عالم الحياة الزوجية - منتدى

THE SKY COLORS · 16-06-2009, 01:31

بسم الله الرحمن الرحيم
السلام عليكم ورحمة الله وبركاته

العام في نفس هذا الوقت كنت جالسه عند التلفزيون
الساعه 2 الظهر

دق التليفون و رديت :الووووووووو
خالتي : هلا هنادي كيفك
انا : هلا خاله الحمد لله ايش عندك داقه هالوقت
خالتي : ابي امك اليوم بروح اشوف وحده لسلطان
مادحينها لي ناس بروح اشوفها ابيها تجي معي

انا : والله امي بتطلع هي وابوي بيرحون لعمتي بالمستشفى
خالتي : اهااااااااا اجل يالله مع السلامه
انا : خاله عطيني نوال ابي اكلمها

(نوال بنت خالتي وكبري بالسن )

كلمتها وسالتها بتروحين قالت ايه
قالت تعالي معنا
قلت : لا تخيلي بس فشله احس عيب
نوال : لاعيب ولا هم يحزنون مايصلح نروح انا وامي بس تعالي معنا

انا : ليش اختك مها وينهي ؟؟
نوال : مها زوجها رافض يقول رايحين حفله عشان تروحون كلكم
المفروض بس امك تروح تعرفين فلسفه الرجال

انا : ياكرهه رجل مها كرررررريه مسوي الرجل المثالي
المهم بس خلاص بروح معكم ايش ورانا نساعد سلطان
ويابخت من وفق بين راسين بالحلال

بس متى مواعدينهم عشان اتجهز

نوال : امي قايله لهم قبل صلاه المغرب يحطنا السواق يروح يصلي ويرجع ياخذنا
انا : اهاااا حلو طيب يالله مع السلامه مروني
بعد صلاه المغرب جت مرتني خالتي وبنتها
قلت تاخرنا عليهم صح ؟؟
قالو : لا عادي ايش وراهم يعني
اللي يبي سلطان ينتظر عمر !!!

مرينا على ام صالح صديقه خالتي و وصلنا لبيت الناس
وهو ياذن العشاء

دخلنا تقهوينا وحلينا شربنا شاهي وعصير واكلنا كيك
ودخلت البنت شفناها وطلعنا

ركبنا السياره ماقصرنا قطعنا البنت من الحش وكل ماسكتنا قالت خالتي : ايه الله يوفق بناتنا

وعلى هالموال قعدنا اكثر من 3 شهور دخلنا فيهم 7 بيوت
انا ونوال وخالتي وام صالح واذا مافيه ام صالح جت امي

وكل مانطلع نقول :

البنت حلوه بس قصيره
البنت حلوه بس طويله
البنت حلوه بس سمراء
البنت حلوه بس دبا
البنت حلوه بس نحيفه

وسلطان مايدري عن هالحوسه ولا شيء

لين جاء يوم وسال امه : يمه مادورتي لي بنت
خالتي : الا ياوليدي ماخليت بيت بس مالقيت البنت اللي تناسبك

سلطان : خلاص يمه انا رحت لبيت خويي وقلت له ابي اناسبكم
وانه قال بشاورها واذا حصل نصيب تعال شفها ولا من شاف ولا من دري
واتفقت انا وياه ورحت شفتها امس
بس وش بنت يمه قطـــــــــــعـــــــه تجنن
يالله اللحين كلميهم واتفقي معهم وبخلي ابوي يكلم اخوها الكبير
بعد ثلاث ايام رحنا وشفناها البنت قليله عليها كلمه عاديه
شفنا بنات احلى بكثيررررررررررر

طلعنا وخالتي تقنع بسلطان ونوال تقنع بسلطان
بس سلطان رافض يقول شفتها وارتحت

طبعا سلطان تزوج واللحين زوجته حامل

ومرت الايام ودارت الدنيا ومثل ماكنا نسوي صار يصير لنا
انا نوال مابقى عائله بالرياض والقصيم مادخلو بيتنا

كاننا اثاث للعرض
اللي جايبه معها حريم جيرانهم
واللي تجيب معها كل خواتها
واللي تجيب معها حريم اخوانها

وانا ونوال نطلع لهم ويرحون لا حس ولا خبر
وصدق من قال : دقه بدقه وان زدت لزاد السقى ..
القصه خيال بخيال :
الماخوذ منها اشياء

ليش الحريم اذا راحت تشوف بنت قشت كل قبيلتها معها
البنت صارو اثاث وفساتين للعرض من كثر مايشفونهم الناس

صار الزواج بدل ماهو استقرار وفرح صار فيه جرح للمشاعر
حراااااااااام والله حرااااااااااااام

