عالم الحياة الزوجية - منتدى

ثلاثيني ومنفصل · 01-04-2009, 03:39

سموه تحدي سموه هبال اللي يجي .. ودنا نكسر الجمود شوي بالقسم ونوسع صدورنا .. فالكل مهموم ومغموم والحال مايعلم فيه الا الله .. عشان كذا ودنا الكل يحكي تجربته في مراهقته او في فتره خطوبته ( المواقف الطريفه فيها طبعا ) وودنا بعد نسوي تحدي بسيط للاخوه المتزوجين والخاطبين اللي مقبلين على الزواج .. هالتحدي يدور حول ( الكتابه على الجدران ) .. يعني من عنده الجرأه ياخذ له بخاخ ويطمر للجدار اللي مقابل بيته او دريشه خطيبته ويكتب له بيت غزلي او خاطره موجهه للزوجه او الخطيبه ..

شخصيا : في ايام المراهقه الله يذكر ذيك الايام بالخير .. سردادي مردادي في ذاك الشارع .. ومن عاير لعاير .. كود يحصل لنا قــزه من بعيد ( وهي تدخل اخوانها ولا طالعه مسيره ) .. ترى بعض العشاق مايكفيه يعشق ويجلس في بيتهم يتخيل

حتى الشارع اللي ساكن فيه الزين يعشقه بعد ويعد القراطيس اللي تطيح فيه

قد ينتقدني كثيرين مدري كثيرون على هالموضوع ويقول شلون تمتدح هالسلوك الغير حضاري لكن ترا ياجماعه من نقصدهم ( ليسوا اولئك التافهين عاش الهلال والا عاش النصر من قصدناهم هم من حولوا الجدران للوحات ابداعيه
من طقه مواليد عام 1397 وماقبل <<<< يالبى ذاك الجيل

..

قد تعتبرون ان صغار العقول والتافهين

هم اصحاب الكتابة على الجدران

يحق لكم ان تقولون عنهم مايحلو لكم

ولكن للأسف انكم لاتفهمون هؤلاء

قال عنهم البعض قديماً المجانين

وجعلتم الجدران صحائف المجانين

ولكن هؤلاء هم العشاق

هم الحالمين

هم الصادقين

هم الذين عبروا عن مافي نفوسهم بلا عنف او خطأ

هم الذين يعطون للجدار معنى آخر

كنتم تنظرون للجدار على انه بلك واسمنت وبويه

ولكن هم ينظرون له على انه ورق من ذهب ورسول الأشواق

..!!

هم الذين يجعلونكم تنظرون للجدار يومياً وكأنه لوحة فنية

هم الذين يجعلونكم تتابعون كل جدار وكل زاوية وكل بلكه

كيف تسمونهم التافهين

وانتم تتابعون كتاباتهم و قصائدهم ولوعاتهم وآهاتهم

آآآآآآآآآآآآآآه يازمن

وآآآآآآآآآآآآه يابخاخات

كم امضينا على تلك الجدران من السنين الجميلة

كم زيناها بمقاطع الحب والغرام

ثم اعدنا صبغها من جديد

لنكتب عليها بيت آخر اقوى وأصدق

كم اسمينا بعض الشوارع بألقاب غريبة

لايفهمها إلا الغزال الذي يسكن في أحد جنباته

وكم من جدار خليناه ديوان شعري

عشان الزين لاطل من الشباك يلقى شيء يخليه مبسوط

..

كنا نخشى ان يطل الزين او يخرج فيشاهد حادث او حفريات فيتكدر خاطره

لذا وضعنا له مجلة فواصل يوميه امام ناظريه ..!!

حقيقة وبدون إطالة الكلام

اللي ماقد كتب على جدار حتى لو كان جدار طين

ولاتوصخت أصابعه من بوية البخاخ

فهذا دليل إنه ماعاش مراهقته كما ينبغى

وانصحه بشراء بخاخ حالاً

والكتابة على سور منزله

بس من الداخل

وفي الجهة الخلفيه للمنزل

عشان مايحوس الدعوه

...

