عالم الحياة الزوجية - منتدى

لوله العسوله · 13-07-2009, 19:12

بسم الله الرحمن الرحيم
بعد عودتي من اجازه الصيف لتسجيل ابنتي الكبيره في المعهد الثانوي المهني وهذه كانت رغبتها كان هناك اختبار تأهيلي لتمكنها من النجاح كانت ابنتى تراجع في كتب الاعوام السابقه وكانت تصارع نفسها عشان تنجح وتدخل القسم اللي ياما حلمت بدخوله طبعا هو ما كان عاجبه غير ثانويه عامه ويقول كل بنات اخواني واخواتي ثانويه عامه وانتى طالعتلي بالمهنى مين دخل في مخك الافكار هذي
نسيت اقولكم ان اولادي كل واحد له طبع يختلف عن التاني تماما يعني الولد حنون لاقصى درجه ورومنسي لابعد الحدود كان ما يروح السوبر ماركت الا وياخد اخواته ويشتريلهم كل الحلويات من مصروفه الخاص واذا قلتله وانت اش اشتريت يقولي هما بنات مو كل شويه يطلعو اما انا اي شي احتاجه اجيبه بسرعه وكان تصرفه يثلج صدري كان اذا صرخت عليه اذا غلط يقولي اضربيني ولا تصرخي وتحطي عينك في عيني اقوله اش تفرق يقولي اذا صرختى ربي راح يسمعك ويزعل منى بس لمن تضربيني ما في صوت يوصله وما يزعل منى
كنت اضحك واحضنه شويه شويه اسمعه يقول لاخواته اللي تبغا تزعني تزعل ماما كان يخاف من ابوه بس خوف بحب يعني ما يحب يزعله ويخاف على زعله
البنت الكبيره خجوله وانتطوائيه جدا واي شي اقولها هو تسمع كلامي وشخصيتها ضعيفه وما تجادل
كل شي عندها زي بعضه
البنت الوسطى كانت قويه من صغرها وحقها تاخده وتاخد حق اخوانها وماشيه بالمثل اللي يقول
انا واخويا على ابن عمي وانا وابن عمي على الغريب
كانت لو تبغا طلب من ابوها تعرف كيف تخليه يوافق وهو يضحك
تعرف كيف تاكل بعقله حلاوه تلاغيه وتمزح معاه وتقوله اسويك شاي تبغا قهوه تركي اللين يقولها كم تبغي
اما الكبيره تطلب الطلب لو قالها ما عندي دحين تقوله طيب ولمن اقوله حرام عليك ليه ما تعطيها يقولي لو كان طلبها مهم كان سوت زي اختها
تعبت وانا افهمه كل وحده وشخصيتها ما يرد عليا
كان يقولي انت وبنتك ما احس ان طلباتكم مهمه هنا طلع صوتي لاول مره وقلتلو انا طبعي كداحتى مع ابويا اطلب واذا قال ما عندي خلاص ما اطلبه تاني بس ابويا كان اول ما تجيله فلوس يدبل المبلغ مش عشان شي عشان قدرت ضرفه وماكررت طلبي بس انت اذا طلبت كلمه ما عندك حاضره وعمرك ما فكرت تعطيني تاني هنا صاح في وجهى وقالي انا كدا عجبك عجبك ما عجبك خلي ابوكي يعطيكي طبعا ما رديت وخفت الموضوع يتطور بعد يومين طلعت نتيجه بنتي في اختبار القبول ورسبت وكانت نفسيتها محطمه وجلسه اواسيها واقولها لك خير ولا تزعلى ممكن تتفوقي في الثانويه وما تدري اش ربي مخبيلك احسن المهم بدات تلين وهو اش تتوقعوا يقولها
احسن خلي اللي كانو يحرضوكي ينفعوكي هذا عشان انا ماني راضي قلتلوا حرام عليك طيب خاطرها حسستني بنت الجيران مو بنتك وكان باقي اسبوع ويبدا العام الدراسي الجديد وولدي وبنتي الوسطى كانو مع اهلي في مصر سجلتها في الثانوي وطلبت منه نشتري ملابس المدارس حلف انه ما عنده واصبري كم يوم ربك يفرجها قلت حاضر
كان تاني يوم تبدا اجازته السنويه شهر ونص وبرضه تاني يوم يوافق عيد ميلاد بنتي الكبيره طلبت منه ترته انا اشتريها من مصروف البيت ونسويلها حفله مفاجأه انا وهو وهي واختها الصفيره 4 سنوات قال طيب
عزمتنا اخته في استراحه عندها وطلعنا وهناك طلب منه زوج اخته يشوف له مستأجر بالسنه للاستراحه
قاله انا اخدها منك بأربعين الف في السنه ومن بكرا المبلغ يكون عندك