بنات الناس مو لعبه لكم
اذا حطتي بنت في بالك واخلاقها زينه خلي ولدك يروح يشوفها
مو بنات ام الجيران وخالته لان اللي بيتزوج هو مو اهم ؟؟
وحطي في بالك قبل اي شيء ان عندك بنات مثل ماتسوين راح يصير فيهم
فخافي ربك في بنات الناس
وانت ياللي اسمك رجال
على مين تلعبها اذا ناوي تتزوج جد لاتخلي زوجتك عرضه للي يسوي ولي مايسوى

الرسول عليه الصلاه والسلام ليه اجاز الشوفه الشرعيه ؟؟
لانها للرجل وللمراءه راحه مو لاخته ولامه ؟؟
ابي اعرف ايش دخلهم ؟؟
(هذا الموقف حاصل لصديقتي فحبيت اكتب عنه من القهر عليها)
تحياتي لكم ..
(ودي احط هالفيس قاهرني ودي اصفقه حطيته لكم بالاخير

>>حاطته حاطته الله لايعوق بشر )

الـثُــريا · 16-06-2009, 01:41

فعلا صادقه كثير تصير يقهروووون هالحريم اللي كذا

يسلمووووو حبوبه وربي يرزقك انتي وصديقتك بالزوج الصالح وكل بنات المسلمين عاجلا غير اجلا

taghy · 16-06-2009, 01:42

يعطيكي العافيه اختي اكريمه دائما تفاجأينا بموضوع خيالي اجمل من الاول ارجو ان تتقبلي مروري المتواضع

THE SKY COLORS · 16-06-2009, 01:47

اقتباس:

المشاركة الأصلية كتبت بواسطة الـثُــريا

فعلا صادقه كثير تصير يقهروووون هالحريم اللي كذا

يسلمووووو حبوبه وربي يرزقك انتي وصديقتك بالزوج الصالح وكل بنات المسلمين عاجلا غير اجلا

اللهم امين يارب
تسلمي ياعسل على الدعوه
والله يهدي هالحريم مابي اقول درووووووج بس انهم دروج على هالتصرفات ..

THE SKY COLORS · 16-06-2009, 01:54

اقتباس:

المشاركة الأصلية كتبت بواسطة taghy

يعطيكي العافيه اختي اكريمه دائما تفاجأينا بموضوع خيالي اجمل من الاول ارجو ان تتقبلي مروري المتواضع

مرورك على راسي من فوق
والاجمل كله تعليقك

كلي ملح ودمي سكر · 16-06-2009, 01:56

يااختي مادري خلاص كل ماقراء مواضيعك وتفاعل معاها تطلع من احلام اليقظة
الان قريت من الاخر
خلاص عرفتك هههههههههههه

مجرد أحلام · 16-06-2009, 01:59

احنا ماعندنا هالعاده
بس فعلا يأثر على نفسية البنت ،، وكمان اللي يتشرطون ويسوون كذا مثل الفحص سبحان الله غالبا ماتتيسر لهم
مشكوره اختي ..

نوافــــ · 16-06-2009, 02:01

مادام انتوا يالحريم خليتوا الزواج فيه تكاليف كبيره تحملوا النتيجه ارسل الله عليكم من انفسكم ومن جنسكم
من يضيق عليكم ويمشي سوق بعضكم بالزواج لانها مزيونه وسوق بعضكم يطيح
لو صفيتوا النفوس وماخليتوا الزواج بتكاليف كبيره وماضيقتوا على خلق الله كان جاكم فوج
واخذكم من يقتنع فيكم وعلى فكره مافيه رجال يدفع مبالغ كبيره الا يكون انسان ما هوا قنوع ببساطه
وغالبا الي يكون على قد حاله يكون قنوع وراضي فانتوا الي بديتوا هالشي فتحملوا النتيجه
مثل ما انتم يالحريم ماتبون الا الي يدفع الكاش والمبالغ الوهميه تحملوا انكم تصيرون مثل الاثاث
ومثل البضايع على تسعيره معينه ! ومافيه امل تنزل عن هالتسعيره ..!!
ومادامكم خليتوا الزواج بس للي معهم معناته مانقيتوا الا الرجال الغير قنوعين والي ما يرضون
باقل من الي بروسهم ! لكن لو خففتوا ورضيتوا بالي دينه واخلاقه تمام كان ماصرتم بهالحاله
وصرتوا بهالشكل ... الحمد لله والشكر بس

THE SKY COLORS · 16-06-2009, 02:02

اقتباس:

