عالم الحياة الزوجية - منتدى

realistic_777 · 17-08-2009, 23:00

السلام عليكم ورحمة الله وبركاته...

ياساده ياكرام هذي السالفه ممكن تحصل لكم او لأحد من اقاربكم...وردة الفعل اكيد تختلف من شخص لاخر...وبصراحه انا كتبتها في المنتدى علشان يطلع عليها الاعضاء وخصوصاً البنات علشان يعرفون ان احياناً سبب رفض العريس لها مو لشكلها بحد ذاته...بس يمكن فيه اشياء ثانية اثرت عليه وخلته يتراجع عنها.

كم تمنيت لو كنت اعرف طريقة اقدر اشرح للبنت اسباب رفضي...ولكن الظروف حالت ولا حول ولا قوة الا بالله...عاد انا قلت خلني اخليها رساله عامه للجميع وبنفس الوقت ادعي الله ان تقراء بنت الناس كلماتي هذي وتعرف شعوري تجاها.

واليكم القصه:

في يوم ما عزمت على الزواج وبلغت اهلي (امي"الله يعافيها" وخواتي) بأن ودي اعرس وبنفس الوقت كنت احاول ادخل على بيتنا السرور الي كان مفارقنا من فتره - وافرح ابوي...وامي بالذات الي مابقى بعمرها كثر ما مضى (ادري ان الأعمار بيد الله...لكن مرضها خطير عافاكم الله ومن تحبون)...وقاموا مشكورين بالبحث...ووقع اختيارهم على وحده ما شافوها قبل كذا (لأن مافي ببالهم وحده للزواج وبنفس الوقت الي يعرفونهم خواتي متزوجات) ولكن الناس ما قصروا واذكروا لهم وحده خلوقه ومملوحه وبنت حموله طيبه...اتصلت امي على امها وعرفت عن نفسها وسبب اتصالها...وبعد اسبوعين او ثلاثة جاء الرد منهم بالموافقه وقالوا سألنا عن ولدكم وما سمعنا عنه الا الخير...بس ابوها وده يشوفني ويقعد معاي اول (وترى ابوها هو سبب كتابتي لهذا الموضوع ومحور القصة هنا!!)...وبالفعل تواعدت انا وياه على يوم على اني ازوره في البيت.

اول ما استقبلني عند الباب وهو يسلم علي كان يناظر فيني بزياده واطال النظر (بصراحه استحيت وقلت لا يكون فيني شيء غلط وانا مدري؟) وكانت على محياه ابتسامه تكاد لا تراها!!...دخلت المجلس وجيت بجلس او اني جلست (ما اتذكر) قالي لا تقعد هناك...تعال اقعد هنا!! قلت له شكراً انا مرتاح هنا يا عم...قالي لأ...قوم واقعد هنا الجو ابرد لك بجلافه شوي "بصراحه هذا الي حسيته"!! (مع ان المجلس كان بارد وقتها والتكييف تمام!!) وظل اصبعه مشدود يأشر لي على مكان الجلوس المقترح (كالطالب المتحمس للإجابه على سؤال الأستاذ!!)...الا يبيني اجلس بهذا البقعه بالتحديد!! قلت له ان شاء الله وجلست بالمكان الي هو يبيه...(بصراحه حسسني بتعامله معي...كالطفل الي ينهره ابوه...الله يسامحك ياعم... هذا وانا على مشارف الثلاثين من العمر...جالس تعاملني كذا!! اجل لو كنت فطفوط وعمري تحت العشرين وجيت اخطب من عندك وش سويت فيني؟

