عالم الحياة الزوجية - منتدى

نواااره2009 · 14-05-2009, 04:10

السلام عليكم......
آااااااه من الناس الظالمه...أنا تقريبا بكمل 3شهور عند أهلي وزوجي لا حس ولا خبر لا طلق ولا فكر يسأل وانا كل يوم أقول أجيب عفشي يكفي اهانات ويوم اقول يمكن أستعجل واندم ويوم أقول وجود عفشي ماراح يغير شي بقراره سواء طلاق او الصلح...
قبل يومين أمه توصل كلام مع وحده إنها أخذت مفرش السرير اللي انا شاريته وتصدقت فيه على وحده ماتدري ان الله طيب لا يقبل إلا الطيب وهذا مومالها يعني لغيرها...أنا أذكر مره سألتني تبغينه؟ ضحكت قلت أكيد غاااالي علي قالت بكم ضحكت قلت 900ريال بس موعشان سعره ذكريات أول مفرش ينحط على السرير....وتسكر الموضوع ....أنا أصلا مواللي زعلني إني ابغاه انا لوبشوفه بولع فيه...أنا اللي قاهرني اسلوبها؟؟؟تبيني أجي آخذ عفشي....صحيح ياكبر الألم يوم تتعامل مع صغار النفوس...
قبل البارح أبوي قال خلاص روحي جيبي عفشك يمكن يرسل ورقتك وتفتكين..الصباح الوالد دق على أبوزوجي قال نواره بتجي تاخذ ملابسها قال لا يمكن ولدي مقفل غرفته وهي كيف تجي الحين وحنا في الدوامات((يبيني أجي أحب روسهم)))سمعت ابوي يقول كلها ملابس وأهلك فالبيت (أم زوجي) وخلها تفتح لهم الباب واذا بغت شي تاخذه لومن ملابسها أبد اللي ماتبون نواره تاخذه موطالع من بيتكم.. (((والله وانا عنده مايقفلها حتى اذا بغا يسافر وانا عند اهلي مايقفلها ..واذكر مره قلت له قفل الغرفه وعصب كأنه يقول وش قصدك أهلي مايدخلونها))))....طبعا أبوه قال دقو عليه وعطوه خبر ...والوالد دق على زوجي مرتين ولا رد... وبعدين دق على ابوه وحصله مشغول(((طبعا مافيها كلام ياخذون الإذن من أم زوجي))) وبعد شوي أعاد الإتصال على زوجي .......ورد طبعا أبوي ألقى السلام وقال كيف الحال الغرفه مفتوحه نواره بتجي تاخذ ملابسها قال إيه مفتوحه ((يقول أبوي إنه يوم رد قال هلا أبو فلان يعني ابوي...يعني ماقال ياعمي))
المهم رحت انا والوالده والخدامه...وابوي عصب وحط الحره والزعل فيني لأنه مقهووور منهم يقول ماقصرنا معهم ليش كذا على الأقل الإحترام؟؟؟؟....وعاد تخيلو الضغط النفسي اللي انا فيه كلام يعذب وابوي وجهه صاير اسود وانا لاحول ولا قوة لي ...والجو حار وصلنا على الظهر ويوم دخلنا ...أمه واقفه بجبروت وبكبر مريت انا والشغاله من عندها وطلعنا فوق((ولا احد يقول ليش ماسلمتي غير ان ولدها يوم جانا ماسلم على ابوي ورافع صوته واقسم بالله ابوي ماعمره قابله الا بكل طيب ونضيفه احسن ضيافه غير كذا امه هي السبب تقريبا بكل اللي انا فيه انا بتطلق وكل تبعات الطلاق بسببها كل دمعه كل هم كل جرح هي المسؤوله)) يوم دخلت جناحي بحط أغراضي الا هي واقفه على راسي وأمي ياحليلها قاعده تغمز لي وتهمس(سلمي سلمي) وأطنش ...كيف أسلم وانا قاعده أجمع ملابسي وأغراضي وبتطلق كيف ياعالم أسلم؟؟؟....طبعا اللي إستغربته إن عطوراتي حاطين عليها منشفه وكلها غبار شكلهم مغطينها من يوم رحت وفيه دولاب مشترك يعني طبق فيه ملابس خاصه لي والطبق الثاني فيه ملابس زوجي تخيلو مغطين ملابسي بطريقه غريبه لافين عليها شرشف صلاه عشان إذا فتح ولدها الدولاب مايشتاق ويجيبني وتعالو شوفو نظراتها لي يوم فتحت الدولاب مستانسه وتناظرني تراقب ردة فعلي يوم شفتهم مغطينها وكله كوووووم ووقفتها على راسي كوم ..حاطه يدها على خصرها وتهز وابتسامه سخريه وتناظر لكل قطعه نحطها في الشنطه شافت كل شي ...طيب لو إبتعدت شوي كان أهون...طيب ملابس بنت يعني إيش؟؟؟ شافت ملابسي الخاصه قسم بالله حسيت بالموت...لوجلست على كرسي وجلست تراقبني أهون من وقفتها ياناس قسم بالله شعور يموت والله والله والله مهما كتب لي الله عمر مستحيل انسى وقفتها ويدها على خصرها وابتسامه السخريه كل ماأذكرها أحس بختنق حتى ماإستحت من أمي...وانا إرتبكت لدرجه إني نسيت أغراضي بأي درج...حسيت إني مثل المجنونه....جمعت عفشي وقلبي يتقطع وهي تمشي وراي مثل ظلي وحسيت انها ودها اني اقول اي شي عشان تصارخ موبعيده تقول بكره ضربتني وإلا قالت...لأني عرفتها لزمت الصمت حاولت أتماسك فيه شنطه كبيره لي فوق الدولاب قلت لشغاله تجيبها لأن أغراضي كثيره وطلعت الشغاله على كرسي وسحبتها وتجلس تصارخ على الشغاله شوي شوي على الدولاب لاينكسر...ورحت لصاله أخذت ملف وهي تناظرني طبعا الملف لي فيه صور لي لبطاقة الأحوال وبيانات لأني كنت بطلع بطاقه ولاطلع لي..أخذت الملف وحطيته بالشنطه وتجيكم طايره وتصارخ علي هذا الظرف يخصك وإلا يخصه ...أنا رديت بهدؤ كعادتي كيف يعني يخصني وإلا يخصه أكيد يخصني وتصارخ أقول هاتيه(((طيب أنا رفضت أعطيها)))وتسحب الملف وتفتشه وانا أموت واموت ...قلت لها بهدؤ خايفه أسرقه وتصارخ علي أنا ماقلت تسرقين(((وإصبعها شوي ويدخل بعيني)))) قلت كلن يشوف الناس بعين طبعه وتصارخ بوجه أمي تقول شفتي التربيه؟؟؟؟((((أصلا هم من عشرتي معهم منحطين ولدها بنفسه قال لي مره انا لساني وسخ إرضي بالواقع ))))) طبعا لا انا ولا امي ردت عليها.....بالله وش بسرق هالوزير وإلا رجل الأعمال أسرق أوراقه الحمدلله ....أصلا السله اللي أخذت منها الملف مافيها إلا أفلام وأوراق مستشفى وعلب تحاليل(وبيني وبينكم يوم شفتها إخنقتني العبره رحمته حسبي الله على أمه مايكفيه بلواه تحرضه علي ...الله يشهد إني كنت واقفه معه وكنت ناويه ماأتخلا عنه لواعيش عمري بدون عيال لكن هواللي رماني)بعد مافتشت الملف وقالت لأمي شفتي التربيه وأطير للمطبخ وأطلع كيس زباله بحط مواعيني اخوي اللي شاريهن لي أجل حنا نسرق والله ماأخلي لها شي ...خل مرته الثالثه اللي على مزاجها تشري لها مواعين وتسنع نفسها...أنا يوم جيت ماحطو ولاقدر واحد الله لايفقرنا كل هذا عشان ماأطبخ تحت..عاد أبوي محذرني يقول وانا ابوك خليك عزيزة نفس لاتاخذين الأشيا اللي شاريتها إخذي بس ملابسك لكن الدعوه موحاااجه أصلا حتى ملابسي مااابيها ولاأبي ذكرياتها بس هذولا ناس نفوسهم صغيره خلني أصغر نفسي على الأقل أخذ كل اللي لي..وتلحقني للمطبخ وتصارخ وش بتاخذين الله يرحم والديها وش باخذ كل اللي في المطبخ من حلال أهلي بس قلت خلني أخذ شي بسيط أرفع ضغطها مادامني ماعرف ارد ....وأطلع القدور وأحطها(((والله إني ضعيفه)))وهي تصارخ لاتاخذين قدوره خوذي اللي لك بس((والله مالهم قدور وبغيت أقوله لها بس والله لنتهاوش عاااد من حرتي أمسك غلط ماأطلع إلابقدوري))وأسكت ...المهم نادى أبوي عامل يشيل العفش وتطري علي لوحه وطاوله جايتني هديه من صديقتي وأنط قدام أبوي والعامل طبعا متغطيه وأنط على الكنب وأطلع اللوحه وأبوي يهاوش يقول خليها وأنا ماعاد أشوف ابوي عطيتها العامل ..ويوم نزلنا مسكت أمي تحلفها على الطاوله تقول إحلفي إنها لبنتك وأمي ضعيفه قالت والله إنها من صديقتها(عاد الطاوله صغيرونه يمكن ماتسوى خمسين ريال بس أنا إنحرقت أعصابي))عاد بنتها كبيره متزوجه طلعت تهاوش وتسبني بس أنا طلعت بهدؤ طبقت (الحقران يقطع المصران)عاد القدور عطيتها العامل..ويوم رجعت ياكثر العطورات والكريمات والملابس قلت لأختي نادوا مرة أخوي بفتح بسطه المغرب