احد الاصدقاء كانت الفتاه التي يحب .. وتزوجها فيما بعد تفصل عند خياط الحاره وكل يوم وهو مسنتر بالشارع لايكل ولا يمل .. كله على امل شوفتها لو لمحه ..
حتى مخدته مسميها نوره <<<السموحه يابو فهد قلنا اسم المدام

اخر شي مسك البخاخ وكتب على الجدار الموازي لباب الخياط وكتب :

خياط حارتنا إذا جاك خلي,,,, ضيق عليه الثوب من عند الأرداف
خل النهد في صدرها باين لي ,,،, واقصر كموم الثوب اليا حد الأكتــــاف
وفصل لمحبوبي قماش من اللي,,,, يلزق على ردفه وبالحيل شفاف

8
8
88

صارت معلم تاريخي لمده 20 سنه وحتي البلديه وصاحب المبنى تحسف يمسحها لين العام الماضي تغير المالك وهدم العماره كلها ..
.....

فراشه بلون واحد · 01-04-2009, 03:45

موضوعك قمه بالروعه وكسر لروتين الممل يعطيك الف عافيه وانشائ الله خويك راعي الشعر تزوج محبوبته؟؟؟؟؟

شوشو 23 · 01-04-2009, 04:28

يسلمووو اخوي ثلاثيني موضوعك رااائع عجبتني حكاية الكتابه على الجدران خخخخخخخ

ثلاثيني ومنفصل · 01-04-2009, 04:45

اقتباس:

المشاركة الأصلية كتبت بواسطة شوشو 23

يسلمووو اخوي ثلاثيني موضوعك رااائع عجبتني حكاية الكتابه على الجدران خخخخخخخ

اقتباس:

المشاركة الأصلية كتبت بواسطة فراشه بلون واحد

موضوعك قمه بالروعه وكسر لروتين الممل يعطيك الف عافيه وانشائ الله خويك راعي الشعر تزوج محبوبته؟؟؟؟؟

الله يجبر بخاطركم .. ادري سيأتي الكثير من منتقدي هؤلاء المبدعين ويصفهم بالهمجيه

.. واقول لهؤلاء ..

من قدكم ياعيال النعمة

كل واحد قاعد يسوي نفسه فاهم

ويتشره على هالمبدعين وينعتهم بابشع الصفات

..

اتوقع كل واحد منكم شاري له ابوه سبوره بيضاء واقلام مائية من يومه نونو ..

الله لايلومكم

ماعشتوا مراهقتهم كما ينبغى ولاعبرتوا عنها تعبير صادق

من البيت للمدرسة ومن المدرسة للبيت

وفي الاجازه على لندن وباريس ..

يعني من يومكم صغار وانتم مدلعين وفي احضان المربيات الفلبينيات ..

لكن حنا شقينا وتعبنا وذبحنا الحب والعشق

اللي قطع قلوبنا من يوم كنا في رابع ابتدائي

لذلك مالقينا هالسبورات البيض اللي عندكم فأتجهنا للجدران المجانية

صح اننا ظلمنا اهل البيوت وحسنا جدرانهم

لكن وش نسوي الدولة ماوفرت لنا اندية ووسائل ترفيه

وايضاً خلينا هالبيوت اللي نكتب عليها تصير مشهورة وتصير سهلة التوصيف

وهذي ميزه وفائده من فوائدنا

..

ويا كم من بيت كتبنا عليه ومن بكره جبنا بويه جديده وصبغنا له جداره

عشان نكتب عليه بيت شعري جديد بشكل آخر

منها نلفت نظر ام العيون السود اللي ساكنه قبال الجدار وتحس فينا

ومنها نحصل على المصاقيل المائية إذا انتهى البخاخ

..

ياناس اللي تشوفونه على الجدران هذا فن

هذي مواهب وحروف

هذي قدرات خارقه

هذي احاسيس ومشاعر داخلية بدري عليكم تفهمونها وتحسون بها ..

تقولون هذولي مرضى نفسسين ودشير

ونقول لكم هذولا مبدعين وحالمين وعاشقين

هذا واحد من الاصدقاء من اللي كانوا يكتبون على الجدران

والآن مرشد طلابي ووش حليليه وماجا زينه

حتى الدخان والتتن ماقد شربه ..

لكن مشكلته يوم كان صغير يحب بنت الجيران

..

لذلك صار خطاط ورسام بسبب الحب والعشق وتوفر البخاخات والجدران الناصعة ..

يعني كانت الجدران ذيك الأيام عبارة عن بلك وبويه

ونص هالجدران ممخوش ومعفول من الغشم إذا جو يلبقون سياراتهم

يعني انتم كنتم تنظرون لها جدران

لكن احنا ننظر لها عالم آخر تحلق فيه إلى ابعد مكان ..

انتم ياعيال النعمه إذا الواحد منكم عشق وحب

يروح على طول يأخذ وسادته ويغمض عيونه ويقعد يحلم لحاله ..