وبداء الحديث وقال مافيه احد بالبيت الا انا وولدي وأنت...والأهل تراهم طالعين...بصراحه انا مدري وش كان يقصد بكلامه! "انا بداخلي اقول تراني عارف ان هذا اليوم ماهو بيوم الشوفه ياعم"...المهم جلس يسولف بسوالف جس النبض والتسحيب (الي اتوقع اغلب الشباب عارفينها..وبصراحه ودي اوجه رساله لأعمام المستقبل... الله يخليكم بطلوا هالحركات...انتوا ما سألتوا عنا؟ انتو ما استقصيتوا عنا؟...خلاص شنو هذا؟ وشو شايفينا الله يسامحكم...ترى بعض الشباب الزم ما عليه سمعته وسمعة والديه واهله...ترى ان صلح حالنا قالوا لنا الناس "الف رحمة على والديكم"...وان غلطنا عليهم ترى اقلها يبي يقولون "الف لعنه على من رباكم" وبصراحه انا عن نفسي ما احب احد يقولها لي...واكيد كل واحد في عقله مخ وعنده مشاعر...وترى حنا جالسين طول هالسنين نحاول نحافظ على سيرتنا عند العباد ورب العباد.

عقب ما انتهى كلام التسحيب وجس النبض...لاحظت سوالفه اخذت منحى جديد وقام غير الموجه الى إذاعة المفاخره والتكبر او هكذا شعرت!!...يعني جلس يسولف احنا سوينا واحنا فعلنا وجينا ورحنا وقام يذكر لك شخصيات من امراء وتجار ووجهاء!! (وهذي رساله ثانيه موجهه لكم يا اعمام المستقبل...اتركوا الكبر والخيلاء فلربما كان هذا الذي قدامك ضعيف وعلى قد حاله وبنفس الوقت ما تكون عنده ثقه بنفسه فيقوم يهون عن بنتكم...او يمكن يكون العكس ويعرفهم عز المعرفه اكثر منكم بحكم صداقتهم اوعلاقتهم العمليه او لربما قرابتهم فيه ولأسرته وانتم ما تدرون) على العموم سكت واصغيت له...الا صح نسيت على طاري الشخصيات الي ذكرتها يا عمي "ترى كان في واحد منهم يجي عند ابوي الديوان كل اسبوع يسولفون ويتجاذبون اطراف الحديث مع بعض...وواحد ثاني ترى تربطنا فيه صلة قرابه...وواحد وواحد وواحد" مدري احس اغلب الي ذكرتهم حبايبنا مثل ماهم حبايبه!! J

على العموم عطيته جوه وخليته يسولف وانا مصغي له وبنفس الوقت منبهر منه!! تقولون لي وشلون منبهر منه؟ لأني كما سمعت من الناس عن هالرجل وقبل لا اشوفه...كانوا يثنون عليه ويقولون انه "طيب وهادي ومتواضع" ومثقف (يعني يبي يكون متفهم وواعي) وهذا الشيء حببني فيه وفي بنته حتى قبل لا اشوفها...وفوق هذا وبصراحه حبيته زود يوم شفته ملتزم "متدين"...وكنت قبل لا التقي فيه كنت اسولف لواحد يقرب لي وبنفس الوقت close person to my heart (يعني بالعربي احبه زعاده اخو لي) اني ان شاء الله بنسجم معاهم وحاس اني برتاح معاهم كثيررر...ولكن بعد الي شفته ورأيته من العم الله يصلحني واياه...خلاني استغرب تصرفاته وهذا سبب الانبهار منه...ولكن الى الان تصرفاته لم تثنيني عن المواصلة في موضوع الزواج من بنته...لأني متوقع خمسين بالمائه من هذا اللقاء.

الحاصل خلصت مقابلتي معاه...او خلوني اقول اختباراته لي واستفراده لي (لا تزعل ياعم ترى للحين احبك واقدركJ)...واتذكر قبل لا اطلع من عنده كان يقول لي خل امك وخواتك يجون يشوفون البنت وامها على الخميس الجاي..."وكان يقول لي اسمع لوصف خواتك اكثر من امك واعرف وش يقولون لك عنها قبل لا تجي وتشوف البنت النظره الشرعية"...انا هنا بصراحه حطيت مليووووون question marks على هذا الكلام... وما عرفت شنو يبي وتحيرت حيل بكلامه وشنو يقصد بقولته (اسمع لخواتك اكثر من امك واعرف وش يقولون لك عنها قبل لاتجي تشوف) كلامه يبين ان موافق على النظره الشرعية...وبنتك؟ مالها راي تقوله لي؟ ولا وش السالفة؟ بصراحه كلامك ما كان مفهوم اطلاقاً (في تلك اللحظة)...لأنه النظره مسموحه عندنا وبمحيطنا...ومافيها اي اعتراض من افراد مجتمعنا؟

