عالم الحياة الزوجية - منتدى

ثلاثيني ومنفصل · 20-04-2009, 05:00

يولد الادمي منا .. ويطلع على الدنيا .. بالنسبه للشباب تبدل طموحاته من سنه لسنه .. فمره وده يصير لاعب ومره وده يصير طيار ومره وده يصير مطرب ويمكن بيوم واحد يجي له اكثر من طموح ..

اما الفتيات ..
فالطموح يمر غالباً بمرحلتين المرحله الاولى انها تصير مدرسه .. وتبدا ترجمه ذلك الحلم في جدران الحوش والسطح ودفاترها والاب المسكين يشتري من هالدفاتر ولايدري وين تروح ( الاخت تخصص بعض الدفاتر لهذا الحلم ) .. ومن توصل البنت للمرحله الثانويه يتلاشى ذلك الحلم ويسنتر امامها حلم اخر من نوع اخر .. الا وهو حلم الزواج ..

ذلك الحلم الرائع العذب وتبدا في تشكيل صوره فارس الاحلام .. وهالفرس الابيض اللي اشغله الله في حلم كل بنت وهو مسنتر والفارس اللي لايشق له غبار .. وطبعا خشة هالفارس تتغير حسب المزاج والحاله النفسيه .. فمرات قد يتمثل بصوره ابن الجيران .. ومرات بصوره مطرب او ممثل او شخصيه مشهوره .. وعلى طاري عيال الجيران احسهم اكثر من انظلمو في الحب .. فمما نسمع ونرى نادره هي الزواجات بين ابناء الجيران وبنفس الوقت كثيره هي قصص العشق بين ابناء الجيران ..

يكتمل الحلم .. وبدون فرس ابيض فقد استبدل الفارس فرسه بالكامري او هوندا .. وربما لكزس او BMW طبعا فيه من الفتيات من تقيم فارسها حسب فرسه قصدي موتره ..

يسبق مرحله الزواج مرحله ( المخاض ) وهي فتره الخطوبه والملكه .. وفي مجتمعنا تختلف من منطقه لاخرى ومن عوائل لاخرى ايضاً ففيه بعض الاسر من يملكون والمعرس مقفي ومقبل عليهم وروحات وجيات وسعه صدر وفيه عوائل يكتفي بالرؤيه الشرعيه بس .. وفيه عوائل اكشط واربح .<<< يعني مش بوزك تشوفها قبل يوم العرس ولو طالبت بغير ذلك قالوا انقلع ماناقص الا هذي بعد ياقليل الحياء ياللي ماتستحي .. ( والمصيبه لاصارت امك بعد تررد نفس الكلام .. وش هالحتسي ياولدي هالطبايع ماهي بلنا ولا حنا من اهلها .. اقطع واخس ولايسمعك احد تفضحنا )

طبعا هالفئه الثالثه هي الاشد معاناه فهو مثل اللي مدخل يده في جحر ضب ( يمكن يدخلها ويطلع الضب ويمكن يكون داخل هالجحر عقرب مع الضب ) <<< صارت معنا ترا لاجينا نصيد ضبان .. وسوري على التشبيه ولكن هذا اللي حضرني الحين ومتعيجز لادور مثال ثاني .. المهم تبدا الطلبات تنهمر على هالفارس ويفكر الفارس في الحلول الماليه اللي ممكن تساعده على تلبيه مطالب زوجه المستقبل ( طبعا للاسف فيه من البنات اللي ودها تنتف عريسها تنتيف وكيف لا وهي اهم شي عندها صديقاتها نوره ولمى ونجود .. وش بيقولون عنها ووش راح يحكون وهي همها الاول ليست الحياه الزوجيه اللي مقبله عليها والشركه التي ستؤسسها مع هذا الزوج بقدر ماهو كيف بتكون طلتها وكشختها وكوشتها وشوشتها ) ..

تبدا مرحله الزواج .. وتبدا تنجلي الطباع في كل من الزوج والزوجه .. ويبدا التذمر .. طبعا الرجال بالاغلب هم الاقدر والاكثر حفاظا على خصوصيه علاقاتهم مع زوجاتهم .. واما الحريم فالعوابه يالله من فضلك مايحتاج ..
طبعا كلهن مظلومات ومسكينات ولا لهن حيله والزوج ( السعودي ) هو اللي ابد جاف ولايقدر ولاهوب رومنسي ولايفهم وحنان ومنان .. اما هن فكان من المفترض لو انولدن في ايرلندا ولا في لبنان لكي يرزقن بمن يعطيهن حقن من الدلال والرومنسيه ..