نواااره2009 · 14-05-2009, 04:17

عاد والله مافتحت الملابس أحس إني بموت بصراحه الطلاق مر وانا مجربته وماصبرت عليهم إلا لأني مابي الطلاق ...وبنفس الوقت راحمته يعني بيجلس كذا يتزوج ومايتبع غير شور أهله..
وبنفس اليوم قطع جوالي ولا دريت إلا من البنات في الكليه يقولون نتصل مقطوع رقمك
لأنه هويشتغل في الإتصالات وهواللي معطيني الرقم ...المشكله سوا يعني موفاتوره ماراح يضره...
مدري أحس موضه عندهم سالفة قطع الرقم....
الحمدلله والشكر أرخص مارخص الله الأرقام....وريحني انا الجوال ماأستفيد منه شي صديقاتي يدقون على الثابت ومتى مابغيت بطلع رقم مميز وأغيضه

بس المشكله ماعندي واسطه ههههه
آآآآآه الله يعين والله ماتصدقون وش كثر إهانتي بوقفتها على راسي.....ادري يمكن ماتحسون بموقفي بس والله مؤلم عمري ماحسيت بذاك الشعور....
دعااااائكم لي بأن يفرج الله همي

وجـــدان غـــاليتك · 14-05-2009, 05:33

..يــــابعدي أنتي وربي ضاق صدري على حالك..صحيح يوم أنهم يقولون(أذا أكرمت الكريم ملكته وأذا أكرمت الئيم تمردا)الا نفش ريشه مو بس تمرد..ياقلبي عندنا وعندك خير..صايره موضه الهواشه يوم تروح البنت تأخذ أغراضها..وربي ياوحده أعرفها يوم راحت تأخذ أغرضها أول مادرو..أنها جايه خلاص تقولين صابهم مس بسم الله علينا..راحت هي وأختها ويوم وصلو تعالي شوفي الأكشن الي صار تهاوشو على الذهب والأغراض ..المشكله البنت تبي تأخذ ذهبها..وأم زوجــها تقول لا مقويه

