<<< والله التحطيم

يقولي واحدن من الاصدقاء في ان الحجوزات بالصيف اللي فات كانت كثرانه على تركيا ( بعض البنات يحسبن من يطبن في مطار اسطنبول ومهند في استقبالهن ) ..

وفي شي جديد توه طلع هالسنه .. اذكر قبل كم سنه كل ماسالتك احد قالت لك ( انا اشبه زينب العسكري بس اني اصغر فم

) .. يوم زينب ذيك السنين حديث الهواويه واهل القلوب الخضر

.. وهالسنه سبحان الله تغيرت الاشباه وصارن كلهن يشبهن لميس

..

والحريم الله يحفظهن ويهدينا وياهن .. بعضهن ماتعرف إلا بجامه القطن ولا عمرها الظاهر سمعت ولا شافت قميص نوم بحياتها .. وبعضهن ( تقولك تشبه بالكفار ) <<< والله العذر

عموما نقولهن ترا الدعوى ملحوق عليها وكان ماني واهم ان محلات سيدتـــي و عبدالله السيد ( اللي على
تقاطع شارع العليا العام مع طريق مكه ) موجود لها الحين تزرق له اللي ماودها ان زوجها يجيب لها .. ضـــره ولا تبخل على نفسها صح بتشوف لها شغلات على 9000 الاف و12 الف وحنا مانقول لها اشتري بها الاسعار لان بصراحه ( بعض الحريم وبدون زعل على هاللبس تبي تصير مثل الددسن اللي مركب لها جنوط BMW )

وفيه اطقم رخيصه ومناسبه من الالفين وتحت وتفي بالغرض .. ياليت الشي على اللبس وبس حتى الاهتمام ببيتها وبغرفه نومها تحديدا تلقاه معدوم .. وتشوف غرفة نومها تحس انك داخل غرف ساسكو اللي على طريق الرياض

..

هــــنوووف · 30-03-2009, 11:32

هههههههههههههههههههههههه

لاااااااا حرام عليكـ أنت عن مين تتكلم ؟!!

بديت أشكـ فيكــ ياثلاثيني

يعني معقولة هالحريم ماعمري قابلت أحد منهم

صحيح فية بعض الأهمال وعلى قولتك بجامة قطن بس مو الغرفة حوسة وماتلبس قمصان نوم ؟!!!

:

/

دلوعة نايف · 30-03-2009, 11:50

هههههههههههههههههههه
ثلاثيني ..
أسلوبك رائع جدا ..وممتع ..
مشالله الله عليك تتكلم بواقعية ..
بس حطمت النساء المرتبات ..
ههههههههههههههههههههه

دلوعة نايف · 30-03-2009, 11:52

اجل وحده زوجها رومنسي وعاطفي ويطلب منها الكلام الحلو ( ياعمري وياروحي ) وهي ترد عليه تقوله :
والله لا قايلة لك يا عمري ولا يا روحي.. الحب أحبك ..مانيب كاذبه بس هالكلمات يالله أقولها لعيالي إذا صخنوا <<<< والله التحطيم

عن جد تحطيم
وش هالمرة ياررررربي
لمين تخزن الكلام الحلو إذا ماقالتة لزوجها واولادها
شكلها ماتخزن ابدا
وماتعرف حتى تنطقهم
الله يعين الزوج عليها

ثلاثيني ومنفصل · 30-03-2009, 11:53

اقتباس:

المشاركة الأصلية كتبت بواسطة هــــنوووف

هههههههههههههههههههههههه
لاااااااا حرام عليكـ أنت عن مين تتكلم ؟!!
بديت أشكـ فيكــ ياثلاثيني
يعني معقولة هالحريم ماعمري قابلت أحد منهم
صحيح فية بعض الأهمال وعلى قولتك بجامة قطن بس مو الغرفة حوسة وماتلبس قمصان نوم ؟!!!

:
/

عن بعض الحريم

الجندل · 30-03-2009, 11:53

والله كلامك واقعي
لكن انا شايف أن ثقافة الرومانسية
بدت تدب في مجتمع نسائنا الحلوات !!
وبالمقابل أنا أرى أن حتى حنا يالرجال
نتمتع بقدر كبيرمن الجلافة والجفاف والتكشيرة
والصمت والرسمية و..... الشيء الكثير .
خصوصاً في البيت !!!
وفغي الأستراحة ومع الشلة
تلقى الواحد ياحليله (يازينه).
لكن مثل ما ذكرت أنا متفائل
بأن ثقافة الرومانسية قادمة لا محالة
طبعاً بتقول : وش يفيد لا فات الفوت ؟
أقول:على الأقل للأجيال القادمة .
حصان ابليس
والله مضحكة جداً ...
بارك الله فيك ..

هــــنوووف · 30-03-2009, 12:00

اقتباس:

المشاركة الأصلية كتبت بواسطة ثلاثيني ومنفصل

عن بعض الحريم

طـــــــيب بعض بعض وش فارقة معي أنا

بس تصدق ماعمري سمعت أو قابلت أحد من هالــــــ بعض

غريبة صح

طيب بسأل سؤال ممكن ؟!!

هالي تتكلم عنهم ناس متزوجين حديثا ولا كلامكـ هذا يحكي عن وضع بعض الحريم بعد كم سنة زواج ؟؟؟!!