ومن الامثله الكثيره على عوابه الحريم ..
ذلك التجمع الدموي الذي يبدا كل ضحويه .. فالويل كل الويل لمن ستكون حديث هذا المجلس ..
تلقاهن يقطعن بنت الحلال ويشرشحنها ولا خلصن قالن ( الله ربنا وربها ..حنا وش نبي فيها ناخذ ذنوبها ) <<< بدري

ومدارس محو الاميه صارن يسجلن فيها ماهوب لطلب العلم قد ماهو بحث عن الجديد من السوالف ..
تجيك كل وحده معها ترامس قهوتها وصواني الحلا كنها رايحه تقهوي لها نفاس ماهيب رايحه تدرس ..
سبحان الله مدري ليه المرأه اكثر من الرجل اهتماما بسوالف الطلاق ونقلها والزياده عليها وربما التسبب بها ..
وهي اكثر انسانه تقلب الدنيا لاتطلقت ..

ومهما بلغت من العلم اوغيره فطبعها هو هو مايتغير مهما حصل ..

اتذكر طبيبه شعبيه اسمها ام عوض <<<<الاسم الحركي لام العبدالسلام ..
كانت الزحمه عندها بحكم اللي يجن يتطببن عندها ..
هذي في ولدها عظيم وهذي ولدها مسنن وهذي ولدها مدري وش فيه المهم شوي شوي صار ثلاث ارباع اللي يجن عشان السوالف والهذره .. وبالاخير تسببن علي الأستشاريه ام عوض وقفلت عيادتها بسببهن ..
ماعاد يقرن ببيوتهن كل يوم طاقات العبي وطيران لبيت ام عوض .. واشتكوا رجال هالحريم منها وبسبب هالشي قطعن رزقها ..

واما الرجال ففيه من مايملى عينه شي واللي يسمعه يقول الاخ مواليد ميلانو ولا بروكسل .. ومن شافه هو وخشته وفنيلته العلاق ..لعن ساعه جمعته هو وهيك اشكال بمجتمع واحد ..

الحين ياللي ماتستحي تقارن بنات هالارض بغيرهن من ممثلات ومذيعات ممن تعلم ونعلم انك لو خيرت بالارتباط فيهن وبين بنات وطنك لاخترت بنت الوطن .. مالت على هالخشه اللي ماحلاها ربي وتشرط وتطلب مواصفات تعجيزيه دون اي اعتبار لما لبنات ديرتك من مميزات وخصال نادر ماتلقاها بغيرها .. <<< ترا الزين غسال يدين يالحبيب

تبي تقولي انهن حنانان ولايعجبهن شي ولو تشوف الخير منك عمرها كله ويجي يوم ترفض لها طلب ( قالت ياويلي ماعمري شفت منه خير ) ..

وتبي تقولي انها تطلب وتصرف عشان تكشخ في عزيمه صديقتها فلانه ولا في زواج صديقتها فلانه .. وانت مالك من هالكشخه نصيب ..

وتبي تقولي انها شغاله في تنتيفك وتقصيص جناحك ولاتبي يجي معك ريال عشان ماتعرس عليها ..

وتبي تقولي ان رجلها ثقيله في زيارتكم لبيت اهلك .. وماتشوف الا غبرتها قدامك وعباتها تكفخ في زيارتكم لبيت اهلها ..

وتبي تقولي ان ابتسامتها من الاذن للاذن لاصار الضيف عندكم من اهلها .. ومبوزه ومبرطمه لاصار الضيف من اهلك ..

وتبي تقولي انها مستحيل تمدحك ابد سواء كنت تستاهل ولا ماتستاهل يعني في كلا الحالتين مذموم والعذر والله مابي الحريم يعطوني عين .. وتذمك عشان تطفي العيون <<<< والله من زين التفكير

وتبي تقولي انها أي كلمه تجيها من اهلك ولو كانت عاديه ( تجلس هي وابليس ويسوون ميتنق ( اجتماع ) عشان تحلل كل كلمه حسب مايراه ابليس الرجيم ) ..

