تكلمنا في المرات الماضيه عن تقصير بعض الزوجات ومشاهد وتصورات زعلت ناس ولاعجبت ناس وكاني جايب هالكلام من بطني .. وطلع 90% من المشتركات يروحن نوادي صحيه هن وجاراتهن وبنات خالاتهن وعماتهن ولايعرفن وش معنى بجامه القطن والديرم لدرجه بعضن مالقت المعنى الا بقوقل من كثر ماهي تجهل بها الامور ..
نقول ارفقوا علينا شوي وتراني قررت إني اكتب لي مويضيع يكون خالي من الذب .... بعدين يابنات ترا مالنا لايم حتى بالتلفزيون مانشوف العنصر النسائي ابد و العنصر النسائي الوحيد اللي نشوفه في المسلسلات هو ( عبدالله المزيني ) ، ومن تالي طلعت لطيفه .. يعني بالله شلون تبونا نفكر ونحكم وهذي العينات اللي حنا نشوفها ..
بما اننا مقبلين على موسم التزاوج اغلب الشباب هالوقت يملي الشروط على امه ولا اخته .. فيه من يقول ابي وحدة حلــوة بس تكون مررررة بيضــاء وابي وحدة شعرها طويــل وابي وحدة نحيــفه وابي وحدة متعلــمه والا موظـــفه...
طيب يا اخــي فيه من تكون بيضاء وشيــنه <<<<< مع احــترامي للبيــض
وفيه من تكون سمــراء وجــذاااابه وماشـي سوقـها
فيه من شعرها طوييييييييييل >>>>>> يسحب ويكنس
بس مو حلو كله ع بعضه وصلتين<<<< يعني قليل ولاهوب كثيف وفيه من الي شعرها قصير وكثيف ووش حلاته
وفيه المتعلمه بس لسانها هالطول.... وفيه اللي ماتعلمت وكلها قطعه عسل
و الموظفه يمكن ماتخرج منها ولابريال .. وفيه العاطله اللي من تاخذها يفتح ربي بوجهك ابواب الرزق
ماهي زينة هالتشرطات الي هابين فيها الشباب .. فالفتاه السعوديه قدرها اكبر من شروط والظفر بها امنيه لدى كثيرين .. مغير حنا اللي تفكيرنا مدري كيف صاير .. يجيك الاخ متسدح بالصاله وفيه الا قوه روتانا كليب وهات يالمقارنات اللي مدري وش تبي .. ولو بنيت هالمقارنات على افتراضات صحيحه ومنطقيه فمن شاهدهن مايساون ظفر سعوديه ..
مشكله هالوقت وخاصه من الشباب المقبلين على الزواج .. وامهاتهم تحسه وكانه يبي يروح لمعارض النسيم والا الشفاء ماهوب بيروح يخطب .. تجيك امه وبدون اي مقدمات تدق على الناس ودي اسير عليكم اليوم ابشوف بناتكم فلانه وفلانه وفلانه ابخطب لولدي محمد << يا حلالاه وطيه صابرك انتي وولدك محمد ..
زين اللي ماتقول بعد ودي أشوف استمارات البنات ومفحوصات ومجددات ولا لا .. ثم تجيك عاد عقب عصريه ويقالك كاشخه الحين نعنبو بليس عمركم شفتوا تنوره صفراء منقطة بأحمر .. وكانها هي اللي متفضله على الناس انها تبي تخطب منهم .. لابوك لابو ولدك معك .. والام المسكينه تبي تزوج بناتها وتبي لهم الاستقرار والستر .. طبعا عندنا وبنجد خاصه .. البدو الخطبه عندهم عن طريق الرجال .. والحضر عن طريق الحريم .. يعني عند البدو ابوك ماعليه من اي مواصفات وساحب السيفون على اي مميزات اهم شي ابوها والسيره الذاتيه وهل هو رجال كفو وفيه خير ولا رخمه مافيه خير .. والله يعين اللي ابوها رخمه ولو انه هالوقت راحت هالامور وكلن قيمته برياله وياكثر الرخوم اللي كلن يدور بناتهم .. واما الحضر فغالبا عن طريق الحريم لذلك لاشفتوا حريم بصاله عرس مبققه عيونها اعرفوا انها حضريه وولدها شاب عليها يبي يعرس .. وبعد ماتقز لها كم وحده تاخذ الاسامي والجوالات والعناوين عشان تخطب ..
اتذكر احد الاصدقاء ( اللي خطبهن يجي 200 حرمه ) من زود الفضاوه هو وابوه لو طالعين لبقاله تشاوروا وش رايك نمر بيت ابو فلان نخطب لك .؟ .. قال الولد قدام يبه .. ولو راجعين من المسجد بعد ماعندهم اي مشكله . المهم يقولي في احد الايام رحت مع ابوي نبي نخطب وحده من بنات احد الاسر الكريمه المهم دخلنا ولقينا ابوها متسلقي فالمجلس … سلمنا وعرفنا بانفسنا … وهو على اتسلقايه … يقول قال ابوي : حنـآ جايين نبي بنتك .. قال الساعه المباركه … و بدون مقدمات ترى المهر 100الف ريال من غير الشبكه … قلنا دور غير هالكلام … قال سقها .. ركبنا السياره ولحقنا وقال علشانكم 85 ألف من غير الشبكه هاه وش قلتوا ….قلنا الله يرزقها … قال طيب بـ 50 ألف وبدون شبكه .. والله ما اسفطها لغيرك بهاالقيمه حول وخذها معك هالحيين يقول وانا قاعدن جنب ابوي الا اسمع صوت وحدتن بالحوش تكلم اخوانها الصغار ..يقول انا بس سمعت الصوت قمزت وهزيت كتف بالهواء ( واقول بنفسي هذي هي ) الا ابوي يدبجني بظهري يقول اركد يالثور .. من هالحين مدردب .. وهالحين عايش هالصديق بسبات ونبات ومخلفين صبيان وبنات .. الله يوفقهم
الشاهد في الموضوع ..