المهم سلمت عليه ومشيت من عنده ورحت البيت...وطبعاً اول ما دخلت البيت هاتك يا اسأله من الوالده والاخوات...طبعاً انا ما قلت وش صار بالضبط ولا بينت لهم اني شوي متضايق من اسلوبه...بل على العكس قلت لهم ان عمي ذهب وعسل وورد طايفي!! وياحظي لو ناسبته وبينت لهم اني مسرور واخر انبساط مع عم المستقبل...وانا طبعاً ليلتها جلست سهران احلل الموقف والحديث الي صار بينا...وقعدت احاول اقنع بنفسي واقول لها...اترك عنك الوساويس وترى عمك طيب وحبوب والناس تذكره بالخير...لا تحكم عليه من اول لقاء...وخلك طبيعي...بس والله تعرفون يا اخوان "first impression" وربي لها تأثير كبيررر.

جاء يوم الخميس وصلت امي مع خواتي لبيتهم وطبعاً قبل لا انزلهم احس اني قلبت روسهم بكثرة توصياتي لهم بحيث انهم يبينون لهم مين انا وكيف طبعي واني انا بزوج نفسي بنفسي واني ماني مثل باقي الشباب الي مصاصته للحين بفمه واني شايب حيل بتفكيري...وبعض المواضيع الي تعتبر عندي حساسه حيل ومصيريه (مثل نوع الدراسة او اذا براسها وظيفة وإختلاط "مع اني ما اظن ابوها كان يسمح لها..بس للحيطه والحذر" وشغلات كثيررره)...واجلسوا عندهم ساعتين او اكثر قليل...ولكن يشهد الله انها كانت عندي يومين او اكثر من طولها...وطبعاً ما يحتاج اعلمكم بحالي في ذاك الوقت...صاير مثل البزر الي مضيع امه...قاعد افتر بالشوارع لحالي واتربص لجوالي احتريهم يدقون علي علشان اجي اخذهم واعرف بالي صار معاهم وكيف وصفهم للعروس؟

واخيراً اتصلت وحده من خواتي وجيتهم طيران وما يحتاج اعلمكم وش صار بعدها...وكيف كان حال امي وخواتي من الصداع الي جاهم مني J...وطبعاً قبل لا يطلعون من بيت العروس كانوا قد اتفقوا على يوم تكون فيه "النظرة الشرعية"...وطول ذا الوقت هاتك ياتفكير ومحاتاة.

جاء اليوم الموعود والي انا منتظره بقلق...وطبعاً كنت لحالي زي اول مره لا امي معاي ولا ابوي...واستفرد فيني عمي مع ولده Jومن هنا احب اقولهم جزاكم الله عني كل خير على الضيافة ما قصرتوا...المهم صاح الابو على البنت علشان تجي...طبعاً انا دوروني ساعتها (وجهي صار الوان ومدري بطني مغصني حييييل)...وااتوقع حتى هي بعد...لأني حسيت ان ابوها يوم صاح عليها مابغت تجي...وما جت الا مع اخوها الصغير...شكله قعد يسحب فيها علشان تجي...يحلليلنا مستحيين J (وبالمناسبه احب اقول للبنات ترى حتى حنا زيكم ويمكن اردى)...طبعاً جت وجلست وانا عيوني على الارض اوعلى العم "ودي اقوله عمو عمو عمو شفت حصلي ازاي"...واحاول استرق البصر للبنت كل ما حول العم نظره عني...ولكن للأسف كان مركز اغلب الوقت علي...ولكن دق جواله وقام من مكانه...انا انبسطت وقلت هذي فرصتي اشوفها زين...ولكن للأسف هو قام من هنا وقامت بنته معاه...واخوها وراها...وبعد اقل من دقيقه رجع لي ابوها وهو مازال يتكلم بالتلفون...