هنا نقولك عزيزي الزوج ( تراك في جهاد واصبر وربي يعوضك الجنه ) ..

وان كان مافيك صبر .. فترا الشرع حلل لك اربع يعني ثلاث مقاعد شاغره في رحلتك الزوجيه ..
فبادر بتغطيه احد المقاعد ( درجه اولى ) وخل السياحيه للسياحيه ..
فبعض الزوجات لاتستقيم في تعاملها مع زوجها الا بعد الضــــره ..

.....

شي باط تسبدي وهو اتهام الرجل السعودي تحديدا .. بالبرود والجمود ..
اقول : ان السعودي تاج على روسكن مالت علي هالوجيه .. شفتوا لكم مسلسين تركي وصرتن كلكن لميس وعلى طاري لميس قبل كم سنه ايام ( زينب العسكري بعزها وايام ماكانت معشوقه الشيبان ) اتذكر كل من شبهت نفسها قالت ابد انا ( تسني زينب العسكري بس اني اصغر فم ) <<< يقالك مميزه

وهالسنه وسبحان الله تغيرت اشابهن كلهن وصارن كلهن يشبهن لميس ..

السعودي عز وفخر ومرجله وقبلها الدين ..
صح ان التنسيم واجد مرات .. والجلافه واحد وعلينا حركات مال امها داعي وحنا مبدعين فيها ولكن حالينا الله حتى مع الانتقادات والحرب الضروس التي تشن ضدنا يظل السعودي الملح والقبله ..
واللي يبي مهند المطار فاتح بابه وبدل المطار فيه اربعه ..
واللي مامعها تذكره نسوي لها قطيه ..

والأكيد انه ( السعودي لا وفــا وفا ولا صدق صدق ولا حب حب بكل مافيه وجا كله من اقصاه ولكن مالطيب نصيب بها الوقت ) ...

** الكلام اعلاه ليس معمم للجميع فهناك الحمد لله ممن هن وهم خارج هذا النطاق حفظهم الله ورعاهم وادام وجودهم في مجتمعنا ووفقه لما يحب ويرضى .. فنحن لسنا مجتمع ملائكي .. وعندما نكتب عن هؤلاء هو بهدف ان ينظر كل مقصر لنفسه ويحاول معالجه قصوره وهنا نصل لهدفنا ..

على الهامش
حاضر يادكتور ..

أيام الجامعه كان الدكتور الأمريكي " ماك نيل " ينادي على الأسماء كل يوم
وفي كل مرة ينادي على "قينس أقينس" ولا أحد يرد
كنت أقول لخالد بجنبي
وينه ذا قينس .. يا أخي يعجبوني اللي يطنـشون المحاضرات الأولى وما يحضرون
كان " قينس" بالنسبة لي أسطورة ، فمن خلال الأسم لا يمكن لأي أحد أن يحدد هويته
في الأسبوع الثاني أحضر الدكتور القائمة الجديدة بأسماء الطلاب
نادى عليهم جميعا بما فيهم " قينس أقينس " إلا أن أحدا لم يرد
صرخ الدكتور مرة أخرى بإسمه ، لم يرد أحد أيضا
ثم قال هل يعرفه أحد منكم ، أجاب البعض : لا ، وسكت الآخرون .
في اليوم التالي نادى الدكتور على الجميع بأسمائهم
طبعا لم يحضر " قينس"
ثم أعاد الدكتور المناداة على الجميع ولكن هذه المرة بالرقم الجامعي
وحينما وصل إلى رقم معين : أجاب أحد الطلبة : yes .
صمت الدكتور قليلا ، ثم أعاد النظر إلى القائمة أمامة وصرخ : أنت " قينس اقينس "
فرد الطالب : no
أعاد الدكتور الرقم الجامعي ، فقال الطالب : yes
قال له مرة أخرى بعصبية شديدة : أنت " قينس أقينس " ؟؟!!
قال الطالب : no
سأله الدكتور : what is your name
أجاب الطالب بلهجة بدوية عميقة : قرنااااااس القرناااااس
حينها تبادلنا نظرات الدهشة أنا وخالد ، ثم انفجرنا ضاحكين

لحظة عشق · 20-04-2009, 06:36

انامالي فالكلام كله انا بس ابغى اكون اول وحده تاخذ القطيه..(كم توصل تقريبا)...

