عالم الحياة الزوجية - منتدى

مايصح إلا الصحيح · 20-06-2009, 20:23

السلام عليكم ورحمة الله وبركاته
أنا قبل فترة نزلت موضوع عن اختفاء البنات بمجرد إني قررت أتزوج بهذا الرابط
بشررررررى البنات خلصن ماعاد فيه عوااااانس
أنا حصلت بنت تناسبني جداً وتقدمت لهم وقبل لا أطلع من عندهم قالي والد البنت انتظر أسبوع بالكثير ونرد لك
جاء اسبوع ولا رد علي واسبوعين ولا رد علي واتصلت عليه
عشان أشوف وش صار على موضوعي قال أمورك زينة ومن هالكلام ،، قال بالكثير انتظر يومين ثلاثة أيام بالكثير
المهم انتظرت يوم ويومين وثلاثة واسبوع واسبوعين وثلاثة اسابيع ولا زلت انتظر أنا قلت مستحيل اتصل عليه لأني اتصلت عليه مرتين والصراحة أنا حصلت غيرها ثلاث بنات
هل مدة 35 يوم كافية للسؤال عني ؟؟مع إني واثق من نفسي ولله الحمد .
والصراحة النفس طابت منهم وش رايكم أتقدم لأحد الثلاث بنات واسحب عليهم وإذا اتصلوا علي أقول خلاص ماصار شيء
ولا أنتظر ولا أدري متى يردوا علي؟؟
وإذا انتظرت كم رايكم المدة اللي انتظرها ؟؟

مدري وش اسمي نفسي · 20-06-2009, 20:50

وعليكم السلام ورحمة الله وبركاته

اخوي انا اقول استخير هذا اولا

ثانيا بعد ماتستخير كم مره

اتصل على ابوها وقوله ابي اعرف ردكم ولا خلاص

يعني خذ منه كلام اخير واذا قالك بعد يومين قوله السموووحه انتظرت كل هالفتره

يعني باختصار وباسلوب حلو بين له ياتعطوني الرد ولا خلاص ماكأن صار شي

والله يوفقك ويرزقك بالزوجه الصالحه يااااااااااااااااارب

شقراوي وفتخر · 20-06-2009, 20:59

شف اخوي انا مالى خبره بالامور هذي
ولا اعرف كم الناس عاده يقعدون يسئلون عن الي بيخطب منهم
بس
رح وكلم ابوهااا وقابله وشف الوضع بنفسك
اذا ما فيه نصيب يعوضك ربك بغيرهاااا

.

نورالتقى · 20-06-2009, 21:24

خمسة وثلاثين مدة كثيرة انهم يسألوا عنك ولكن لاتعلق نفسك فيهم شوف نصيبك
يقولون الجواب مبين من عنوانه ثم انت اتصلت عليهم مرتين يعني سويت اللي عليك
ولو تبغى تتصل تاني شيء يرجع الى نفسيتك المهم انك ماتضيع وقتك اخوي
الله يوفقك ويدلك الى مافيه الخير
نورالتقى

العمده · 20-06-2009, 21:38

عزيزي انت تعرف ظروفك
وفكر قبل الاقدام على كل شي واستخر ترى الاستخاره فيها الخير الكثير
وربك يكتب اللي فيه الصالح لك ان شاء الله

(امل الدنيا) · 20-06-2009, 21:55

شوف اخوي والله مدة 35 يوم كثيييييييييره يعني شهر وزيآده
النآس تسأل أسبوع أسبوعين بالكثير وانت بصرآحه انتظرت بمآ فيه الكفآيه
يعني هالمده أمدآك سويت التحليل وطلعت النتيجه ..
وسويت اللي عليك ودقيت عليه مرتين والله ومثل مآقلت النفس طابت
إذآ والله عآدي تدق عليه مره ثآلثه أوكي دق وقوله مافيه نصيب وإذآ مآ ودك أخطب وتوكل على الله
ومثل مآ قآلوا أستخير مره ومرتين وثلاث وربي يخير لك البنت الصآلحه من الثلاث
وربي يوفقك ويكتب اللي فيه الخير لك ..
وريزقك بالزوجه الصآلحه ..

