الكلام موجه للجميع على وجه العموم ...
تخيلو معاي انك بيوم من الايام كنت طاير من الفرحه بعد حزن طويــــل جاك خبر انه انت تحمل في احشائك جنين روح حيه عايشه بداخلك .. تخيلو المشاعر الي راح تحملونها للشي هذا .. تبدون تخافون على نفسكم وصحتكم .. وكل شوي تشوفون نفسكم بالمرايه .. تتخيلون هذا الولد او البنت شنو بيكون .. وتتمنى له مستقبل دراسي كبير وحافل بالنجاحات .. وتبدي تعيش مع نفسك بعالم الخيال الي ياخذك لبعيد بعالم انت بنيته لنفسك وللروح الصغيره الي ساكنتك ... تخيلو مع الايام الالم الي تحسون فييه من الاوجاع الكبيره الي تجيكم والالم الليل الي ينسيكم الرقــاد ... وكل هذا وهم تصبرون "يالله على هالمقدره العظيمه على الصبر" مع كل الاوجاع والالام .. تحسون هالشي عسل على قلبكم ... لأنها احساس وهبه من الله ...
وبعد فتره تتغير ملامحكم ووتغير النفسيه وتصير من اسوأ لأسوأ كل هذا بسبة هالروح الي ساكنه فيكم... تخيلو معاي انكم مو ملك لأنفسكم لأ ,,, انتو هني عشان تجي الروح هذه العطيه "الهديه" الي الله جابها لكم ...
وبعد فتره يجي وقت انه الروح هذه تطلع على الدنيا بعد فترة 9 شهور من التعب وبكل صدر رحب تنسون الم كل شي من تشوفون الجنين هذا ... النعمه الي الله عطانا اياها .. الهديه الي احنا مكلفين بالحفاظ عليها
ومع اول صرخه تسمعها من الروح هذه ينخطف عقلك وقلبك ... ومع الايام تحس انه روحك اهيا الي انقسمت وانك الحين عايش بروح وحده بجسدين ... ويكبر الجنين ويكبر ويكبر ويكبر لين صار شاب او بنت كبار .. تخيل مقدار الخوف الي تخافه عليهم .. والقلق والحيره .. وماتدري وش تسوي عشان تواكب هالشي ...
وفجأه بيوم من الايام البنت او الشاب .. يبدى يطفش من تصرفات امه وخوفها عليه ... ومع الوقت يبدى يتمادى .. ويطول لسانه .. ومع الايام مالقى من يردعه عن هالشي يتطاول اكثر ويمد ايده عليها .. يبكيها ينزل دمعة قهر من عينها .. واهيا مع كل هذا تدعي له ... تدعي له بالهداوه وراحت البال... تدعيله من قلبها بكل صلاة ان الله يرده لعقله ... لكن تخيلوا شنو الي بيكون صار للروح هذه صار "عـــاق" والكل يعرف شنو العقوق بالوالدين .. وبعد كذا بكم سنه وانت تايه عنها ماتدري عن امك واهيا للحينها تدعيلك وماقدرت تكرهك .. يجيك يوم وتفقدها ,,, تدخل البيت فاظي ,,, بارد ,,, تحس انك تايه ماتدري وين الله قاطك ,,
تناظر بالتلفون ماتشوف احد يتصل يسأل ويخاف عليك من غير سبب بس عشانك ,,, تحس بوحشه ,,, الم ,,, ضياع ,, تقعد بزاويه لحالك وسط الظلام تبكي حرقه ,,, تتمنى يرجع اليوم الي تماديت فيه عليها ,, وتتمنى انه ايدك تنقطع بدال ما تنمد عليها ,,, تتمنى ترجع وتشوفها ولو للحظه وتطلب منها الرضا والسماح ....
ليش نعامل امهاتنا بجفا ... رساله لكل شخص قرا موضوعي ... رساله لكل عضو وعضوه هني بالمنتدى ...
الام ثم الام ثم الام ... كان احد الصحابه اذا يدخل على البنت ينزل على رجول امه يبوسها .. واحنا الحين انتعاجز حتى بالاتصال عليها او السؤال عنها ...
مابقى شي للكلام اكثر الموضوع انتهى وليتني اكون وصلت فكرتي