عالم الحياة الزوجية - منتدى

لـــمـــى · 03-04-2009, 06:19

بصراحه دايما يجي في بالي اكتب مشكلتي هنا , بس انحرج وارجع بكلامي , واذا تشجعت اقعد افكر بكتب ايش ولا ايش !!!!!!!!!!!!!
انا متزوجه من 7 سنوات
جميله طفوليه دلوعه رقيقه متعلمه ومثقفه ( وهذا راي الكل مو رايي انا )
نتيجة زواجي هذا طفلين هم أغلى شي أملكه بدنيتي
مشكلتي زوجي اللي دمرني تدمير نفسي فوق ماتتخيلونه .......
في بداية حياتنا كان انسان رائع بكل مالهالكلمة من معنى .......
كان يخاف علي وكان يهتم فيني بالحيل حتى دمعتي مايطيق يشوفها ......
ظلينا 3 سنوات على هالحال ..... بعدها ربي رزقني بطفلي الاول ......... وبدل ماتصير حياتنا افضل ......... انقلب 180 درجه
صار ماعنده اي اهتمام فيني وصارت فيه قسوه مو طبيعيه , مافيه رحمة بقلبه , لدرجة من كثر ماكتمت بقلبي قبل ايام كنا في المطبخ قلت له احس ألم بقلبي (وانا وربي صادقه) , قال طيب وأخذ كوب الكابوتشينو حقه وطلع للصاله !!!!!!!!!!!!!!!!!!!
وربي لو سمعت منه كلمة سلامتك بس كان شفتها شي كبير منه ..... لو ضمني لو قال اي شي بس مايتجاهلني بهالشكل !!!!!!!!!!!!!
مااقول لكم اني كثيرة شكوى علشان يمل شكواي او اتمارض .... وربي مو حركاتي بس الرحمة زينه ياعالم .....
عايش حياته لعمله بس ...... طول وقته يفكر كيف يوصل بعمله لأعلى مركز ...... ويبي يشتري السياره الفلانيه .... ويبي يجيب الشي الفلاني .... ويبي ويبي ويبي ............
اعرف ان الانسان يبي الافضل دايما بس مو لدرجة ان زوجته واولاده يصير وجودهم شي ثانوي بحياته !!!!!!!
تخيلو الوضع معي ...
يطلع لدوامه الصباح يرجع يلقى البيت نظيف مرتب والغدا جاهز مع العلم اني لاعندي خدامه ولاشي , قايمه ببيتي وزوجي واطفالي بنفسي ورافضه فكرة الخدامه تماما لعدة اسباب اهمها اني اكره وجودها في بيتي وماراح اتحمل منها أي أذيه اتجاه اطفالي لأنه لو صار منها شي اتجاههم مابيكفيني دمها ..... ثانيا انا مهووسة نظافه -ومعروف هالشي عند كل اللي يعرفوني- يعني ماأثق بنظافتهم ....
احط له غداه يتغدى ويروح عند التي في يطالع , ومايبي ازعاج , بعدها يطلع لصلاة العصر ومايرجع الا اذا ابي اقضي مشوار ضروري .....
في الفتره اللي يقضيها في البيت صار وقته كله يضرب ولدي ( رغم ان عمره 4 سنين بس ) !!!!!!!!!!!
وربي ياناس انه بدا يضربه من عمره سنه ويشهد ربي على هالشي , وضرب فعلا فظيع لدرجة انه مره ضربه على يده الين طاح ظفر الولد على الأرض .....