لكن احنا حتى الوسايد ماعندنا ولاندري كيف شكلها <<<<<< ادري هذي مالها مطار بس مشوها لي

لذلك نروح للجدران ونحلم فيها ونخليكم الصبح تحلمون معنا ..!!

احنا حولنا هالجدران لكم إلى لوحات فنية

إلى ابداعات ومساحات شعرية

طمسنا هوية الاسمنت والبلك واظهرنا هوية الشعر والابداع ..!!

لو كانت غير ملفته للنظر كان مريتو من عندها وتجاهلتوها

لكنكم توقفون امامها احتراماً لها وتتأملونها وتقرأونها حرف حرف

ويمكن تحفظون كل حرف مكتوب وترددونه بعدين في لحظات التأمل

هذه هي الاحاسيس والمشاعر الصادقة

نصيحتي لكل من وصل لهذا العمر ولم يخط بيده على جدار ولم يمسك بخاخ بوية

انه يقوم الآن ليخط بأنامله بيت شعري على جدار بيته

ليشعر باللذه والمتعة

بس ياليت يكون في الجدار الخلفي

لأن بعضكم خطه دمار وإذا كتب كلمة تحس انه يكتب برجله ..!!

هذي بيتين من مشاهداتي :

ياعلي هذا البيت ملزوم أمره **** لو قلت لي كثرة مرورك سماجه

بيت ٍ غلاه بوسط قلبي مقره **** أغليه لو هو مانفعني بحاجه

شادن مون · 01-04-2009, 05:57

يا اخي الحب هو الحب بجنونه ووقته صح ماكتبنا على الجدران لاننا اولا بنات لكن طريقة التعبير فيها
كان صادق ومجنون والقلب ابو سهم من نصه والاسم جواته وبيت الشعر الله الله صح انا اصغر منه بسنتين
بس لحقت عليه وشفت ولاتنسى جدران المدارس حقت البنات واللي تدرس فيها حبيبته ياسلاااااااام
يكتب اسمه مو اسها علشان مايحرجها بس توصل رسالته بشفرة اهي تفهمها ههههههههههههه والله ايام مشكور على الموضوع والذكريات الجميلة

سمرا سعوديه · 01-04-2009, 06:36

والله من جد غيرت لنا جو , خليتنا نتذكر ونضحك ...

انا ياثلاثيني مالحقت على الحقبه التاريخيه اللي تكلمت عنها , الحقبه اللي فيها من جد عشاق وجانين على البنت اللي يحبونها , ومطارد وراها , وحراس على راس شارع بيتهم , والله عجبني المجنون راعي شعر الارداف والشفاف ...

انا لحقت على حقبة ابوي و عمامي العشاق , صدق ابوي عصبي , بس رومانسي , علشان يلمح خيالها كان يصر على الغاليه يوديها السوق مع اهلها تجهز لزواجها , وكل شوي مرتز عند باب بيتهم مودي لها هدايا , عمي اللي بعده عبدالحليم حافظ ياهي رومانسيه عليه ماتلقاها الحين , يقرا روايات الحب ويكتب شعر , حب وخطب , كان يتفق مع عمتي لما يطلعون الاهل تجيب خطيبته لبيتهم , والله اخت رجال هالعمه تجيبها له وتقعد وهي متحجبه >> مودرن
ويطقها سوالف وهو طايح فيها غزل وكلام حب واذا قامت بتروح بيت اهلها يعطيها مراسيل الغرام , دستة رسايل سارد لها فيها اغاني عبد الحليم , عمي الصغير بايعها , يلم البنات اللي يحبهم ويركبهم معاه السياره ويحوس فيهم وين اهاليهم ماادري , في السياره كل يوم يقول حق وحده احبك وبتزوجك , شوف الخيانه نفس الشله في نفس المكان وكل يوم يقول لوحده احبك وبتزوجك , لا ويصادف في السياره احيانا خوات >> صايع بشكل مو طبيعي بس والله شريف ماعمره مسك يد وحده فيهم
بس كانت فيهم وحده تموت فيه كل يوم قبل ماتنزل تقول له بتتزوجني يقول لها اي >> خاين بالفطره

عمامي كانوا مهتمين بروايات الحب عربيه واجنبيه , وكانت جدرانهم غلاف الروايات , يكتب بيتين شعر لحبيبته , يوصفها بكلمتين , يرسم قلب شاق السهم جدرانه ويسوي فيها مستحي مايكتب الاسماء , يصادق اخوان الحبيبه علشان يدخل بيتهم او يرتز عند الباب >> والله حب عذري

يسلمو ياثلاثيني ذكرتنا بايام اول الحلوه ...