المشاركة الأصلية كتبت بواسطة نانسي بنت مطلق

يااختي مادري خلاص كل ماقراء مواضيعك وتفاعل معاها تطلع من احلام اليقظة
الان قريت من الاخر
خلاص عرفتك هههههههههههه

هههههههههههههههههههههههههههههههههههههههههههههههههه ههههههههههههههههههههههه
وش تبين فيه اذا هو حقيقه او خيال اهم شيء المضمون
تعليقك ومروك اسعدني

THE SKY COLORS · 16-06-2009, 02:03

اقتباس:

المشاركة الأصلية كتبت بواسطة مجرد أحلام

احنا ماعندنا هالعاده
بس فعلا يأثر على نفسية البنت ،، وكمان اللي يتشرطون ويسوون كذا مثل الفحص سبحان الله غالبا ماتتيسر لهم
مشكوره اختي ..

العفو ياقلبي
كل زواج لازم يصير فيه عادات تخرب ..

لوليارا · 16-06-2009, 02:06

خيتو THE SKY COLORS والله ثم والله انك عسل
وربي هذا اللي صاير والله حرااااااااااام البنت ماهي لعبة تراها تحس..
يسلمووووو لاخلا ولاعدم

THE SKY COLORS · 16-06-2009, 02:09

اقتباس:

المشاركة الأصلية كتبت بواسطة نوافــــ

مادام انتوا يالحريم خليتوا الزواج فيه تكاليف كبيره تحملوا النتيجه ارسل الله عليكم من انفسكم ومن جنسكم
من يضيق عليكم ويمشي سوق بعضكم بالزواج لانها مزيونه وسوق بعضكم يطيح
لو صفيتوا النفوس وماخليتوا الزواج بتكاليف كبيره وماضيقتوا على خلق الله كان جاكم فوج
واخذكم من يقتنع فيكم وعلى فكره مافيه رجال يدفع مبالغ كبيره الا يكون انسان ما هوا قنوع ببساطه
وغالبا الي يكون على قد حاله يكون قنوع وراضي فانتوا الي بديتوا هالشي فتحملوا النتيجه
مثل ما انتم يالحريم ماتبون الا الي يدفع الكاش والمبالغ الوهميه تحملوا انكم تصيرون مثل الاثاث
ومثل البضايع على تسعيره معينه ! ومافيه امل تنزل عن هالتسعيره ..!!
ومادامكم خليتوا الزواج بس للي معهم معناته مانقيتوا الا الرجال الغير قنوعين والي ما يرضون
باقل من الي بروسهم ! لكن لو خففتوا ورضيتوا بالي دينه واخلاقه تمام كان ماصرتم بهالحاله
وصرتوا بهالشكل ... الحمد لله والشكر بس

شف انا من دخلت الموضوع وشفت نكك تحت مربع الرد وانا اقول اللهم اجعله خير
يعني ابي افهم لاااااااااااااااااااااااااااااازم لااااااااااااااااااااااااااااااااازم كل موضوع تهاوش
اقراء على نفسك وانا اختك عليك بالبقره تراها تهدي الارواح
ولا هذي عصبيه قبل الزواج
عشانك لين اللحين مالقيت اللي ترضى فيك تعصب علينا وش هالمنطق وانا اختك
سم بالله واستغفر ربك والله يهدي سرك يارب
دعواتي لك بالهدايه وصلاح النيه
بعمري ماشفتك واقف بصف بنت منيتي القى لك رد واقف فيه مع بنت

THE SKY COLORS · 16-06-2009, 02:10

اقتباس:

المشاركة الأصلية كتبت بواسطة لوليارا

خيتو THE SKY COLORS والله ثم والله انك عسل
وربي هذا اللي صاير والله حرااااااااااام البنت ماهي لعبة تراها تحس..
يسلمووووو لاخلا ولاعدم

العسل انتي يالبى قلبك والله
شفتي لعبو فينا هالحريم الله يهديهم يارب ..

كلي ملح ودمي سكر · 16-06-2009, 02:14

ياختي السماء الملونة وربي اول كنت اقراء مواضيعك وتفاعل معاها ويم اكتشف انها من احلام اليقظة اخر الموضوع يرتفع ضغطي زي موضوع من يوم مادخلتي الجامعة وانتي بكرامة ههههههههه

мόόη Ļίģħт · 16-06-2009, 02:17

شدتني القصه

اهنيك على ادراجك للمعنى بهالطريقه الجذابه ^.^

الشوفه الشرعيه المفروض ماتكون بالسهوله هذي

ماتصير الا بعد سؤال من الطرفين وشبه موافقه .. فتكون لحصول الراحه النفسيه والقبول بين الطرفين

موضوع روعه يستاهل الختم ^.^

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

قسم بالله انهم بنات للعرض !!