عالم الحياة الزوجية - منتدى

سندريلا حارتنا · 04-04-2009, 18:03

السلام عليكم الصراحه ما ادري من وين ابدا انا عاجزه عن الكلام حياتي ضاعت بسبت واحد اخذ مني كل شي وراح انا اكبر منه بسنتين الا المهم بديت معاه بوعد منه اذا كان يبي يتسلى او زواج فوعدني بالزواج تعرفت عليه بعد ما تخرجت من الثانوي وانا اللحين متخرجه من الجامعه من 4سنين ضحيت بكل شي عشانه وقفت معاه خليته يترك اصدقاء السوء وصار يصلي بفضل الله ثم انا كان انسان ضايع واللحين صار متزن لاني شجعته بعد ما تخرج من الثانوي جلس في البيت لانه ما يحب الدراسه انا الي شجعته على الوظيفه قلت له اذا ما تحب الدراسه اشتغل واشتغل مع انه هو اناني لاني اول ما تخرجت من الجامعه رفض اني اتوظف وانا من كثر ما كنت احبه سمعت كلامه واللحين اتالم انزف قهر لاني ماتوظفت ولا احد قبلني تأخرت المهم هو اشتغل وتعرف على ناس معروفين وصار شغله احسن من اول والكل يحسده عليه بفضلي انا بعد الله امه تدري انه يكلم وجاء وخطبني بس ابوه رفض وقال ماياخذ وحده يكلمها وللاسف بدل مايضحي بكل شي عشاني عشان كل وقفه وقفتها معاه واخلاصي له لاني ماتزوجت قطع في نصيبي ومستقبلي وصار مغرور عقب ما تطور شغله راح وبكل بساطه ينتهي كل شي لانه نذل وحقير وما يتساهل كل وقفه وقفتها عشانه طبعا مالي اسبوع كنت اتمنى انه يرجع او يتأسف بس باعني برخيص حتى يوم كلمت امه عشان ابي اعرف رده فعلها لامتني وقالت انا الي جبته لنفسي وولدها عايش حياته ومستانس حسبي الله عليه وين مايروح قلت لازم ابدا حياة جديده اضحك على نفسي وشلون ابدا وانا انتهيت انا مو متحسفه عليه انا صعبانه علي نفسي وما استاهل يصير فيني كذا غيرت رقمي احاول اوقف على رجلي من اول وجديد بس بعد فوات الاوان 9سنين اخذت مني كل شي والحين ادفع ثمنها

في الغابة البعيدة · 04-04-2009, 18:15

بالفعل اختي مشكلة كبيرة هادي بس لا عليك اختي ان الله يمهل ولا يهمل و ان شاء الله يكون الخير وتجدين ولد ناس وعمل ان شاء الله ولا تيئسي اختي

][*الحياة حلوة*][ · 04-04-2009, 18:23

عادي طيب مافي جديد كل الرجال اللي يخونون ويكلمون ويغازلون كذا ,,,,,,,

ليش زعلانه احمدي الله طلعتي من غير خسااااااائر أخرى تذكر’’’’

عيشي حياتك ومثل ماسحب عليك اسحبي عليه

من عافنا عفناه (لو) كان ((غالي))

الله يعينك على النسياااااااااان

موفقه اختي

ضيم السنين · 04-04-2009, 18:23

ماعليش يعني وش اللي رفض انتس تتوظفين؟

من بقية اهلتس يتحكم ويفرض رايه ولا وشو وش هالحب بالله اللي يخليه يعطيتس اراء تودي بستين دهيه

وش هالحب اللي مايحب لتس الخير

بالله من جدك انتي ؟

يقول لاتتوظفين وتمشين على كلامه؟

يعني له الدرجه ساذجه وماتعرفين انه مايحب لك الخير

وين عقلك

اللي راح راح مايمديك ترجعينه ولا تعدلين فيه شي

ولا تلومين عمرتس لانه مابيفيد ماغير يجيب الحسره والندم والقهر

اعتبريها محطه في حياتك تعلمتي منها وخذيتي درس

والتفتي لعمرتس وانتبهي لتفكيرتس لاتخلينه يسيطر عليتس

دوري لتس وظيفه دام معاتس شهاده اي شي تشغلين تفكيرتس عنه

وموفقه ان شاء الله

بخصوص زواجه منتس هو ماقصر جا وخطب بس ماعرف يقنع ابوه يمكن؟

ويمكن هالفتره يقنع ابوه فيها ويجون يخطبونتس دام امه موافقه

لاتتسرعين بالحكم

][*الحياة حلوة*][ · 04-04-2009, 18:27

اقتباس:

المشاركة الأصلية كتبت بواسطة ضيم السنين

ماعليش يعني وش اللي رفض انتس تتوظفين؟
من بقية اهلتس يتحكم ويفرض رايه ولا وشو وش هالحب بالله اللي يخليه يعطيتس اراء تودي بستين دهيه
وش هالحب اللي مايحب لتس الخير
بالله من جدك انتي ؟
يقول لاتتوظفين وتمشين على كلامه؟
يعني له الدرجه ساذجه وماتعرفين انه مايحب لك الخير
وين عقلك

8
8
لاتقلين كذا الحب مايعرف لو قال لها ارمي نفسك بالنار قالت تم اجل وشلون لاقالها لاتدرسين

هم البنات من ربي مايبووون الدراسة وشلون لاجات من اللي تحبه هههههه<<بتفرح اكيد خخخخ

الله يعينها بس

ضيم السنين · 04-04-2009, 18:47

اقتباس:

المشاركة الأصلية كتبت بواسطة 0حياتي كلهـ (لله) ـا0

8
8
لاتقلين كذا الحب مايعرف لو قال لها ارمي نفسك بالنار قالت تم اجل وشلون لاقالها لاتدرسين
هم البنات من ربي مايبووون الدراسة وشلون لاجات من اللي تحبه هههههه<<بتفرح اكيد خخخخ
الله يعينها بس

ياحياتي مو دراسه خلصت هي تقصد الوظيفه قالها لا تتوظفين يعني مستقبل

~ تَـــــــــرَف ~ · 04-04-2009, 20:49

الله يهون عليك واللي فات مات لاتفكرين فيه وانشغلي بأي شي

واعتبري هالموقف عظه وعبره لك ولغيرك

والله يسعدك ويوفقك اللهم اامين

سندريلا حارتنا · 04-04-2009, 21:57

هو كنه ماصدق راح بعد ما صار رجال شاف نفسه علي وباعني الي يحب ما يقول امي وابوي بس انا كنت حاسه انه طفش لدرجه انه كان يكلمني من غير نفس ومع غيري والله اعلم مين يجلس بالساعات انتظار يعني هو تركني وهو ما خسر شي بالعكس انا غيرته للافضل اما انا ما راح يجيني افضل من الي جو اخطبوني مع انهم احسن منه مليون مره بس انا ضحيت عشانه وبالاخير تركني بس وين يروح الله على الظالم وان شاء الله ربي راح ياخذ حقي منه كما تدين تدان ومشكورين حبايبي ماقصرتوا

قحطاااني ماااركه · 04-04-2009, 22:07

طبيعي جداً كل اللي صار لك هذا هو المتوقع !!
ليش يتزوجك وانتي عطيتيه كل اللي يبي اجل يزوجك ليه

انتي اللي حطيتي اصبعك بعينك وسمحتي لنفسك تتعرفي
على واحد ما يحل لك شرعا ً ودائما المعصية تذل صاحبها

وانتي الآن تسددين فواتير سنين الحب واللذه المحرمه

الله يجبر مصيبتك ويهون عليك ويرزقك الزوج الصالح

أجمل تحيــــــــــــــه

م-سيف · 04-04-2009, 22:07

الله يعينك ويصبرك

ماادري وش اقول .... تركتي كل الحياة ومباهجها وارتبطتي بشخص لاتوجد اي مقومات لبناء اسره معه

مشكلتك انك عاطفيه وكنتي تبحثين عن بيت واسره

واعطيتي عقلك وروحك له ... مع ان تكوين اسره معه ضرب من المستحيل

وهذه هي النتيجة .....

رحل .... وانتظري خبر زفافه عن قريب ..!!

على العموم

انتي تستطيعين انك تبنين نفسك من جديد .....

ابحثي عن وظيفة .... واجهي الحياة .... لاتزالين قويه ....واعلى كعب منه ....

والله يوفقك في حياتك الجديدة

لوعة الخاطر · 04-04-2009, 22:12

لاحول ولاقوة الا بالله .....

الي عليكي تسوينه هو ال Delet من بالج وتقطعين علاقتج فيه للابد وحمدلله انج عرفتيه على حقيقته قبل لايفوت الاوان

وتندمين بعدها انج لو أخذتيه وتصرف معاج بهالطريقة !!

وعسى ان لاتكرهوا شيئا وهو خير لكم ....والله دايما يكتب الصلاح والخير على عبيدة والله يستر عليج وتلقين

واحد أحسن منه بكل شيئ ويعوض صبرج خير ...

حبيبة ابنة · 04-04-2009, 22:19

الله يبعثلك الي احسن منوا يا رب

نجلاء22 · 04-04-2009, 22:28

هذه نهاية العلاقه المحرمه

الوضع عادي

ماشوف اي مشكله

نجلاء22 · 04-04-2009, 22:29

هذه نهاية العلاقه المحرمه
الوضع عادي
ماشوف اي مشكله

الهوى الباقي · 04-04-2009, 23:36

هاذي نهايه المغازل والخرابيط حقتكم التافهه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

ضاعت حياتي