مابيننا اي نقاش .... اذا تناقشت معه في مواضيع مثل : ضربه للولد - معاملته لنا - حاجتنا لوجوده ......... يحاول بأي طريقه يطلعني انا الغلطانه او الولد هو الغلطان بأساليب استفزازيه ...... يعني يطلعك من موضوع ويدخلك بموضوع ثاني وثالث ورابع الين يحوسك ..........
جت بنتي وتوقعته بيصير افضل بمعاملتنا لأن على قولتهم البنت تحنن قلب الرجال
تحسن فتره بعدها رجعت ريما لعادتها القديمه وأسوأ .... صار من يدخل مع الباب يدور الولد ويدور على أي سبب علشان يضربه او يهاوشه ..... وربي ماكنه ولده ..... وهالحال طول اليوم ..... لدرجة اني يوم ولدي يغلط اتجاوز عنه ماابي اهاوشه .... نصير انا وأبوه عليه !!!!!!!!!!!!!!!!!!!!
وازيدكم من الشعر بيت حتى البنت اللي عمرها 7 شهور الحين ماسلمت منه ...
ياخذها ويرفعها ويخابط فيها كنها عمرها 7 سنين مو 7 شهور ...
قبل اسبوعين تقريبا رفعها من يدها وكسر يدها .... ياناس طفله عمرها 7 شهور ويدها مكسوره !!!!!!!!!!!
هذا شيء من فيض بالنسبه لمعاملته لأطفالي ...
بالنسبه لي وربي لي يمكن شهرين مقاطعته حتى بفراش الزوجيه صرت بارده معه ... ماعدت أتقبله .....
لاتقولو يمكن انتي ماتهتمين فيه .. لا وربي .. بس والله من اللي فيني ... رغم اني عندي طفلين بس وربي اللي يشوفني يحلف اني مو متزوجه بعد .. حلوه ورشيقه وطفوليه ومرحه وكل ماشافني احد حلف انه مافكر لحظه اني ممكن اكون متزوجه ... مابالكم بوجود طفلين .... وربي كل اللانجري حق لاسنزا ونعومي وغيرهم موجودين بخزانتي بس علشانه .... مايدخل مع باب البيت الا وريحة العطور في كل ركن وكل زاويه وابتسم له لو ايش مايكون فيني لأن دايما براسي انه يتعب ويهلك علشاننا بعمله فعلى الأقل أحاول انا اخفف عنه ..... بس النتيجه تطنيش ... قمت حقرته
تزوجت وانا عمري 17 سنه .. وعايشه بمرح وضحك لين الحين .. كل من شافني قال ماعندك هموم .. مادرو عني ... وربي اني اموت باليوم ألف مره بس ماأبين لأحد ....
الناس يمدحون فيني حلوه رقيقه ناعمه جسمك يجنن ومن هالكلام ... القهر هالكلام ماعمري سمعته من زوجي وهو زوجي وأولى انه هو يقول لي هالكلام !!!!!
جيته مره قلت له الناس يقولون لي كذا وكذا وكذا ليش انت ماتقول لي ؟؟؟ (هذا طبعا بعد ماتعبت من كثر ماألمح له شرايك وكيف شكلي كذا و و و و )
تخيلو وش قال .. وليته ماتكلم !!!!!
قال انتي عارفه هالشي ومغروره كفايه مايحتاج أنفخك أكثر !!!!!!!!!!!!!!!!!!!!!!!!!!!!!!!!!!!!!!
وربي اني انصدمت ..
حاولت اتفاهم معه بهدوء ان الأنثى تحب تسمع هالكلام لانه طبعها ... يطنشني
نفسي أسمع كلمه حلوه منه ...
نفسي يقول لي أحبك ...