..وصلت بينهم لطقاق بس تدخل أبو زوجها و ربك ستر..ماعليك فيهم هما كذا بعض الناس لا جو يخطبون يوووووو يشيلونك شيل بلمديح والأحترام ويسونك يـــــادهينه لا تنكتين ولمن خلاص صارت البنت في بيتهم وقضى العرس..بدت تشين الأخلاق.. طبعا موكلهم في ناس محترمه حتى بعد الأنفصال يضل الأحترام بين العيلتين ..ربك موجود يابنت الحلال والظلم ظلمات يوم القيامه وهي أذا عندها بنات أو أولاد لسه ماتزوجوأسمعي فيهم..لا تخافين وربي ربك بيأخذ حقك في الدنيا قبل الأخره..وعلى سالفة الجوال يارب رحمتك من جد نفسه مدري كيف خليه يشبع فيه..وانتي طلع لك رقم ثاني ..يمكن عاجبه ويبي ياخذ هههههههههه الله لايبلانا من جدنــــــــــفسيات..أسأل الله الكريم رب العرش العظيم أن يأجرك في مصيبتك ويبدلك بخير منها..ويشرح صدرك وييسرأمرك..ويرزقك على قد نيتك..ويحفظلك والدينك يـــــارب..بتوفيق

(((قلب امرأة))) · 14-05-2009, 06:27

الله يفرج همك اختي

والله من كثر ما نسمع الطلاق ومشاكلة صرنا نخاف نزوج عيالنا واخوانا

بس عزيزتي عدم تسليمك لها كان تصرف غير صحيح (لان السلام لله) ولا تنسي انها مثل امك)

وايضا روحتك لبيت اهل زوجك في هذا الوقت كان صعب عليك شوية

المفروض الوالدة واخواتك اهم من يذهب ويحضروا عفشك حتى تتجنبي مثل هذا الموقف

اصبري واحتسبي امرك لله

وان شاء الله تكون حياتك اجمل مما سبق

..هــــــــــــدب.. · 14-05-2009, 06:36

الله يعينك اختي ويعوظ عليكي والله الطلاق مر مجربته
بس انا احسن منك ماخليت خيط بأبره كل العفش اخذته هو كان عازله اللي بفلوسي حطه بالحوش واللي هو شاريه بالمخزن واجيب ذاك العامل ويحدر كل العفش بس ام زوجي الله يطول بعمرها معي لانها عارفه اني مظلومه
وفرشت شقتي اللي اداني ابوي بعفشي واتمخطر فيها انا وعيالي قولو ماشاء الله تبارك الله لا يجي يطلع عيوني هههههههههههههه

م-سيف · 14-05-2009, 06:53

الله يعينك ويصبرك ويعوضك خير

وانتي تصرفتي معهم بطيبتك واحترامك

الله يوفقك

طعنتني لكن علمتني · 14-05-2009, 07:55

اختي انا متابعه للمنتدى ولكن كلامك اثر فيني وسجلت دخول عشانك انتي

المهم ياخيتي انا ماعرف من قبل مشكلتك الي ادت للزعل

بس لو صار الطلاق 00

لا تشيلين هم الدنيا على راسك ولا تحرقين قلبك وعافيتك على الحزن

الحياه ليست زوج ((خلق الانسان للعباده ))

اهتمي بعلاقتك اولا مع خالقك صلي قيام الليل وادعي واستغقري والله بيرزقك بزوج صالح يستحقك

انشغلي ببر والدينك كملي دراستك ان لم تكمليها من قبل وان كنتي موظفه انشغلي بعملك وهواياتك

