عالم الحياة الزوجية - منتدى

نواااره2009 · 30-05-2009, 03:24

السلام عليكم ورحمة الله...
بصراحه موعارفه من وين أبدأ..أظن بعض الأخوة والأخوات يتذكرون مشكلتي وآخر مرة كتبت أني رحت آخذ أغراضي من بيتي وكيف تعامل أمه معي ذاك اليوم..طبعا ولدها مطلقني؟؟؟وخلاص أنتهى كل شئ..
وجالسه أستعد لإمتحاناتي...واليوم بالذات جالسه أفكر في أهلي ..كيف أطمنهم إني مرتاحه وأني ان شاء الله قد الإبتلاء....أبوي دايم ينظر لي ويتفحص وجهي..وش فيك نوااارة اليوم كأنك متضايقه محتاجه شي تبين شي....لا لا لا يبه مافيني شي......أمي دايم تبحث عني وتطاردني بالأكل إكلي إكلي حتى لوكنت شبعانه لازم آكل ولوكنا نتقهوا لازم تاكلين حلا ...طيب مابي خلاص أكلت كفايتي؟؟ وتحلف علي؟؟... أخوي توه عريس كل بعد شوي ناط لي ويمسكني على جنب وأنا أحسب عنده مشكله يمسكني نوارة وش فيك شنتي نحفانه

عيونك وش فيها كأنك مصفره ومدري وشو....بطنك يوجعك خلاص بكره بوديك المستوصف؟؟؟؟

....أي مستوصف والله مافيني شي...ماأحس بشي...
أخوي الثاني يمسكني وهو بيطلع نوارة أنتي متضايقه من شي ناقصك شي؟؟يبي لك جلسة خاااصة بأقرب وقت؟؟؟........مافيني شي..وش جلسته؟؟؟