يوم اقول له مااحسك تحبني .. يقول انا دايما اجيب لك واجيب لك ومانفسك بشي ....... حبه يترجمه بالأشياء اللي يجيبها لي !!!!!!!!!!!!!!!!!
قلت له ماابي هالأشياء ابي أسمع كلمة حلوه ... ابي لو شفتني لابسه شي حلو تمدحني تقول اي شي يفرحني .... وكالعاده ..... يرد .. مايحتاج اقول لك انتي عارفه !!!!!!!!!!!!!!!!!!!!!
جربت معه كل الأساليب .. التلميح .. التفاهم .. التطنيش .. المشاكل .. الزعل
مانفع معه شي ....
كنت ألمح له يدخل مواقع ع النت .. يطنش ومايهتم
في الأخير اعطيته هالموقع وطلبت منه يقرا هالمواضيع
تعرفون وش قرا ؟؟؟؟؟
قام يطبق العلاقات الزوجيه الحميمه بسسسسس
هذا اللي استفاده من الموقع !!!!!!!!!!!!!!!
مع العلم انه حتى بالعلاقه الحميمه فيه قسوه فظيعه ... احيانا اسكت عليه بس لأني اعرف ان هالشي يعجبه .. واحيانا اشتكي له ... لدرجة وصلت فيه انه حاول يسوي فعل حرام معي ... وقاومته بس بعد ماسبب لي الأذى فعلا .. ورحت لدكاتره علشان يعالجوني ... وطبعا هو خاف واعتذر ومررنا الموضوع وانتهى لأن المهم اني تمام وانه مايرجع لهالتصرفات بعد كذا ....
هالحين اللي زاد الطين بله .. صار يقول لي الله يشيلك عني !!! والله ياخذك !!! والله يفكني منك ويريحني !!! لأتفه الأسباب ... مع العلم ان هالكلام ممنوع بيننا .... مابيننا هالكلام وهالألفاظ !!!!!
امس قلت له ماما رجعت من السفر وابيك توديني أسلم عليها ... يقول مابوديك واتحداك تطلعين مع هالباب ... طبعا هو عارف اني لو اموت ماركبت مع سواق لأني اخاف ... فقلب السالفه تحدي ومذله !!!!!!!
مليون مره اقول له ياآدمي اذا ماتبيني رجعني للبيت اللي اخذتني منه وماعليك حسافه ... ويرفض ..
ماعدا مرتين رمى يمين الطلاق ... بس كان الموضوع بيننا ومادرى فيه احد حتى من اهلي واهله ... كان يروح يسأل شيوخ عن الوضع وهم يدلونه ... وقال له شيخ الطلقه الأخيره تصير طلقه بائنه يعني مافيه بعدها رجعه ....
وفي كلا المرتين ... تبون اصدمكم وش رجعني له ؟؟؟
انه يبكي !!!!!!!!!! ويحبني ومايتخيل حياته من غيري .... ( هذا كلامه طبعا )
امس حسيت خلاص ابي اطلب الطلاق ابي الفكه ... احس اني ضعت وضاع شبابي معه ... وربي حرام احس ان نفسي ماعادت تهون علي من كثر تجريحه لي وماعاد فيني صبر ... اللي كان مصبرني عليه حبي له ... وهالحين راح هالحب وراح معه الصبر وراح كل شي .....
بس اشوف هالطفلين وربي مايهونون علي يعيشون بين ام و اب منفصلين ... بنفس الوقت وضعنا في البيت مايشجع .. هو بعالم وانا بعالم ثاني ومابيننا الا مشاكل ومافيه اي دليل على ان بيننا فيه حب او حتى اهتمام ...........