ودائما قولي لنفسك ان هذا القدر لازم ارضى به كتب لي ربي ااكيد فيه خيره لي

ام زوجك كل عمل الله شايفه لوكان مثقالذدره قولي حسبي الله ونعم الوكيل

والله يمهل ولا يهمل والكل مجازى بما يفعل

لا يهمك العالم اذا الله معك فقط تقربي لله

الله يسعدك ويشرح صدرك

تحياتي

عود روويان · 14-05-2009, 08:52

حسبي الله لا اله الا هو عليه توكلنا وهو رب العرش العظيم

الله يآخذ حقج ان شاء الله

عليــــــــــــــــج بالاستغفار وقياااام الليل وقراءة سورة البقره

المررتفع · 14-05-2009, 09:12

الله يكون بعونك اختي

ويكفي تعاملك معاهم بالطيبة والتطنيش لان الهواش والكلام يزيد الطين بله

ومثل ما قلتي الحقران يقطع المصرا

عوضك الله خيرا

كلي ملح ودمي سكر · 14-05-2009, 09:17

الله يعوضك ولد امة الظالمة ماعلية حسافة ماهو رجال

اصبري وانسي الماضي وعيشي حياتك والله يوفقك مااحد ياخذ الا نصيبة والرزق على الله

بـريق الألماس · 14-05-2009, 09:42

ماقول غير رددي حسبي الله والنعم الوكيل ولا يهمك الله

يعوضك وكل ماتذكرتي الموقف قولي اللهم اجرني في مصيبتبي

واخلف لي خيرا منها

اما الأم في جبروت السموات والأرض ياخذ حقك لا تكلفين

قحطاااني ماااركه · 14-05-2009, 09:53

لا حول ولا قوة إلا بالله

والله أرتفع ضغطي وانا أقرأ قصتك ؟!!!

اعوذ بالله منه هو وأمه لهالدرجة لا حياء ولا شيمه ..

لو خليتيها لهم يتهنون فيها الله لا هنيهم ..

وبعدين ليش رحمتيه ؟!!!

هذا ما يستاهل الرحمة ؟ّ!!

يعامل أبوك هالمعامله صحيح اللي أختشوا ماتوا

الحمد لله اللي خلصك منهم ومن شرهم وما فيه مثل راحة البال

يا زواج يسر الخاطر ولا بلاها

يغنيك الله عن زواج مثل كذا

الله يوفقك ويقدر لك الخير ويجيب لك ابن الحلال اللي يستاهلك

عافك الوقت · 14-05-2009, 10:32

بسم الله الرحمن الرحيم

اختى الفاضلة ان الله امتحن المؤمنين واخبرهم باختبارات كلا حسب ايمانه وكلما زاد الايمان زاد الابتلاء من الله العلي القدير فاصبري واحتسبي عند الله اجرك ... واطلبي من الله ان يعوضكي خيرا ان شاء الله .
اختي الفاضلة لعل الله اراد لكي الخير في عدم الاستمرار مع هذا الزوج
وكل هذا امور ممكن ان تحدث واراد الله لكي الخلاص باقل الاضرار .
فاحمدي الله واشكريه على نعمه فلا نعلم ما هو مكتوب لنا .
اختي ادعي الله ان يثبتك ويرزقكي بالزوج الصالح
اللهم اني اسالك بعزائم مغفرتك وبكل اسم هو لك سميت به نفسك
او انزلته في كتابك او احتفظت به في علم الغيب عندك ان ترزقها الزوج الصالح
والذرية الصالحة الحافظه لكتابك الكريم اللهم امين

نواااره2009 · 14-05-2009, 11:39

اشكرك وجدان وبصراحه أنا اول مره أشوف ناس زي كذا اول مره ادري ان فيه ناس يهاوشون مرة ولدهم وهي جايه تاخذ عفشها وإلا يتفرجون عليها؟؟؟؟يعني بتوريني إنها ذلتني وإلاخايفه أسرق؟؟؟ المشكله كلها غرفه وصاله ومامن أثاث؟؟؟؟؟الله يرفع عنهم ولا يبتلينا...

نواااره2009 · 14-05-2009, 11:45

قلب أمرأة أشكرك حبيبتي على مرورك
وتخسي تصير مثل أمي...والله ياقلب أمرأة إني يوم كنت عندهم ماعاملها إلا مثل أمي وكل مانزلت حبيت راسها وإذا رجعت من الكليه سلمت عليها وطيبه معهم لأبعد حد أنزل واطبخ معهم واهتم في بناتها مثل خواتي وعلى كثر ماشفت منهم ولامررررررررررررررره جرحت وحده او غلطت بحق أحد فيهم والله الشاهد.... لكن لو احد في مكاني ذاك اليوم والله مايسلم عليها......يابنت الحلال سوت سوايا خليها على الله
وانا ماااااكنت ابي اروح بس خواتي صغااااار ماعندي احد وامي تخاف وتستحي يالله راحت معي؟؟؟

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

أم زوجي أهانتني يوم رحت آخذ أغراضي