شوفي بالنسبه لليوم اللي عند الأولى في البدايه كنت أحس بفراغ ووحده البيت فاضي ومافيه حس
واحياناً الشيطان يلعب فيك ان كنتي فاضيه واتصلتي عليه وما رد عليكي أو كان جواله مقفول إذا ماتعوذتي بالله وما اشغلتي نفسك راح تستقبلينه في يومك وانتي
لكن بعد شهرين من زواجي بديت أشغل نفسي ونسيت طاري الوحده تماماً ولا صرت أتصل عليه في يومها عشان ما اقهر نفسي وصار هو يتصل فيني يطمئن عليا ..


اهم شي انك تشغلي نفسك بأي شي فرضاً اعملي حلا .. اطبخي اي وجبه .. نظفي بيتك ورتبيه اغسل الملابس و اكويها.. .. جهزي ملابسك حق اليوم اللي بيجيكي فيه واتدربي تعملي مكياج مختلف واستشوري شعرك في يومها.. جهزي حركات حب ورومانسيه لزوجك اتفرجي تلفزيون .. كلمي اهلك وصاحباتك بالتيليفون .. نامي كويس نامي قد ما فيكي لأنك ضامنه انه ما راح يجيكي الا في اوقات معلومه.. أعملي حمام مغربي لنفسك وشيلي الشعر الزائد بالحلاوه .. اتعلمي على رقصه معينه روحي اتعرفي على جيرانك وزوريهم .. العبي بالكمبيوتر واتصفحي النت أقرأي كتاب اذا تحبي القراءه .. اذا ربي اكرمك ورزقك طفل عسول انشغلي فيه .. انشغلي في اي هوايه تحبينها.. واحياناً خليه يوديكي تشوفي اهلك .. لوتدورين لك وظيفه او تروحين معهد او تحفيظ قريبكم ترى افضل لك كثيير .. ولاتسمعين لوسواس الشيطان ابداً واذا حسيتي بأنك فقدتيه اشغلي نفسك بالصلاه واتعوذي من الشيطان وراح ترتاحي.. اهم شي بينيله شوقك بدون ما تحسسيه انك زعلانه من بعده عنك وانشغاله بالبيت الأول

بعد هذا كله صدقيني ما بتلاقين وقت فاضي عشان تحسين بالوحده وماراح تسألين فيه.. أصلاً ماعندك وقت والله انا مجربه هالشيء والحمد لله الحين مرتاحه ومريحاه معايا .. انا الحين ليا 8 شهور من زواجي وماعندي اطفال ولا حمل .. ادعيلي الله يرزقني الحمل لأني حاسه انه راح يشغلني اكثر ويملي عليا البيت وراح يعلق ابوه فينا اكثر...

شوفي اذا اتصلت الأولى عشان شي ضروري هو يرد عليها بعيد عني عشان مايجرح مشاعري وبعدها يعرف الظرف ويجي يستأذنني انه لازم يخرج وانا في البدايه.. اقوله والله لسه ما شفتك زي الناس ولاجلست معاك.. ومن جوايا اقول اكيد الأولى تلفق اعذار عشان تبغاه يجيها ويقطع يومي وتنكد عليا لكن بعدين اقول هوا وامانته.. خليه يروح برضاي احسن من انه يروح غصباً عني ويصير فيها زعل.. واقوله: روح ولا تتأخر أمانه.. واجلس استناه مغلوبه على امري.. وبصراحه انا اولاده بالذات ما ارضي عليهم ..ابرياء مالهم ذنب.. وأي شي يخص الأطفال اقوله روح عشان خاطر فلان كله يهون .. واسميهم ..عشان يعرف اني احب اولاده اللي هم احب الناس عنده..
لكن اذا كان الأمر موضروري مايقول شي ولا يجيها ويقول لي شي موضروري يروحلها بعدين لكن مو الحين - يعني يروح لها في يومي- لكن مو وقت اتصالها عشان مايزعلني وفي كل الحالات زوجي يستأذنني الله يحفظه ويخليه ليا..

ولازم انتي تصبري وتتغاضي عن حاجات كثيره وانتظري العوض في الدنيا بمحبته وفي الآخره بالأجر والثواب من الله

أهم شي لاتحققي معاه في كل روحه وكل رجعه .. وخليه يآخذ راحته.. لأنك راح تحسين اول مايطلع في يومك لو مع اصحابه انه رايحلها لكن هذا موصحيح هذا ظن سيء .. فشيلي الفكره هذي من بالك وخليه يروح لها في يومك بدون علمك احسن من انه يروح بعلمك.. وتزعلين..

هذا اللي عندي واتمنى العضوات العزيزات يساعدوكي..
اعتذر على الإطاله .. الله يوفقك ويوفقنا ويحبب ازواجنا لنا ياااارب