طبعا انا انصدمت لكن ما علقت ولا بكلمه انتهت سهرتنا ورجعنا البيت وطول الطريق يقولي اش رايك ناخدها وبدل سفركم في الصيف نصيف فيها وانا اقوله انشاءالله قالي انت الواحد حرام ياخد رايك انت زي قلتلك انت وانت قلتلوا يعني لو قلت رأئي راح تاخد بيه قالي لا الرسول عليه الصلاه والسلام يقول شاوروهم وخالفوهم
قلتلو ما قال اول شوف طلبات المدارس وبعدين الترفيه
طبعا ثار في السياره وانت قليله ادب وما يخصك انا ما ابغاهم يكملوا تعليمهم طبعا انا شفت الموضوع كبر سكت والصراحه خفت لان اول مره اشوفه بالحاله دي رجعنا البيت ودخل ينام جبت كاسه عصير زي كل ليله واعطيته يشرب وفوقفت عند باب غرفتي وقلتله تبغا منى شي قالي انقلعي من وجهى
انا سرت زي التايهه واكلم نفسي مين هذا عمره ما اتلفظ بكلام جارح اليوم مو طبيعي وافكار وكلام استرجعه وسبحان الله لاول مره في حياتي 20 سنه عشره عمري ما فكرت استخير عليه
وهذيك الايام ماني حافظه دعاء الاستخاره هي جمله وحده قلتها بعد الصلاه وكنت اقولها في سري خفت لا يسمعها
(يارب اذا حياتي مع هذا الانسان ليا خير فيها كملها,واذا فيها شر اصرفها)وقمت نومت هو كانت بدايه اجازته وطلب مني الغدا اكل جاوي (اندونيسي)واختى طلبت خدامتى تساعدها لان اصحاب زوجها طالبين اكل بحري ومحتاج شغل
صحي من النوم من 10 وانا كنت سهرانه للفجر افكر في تصرفاته صحيت بنشاط وجهزت الفطور وفطرنا وكنا نتكلم جدا عادي وجلس يقولي ها اش راح تغديني خلاص الجاوي قلتله اكيد قالي طيب انا اخد الخدامه لاختك وانت جهزي الاكل 1 ونص يكون جاهز قلت ابشر
نسيت اقولكم ان لمن سكنا عند اخوه بعد سكنتنا بسنه اتوفى اخوهم الصغير وزوجته وتركوا 5 اطفال كانو في رعايه اخوهم الكبير اللي احنا ساكنين عنده فطلب اخوه الشقه عشان العدد عنده كبير من الاولاد وكمان 5 اولاد اخوه يحتاج مكان اكبر وطلعنا ندور بيت دخنا وما حصلنا شي مناسب قال ابويا تعالو في الملحق انا اكبره لكم ووقت ما تبغوا تتطلعو براحتكم ورفض ياخد ايجار وقال اخد ايجار من ولدي انت زيك زي اولادي لا ندفع كهرباء ولا تلفون كله ببلاش
المهم خرج هو الخدامه وبعد ساعتين اختي تتصل وتقولي اش بتعملي قلت باطبخ قالت لمين قلت لزوجي ولنا قالت اش سار بينك وبينه طبعا انا ولعت وفكرت ان الخدامه قالتلها شي مع ان خدامتي لها عندي 8 سنوات ومستحيل تتكلم وفلبينيه وتتكلم انجليزي وما تعرف عربي كثير واختى ما تفهم عليها قلت مين قالك قالت هو عندنا ويقولك جهزي ملابسه كلها والا راح يطلقك ضحكت وبكيت وقلت انت كذابه حلفت انها ما تكذب وقالت انه جالس يتذكر اشياء من ايام زواجكم انه اتحملك ما تعرفي تطبخي ولا تغسلي وكلام كثير يضحك ويبكي قلتلها ماراح اجهز ملابسه عشان لايقول طردتني من بيت ابوها قالتلي بلا جنان راح يطلقك قلت ماراح يطلق مالك شغل
اتصلت اختي بخالتي واخوه وقالتلهم قالولها خليها تعطيه جزء من الملابس
طبعا اختي من الصدمه اتصلت باخويا اصغر مني بسنتين اخويا هذا ملتزم وييصرف بحكمه طلع عندي وقالي يا اختي اكيد في شي مضايقه الله يرضي عليكي اعطيه طلبه وهو عاقل ما يتصرف غلط انا اعرفه طبعا كل اهلي يحبوه لانه حكيم وعمره ما زعل احد
جات الخدامه واختي واختي لغت اصحاب زوجها من الغدا وجلسوا يساعدوني
حطيت ملابسه بس مو كلها واكرمكم الله حطيت كل زوج جزمه في كيس زباله نظيف لانها كثيره ولكل لبس له جزمه وحطيتها في كرتون فاضي حق مناديل وغلفتها بلصق والملابس في شنطه وسط وارسل السواق اخدها