وربي احس ان الدموع اللي تطلع من عيوني طالعه من قلبي ....
تعرفون يوم يقولون يبكي بدل الدموع دم !!!!!!!! واللي خلقني هذا اللي احسه
وماعدت ادري الغلط مني ولا منه !!!!!!!!!!!!
وضعي محيرني ومدري وشسوي !!!!!!!!!!!!!!!!!!!!!!!!!!!!!!
معقوله بقدر اكمل حياتي معه على هالحال ؟؟؟؟
آسفه على سوء التعبير .. وعلى الإطاله ولعلمكم هالاشياء اللي قلتها والله بعد محاولات للاختصار .. والخافي أعظم .. بس حسيت بموت لو مافضفضت وطلعت اللي بقلبي ..

م-سيف · 03-04-2009, 06:40

الله يعينك

الواحد من الممكن انه يتحمل سوء وغلظة الطرف الاخر .... ولكن لا يتحمل اي سوء يصيب اطفاله ....\

كيف بأب يفعل مايفعله زوجك بأبنائه !

ضرب !!

ويصل لكسر العظام !!

الله يعينك عليه ....

حياته العملية طغت عليه .... وقد يكون مشدود طول اليوم بسبب عمله وطموحه

جيبي شغاله ....

واصرفي قد المستطاع اطفالك عنه

انتي بقيلك طلقه واحده على كلامك ....

حاولي البعد ان اي شحن او نقاش .... مثله طايش ممكن يسويها ...

حاولي معه انه ياخذ اجازة ... وتسافرون سوا .... انتي واياه بس ....

يمكن يشوف الحياة بوجه آخر بعيد عن الضغوط العملية ....

الله يعينك

لـــمـــى · 03-04-2009, 06:53

اول شي شكرا على الرد والتفاعل ....
احنا من شهر رجعنا من سفر ...
وكان وضعه مااقول رائع ...
بس ماشي حاله ...
يعني الحد اللي ممكن اقتنع فيه واقول حياتي ماشيه ...
فكرة اني اسافر من غير اطفالي مستحيله ...
مقدر ابعد عنهم ...
مااتخيلهم بعيدين عني لحظه ...
بس رجعنا من السفر رجع لنفس الوضع ...
مع العلم انه حتى واحنا مسافرين كانت معاملته سيئه لولدي ...
لدرجة يوم عصبت عليه قال هذا ولدي وانا اربيه ... قلت له مثل ماهو ولدك ولدي انا بعد ماابيك تجننه ...
قام ومسك الولد ورفعه ورماه على الارض ...
وربي رماه على الارض !!!!!!!!!!
وضربه ضرب قسم بلله اني افك الولد منه بالقوه ........
بالنسبه للطلاق ... وربي اني بايعته بتراب ... ماابيه .... بس هو يسويها .... المشكله انه رافض وصاير حذر تماما ....
انا كل همي بنتي وولدي خايفه عليهم وربي ... ماابيهم يكبرون بهالجو ...
وبنفس الوقت ماابيهم يبعدون عني او أبعدهم عن أبوهم بانفصال ...
لأنهم بيكونون الضحايا بالأول والأخير

حبيبة ابنة · 03-04-2009, 06:56

الله ايعينك ويساعدك ويطعمك الي في بالكويهونها عليكي وعلى الجميع

موتي ولا دمعة أختي · 03-04-2009, 07:10

يا دافع البلى !!!

زوجكـ ( مريض نفسيا ) اسمحي لي أختي ...

في أحد تشيله إيده يضرب ( أطفاله ) !!!!! وهمـ بهالسن ؟!!!

الله يعينكـ وربي من قلب الله يعينكـ ... كيف متحمله ؟!!!

الحل - من زاوية تفكيري - :

- أولا تكوني صارمة معاه في قضية ضرب الأطفال ... بالكلامـ او بالفعل من خلال إشراكـ شخص من العائلة

أبوه أمه ... الجني الأزرق ... أي أحد

- ثانيا لازمـ تحطين النقاط عالحروف كفاية - تساهل - وتقبُّل لأنه الوضعـ خطير جدا على أطفالكـ نفسيا قبل

العامل الجسدي ...

- ثالثا الدعاء الدعاء الدعاء - التقرب إلى الله - وبعون الله تُفرجـ ...

واذا تطلقتي بعد ( خير ) ... بس هذا خليه آخر حلـ ... لانه بينكمـ اطفال ( مع اني ماني عارفة بصراحة

وين مصلحتهمـ ... بوجوده أو بعدمه ) ...

كل الود أختي ...