THE SKY COLORS · 20-06-2009, 22:01

ياولد الحلال تبيهم هم يدقون عليك ؟؟؟
انت اللي تدق عليهم
دق عليه هالمره كان عطاك كلمه ولا اسحب وشف غيرها
والله يوفقك يارب

اميره بلا فارس · 20-06-2009, 22:08

بصراحه ماطلو تقريبا يعني شهر واسبوع! يسألون
ماأدري انا احس انهم يماطول والمده كافيه للسؤال
استخير ربك اولا واذا شفت الموضوع مافي نصيب خل الوالده تدق وتسأل

عسل دافي · 20-06-2009, 22:09

ليش ناخذون الامورو كلها بضيق وزعل والد البنت قالك انتظر ومافيها شي لو يسألون حتى ولو طولوا يبون يزوجون بنتهم من شخص واثقين منه ومن سمعته والله بهالزمان صعب تلقى شخص زين ولا بد تسأل عنه مرتين وثلاث وزياده
انت اذا مستعجل او متضايق من الامر اتصل آخر اتصال وقول لهم عن اللي بخاطرك باسلوب حلو وقولهم عطوني ردكم الحين موافقين او لا
ومن ردهم عليك تصرف
والرفض مايعني نهايه العالم بالنسبه لك
يعني لابد انك تحاول وربنا باذنه راح يرزقك الانسانه اللي تناسبك
وموفق اخوي

حـِـِבيِٿ ﺈلرٍؤٍحّۓ ✿ ؛ ~ · 20-06-2009, 22:12

35 يوم مده مو كثيره
عادي
ي ناس ترد بعد 6 اشهر السالفة زواج مو قلي بطاطس
وإنك تتصل عليهم أكثر من مره هذي بادره طيبه منك عندهم
إنك للآن متمسك بالبنت وبقربهم
وسع صدرك ولا تخاف وتروح وتجي فيك الظنون والوساوس
وإقتنع باللي اقدمت عليه ولا تتردد مو لقيت 3 غيرها خلاص يعني مالك حاجه بهم ..!!
وش ضمنك إن الثلاث راح يوافقوا عليك .. ؟!
وش ضمنك إن وحده منهم هي الأصلح لك ..؟!

الله يوفقك ويكتب لك الي فيه الخير ..
وخليك كمان شهر وإتصل عليهم خلاله وحاول تزورهم بدون ما تسألهم عن الموضوع
بالتوفيق لك

محب الحرية · 20-06-2009, 22:38

لاعادي لاتقول كثيرة ولا شيء اصبر اسبوعين كمان وارسل لهم شخص ثقة
كعم كبير السن او احد معارفهم او شيخ قبيلتهم كلمة .

اخوي خطبنا لة بعد عيد الفطر ردوا علينا بعد عيد الحج رغم اننا من قبيلة واحدة ولكن الولد متوظف بمدينة اخرى وماينعرف اخلاقة من يوم خرج من القبيلة وزي ماقال ابو البنت ونعم بكم كلكم ولكن يهمني اللي ازوجة ابغى اعرف كل شيء عنة من غيركم .

التايف · 21-06-2009, 01:22

قابل ابوها وجها لوجه و اساله و قول لي نصيب عندكمو الا لا
الاستخارة مطلب في هالمواقف
الله يوفقك

(( رامي )) · 21-06-2009, 01:22

الله يعينك
اقول شوف غيرها بعد الاستخاره طبعاً

من جنبها · 21-06-2009, 01:25

ياخى لاتصيرر بثرر كل شوي داق عليهم
لو يبوونك كان اتصلوو يعنى معلقينك سنه كاملة سلاماات
رح شفلك وحده ثانييه وخلها تنقع عند اهلهااا
المشكله انك مافهمتها منهم,,,,

ايان 88 · 21-06-2009, 01:57

لا اقول لك انتظر بعض الناس يجلسون شهر او شهرين..
بعدين ابوها قال الامور زينه ياخي هم موافقين بس انت ما فهمتها
ولو انت ماعجبتهم كان قال لك نفكر او اي شئ ثاني
وبعدين لازم تقدر وتنتظر وبكذا بتكبر بنظرهم..
وصفه التسرع ف الرجال مو كويسه..
والي صبرك كل هالسنين يصبرك ايام واسابيع زياده
وتاخرهم ليش كذا ماثر عليك ومو معناته انك ما عجبتهم
بس البنت تحتاج وقت تفكر وتعرف اشياء عنك من خلال السؤال
ويا اخوي طول باللك طول باللك
واهم شئ استخر قبل اي خطوه
وبانتظار اخبارك و وش سويت..
والله يوفقك..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

اشيروا علي ياجمااااعة أهون ولا أنتظر ردهم ؟؟؟؟؟؟؟؟؟؟؟؟؟؟