ضاق صدري · 20-04-2009, 08:00

اهلا ياثلاثينو
الله يسلم ايديك على هالكلام وخاصه لانك
احيانا تكون مؤيد وبقوه للمراه وواقف معها وفجاه تتغير وتصير مناصرللرجل يعني ماتزعل احد
ايه نعم انا معك انه في رجال يسوون الف مهند لكن يكابروافي انهم يظهروا رومانستهم وحنانهم مثله واساسا ماانعشق مهند من قبل بنات الخليج الا من رومانسيته وولعه على نور مش عشان شكله
وبعدين ليه تقلب علينا المواجع وتذكرنا باللي مضى وايام الحب البرئ بس انا صراحه ماكان ابن الجيران لكن وانا صغيره يعني سادس ابتدائي تقريبا نص شباب عيلتا كانوا يحبوني ومسويين قبضايات قدامي >>>>ياااي على ذيك الايام كان الحب طاهر
يعطيك الف عافيه على هالاسلوب الممتع
وزين اني لحقت ارد عليك قبل الاعضاء لانه ماشاء الله مواضيعك ما الحق ارد من كثر الردوود
واكتفي بالقراءه
تحياتي

ثلاثيني ومنفصل · 20-04-2009, 08:35

اقتباس:

المشاركة الأصلية كتبت بواسطة لحظة عشق

انامالي فالكلام كله انا بس ابغى اكون اول وحده تاخذ القطيه..(كم توصل تقريبا)...

ابد تولمي ..شرهتك على اللي بيقول ليه ..

ثلاثيني ومنفصل · 20-04-2009, 08:43

اقتباس:

المشاركة الأصلية كتبت بواسطة ضاق صدري

اهلا ياثلاثينو
الله يسلم ايديك على هالكلام وخاصه لانك
احيانا تكون مؤيد وبقوه للمراه وواقف معها وفجاه تتغير وتصير مناصرللرجل يعني ماتزعل احد
ايه نعم انا معك انه في رجال يسوون الف مهند لكن يكابروافي انهم يظهروا رومانستهم وحنانهم مثله واساسا ماانعشق مهند من قبل بنات الخليج الا من رومانسيته وولعه على نور مش عشان شكله
وبعدين ليه تقلب علينا المواجع وتذكرنا باللي مضى وايام الحب البرئ بس انا صراحه ماكان ابن الجيران لكن وانا صغيره يعني سادس ابتدائي تقريبا نص شباب عيلتا كانوا يحبوني ومسويين قبضايات قدامي >>>>ياااي على ذيك الايام كان الحب طاهر
يعطيك الف عافيه على هالاسلوب الممتع
وزين اني لحقت ارد عليك قبل الاعضاء لانه ماشاء الله مواضيعك ما الحق ارد من كثر الردوود
واكتفي بالقراءه
تحياتي

الله يحييك ويبعد عنك كل ضيق .. والله كتبت رغم اني مقرر معاد اكتب لان عن الرجال ولا عن الحريم .. عندنا ناس نفسيات اللهم ياكافي .. وإرضاء الناس غايه لاتدرك .. والرجال ابوهم للجنه شرنا من الحريم مايعجبهن شي .. ودايم معارضات ويوم كتبت بجامه قطن صارن كلهن واللي هن يعرفن راعيات صوالين وعنايه بالبشره ودورات تجميل <<<<<علينا يامناحي .. والله لو ابحلف ان بعضهن تكتب ردها وبجامتها القطن عليها .. وشوشتها طايره ..

لكن نقول ماعليه نصبر والاجر على الله .. دمتي بخير ..