تحقيق فيدرالي عن أوضاعي النفسيه؟؟
أبوي الله يحفظه أحسه أكثر واحد يهتم يشيييييل هم دايم ألقاه يفكر وأحسه متنرفز؟؟؟يفكر بطليقي وسواياها...أبوي الغالي يقول ماعليك وانا ابوك ربي بيعوضك أنا أدعي لك دايم حتى وانارايح اصلي الفجر وحتى بعد ماارجع من الصلاة واحط راسي على المخدة أدعي لك...
أبوي يذكرني في كل وقت وأنا متى أخصه بالدعاء؟؟
أهلي يدارون خاطري ويعاملوني بحنيه زايدة ....
وأنا جالسة أفكر كيف أدخل السرور على أهلي ..كيف أخليهم يتأكدون إني مرتاحه وسعيدة ولايشيلون همي؟؟؟
وأبوي أحس إني الوحيدة اللي جايبه له الهم بمشاكل طلاقي؟؟هودايم يردد (قضاء وقدر) وأنا راضيه باللي صارلي وربي يكتب لي الأجر ان شاء الله...لكن
الليلة أتصلت جدة طليقي...تدرون وش قالت؟؟
قالت إن طليقي رافع علي قضية بالمحكمة والقضية أساسها (ليش تجيب عامل في بيتي يشيل معها العفش؟؟؟)...وش يقصد؟؟ ياترى بيتهمني إني سارقه شي ماأتوقع وقاحته توصله لهذي الدرجه؟؟ لكن قضيه مره وحده ..ومحكمه؟؟؟ وقاضي؟؟؟؟..وإلا بعد فيه شي ملفقينه لي بس وشو؟؟؟ ياربي وأنا خوافه وأستحي كيف أجلس مع قاضي ومع طليقي كيف أناقش كيف أجاوب...حسبنا الله ونعم الوكيل هذا الشي أكبر مني كيف سمح لنفسه بكذا؟؟؟....وأنا كيف بتحمل كيف بيكون وضعي من هنا إلين أروح أكيد لابنام ولا بذاكر ولا بكون أصلا طبيعيه هذا إذا ماجاني شي؟؟
أنا مريت بمشاكل وهموم وطلاق كنت أتضايق أحس بالحزن أتعب بس مو مثل اليوم
أنا أول مادريت طاح الجوال مني ورجعت شلته والجوال يتحرك بيدي أحاول أثبته موقادره أصابعي ترجف وحسيت ببروده بجسمي وصداع فظيع....أنا الإنسانه اللي خايفه ربي وعمري ماآذيت أحد ولاأخطأت بحق نفسي أو حق أيا كان ..أتهم بقضيه وشئ تافه؟؟؟؟..أبوي معروف بين الناس وله مكانه ياماساعد ناس وقدم لناس ويقدر الناس...يدخل محاكم بسببي؟؟ وطليقي ليش أختار هالوقت عشان امتحاناتي؟؟
أبوي للحين ماعرف بالموضوع لأن كان عنده ضيوف ويوم خلصوا عشا مر علي قبل ينام وكان شكله مرهق وماحبيت أقوله؟؟
وأمي اللي دايم صابره وتصبرني بكلامها ..اليوم غيييير وجهها متغير؟؟ حتى أبوي سألها قدامي..(كأنك متضايقه؟؟)
آاااااااااااااه بس كيف بتكون نفسيت أبوي وأخواني؟؟؟
والناس وش بيقولون عني؟؟؟
يعني خلاااااااص أعتبر نفسي إنتهيت؟؟؟
أنا عارفه إن الرأس المدبر أم طليقي ..ليش تسوي فيني كذا؟؟ماتخاااااااف من اللي أقوى مني ومنها؟؟
ماتخاف من دعوة المظلوم؟؟......هي وطليقي ينامون..وأنا دموعي مبلله سجادتي وأتحسب عليهم؟؟ مايخافون من ربي اللي وعد ينصر المظلوم ودعوته ولوبعد حين..ووعده حق..
طيب أنا مابدر مني شي يخليهم يطاردون وراي؟؟؟....ماأخطيت على أحد ولاظلمت ولاقهرت ولاسلبت ولا قصرت وربي شااااااااهد...
طبعا العامل نزل العفش من الدور الثاني لأن الوالد مسوي عملية في قلبه وممنوع يحمل الأشياء الثقيله... ومتصلين ناخذ الإذن قبل نروح؟؟؟.....بس هم يدورون المشاكل؟؟؟....
الحزن والمشاكل تجيني وأنا مسالمه
الحين كيف أتصرف أروح إذا جاني إستدعاء...؟؟؟
لاتقولون جيبوا ناس يتدخلون بينكم؟؟؟لأن شوره بيد أمه وأمه ماعليها من أحد؟؟؟وهوأصلا مايقدر أحد؟؟
حسبنا الله ونعم الوكيل هو نعم المولى ونعم النصير
اللهم إجعل ماأصابني رفعة لي ولأهلي اللهم أكتب لي الأجر وثبتني وأجعلني من الصابرين
لا إله إلا أنت سبحانك إني كنت من الظالمين
لاحول ولا قوة إلا بالله انا لله وانا إليه راجعون اللهم أجرني في مصيبتي واخلف لي خيرا منها
حسبنا الله ونعم الوكيل فيمن ظلمني اللهم خذ لي حقي منه أخذ عزيز مقتدر اللهم أرني فيه عجائب قدرتك

م-سيف · 30-05-2009, 04:02

لا تقولين شي ألي يجيكم شي رسمي ....

يمكن كلام بس نقلوه للجدة ... عشان تتصل عليك المسكينه ...يبون يسوون لك شوشره

انتي انسي الموضوع

وعيشي حياتك ...

واذا جاكم شي رسمي ... الموضوع بسيط

ويمكن ان الشيخ بنفسه يرد الدعوه بدون ما تتدخلون ان كانت القضية مالها داعي ....

الله يكون بعونك

صدق الوفى · 30-05-2009, 04:03

قصتك داميه

مالت عليه وعلى ام جابته

بعض الرجال فرعون مصغر

لكن كوني قويه ولا تكوني من البؤساء وتكلمي بطلاقه وشموخ وعزة نفس

يعني والله قلة حيا

وين الضمير وين الخوف

لكن قالوها

لو انك نذله وابوك واهلك كان ما صار هذا موقفهم

بعض الناس تدوس عليهم يضربوا لك تحيه اوجلال واحترام

اما الطيب الزايد عند اللئيم تمرد كالشياطين

حسبي الله ونعم الوكيل

دخلت هنا واستفتح بهذه الفاجعه عسى الله يصبرك ويخلف عليك

عندي اقتراح للمجتمع

ورى ما يتم ترشيح قاضيه!!!!!!!!!!