الان هنااااااااا ابيكم تركزون معاي شوي...

كان يتكلم مع واحد ويقوله ابشرك ولد فلان الفلاني خطب بنتي .... انا بصراحه هنا انصدمت من هالأسلوب...وقعدت فاتح فمي قدامه وما عرفت وش اقوله...اقسم لكم بالله اني حسبته يمزح او يمثل علي...يعني قسم بالله لو اني ماني عارف انهم ناس مستورين كان قلت ان في بنته بلاء ويبي يتخلص منها وعلشان كذا سوى هالشيء مثل الي يبي يحطك قدام الأمر الواقع!!...ولو اني للحين ما شفت بنته المسكينة كان قلت ان فيها عاهه او عيب خلقي!!...بصراحه انا هنا ضاق صدري حيييل من الحركه الي سواها قدامي (لأن بعرفنا وعاداتنا ما ينشر خبر مثل كذا او نتكلم فيه عند احد الا بعد اتفاق الأسرتين وقبول الأثنين المعاريس لبعض!!...مدري هو وش كان يبي يبين لي او يوصل لي من رسالة؟...مدري هي (رضيتوا ولا نرضيتوا ولا وشو بالضبط ياعم؟)...انا بصراحة زعلت ولكن كظمت غيضي وقلت سوي روحك مافيك شيء...وطلعت من بيتهم مبتسم ابتسامه صفراء لا تكاد ترى.

دخلت البيت وكانت امي موجوده وسألتني هاه شرايك؟ مارديت عليها وصعدت غرفتي وسكرت على عمري ليلتها...وخواتي يتصلون على جوالي وانا ما ارد عليهم...وامي نفس الشيء ودها تكلمني واقولها بعدين اكلمك...جلست مع نفسي ابي اعرف هو ليش سوا معي كذا؟ وهل فعلاً كان ذايع الخبر من غير ما يعرف رايي وراي بنته!! وبالفعل تبين لي لاحقاً انه كان ذايع الخبر عند امة لا إله الا الله!! لأني في ثاني يوم وانا طالع من البيت لاقاني جارنا في الشارع ومسكني يبارك لي! ويقول لي الف الف مبروك سمعنا بخطبتك من بنت فلان والله يبارك لكم!! يعني لاحظوا ترى البارحه صايره الشوفه؟ يا عمي...ودي اعرف انت الحين وش دراك اني اتقبل بنتك او هي تتقبلني؟ مدري مالنا راي عندك الله يسامحك!! ما تعرف تنتظر تشوف الرد من الطرفين؟ بصراحة انا عقب ما مسكني جارنا وقعد يبارك لي ما عرفت وش اقوله...وقعدت اصرفه وقلت له يمكن هذا واحد ثاني من الأسرة...قام رد علي لاااا انا الي سمعته انه ااانت...فلان ولد فلان وترى ابو فلان هو الي قالي هالشيء (وفلان الثاني...هذا واحد من الجماعة ايضاً)...انا هنا ايقنت يقين تام ان اغلب جماعتنا عرفوا بهالشيء...وحنا اصحاب الشأن للحين ما ابدينا رأينا ببعض وقلنا لأهالينا!! ... ليش ياعمي ودي اعرف سبب للي سويته ماني عارف؟

بصراحة انا هنا عطيت جارنا (الملقوف) ظهري وقلت له عن اذنك ورجعت البيت ودخلت على امي وقلت لها ما بيهااااا وهذي المره الثانية لأني في فجر هذا اليوم عطيتهم قراري بالرفض"بس هالمره بقهررر والدم مفور على الاخر" وابيها تبلغهم رفضي حالاً لأنها في ذيك اللحظة للحين ما اعطتهم جواب...واميمتي تحاول فيني...طيب ليش يا وليدي ماتبيها؟ قمت قلت لها ما جازت لي وخلاص...مع ملاحظة اني لو كنت برفض البنت عن شكل فهو ما راح يشكل 10% من قراري...ولكن اسلوب ابوها وتصرفه يمكن هو سبب 90% الباقية...لكن الواقع والصدق ابوها الله يهديه.