:
:

شادن مون · 30-03-2009, 12:21

والله ماسمعت شيء بعد من بعض الحريم اللي قلته قليل من كثير بس متوقعه ان في جعبتك الكثير يالله ثلاثيني اكشف لنا الباقي هههههههههههههههههههههه
اي ريح طيبة حذفتك على منتدانا ياهلابك والله من زمان عن المواضيع الحلوووووووووووة والواقعية

ثلاثيني ومنفصل · 30-03-2009, 12:30

اقتباس:

المشاركة الأصلية كتبت بواسطة هــــنوووف

طـــــــيب بعض بعض وش فارقة معي أنا

بس تصدق ماعمري سمعت أو قابلت أحد من هالــــــ بعض
غريبة صح

طيب بسأل سؤال ممكن ؟!!
هالي تتكلم عنهم ناس متزوجين حديثا ولا كلامكـ هذا يحكي عن وضع بعض الحريم بعد كم سنة زواج ؟؟؟!!

:
:

يعني كل اللي حواليك كشخه ومهتمات بنفسهن ولاقصرن على رجالهن بشي ( على فكره ترا كثير من الحريم مايحكن بمثل هالامور لقريباتهن يمكن يكتبنه بمنتدى ولكن مستحيل تبوح به لقريبه وكمثال بعض الزميلات في المنتدى ربما تحكي بتجربتها هنا ومن الصعب ان تقوله لصديقه ) ..

الا ان كنتي بمجتمع في عالم اخر ( غير بشري ) ولا ساكنه لك بديره مافيها الا بيتكم بس

ثلاثيني ومنفصل · 30-03-2009, 12:36

اقتباس:

المشاركة الأصلية كتبت بواسطة شادن مون

والله ماسمعت شيء بعد من بعض الحريم اللي قلته قليل من كثير بس متوقعه ان في جعبتك الكثير يالله ثلاثيني اكشف لنا الباقي هههههههههههههههههههههه
اي ريح طيبة حذفتك على منتدانا ياهلابك والله من زمان عن المواضيع الحلوووووووووووة والواقعية

تسلمين من ذوقك .. وترا مابطى بالسيل الا كبره .. وما شفتي من البعير الا آذانيه

.. والله مدري وش اسمي هالريح .. الوكاد اني كنت مثل راعيه البسطه من زاويه لزاويه ومن سوق لسوق لين حطيت رحالي عندكم تلبيه لدعوه كريمه .. من أخ عزيز

الوكاد اني رومنسي وحساس وزعول

يعني لاحدن يقولي شي ثم اروح واشيل قشي

هــــنوووف · 30-03-2009, 14:31

اقتباس:

المشاركة الأصلية كتبت بواسطة ثلاثيني ومنفصل

يعني كل اللي حواليك كشخه ومهتمات بنفسهن ولاقصرن على رجالهن بشي ( على فكره ترا كثير من الحريم مايحكن بمثل هالامور لقريباتهن يمكن يكتبنه بمنتدى ولكن مستحيل تبوح به لقريبه وكمثال بعض الزميلات في المنتدى ربما تحكي بتجربتها هنا ومن الصعب ان تقوله لصديقه ) ..
الا ان كنتي بمجتمع في عالم اخر ( غير بشري ) ولا ساكنه لك بديره مافيها الا بيتكم بس

هههه ماني من عالم آخر بس تقدر تقول من مجتمع أخر يختلف كثيرا عن المجتمع الي حولكـ

ومو جالسة أتكلم عن بيتنا أنا أتكلم لكــ عن أكثر من 32 بيت في الرياض بس يمثلون مجتمعي من خوالي وعمامي

وأذا تبينا أكثر دقة أتكلم عن 13 عائلة منهم هم الي أحتك فيهم بشكل أسبوعي وأكثر من 10 بنات من عوايل مختلفة يطلعون صاحباتي

أنا جالسة أتكلم لك من واقع تجربة والي قاعدة أشوفة قدام عيني

آمممم

وش مفهوم الكشخة عندكـ ؟!!

اذا أنها في اللبس والترتيب اي كل الي أعرف يقّدرون اللبس ويدفعون شي وشويات على ملابس البيت

" المشخلع أقصد " <<<< مو ملابس النوم

مشخلع للبيت شورتات وبديات وميني جوب وفساتين ,,,,,, الخ }

والأهتمام بالنفس ولله الحمد ماعمر وحدة جلست بشعر منكوووش مثل ما أنت تقول وماراح أقول مكياج أوفر عشان ماتكذبني بس الكحلة والروج ماتطيح من يد الوحدة ترى كلها شخطتين ماتكلف شي

نوت بيق ديل يعني ؟!!

ماقصرو على رجلهم تحتمل هالجملة أشياء كثير

شوف كل وحدة وميول زوجها يعني كل وحدة تحاول تشبع أكثر الرغبات تشعب عند زوجها

مثلا أنا زوجي يقدر النظافة عندة هوس مو طبيعي يحب لادخل يشم ريحة الديتول والدخون تعج بالبيت

ويقدررر قهوة العصر مع نوع مميز من الحلا

<<<< أنا هذي أكثر شي أركز عليهم لأن الباقي مو مرررة يهم زوجي

عرفت كيف

كل رجل عندة كم شغلة هي الأساسية عندة يعني اللب و الباقي قشور أو تقدر تقول روتين يومي

مثلا عمي يقدررر الغداء ويحب أصناف معينة على الأكل وقهوة الصبح <<< هذي أكثر شيين تتعب فيها

زوجتة وتسويها بأخلاص

بعدين انا ماقلت مافية مشاكل <<< شدعوة ماصرنا بشر أجل ملائكة

أنا تعليقي على غرفة النوم المحيوسة والي مشببها في غرفة ساسكوو وعلى الشعر المنكوووش ولا الملابس المكررة

أشوى أنك للحين ماقلت ريحة شينة بعد

معليش ممكن أنت شايف كم عينة كذا بس هذول مايمتون لعالم الأناث بصلة

بعدين النظافة من الأيمان

سواء على النواحي الجسدية او المنزلية

مجتمعي يقدر الرجـل

:
:

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

بجامه قطن ( بعد تعديل الخط )