ندري وتدرون ان مثل هالمهر يمكن ياخذ الواحد فيه ثلاث مقاعد درجه اولى ( زوجات ) من اي بلد اخر .. والمقعد الرابع يقعد يركب فيه وينزل لين ينهد حيله .. ولكنه يدفع عند الزواج بسعوديه وبطيب خاطر <<< ماهوب دايم بطيب خاطر ولكن الاغلب انه بطيب خاطر ..
هل هي تسعيره بالتأكيد لا .. وش السبب ياترى وش سبب تميز السعوديه عن غيرها ..
للسعوديه لبى والله معاليق قلبها مميزات نادره الوجود بغيرها ..
كيف لا وقد قيل في السعوديات ..

بنـت الوطـن ياضعيـف الـرأي مـذكـوره
بالخيـر والطـيـب مـذكـوره سنافـيـه
مــن أول الـوقـت يالمسكـيـن مشـهـوره
بالفكر وأحلـى التواصيـف النسائيـه
بنـت الوطـن ياقصيـر الشـوف معمـوره
بالعـطـف واللـيـن وتـزيــده بحـنـيـه
إن كـان بالكـون قـالـوا عيـنـه وحــوره
بنت الوطن من عظيم الشان حوريه
بنت الوطن من جمـال الخلـق مستـوره
الطبـع هــادي ووقــت الـجـد جـديّـه
ممـكـن تـقـوّم بـوجـه المعـتـدي ثـــوره
والأصــل تكوينـهـا ثـابـت حـيـاويـه


<<<صورة شنب بدر صفوق يتحرك كنه ثيل ومغطي الفم ويقول فالك البيرق ..
ان قلنا سنع فهي سنعه .. وان قلنا الاخلاق اثاريها واجد وان قلنا التربيه اثاري ماعليها كلام يعني مافيها قصور والكامل وجه الله حتى لو كان الزين نسبي اثاري الاخلاق واجد وشي يكمل للاخر .. ولافيه مثلها بصبرها وتحملها .. فالزوج مطاع ومقدس ولو ذاقت الويل تحملت وصبرت فتلقاها رغم جلافة الزوج وقسوته تكابد تربيه العيال وتدريسهم وقايمه ببيتها وشئونه .. في العام الماضي كنت بمهمه رسميه خارج المملكه وانعززمت بمناسبه على شرف الوفد الزائر .. احد موظفي البلد المضيف ( مانيب قايل اسمها لايجي بعد يقول كيف تقول كذا عن بلدنا ) ، المهم طبعا كانوا الحضور مع عوائلهم مغير حنا اللي سملق لحالنا ، وانا عاد مشخص بذيك البدله والكرفته طالعتن علي ذيك البدله بقيمه انتدابي 5 مرات الله لايخسر .. الزبده الرجال خذاني على جنب يقالك يبي يعرفني باهله وانا اللي اتنحنح طبعن ( النحنحه في مجتمعنا السعودي الغرض منها تنبيه المرأه الي وجود ذكر في الجوار ) وداني الرجال يبي يعرفني على زوجته والحق ينقال محتشمه بالفستان اللي لابسته و بالأمانه فستانها كان مسبل بس عيبه إن فتحة الفستان من الرجل للحووووووض الأيمن .. في لحظتها سهيت وسجيت كم من السعوديات احلى بمليون مره من هالمرأه وأبهى .. ولماذا يقارن البعض السعوديات بهؤلاء .. اكتشتفت لحظتها ان عندنا بالسعوديه كنز اسمه ( المرأه ) بعفتها ولباسها وحشمتها .. وحشمتها هي اللي حلتها وزادت غلاها .. وقبل هذا كله دينها ..
بعض الرجال للاسف هنا يذمون في النساء ولا يملى عينهم شي ( البته ) ولو طالعنا في هاللي اسمه ومحسوب رجال لقيناه لاشغل ولامشغله, أبوه يكد عليه ونوم الى الظهر ، ثمن يقوم يتزبرق ويتسنع , ودوجه بالاسواق ومطامر ورى هالبنات إلى العشاء , ثم يكملها بشقه واحدن من الشباب اللي بدال ماتزور المقبره عشان تتذكر الموت ومصايب الدنيا.. تزورها ويمكن أجرك أزود .. والا راح لهم بالاستراحة إلى أنصاص الليول <<< فارقني هالزول اللي ماحلاه ربي ..
والمسكينه بانتظاره ولا لها سلطه تحاسبه ولا تهاوشه .. هو الوحيد اللي يامر ويهاوش وهي امرها لله وتكسر قعوها عشانه وهي سهرانه تنتظره ولا درى ولا طق لها خبر
لا ومن زين الطبايع طاروا بالعجه العام يوم قالوا اننا طلعنا بالمرتبه الرابعه عالميا بالكشخه .. وادهرت الايميلات تناقل هالخبر اللي مدري وش يبي ..
اي كشخه يرحم والديكم الكشخه غالبا تركب على الاجسام المتناسقه .. وهذا يتطلب اكل صحي ونوم مبكر ومحافظة على الرياضة وربعنا ما يتقضون الا من الهرم ويسهرون الى الفجر ورياضتهم البلوت .. من وين كشخه يابو كشخه ؟