انا كنت اتصل عليه ابغا اكلمه اشوف اش سويت ما كان يرد عليا ويتصل على اختي ويقولها ترى لو اتصلت راح اطلقها بعد صلاه المغرب اتصل على اختي وقالها
انا طلقت اختك عشان حطت ملابسي في كرتون زي السواقين
والله والله والله ساعتها اختي تبكي كانها هي اللي طلقها وتقولي طلقك طلقك وتبكي وانا اضحك واقولها طيب انت ليه تبكي طلقك انتي والا طلقني انا وطلع اخويا الصغير يهدي عليا وانا كنت ولا كانه شي ساعات اقول من الاستخاره وساعات اقول صدمه
اذن العشاء ودخلت اتوضيت وانا بأصلي بس كبرت وسرت ابكي بصوتي وما اعرف اش قلت في الصلاه وسلمت وهدات ورجعت صليت وقلت يارب اذا كان الطلاق خير ليا فأنا راضيه بحكمتك
ولو سكت كان الامر هين الا خرج ما خلى بيت اللي ما اتكلم فيه كلام ضدده وكلا م صعب يقوله قلب الحقائق كدب
اهلى ما عندهم خبر اتصل اخويا الكبير عليا وقالي لاتزعلى نفسك وانا كلمت ابويا لازم يكون في الصوره ,بعدها اتصل ابويا وهداني وقالي اي شي تبغيه اخوانك موجودين ولا تزعلى نفسك انت عندك سكر واذا هو ما يبغاكي انا ابغاكي ولا يمكن افرط فيكي انت قطعه منى واولادك اولادي وفي عيوني وبعد اسبوعين وصلو اهلي وامي ما تعرف شي امي قلبها ضعيف ماتتحمل اي وحده تتطلق وتجلس ايام وليالي تفكر في اي وحده اطلقت حتى لو كانت مجرد قصه من مجله فما بالكم ببنتها اللي عمرها ما اتخاصمت مع زوجها ولا رجعت مره غضبانه عندها
اول ما وصلو اهلي كل سنه متعودين نسويلهم عشاء في بيتهم ونكون كلنا متواجدين طبعا هى دخلت سلمت علينا كلنا وتسال عن زوجي قلنالها في عمله وفجاه تتصل امه وتقولها معلش شيطان عليه لعنه الله امي ما فهمت وقالتلها خير قالت ليه ما دريتي ان ولدي طلق بنتك امي جاتها القوه وقالتلها وما ادري لكن مع السلامه ولدك الخسران واعتذرت منها وقفلت الخط وسارت تبكي منهاره هديت عليها وقلتلها ياامي نصيبي كدا وانا راضيه بيه طيب اش سار اش الاسباب حكيتهم قالي ابويا اخصريه
هو اتصل بولدي وقاله جهز نفسك انت وكل اخواتك وتعال راحو اولادي هذا كله حصل في الاسبوعين الاخيره من رجب دخل شعبان وجلس يتكلم بالكدب والصدق يبغا يرسل احد يتوسط وابويا رفض قال هو يجي ويقولي ليش عمل كدا طبعا هو لقى انه يلوي ذراعنا ويحرمني من اولادي شهر شعبان وانا حاموت وابويا يصبرني ويقولي لا تضعفي حيجي راكع وانا اللي كان مصبرني اني متعوده كل صيف اولادي 3 شهور يسافروا مع اهلي مصر بس قلبي يقولي ما راح اشوفهم صبرت صليت ودعيت شهر رمضان الليل ابكي والنهار اسوي نفسي عادي وامي اذا شافتني ابكي تقولي اصبري وربي يفرجها واذا شافتني ساكته تقولي ابكي لايسير فيكي شي فضفضي كنت شايله هم امي يسير لها شي
هو بعد ما طلق ورجع ابويا قاله نبغا صك الطلاق هو خاف وقاله انا رجعتها طبعا كان عليه مؤخر 35 الف قاله اذا تبغا صح اعمله خلع من المحكمه قاله ابويا حاضر ومهرك راح يرجعلك انا ما ادخل على بنتي حرام وطلعت انا وابويا المحكمه وعملنا خلع بس هو رفض ياخد ريال لان اتفق مع خالي يسوي اي شي يطلبه ابويا وبعدين يتفاهموا طبعا هذي خطه بين ابويا وخالي لو كان فعلا هو يبغاني وفي شياطين بلعبوا في عقله وانا زي الاطرش في الزفه
يوم 18 رمضان قالي ابويا صك الخلع وصل اقرايه قلت ولا ابغا اشوفه ويوم عشرين دق جرس الباب قبل المغرب واولادي في حضني يبكو ويقولو اوحشتينا واحنا ما راح نرجع بابا قال اجلسو عند امكم اسبوع طرت من الفرح قالي ابويا شفتي ما قلتلك ولسه راح تشوفي اكثر