لـــمـــى · 03-04-2009, 07:38

شكرا موتي ولا دمعة اختي على المرور والتفاعل ..
وربي ماصبرني عليه في البدايه غير حبي له ....... أما هالحين اطفالي .....
ماابي أظلمهم ....
الطلاق مو شي سهل .............
لأن اولا أبغض شيء عند الله الطلاق
ثاني شي هو مو راضي يسويها ومهما أستفزه صار ماخذ حذره
ثالث شي اطفالي مثل ماقلت من قبل

والله اني لجأت لأمه مره حكيت لها على سالفة ضربه لولدي ..
طلع عندها علم لانه يوم ياخذ الولد ويجيهم يضربه قدامهم بعد !!!!!!!!!!!!
انا تهاوشت معه بهالنقطه بالذات وحاولت اتفاهم وكلمت أمه وهي كلمته وماقصرت والله ..
بس رده دايما مااحد له شغل ولدي وانا حر فيه !!!!!!!!!!
وصارت أمه بعد مثلي
اذا غلط ولدي من بين كل احفادها ماتخاصمه وماتزعله لو ايش مايسوي !!!!!!!!!!

وعموما هو تعامله مع الكل مو حلو ...
صار فظيع ومااحد متحمله حتى أهله !!!!!!!!!!!!

لـــمـــى · 03-04-2009, 07:41

شكرا حبيبة ابنة على الدعوه ,,,,,, الله يتقبلها منك ياااارب ,,,,,,, جزاك الله كل خير ,,,,,,,,,,,,,,,,,,,,,

strawberry23 · 03-04-2009, 07:49

اختي الله يعينك الصررراحه انا مصدومه يعني كل شئ في ناحيه ومسأله ضرب الولد بهي الشكل في ناحيه والله خايفه الولد تجيله حاله نفسيه ولا يتعقد قولولي للزوجك يتق الله في الولد لان عيالنا امانه عندنا
وربي قلبي معورني على الولد

::المهاجر:: · 03-04-2009, 08:00

الله يهدي هالزززوج

والله القصة تقطع القلب

اعانك الله اختي

اللي اقدر عليه اني ادعي لك

حبيبة ابنة · 03-04-2009, 09:56

على فكرة انا عندي تفسير لعمايل جوزك يمكن صح ويمكن غلط والله اعلم يمكن انوا زوجك بيغار من اطفالك مع انهم همة اطفالوا هوة كمان بس في ازلام ما بيحبوا اي حدا ايشاركهم في نسائهم عنجد.
والشغلة الثانية انا حابة اسالك كم سوال ويا ريت اتجاوبي عليهم:-
1-هل تزوجتوا عن حب؟
2-هل انجبتوا الاطفال بارادتكم انتوا الاثنين؟
3-هل بتعطي اولادك اهتمام اكثر من زوجك؟
4-هل زوجك بيغار عليكي من حكي الناس مثلا اذا اي حدا حكا عنك انك حلوة ؟
5-يوم اتكوني جالسة مع زوجك لحالم والاولاد نايمين كيف بيكون معك او كيف معاملتوا الك ؟

بتمنى انك اتجاوبي على الاسئلة وبصراحة .

وعلى شغلة الطلاق كما كتبولك الاخوة والاخوات الي قبلي فانا من جهتي بحكيلك انوا ابغض الحلال عند الله الطلاق .
وبما انوا هوة ما بدوا ايطلقك اعرفي اختي بانوا بيحبك ان شاء الله .
اعطي زوجك اهتمام اكثر من اطفالك بس انا ما بقصد انك لاسمح الله تهملي اطفالك انا بحكي في وجود جوزك ورجي كديش انتي مهتمة فيه وبتحبي.
وان شاء الله انكم بتتوفقوا انا رايحة اتابع قصتك واصل ارد عليكي باذن الله .
اختك في الله حبيبة ابنة

سلطان الفنان · 03-04-2009, 11:39

قريت موضوعك بصراحه ما اقول الا الله يكون بعونك ويصبرك يارب
عليك بالدعاء اولا فهي لجوء الى الخالق عزو وجل اعظم شي
ثانيا حاولي معاه بالطيب والحنيه وتقوليله كلام حلو وحركات حلوه ولا تيأسين
واذا جربتي من دون يأس كل شي واعطيتيه الكثير من الحب والاهتمام فما لك غير الطلاق
لكن انا اشوف من كلامك انك تبادلينه نفس معاملته وهذا اكبر غلط

