عالم الحياة الزوجية - منتدى

drema6817 · 27-06-2009, 23:14

السلام عليكم يا دكتوره سوسنه

بنت اختي عمرها 13 تصاب بالتهابات بالمهبل بكثره لونها اخضر و ريحتها مثل السمك و تحكها هي صغيره جدا على هذي الالتهابات اول مره صابتها من سنه مع بدايتها مع الدوره الشهريه اعتقد ذلك

و اخذتها للطبيبه و قالت انها لازم تاخذ مسحه من فتحة المهبل عينه للزراعه و بالعافيه البنت رضيت ان الكتوره تكشف عليها و تاخذ المسحه و انا اعتقد انها من كثر ما كانت مستحيه من الدكتوره وكانت ماسكه يد الدكنوره و شاده على نفسها ما خلت الدكتوره تاخذ المسحه صح

المهم نتيجة المسحه طلعت نظيفه كل اللي سوته الدكتوره قالت لي عقموا الحمام بعدها و اغسلوا ملابسها لحالها احتمال جايتها عدوى من الحمامات العامه

وكنبت لها علاج مااذكره الصراحه بس خذته لمدة اسبوع وصارت احسن الحمدالله

من اسبوع قالت لي ان المشكله ارجعت لها مع الدوره الاخيره هل هالشي انقطع م عاد مره ثانيه ما ادري

انا خايفه عليها يا دكتوره ان هذي الالتهابات تاثر عليها لما تكبر وتصير بسن زواج و خايفه انها تعدي اخواتها لانها تستخدم معاهم نفس الحمام

ايش اسوي شوري علي فديتج هي مثل بنتي انا مربيتها من هي عمرها سنه

امها متوفيه و خايفه يصيبها مكروه و اكون انا السبب اني اهملتها ما راح اسامح نفسي ساعاتها

تحياتي لج

الوعد باكر · 27-06-2009, 23:35

الله يشفيها يارب

ksa_c4 · 28-06-2009, 00:15

الله يشفيها
طيب اختي فيه معقمات بالصيدليه بالاضافه الى الاملاح الخاصه وايضا يوجد تحاميل لتنظيف المهبل

وانتظري الدكتوره سوسنه تفيدك احسن لك

تشكرات يادنيا · 28-06-2009, 00:27

لا اذا بنت لالالالالالالالالالالالا تستخدم تحاميييييييييييييل انتبهي
والباقي والله ماعندي خلفيه وان شاء الله الدكتوره سوسنه تفيدك

(السفيرة) · 28-06-2009, 12:37

.. هلا أختي..
افرازات خضراء + ريحة سمكية معناها اما التهاب مهبلي بكتيري من نوع معين لاهوائي.. او بطفيلي الترايكوموناس.. وطبيعي المسحة الخارجية تكون نظيفة! العلاج فلاجيل (مضاد حيوي) وهو اكيد الي اخذته..
الالتهابات هذي ما تجي عن طريق دورة المياه.. لأن المسببات حقها تموت بسرعة خارج الجسم.. ومقلق تكرارها اذا البنت مناعتها طبيعية.. حاسألك سؤال فقط للتفكير به كاحتمال.. هل فيه أي مجال للتحرش بها من أحدهم ولو سطحيا بدون علمك؟؟ معليش يا أختي أعرف السؤال ثقيل على القلب وما احد يحب يسمعه بس هو الي نفكر فيه مع تكرار هالحالة في بنت صغيرة وغير متزوجة.. الا لو فيه مشكلة عضوية او مناعية... قبل ما تنفي حاولي تفكري وتسأليها بدون ماتحرجيها.. لأن كل حالات التحرش الأهل ماكانوا عارفين بحصولها وكانوا ينفون بتأكد.. وأتمنى ما تكون ابنة أختك منهم لكن التفكير ونفي الاحتمال أفضل من توابع العكس... الله يشفيها ويحميها من كل شر ويجزيك خير على تربيتها... اعذريني مرة أخرى...

drema6817 · 28-06-2009, 12:52

شكرا اختي على تجاوبك

بيتنا و لله الحمد مترابط و مستحيل اي وحده من البنات تطلع بروحها مع سايق خصوصا هي لانها صغيره خواتها ممكن يروحون الجامعه مع امي او الخدامه بس مش لحالهم وما عندنا طلعات كل وحده بروحها انا عودتهم ان طلاعاتهم كلها معاي حتى مع صديقاتهم ما يطلعون واذا تزاورو وهذا من النادر الزياره اكون انا معاهم