والله يعينك

فيفي الحلوة · 30-05-2009, 04:10

هلا نواااره
الله يعوضك أحسن منه يارب هذا مو كفو ينحسب عليك طليق
أذا هاذي سوالفه
بعدين يمكن المره اللي دقت عليك مو صادقه يعني تبي تضايقك وبس أو امه هي اللي قايله لها تقولك
على شان تشوش عليك في أختباراتك ما عليك منها الحقران يقطع المصران
وبعدين القضيه هاذي تافهه وشو يعني رجال غريب وانتي معاك أبوك وجايه تاخذين أغراضك الخاصه فيك
أقول أرقدي وآمني وخليه يولي بس

غزاااال · 30-05-2009, 04:51

اللهم آمين يارب تقبل ما دعت نواره واجب لها دعوتها يا كريم يا مجيب دعوة المظلومين

حسبي الله ونعم الوكيل على كل ظالم جبار اللهم رد كيدهم في نحورهم واجعل دائرة السوء عليهم

واجعل ما يكرهون في انفسهم يارب

ما اقول الا اللهم يارب ياثرني وياثرك وياثر كل مظلوم على وجه الارض من المسلمين والمسلمات يارب العالمين

حبيبتي كثير من امثالك وامثالي على وجه الارض مظلومين لان معروف دائما الحبيب الطيوب الحنون الرحوم ما له حظ في

هالدنيا ((( لان كل مؤمن مبتلى )) واحنا مؤمنين برب العالمين ((( يكفينا قلوبنا الطاهره )))

وما اقول الا الله يخليك لعين رجيك ,,,,, وقولي الحمدلله عندك أهل مثل أهلك يخافون عليك ويعاملونك بالحسنى ذي بحد

ذاتها نعمه من الله لك

با أختي انا ما أدري هالناس أمثال طليقك وأمه و أمثالهم جعلهم الموت اللي ياخذهم ما يخافون انه بيجيهم يوم من ربالعالمين

((( ما فيهم خوف من ربي )))

نوراره ..... ادعيلي وادعي لك تالي هالليل

ما اقول الا الله يثبتني ويثبتك وياجرني وياجرك وكل بنيات المسلمين

طيب من ناحية البلاغ ...... حطي عند امك خبر لا تسكتين علشان يشوفون وش يسوون اهلك وبعد علشان ما ينصدمون

أكثر ,,,,,,, والاحسن غيري رقم جوالك الجوال اللي يعرفونه كنسليه ألغيه تماما

اي شي يكلمون عالثابت والا يكلمون احد من اخوانك والا ابوك ..... قولي خلاص اللي بيني وبينكم انتهى اي شي كلموا

ابوي والا احد من اخواني......

تصدقين اعرف وحده فعلا مثل حالتي وحالتك (( بس انا للاسف الاذيه جايه من زوجي من لسانه السليط اللي متبري

منه ))

الوحده اللي اعرفها ام زوجها شياطينها متبريه منها الزبده انها تدعي على خالتها الليل والنهار تصدقين الخاله جاتها جلطه

في المخ والقلب وصارت مقعده والله انها تقول قولوا لفلانه تحللني وتسامحني لاني ظلمتها ((( يعني للاي انا اعرفها )))

االا وش رايك لفقي لهم تهمه وارفعي عليهم قضيه .... عامليهم بالمثل مدام وصلت عندهم هالوقاحه لهالدرجه ..

((( واستشيري محامي في قضيتك والله خذي رقم اي محامي واستشيريه ما راح يخذلك ان شاءالله ))

ادري اني كثرت الحكي والقرقه بس والله من اللي فيني لاني اغلي غلي على امثال هالشرذمه من هالناس

وما اقول الا الله يصبرك ويثبتك وينولك اللي في بالك واللي في بالي والجميع يارب

وما يضيع اجر من صبر عند رب العالمين ((( وبشر الصابرين )))

وجـــدان غـــاليتك · 30-05-2009, 04:56

<<قضيه ليش جبتي عامل يشيل معك ,,صحيح من قال الفاضي يسوي نفسه قاضي ,,لا يكون أشاعه لتخويف بس أما أذا كان صح,, قضيته أن شاء الله بتنرد في وجهه هذا وش يحسب المشايخ ماعندهم قضايا أهم غير قضايا الأنتقام من الطليقه ترى يعرفون هالأساليب طيب أنتي مراه وما تقدرين تشلين أشياء ثقيله أهم شي الحين أذا طلع الكلام صح ووصلك أستدعاء من المحكمه بلغي الوالد,,لأزم أحدمن محارمك يروح معك ,,يوم رحتي تجيبن أغراضك الولد رأح معك ,,لا تشلين هم أفرشي سجادتك ودعي عليه ( اللهم أكفنيه بما شئت اللهم أجعلك في نحره وبعد عني شره )ربي بينصرك يابنت الحلال أسأل الله الكريم رب العرش العظيم أن يشرح صدرك ويفرج كربك وينصرك اللهم أمين ,,تقبلي مروري