طبعا نسيت كل شي والحمد لله اني معوده اولادي ما يشيلو كلام من هنا ولا من هناك كل اللي قالوه ياماما بابا نحف وما ياكل ويبكي في الليل ويقول امكم ما تستاهل وتاني يوم راح لابويا في عمله وسلم عليه واعتذر منه وقاله شياطين الانس اقوى من شياطين الجن واتصل على اخواني وراح بيتهم اعتذر منهم لانه اتكلم فيهم انهم بقولو للناس انه ساكن عندنا ببلاش واحنا بنصرف عليه وطبعا الكلام دا من راسه
سار كل ليله يجي يسهر عندناوانا اقول لابويا هدا اش جابه يقولي جاي لامك وليه انت تبغيه قلت مستحيل قالي ولا انا موافق يرجعلك
كلمت وحده قريبتنا تفسر احلام وملتزمه حكيتها حكايتي قالت ارجعي استخيري قلت خلعته قالت استخيري تاني جلست باقي رمضان استخير واشوف رؤيا واحكيها تقولي ان شاءالله في رجوع بس برضه استخيري راحو بناتي قبل العيد بيومين وجاني ولدي معاه 3000 الاف ريال يقولي هدي يقولك بابا كسوه لك رجعتها وقلتلو مشكور ابويا كساني زي كل سنه جاء العيد وجابولي هديه اولادي بباقه ورد وعلبه فيها خاتم الالماس والفاتوره باسم ولدي يعني منه قلت لابويا اقبلها قال اقبلبها هدي من اولادك
عدا العيد واولادي عيدو معايا وليله المدرسه دق جوالي وانا باصلي المغرب عند خالتي طبعا كنت مسجلته في جوالي ( حبيبي) وانا مع الارقام ما احفظ واكيد مسحته من جوالي بعد الصلاه دق تاني فتحت الخط وهذا يبكي وسامحيني وانت حبيبتي ونور عيني وهذا شيطان وانا ما افرط فيكي وانا وانا
طبعا انا ساكته وهو يقولي شيلي جزمتك واعطيني بيها لان فرط فيكي انا سمعت الكلام دا وجلس اقوله انت دحين اش تبغا متصل
قالي ابغاكي ما اقدر اعيش بلاكي انا ما انام انا وزني نزل قلتلو لوله حقت اول ماتت وانت قتلتها قالي لا انت لولتي وانتى نور حياتي وانا ما استغنى عنك قلت انا اتغيرت مو زي اول قالي وانا راضي بيكي جلس 10 ايام يكلمنى اخر الليل ونستعيد زكرياتنا الحلوه كل دا واهلي ما يعرفو شي وقالي انا راح اجي اخطبك مره تانيه وقفل وتاني يوم لبس وحلق وجاء لابويا هو وخالي وقاله ياعمي انا ابغا مراتي واللي تامر بيه انا حاضر قاله ابويا ما ابغا غير سعاده بنتي قاله بكرا نملك قاله ابويا خير قاله طيب ممكن اشوفها قاله ابويا بعد الملكه قاله اعتبرها الشوفه الشرعيه والله وحشتني قاله ابويا لا بعد الملكه خرج من عندنا على المملك قاله لازم تعمله تحاليل كلم ابويا وقاله التحاليل تاخد 10 ايام وانا مستعجل قاله ابويا اللي صبرك 3شهور يصبرك 10 ايام كلم خالي قاله مدير المستشفى صاحبي سوي التحاليل الصباح والنتيجه 2 الظهر تجهز
رحت مع ولدي وهو لوحده وعملنا التحاليل يقولي اكشفي وجهك قلتلوا غطيتني برغبتك وصعب ارجع اكشف
وفي الليل جاب المملك واشترالي ابويا فستان ورحت للكوافيره كاني عروسه جديده وهو حجز في فندق جده وستن جناح وولدي كتب على الترته الف مبروك ولا تعيدوها تاني جلسنا يومين كانها شهر عسل ورحنا بيتنا وكا ن طاير بيا عشت سنتين قمه في السعاده كنت ارسل بناتي لامي الويك اند واقولهم عندي تنظيف في البيت كنت اعمله جلسات وليالي رومنسيه وكانت مفاجاه ارسل البنات مع اختي واتصل عليه لا تتاخر عشان تعبانه يقولي 10 واكون في البيت واول ما يوصل يلاقي البيت هدوء وريحه حلوه وانا لابسه ملابس يمكن اللي في سني تنكسف تلبسها بس انا كنت احب امتع نفسي وامتع زوجي وكان يتفاجأ ويقولي طول عمرك تغلبيني بمفاجأتك بس طبعا اتغيرت شويه يعني اول كل ما يطلب شي حاضر ومن عيني ولا تزعل نفسك اما بعد الرجوع لو ما اقتنعت ما اوافق واقوله اقنعني او ما ني مقتنعه المهم حسسته اني ليا رائ مو زي اول بقرا مربوطه في ساقيه تمشيها على كيفك بدون اي احساس بمشاعرها