وعودتهم على هالشي من صغرهم عشان يكون هالتصرف بالنسبه لهم هو الصحيح واذا اطلعوا لظرف ما لازم اكثر من وحده يطلعون مع بعض
و بالبيت ما اخليهم بروحم وبيتنا دايما مزحوم بالناس و مايفضى حتى مع اخوها ما تقعد لحالها نحن نعرف المشاكل اللي صايره من تحرشات من داخل الاسر نفسها الله يكفينا شرها و يحفظ عيالنا

وهي من النوع اللي قريبه مني مستحيل يحصل لها شي وتسكت

تحياتي لج

(السفيرة) · 28-06-2009, 13:00

.. الله يديم عليكم النعمة يا أختي.. وأنا تنفست الصعداء .. سامحيني هي كانت أمانة.. ربي يشفيها

ريما المجنونا · 28-06-2009, 19:05

الله يشفيها يارب

drema6817 · 28-06-2009, 22:05

انتظرك يا دكتوره سوسنه

saad@ · 29-06-2009, 01:49

هذا التهاب بكتيري او طفيلي

لازم تروح الطبيبة وتاخدة مسحة مضبوط وتاخد كورس مضاد كااااامل

مو اول ماتختفي الاعراض توقف!!

الله يشفيها

drema6817 · 29-06-2009, 09:25

شكرا لردودكم

نسيان الزمان · 29-06-2009, 22:51

اختي بغيت اقول لج شي والله فقط للحذر مو اكثر
اعرف انه احتمال بعيد وكثير بنات يصير وياهم مثل هذي القصص اقصد الالتهابات لانه البنت ما تكون تعرف تنظف نفسها زين واكيد يوم تكبر تبتدية تتعلم وتهتم بشكل اكبر
لكن بغيت منيج تهتمي زين بهذي البنت وتنتبهي من القريب والمحرمين قبل الغريب والبعيد
لانه كثير عرفت قصص تصير ويا بنات داخل بيوتهن تي من القريب قبل الغريب ربنا يعفي عنا وعنكم
مو بشرط انه تكون عمليه كامله ممكن تلامس سطحي
وساميحين اختي ان شاء الله احتمال بعييييييد جداااااااااااااا
لكني حبيت اعطيج فكره من اللي اسمعه واشوفه بعيني والله
وكلنا مسلمين ومتماسكين وربنا يحمينا ويحمي عيالنا من كل شر
ومني لج كامل الاحترام

drema6817 · 30-06-2009, 10:51

شكرا اختي لنصيحتك بس لما تقولون لي هالكلام قلبي يعورني

هي عندها اخو واحد وغرفته بروحه و ابوها مش موجود وما عندنا موضوع الاختلاط لا مع عيال عم ولا مع عيال خال

و ماتظهر بروحها مستحيل انا مربيتها و اعرفها مثل ما اعرف نفسي

الله يحفظها يا رب

العمده · 30-06-2009, 12:07

الله يشفيها يارب

@. بادرة .@ · 30-06-2009, 14:09

أختي الكريمة طالما الأمر يتم بعد الحيض فهذا دليل على عدم اهتمامها بنظافة المنطقة أثناء الحيض أو أنها تهتم ولكن ليس بالطريقة الصحيحة
عليها غسل المنطقة بماء دافئ قليلا من الأمام للخلف أي تنتهي من المنطقة الأمامية ثم الخلفية وتجفيف المنطقة جيدا وأن لا تطيل استخدام الفوط الصحية وتحرص عند النوم وضع قطعة جديدة جافة وإن كانت فترة حيضها طويلة دعيها تستخدم في الأيام الأخيرة قطع قطنية بيضاء معقمة عن طريق غليها بالغسالة طبعا مع دواء الالتهاب الذي تصفه لها الطبيبة أو غسول مناسب لسنها تحدده الطبيبة وإن شاء الله ما فيها إلا العافية
الله يقويك ويقدرك على رعايتهم ويجزيك عنهم خير الجزاء

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

بنت اخت عمرها 12 وعندها فرازات خضراء و ريحتها مثل السمك