اخفي غلاك · 03-04-2009, 12:39

والله يعيشون اليهال وانتو منفصلين اهون من هالجو اللي عايشينه بالعكس هالجو بيسبب عقده نفسيه لهم
وربي قلبي تقطع عليهم

ام ميدو اس · 03-04-2009, 13:03

لاحول ولاقوة الابالله الله يصبرك ويعينك على هالرجال قصتك موثره واللى اثرفيه اكثرهذول الاطفال وبلاخص الطفله الصغيره بللاه وش ذمبهم البزارين احس قلبى انفطرعليهم لدرجه اني دعيت عليه بكسريده مثل ماكسريدالطفله البريئه الظاهرزوجك حاجه من الاثنين ياعنده حاله اوعقده نفسيه اوانه موبصاحي الله يعينك ويصبرك واذاشفتي كل الطرق مافادت الجئي للقانون بس هذااخرشي واليوم الجمعه ادعي ان الله يهديه ويحنن قلبه عليك وعلى عياله اللى ذبحهم ضرب والله يصلح الشان ويهدي القلوب

ام ميدو اس · 03-04-2009, 13:10

لاحول ولاقوة الابالله الله يصبرك ويعينك على هالرجال قصتك موثره واللى اثرفيه اكثرهذول الاطفال وبلاخص الطفله الصغيره بللاه وش ذمبهم البزارين احس قلبى انفطرعليهم لدرجه اني دعيت عليه بكسريده مثل ماكسريدالطفله البريئه الظاهرزوجك حاجه من الاثنين ياعنده حاله اوعقده نفسيه اوانه موبصاحي الله يعينك ويصبرك واذاشفتي كل الطرق مافادت الجئي للقانون بس هذااخرشي واليوم الجمعه ادعي ان الله يهديه ويحنن قلبه عليك وعلى عياله اللى ذبحهم ضرب والله يصلح الشان ويهدي القلوب

ضحكتي دمعه · 03-04-2009, 15:51

اختي لمى الله يصبرك ويعينك
سبحان الله فيه جوانب بمشكلتك ووضعك تتشابه مع وضعي وحياتي مع زوجي الله يعيننا على مشاكل وبلاوي ذا الرجال
بس بغيت أسالك بالنسبه للضرب هل يضربك انتي زي مايضرب ولدك ؟؟؟يعني يده طويله وهل هو مزاجه عصبي بقوووووه لان فيه نوعيه من الناس اذا عصب او تضايق من شيء يحط الحره بأي احد ضعيف عنده
ولا ضربه لولدك نتيجه لعقده نفسيه يمكن هو كان ينضرب وهو صغير يمكن ابوه كان قاسي معه
انا ودي انك تحتوينه وتشوفين وش دوافع هالقسوه عنده ؟؟؟؟ اذا هو من النوع الي يستحي ويحسب حساب حق اهلك ليش ماتخلين حد من اهلك يلمح له على سالفه ضرب الاطفال ويقول مثلا البنت ليه يدها انكسرت طايحه من درج ولا مكان عالي ؟ واذا مافاد التلميح خل يجلسون معه جلسه حازمه مافيها مجاملات ( انا جربت تدخل الأهل بعد خمس سنوات من الصبر والتحمل دخلت ابوي بس وبالوقت المناسب جلس معاه والحمد لله الى حد ما تعدل زوجي )
خلي حد حكيم من اهلك يتكلم معاه
يايكون رجال و أب بحق وحقيقي ولا يخلي مسؤليته عنهم
وطمنيني عنك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

زوجـــي دمـــرنـــي نـــفـــســـيـــا و جـــســـديـــا !!!!!!!!!!!!!!!!