طبعا هو في البدايه كان عادي بس بدا انت اتغيرتي انتي ما كنتي كدا كنت اطلبه فلوس يقولي ما عندي اقوله اجل فين بتودي راتبك وعندك تجاره بتدخلك دهب يقولي انتي جايه تحاسبيني المهم ولدي قرر يكمل الجامعه في مصر وعشان يدخل بعثه الملك عبد الله لازم يدرس على حسابنا اول سنه وبعدها البعثه
قالي السنه دي ورايا التزامات ما عندي ابويا قاله ولدك ولدي زيه زي ولد خاله انا احطهم على اول الطريق وعليهم الباقي
انا مستعد اتكفل باول سنه سكن ودراسه واكل ومصاريف لو دخل في البعثه اوك ما دخل انت تكمل معاه قاله طيب
قلت انا كمان اتوظف واساعد ابويا واصرف على نفسي قالي طيب
اتوظفت باعجوبه لاني ثانويه عامه وغيري جامعيات وما حصلوا بس سبحان الله ربي كان واقف معايا سافر ولدي وسافر ابويا معاه وسكنه وسجله وتتم عليه ورجع واتوظفت انا وكنت مبسوطه وهو رضي بالوظيفه لمن عرف اني ما اتنازلت عن نقابي وكنت موفقه بين عملي وبيتي وكان مديري جدا متساهل معايا ارجع اطبخ واتغدى مع اولادي وزوجي وارجع العمل اكمل ساعتين وارجع تاني البيت الين جاني في اول رمضان قالي لو ولدي دخل في البعثه تسيبي العمل قلت ليه قال خلاص كفايه عمل قلتلوا طيب لو طلبت فلوس تعطيني قالي انت شايفه الحال واقف قلت الحال يوقف عندي بس اما لاولادك شغال وسبته ونمت طبعا هو اتعود ان طلباتي من ابويا وانا لمن رجعت فتحت عيوني على كل كلمه هو قالها بدا في رمضان انا ما ابغاكي تنزلي سوق لوحدك طيب قوم وديني, انا تعبان طيب مين يجيب الكسوه؟ موضروري قلت حاضر اللي تامر بيه وسار ياخد البنات وهو يكسيهم وانا مش مهم قلت عادي ماراح تموتي لو ما لبستي جديد وعندك عمل يعني مافي زيارات
اعطيت اختي اشترتلي قمصان نوم لان احب اكون في بيتي ملكه مو مهم برا البيت طبعا بدون علمه ابغا افاجاه
نسيت اقولكم ما كان يصلي زمان وقلبي يتوجع وانا اصحيه لصلاه جمعه بس قبل الرجوع رجع لعقله وكل فرض في المسجد ويقرأ طول الليل طبعا بناتي كانو يحكوني وهذا اكثر شي خلاني افكر ارجع بدا يتغير يتخيل اشياء ما حصلت ولو حلفت انها ما سارت يصرخ عليا
مره صحاني من نومي في رمضان ويقولي مين اللي كان بيكلمك في التلفون وكنتي تكلميه بصوت واطي احلف والله ما كلمت احد خد الجوال وشوف المكالمات الوارده يقولي على مين مسحتى المكالمه بعد ما خلصتي
مين اللي بتكلميه في الدرج وانت طالعه كنت باسمعك من الانتر فون
كل كم يوم بحكايه
مين فلان اللي اسمه في جوالك اقوله هدا ولد اخويا طيب ليه كاتبه حماده وهو محمد
والله شيبني من اسئلته وانا اقول متوتر زعلان وجالسه التمسله اعذار لاني احبه وما احد في اهلي يدري باي شي لحد ما جاء العيد وكنا قمه في السعاده واولادي طلعو كباين مع اهلي وانا قلت لالا انا راح اعيد مع حبيبي وراح نعيد ايام العسل حقتنا وهو فرح
كنت كل ليله نعمل عرسان واحنا في قمه السعاده نصحى من النوم نفطر ونجلس اللين الليل نطلب العشاء كل ليله من مطعم عشنا عرسان بمعنى الكلمه
وفجأه .......................... انتظروني في الجزء الخامس