! تكفيني الذكرى ! · 01-04-2009, 06:52

الله يوسع صدرك وياليت هالزمن يرجع ياخوك بس ااااااه على زمنا اللي راح بذكرياته
لي عوده----حامله معي شئ من الذكريات

تفاحة وردي · 01-04-2009, 07:52

لله درك ياا ثلاثيني على هالمواضيع حركت شجوني
ابدعت وابدعت ثم ابدعت
ياخي ذكرتني بما مضى
كانت امنية حياتي اني امسك بخاخ واكتب على الجدار بالشاارع
بس المشكله كانت انوثتي تحول بيني وبين تلك الامنيه>>>>>>>>>>>>>> امحق انوثة
ولكني كنت افجر هذه الطاقه في نهاية دفتر الاملاء
ااااااااااااااااااااااااااااااااه يادفتر الاملاء
كم عانيت وعانيت وعانيت
ايام ليست كالايام
تقبل مروري ويسلمو عالموضوع الرائع

ضيم السنين · 01-04-2009, 08:26

انا اعيش في شعبيات ومازلت وكلها الجدارين مشخمطه ابيات شعر وقلوب وسهوم رايحه جايه وحروف

حتى اللي بالفحم مازال موجود مانمسح

الحب مقطع قلوبهم ذيك الوقوت

اخبر كنت اقلدهم بس ماحيلتي الا اني اكتب اول حرف من اسمي ولا اكتب (طلع البدر علينا )على قد عقلي ذيك الحزه

ومازالت موجوده

واللي كان يشخمطون كلن اخذ حبيبته سبحان الله ذاك الزمن نقي وحب نظيف

اللحين لو احد شخمط كتب ايميل ولا رقم يادافع البلا

ليت يقرون البلديه موضوعك هذا بيكرفسونك فيذاك بيقولون يساهم في السلوك الغير حضاري

يعطيك العافيه على المقال المنعش

همسةطفله · 01-04-2009, 11:23

هههاي يسلموا اخ ثلاثيني موضوع يجنن صراحه امنية حياتي اكتب بالبخاخ
على الجدران بس على قولت تفاحه وردي انوثتنا تحول بين تحقيق ذلك
ذاك اليوم شفت بحوش اهلي بخاخ لأبوي مدري اش يبي فيه<<<خخخخ
ويالله ماسكه حالي لأشخمط ع الجدار...
بس شكلي بشتري واحد واخلي زوجي يوديني البر او تحت كبري من هالكباري
واحقق امنيتي وافرغ الطاقه الي عندي

شادن قطر · 01-04-2009, 11:31

موضوع رووووووعه

وليس على العاشق حرج

دانةالبحار · 01-04-2009, 11:45

الموضوع رائع عيشني في جو تمنيت اني ولد ههههههه

قحطاااني ماااركه · 01-04-2009, 12:03

يعطيك العافيه

مكحله عيني بزوجي · 01-04-2009, 15:14

وش اشياء حلوووووووووووه ذكرتنا فيها ذكرتنا برسمات القلوب الي تنزف دم هههههههه لا كنك كاتب ميلاد زوجي بضبط 1397بسئله عن هل حركات وسعت صدورنا الله يوسع صدرك بيت الشعر حق الخياط شيييييييييييي رهييييييييييييييب في اي حي هذي كانت

ثلاثيني ومنفصل · 02-04-2009, 02:34

اقتباس:

المشاركة الأصلية كتبت بواسطة شادن مون

يا اخي الحب هو الحب بجنونه ووقته صح ماكتبنا على الجدران لاننا اولا بنات لكن طريقة التعبير فيها
كان صادق ومجنون والقلب ابو سهم من نصه والاسم جواته وبيت الشعر الله الله صح انا اصغر منه بسنتين
بس لحقت عليه وشفت ولاتنسى جدران المدارس حقت البنات واللي تدرس فيها حبيبته ياسلاااااااام
يكتب اسمه مو اسها علشان مايحرجها بس توصل رسالته بشفرة اهي تفهمها ههههههههههههه والله ايام مشكور على الموضوع والذكريات الجميلة

ومشكوره على طلتك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 7 ( الأعضاء 1 والزوار 6)
‏ثلاثيني ومنفصل

عالم الحياة الزوجية - منتدى

خياط حارتنا اذا جاك خلي .. ضيق عليه الثوب من عند الارداف