مكحله عيني بزوجي · 20-04-2009, 12:14

كلام جميل واسلوب اروع بس حلوه اكشط وربح ههههههههه

وردمدني · 20-04-2009, 14:28

ياسلاااااااااام موضوع جديد للرفع
سأشمر عن ساعدي __أب
لا من جد موضوعك حلوبس كررت بعض التفاصيل اللي جلطت بعض المشاركين واعجبتني عبارتك يوم تقول بعضهن مسوين اصحاب صوالين وعناية وهم يردون ولابسين بجامة والشوشة طايرة كأنك تشوفهن

على فكرةالبنات اللي عاجبهن مهنداكثرهن مراهقات اماالشباب اللي (حبو)لميس اكثرهم ثلاثينين واربعينين مراهقين على كبر

اولاوأخيرا السعودي رجل بمعنى الكلمةو لايعرف قدره سوى المرأةالسعودية التي جمعت الدين والخلق والوعي وهذه فئةكبيره من المجتمع لانراهابكثرةلان مجتمعنابطبعه انتقادى ويرى العيوب قبل المميزات فتحوعيونكم وتشوفون ماأكثرهم

يعطيك الف عافيةثلاثيني مواضيعك هادفةوعناوينهاجداجذابة كالعادة دمت مبدعا

روانـ · 20-04-2009, 15:29

تلقاهن يقطعن بنت الحلال ويشرشحنها ولا خلصن قالن ( الله ربنا وربها ..حنا وش نبي فيها ناخذ ذنوبها ) <<< بدري

عاد ذي الجمله اموت اعرف من قلك عليها نسائيه بحته خخخخخخخخخخ

موضوع رائع مجهود اروع ثلاثيني

هاه خفت احلامك انك ملك ؟؟

ضــي شاعـرهــا · 20-04-2009, 17:21

لي عوده مريت مرور الكرااام

نجديه والهوى شرقي · 20-04-2009, 18:35

خشة فارس الاحلام تتغير صح صدقت كل مره بس كلهم من الممثلين والمطربين ماكد صار مره من عيال الجيران مادري تكبر اذكر ولد لجيرانا كل يوم يطير الحمام بالقوايل فوق خزان بيتهم بالسطح وخشته سودا من الشمس وكل شوي يفتح كشرته لويسمع صوتي كان قلتله انزل يابن الحلال لاتطيح وتتكسرعظامك. واتفق معك ان الرجل السعودي اذا حب يعطي قلبه بس متى وشلون !!!!! اما هالمهند كل ماشفته ذكرت اللي يمشي على الجدار مادري لو اني متابعه المسلسل يمكن استخفيت ولد عمه تاركان احلى
قرناس القرناس ثلاث ايام ماحس هههههههه سلمت اناملك على ماكتبت وروحك الفكاهيه

الرومانسيه العربيه · 20-04-2009, 18:55

يا مرحبا ويا أهلا وسهلا فيك ثلاثيني
ماذا أقول أو ماذا أكتب !!
يعطيك ألف عافيه .
تصدق ذكرتني بالكاتب الكاريكاتيور
المتميز محمد الخنيفر ..
أبدعت ثلاثيني ومن تألق إلى تألق ..
أنا من أشد المعجبين بكتاباتك .
تحياتي

ام دينا · 20-04-2009, 19:03

والله انك فنان

تقل قاعد مع الحريم يوم انك عارف سالفتهم

بس الصدق الصدق انا ماسوي من هالشيات الا شي واحد حق روحة اهلي وروحة اهله >>>الكذب خيبه مالي خلق اروح لأهله مع انهم مرره حبوبين بس محب اروح...

تشكررررررات على هالحكي الواقعي 100%

يخسى مهند والله ما يجي ولا ظفر نص سعودي وشو هو عشان يتقارن بشبابنا ..

أنثى حكيمة · 20-04-2009, 22:26

موضــــــــــــــــوع رائـــــــــــــع وممتع ولا يمل من قراءته

والأروع دقتك في شرح التفاصيل بواقعيه كأنك عايش في كل بيت
عجبني وصفك لبعض النساء وهن يكتبن ردهن وشوشتهن
طايرة

على العموم زي ما أنت قلت للحريم ولا الرجال واحد

بس ما فيه مثيل لرجالنا على وجه الأرض

شقاوةأمرأة · 20-04-2009, 23:31

يسلم قلبك بس والله تزررت عيوني موضوعك طووووووووووووووووووووووووووووووويل

booooon · 20-04-2009, 23:44

يعطيك العافية

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

ثلاث حبات خال حول مبسمها .. والمنهل العذب تكثر حوله الزحمه