Abdullah7th · 13-07-2009, 19:17

واخيرا

علقت قبل ما اقرأ ..وحاليا ...قاعد أقرا بتروي

لوله العسوله · 13-07-2009, 19:23

تسلم بس قولي لسه الاحداث ما انتهت لليوم اكملها او اختصر ليوم الطلاق
مع اني احس براحه كبيره وانا اكتب كاني باكتب فلم وانتظر رائ الجمهور فيه وحياتي ما انتهت بعد الطلاق بدات احداث جديده بمعاناه

Abdullah7th · 13-07-2009, 19:40

قرأت كل كلمة ...وبصراحة متعجب منك ...يعني فيه شيء غريب ...نصرفاته كانت بالنسبة لك غريبة وغير متوقعة ..طيب ليه ...يعني انا بعرف الزوجة انه حافظة زوجها غيبا ..وهو بالنسبة لك يطرأ عليه اقوال وافعال غير متوقعة لك ...
وفي شيء آخر ..احسن ان احترامه لجنس النساء منخفظ ومبني على الشك ...مثلا بنلته ما يحب يعلمهم كما قال لك مرة عند موضوع الاستراحة ...ويسألك من اللي اتصل ..طيب انت زوجته ..يعني لو رآك بموقف غريب لازم يستفسر مش يتهم ..يعني الواحد ما يعرف زوجته !!