تاج الورد · 30-05-2009, 05:03

الله ينصرك ويوفقك وماعليك من احد وحاولي تواسي اهلك

عاشق اللمى · 30-05-2009, 05:39

شوفي اختي نواره انتي حطي في بالك شي واحد

أنك ماسويتي شي غلط ولا والحق معك واهلك معك وحريصين عليك

خلاص لاتخافين من شي كل ماحسيتي الخوف يتسرب بقلبك والحزن

فكري وقولي انا خايفة من ايش انا الحق معي واهلي معي ولا غلطت وكله اللي تصير لي هالمشاكل قضاء وقدر فليش اخاف!!؟؟؟

الله يوفقك يارب ويريحك من هالمشاكل اللي هدت حيلك هد
ننتظر اخبار طيبة عن نجاحك ان شالله تقبلي مروري

أميرة العاشقين · 30-05-2009, 08:40

حسبي الله عليهم شكلهم قاصدين فترة الاختبارات جعل بلاويهم تنرد عليهم

الوااادي · 30-05-2009, 12:44

طنشي السالفة وما يصير لك شي

لدمعتي قصة الم !! · 30-05-2009, 13:09

الله يعوضك خيييييييير حبيبتي

ورددي دائما اللهم اكفنيهم بماشئت ووكيفما شئت

ترى اهل طليقي سوا اكثر من كذا طليقي رسالي انه راح يودي بناتي ملجا

لكن صدقيني

وماربك بظلما للعبيد

الفرج راح يجيك وهو وامه يجيهم يووووووووم

نايف الحسن · 30-05-2009, 13:30

وربي اقرأ قصتك
كأني اقرا روايات بوليسية
كيف عايشين الناس هذي
احمدي ربك انك تخلصتي منهم
قصة المحكمة اشاعة يبون يضيقون صدرك لانهم عارفين انك خوافه بزوووود
الله يعوضك خير يا نواره
وربي رحمتك ورحمت ابوك
لك مني كل ود واحترام وتقدير ولوالدك العظيم كل اجلال
اخوك ,,

ابو الغالية · 30-05-2009, 13:56

اختي الكريمة

لنفترض صحة رفع القضية

ماهي الاتهامات ؟

عامل ساعدك في تحميل اغراضك ؟

هذا اتهام ؟
بالطبع ليس اتهام

لم تأخذي سوى اغراضك الخاصة فيك ... فلذا اختي الكريمة نامي قريرة العين واكثري من الاستغفار والدعاء

تقبلي ارق تحايا اخوك

زعيمة المطلّقات · 30-05-2009, 13:59

حبيبتي نوارة..

هذا إبتلاء من الله..
وكل مؤمن مبتلى..

الله يعين الآباء هم اللي دايم يروحون فيها..

والدي بعد طلاقي صابه سكر وقولون عصبي..

هم اللي يشيلون همنا ..الله لايحرمنا من والدينا يااارب..

راح أذكرك بنصيحتك لي أمس..
عليك بالدعاء في جوف الليل..فسهام الليل لاتُخطئ,,

تقبلي تفحيطي السريع في شارع المطلقات..
دائري نوااارة..

Abdullah7th · 30-05-2009, 15:56

الشي الايجابي بقصتك كلها ما يلي :
حواليك أهل وشباب ( اخوانك ) نادرين بالوجود ..ربنا يحفظك لك الجميع ..
ثانيا : انك فاهمة اللي يصير حواليك وهذا رح يساعدك على التصرف السليم ..
ثالثا : شايف انه حياتك كأنه لم يحدث لك طلاق يعني متابعة حياتك بشكل ممتاز ..
رابعا : نسيت شو رابعا ..
المهم ربنا يسهل أمورك ..وما هي الا ابتلاء ..والابتلاء على قدر الايمان ...وطمينا عنك
أخوك عبدالله السابع

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

شئ ماتوقعته؟؟؟