بانتظار الجزء الخامس يا اختي لوله ...

Abdullah7th · 13-07-2009, 19:42

لا ..لا تختصري الاشياء المهمة ..اكتبي براحتك ...واللي متوقعة ...كنت متوقع انه متزوج عليك بالسر ...ولكن الحين اتوقع ان اللي جرى له حسد أو سحر ..وغالبا سحر ...

Hector Ferrer · 13-07-2009, 19:43

الله يسعدك ويعوض عليك...

لوله العسوله · 13-07-2009, 19:48

بالنسبه لتصرفاته كان جدا طبيعي ويحترمنى ويحبني فجاه انقلب وهدا اللي خلاني اسكت وما اعلم احد بشي ظنن منى انه عارض وحيعدي خصوصا ان كل الاحداث دي وتصرفاته سارت قبل طلاقي التاني بشهر واحد

Hector Ferrer · 13-07-2009, 19:49

اقتباس:

المشاركة الأصلية كتبت بواسطة Abdullah7th

لا ..لا تختصري الاشياء المهمة ..اكتبي براحتك ...واللي متوقعة ...كنت متوقع انه متزوج عليك بالسر ...ولكن الحين اتوقع ان اللي جرى له حسد أو سحر ..وغالبا سحر ...

وانتااا الصادق اخي واضح من الجزء الاول..انه السبب حسد او سحر..الله يسعدهااا اختنا ويعوض على صبرهاااا بالسعادة في الدنيا والاخرة.....

..هــــــــــــدب.. · 13-07-2009, 19:59

قصه مؤثره واسلوب جدا رائع
الله يهون عليكي يارب
كملي بس بالله بدون اختصار نبغى التفاصيل
بنتظارك

لوله العسوله · 13-07-2009, 20:06

اقتباس:

المشاركة الأصلية كتبت بواسطة Hector Ferrer

وانتااا الصادق اخي واضح من الجزء الاول..انه السبب حسد او سحر..الله يسعدهااا اختنا ويعوض على صبرهاااا بالسعادة في الدنيا والاخرة.....

اشكرك على المرور تابعوا وانتو تعرفوا

لوله العسوله · 13-07-2009, 20:10

اقتباس:

المشاركة الأصلية كتبت بواسطة طليقة تيفا

قصه مؤثره واسلوب جدا رائع
الله يهون عليكي يارب
كملي بس بالله بدون اختصار نبغى التفاصيل
بنتظارك

تسلمي طليقة تيفا على دعواتك ليا وربي يعوضك انت كمان
وانا اوعدك بالتفاصيل بس اوعدوني ما تملوا

قطاف الصبر · 13-07-2009, 20:12

الشك مرض ...الله يشفي كل من اصيب به

أعانك الله ... ننتظر تكملة الجزء الخامس

لوله العسوله · 13-07-2009, 20:18

اقتباس:

المشاركة الأصلية كتبت بواسطة Hector Ferrer

الله يسعدك ويعوض عليك...

يسلموووووووووووو على المرور والدعوات اللهم امين ليا ولجميع المسلمين

لوله العسوله · 13-07-2009, 20:21

اقتباس:

المشاركة الأصلية كتبت بواسطة قطاف الصبر

الشك مرض ...الله يشفي كل من اصيب به

أعانك الله ... ننتظر تكملة الجزء الخامس

استنتاجك في محله تابعوا الاجزاء الباقيه
واشكرك من اعماق قلبي

بـريق الألماس · 13-07-2009, 22:11

يـاعـزيـزتي ماشاء الله على سردك للموضوع رائع
جميل الإنسااان يتصف بالطيبة لكن الأجمل من يستحق ومع ذلك حاااولتي تغير نمط
حياااتك للأفضل وتغير الجو الروتيني للحياة الزوجية
سامحيني أختي على تعقيبي لكلامك وهذا من إعجابي لسماااتك التي تتصفين بها
الله يعوضك بحياااتك وعقبااال ماتفرحين بعيااالك
ومتااابعينك بدون كلل ولا ملل

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

حياتي بين يدكم ..............الجزء الرابع