غلاي بهالدنيا(زوجي) · 17-08-2009, 23:34

الله يهدي ابوها ويرحم حال البنت مسسسسسسكينه مالها ذنب

كحلها سايل · 18-08-2009, 00:37

تريث اشوي اشوي يا خوي
الموقف اللي وصفته لنا .. من خلال السرد احسه محرج لك اكثييييييييييييير ..
وانا اعذرك في ترددك ؟
بس انت لك الأحقيه انك تصارح اهل البنت ع موقفهم و اعلانهم للخبر قبل ردك عليهم
وهذه مافيها نوع من الذوق و اللباقه و عاداتنااااااااا .. ما هي كذا ..
وبعدين انا مستغربه ؟ انت وياها لسى ما عملتوووا تحليل الزواج
لو لا سمح الله ما حصل توافق ؟ وكلن بيروح في حاله .. كذا المتضرر الأول و الأخير هي البنت
راح يفكرونها الناس انهااااااااااااا مطلقه و فاسخين عقد القران ؟
الموقف ما يتحمل انك تظل ساكت و امقفل عليك باب غرفتك ..
فهم الوضع بالأول اهلك و خواتك ؟ شووف وش رايهم .. وربي يلوم اللي يلوومك ..
صراحه مو قادرة اعطي مبرر واحد الى بو البنت الا انه متمسك فيك ؟ و شاريك فعلاااااااااااا
وباين انه طاير فيك ؟ والا محد يسوي سواته ابد ..
انت احسن الظن فيهم و يارب يكتب لك اللي فيه الخير و الصلاح
واذا ع البنت ما شفتها اكويس ؟ لك حق انك تطلب منهم تشوفها ماره ثانيه
هذه زواج ماهو لعبه لازم يقام ع قناااااااااااعه تامه ..
الله يهدي سرك عليك بالأستغفار ..
و بأنتظار المستجداااااااات ..
موفقييييييييييين ..

آخر وريقات التوت · 18-08-2009, 01:03

اولا الف مبروك

ثانين انت قبل لا تقبل على اي امر استخير الله اولاً وبعدين اقدم عليه

تصرف ابوها غلط يوم نشر ان بنتها انخطبت المفروض مايقول لأحد الين ماتتفقون وتتم الملكه

قال عليه الصلاة والسلام {استعينوا على قضاء حوائجكم بالكتمان فإن كل ذي نعمة محسود}

بس باين عليه انه شاريك اطلب شوفه ثاني ولاتستعجل بأمورك ولاتنسى الأستخاره

الله يوفقك ويكتبلك كل خير...

realistic_777 · 18-08-2009, 01:15

اقتباس:

المشاركة الأصلية كتبت بواسطة غلاي بهالدنيا(زوجي)

الله يهدي ابوها ويرحم حال البنت مسسسسسسكينه مالها ذنب

ااااامين

أحبه ياناس أحبه · 18-08-2009, 01:22

اولا استخير الله
ولايهمك كلام ابوها اهم شيء البنت انت راضي فيها توكل على الله
البنت مسكينه مالها ذنب ويمكن ابوها شاريك ولايبيك تهون
الله يساعدك ويسهل عليك

realistic_777 · 18-08-2009, 01:31

اقتباس:

المشاركة الأصلية كتبت بواسطة كحلها سايل

تريث اشوي اشوي يا خوي
الموقف اللي وصفته لنا .. من خلال السرد احسه محرج لك اكثييييييييييييير ..
وانا اعذرك في ترددك ؟
بس انت لك الأحقيه انك تصارح اهل البنت ع موقفهم و اعلانهم للخبر قبل ردك عليهم
وهذه مافيها نوع من الذوق و اللباقه و عاداتنااااااااا .. ما هي كذا ..
وبعدين انا مستغربه ؟ انت وياها لسى ما عملتوووا تحليل الزواج
لو لا سمح الله ما حصل توافق ؟ وكلن بيروح في حاله .. كذا المتضرر الأول و الأخير هي البنت
راح يفكرونها الناس انهااااااااااااا مطلقه و فاسخين عقد القران ؟
الموقف ما يتحمل انك تظل ساكت و امقفل عليك باب غرفتك ..
فهم الوضع بالأول اهلك و خواتك ؟ شووف وش رايهم .. وربي يلوم اللي يلوومك ..
صراحه مو قادرة اعطي مبرر واحد الى بو البنت الا انه متمسك فيك ؟ و شاريك فعلاااااااااااا
وباين انه طاير فيك ؟ والا محد يسوي سواته ابد ..
انت احسن الظن فيهم و يارب يكتب لك اللي فيه الخير و الصلاح
واذا ع البنت ما شفتها اكويس ؟ لك حق انك تطلب منهم تشوفها ماره ثانيه
هذه زواج ماهو لعبه لازم يقام ع قناااااااااااعه تامه ..
الله يهدي سرك عليك بالأستغفار ..
و بأنتظار المستجداااااااات ..
موفقييييييييييين ..

شوي كلمة انه احرجني...الله يسامحه...وزي ما قلتي ضر بنته وضيق صدري عليها...وللعلم الموضوع صار له سنه...وتراني يا اختي طلعت من غرفتي من ثاني يوم...واعطيت اهلي قراري بالموضوع...وتم الرد عليهم ان الله ما كتب نصيب...وان كان زي ما تقولين ان عمي شاريني بذهب فأنا والله كنت شاريه هو وبنته بألماس...بس صار الي صار وخلاص شكلها تسكرت الابواب بينا وبينهم...و أمي كلمت امها وعطتهم الرد الي ما كان عمي حاط له أي اعتبار.

اجمعني بها يارب H · 18-08-2009, 01:34

الله يعينكم .. ويكتب لكم اللي فيه خير وصالح ..!

كحلها سايل · 18-08-2009, 01:42

اقتباس:

المشاركة الأصلية كتبت بواسطة realistic_777

شوي كلمة انه احرجني...الله يسامحه...وزي ما قلتي ضر بنته وضيق صدري عليها...وللعلم الموضوع صار له سنه...وتراني يا اختي طلعت من غرفتي من ثاني يوم...واعطيت اهلي قراري بالموضوع...وتم الرد عليهم ان الله ما كتب نصيب...وان كان زي ما تقولين ان عمي شاريني بذهب فأنا والله كنت شاريه هو وبنته بألماس...بس صار الي صار وخلاص شكلها تسكرت الابواب بينا وبينهم...و أمي كلمت امها وعطتهم الرد الي ما كان عمي حاطه له أي اعتبار.

ربي يعوضك باللي احسن .. و يعوضها باللي احسن برضووو ..
سبحان الله كل شيء توافيق .. و الأرواح جنود مجنده ..
طيب من بعد هالسنه ؟
ايش اللى خلى فكرة الأرتباط تتأجل عندك ..
هل الموضوع له أثر سلبي ع نفسيتك ؟

realistic_777 · 18-08-2009, 01:42

اقتباس:

المشاركة الأصلية كتبت بواسطة اخر وريقات التوت

اولا الف مبروك

ثانين انت قبل لا تقبل على اي امر استخير الله اولاً وبعدين اقدم عليه

تصرف ابوها غلط يوم نشر ان بنتها انخطبت المفروض مايقول لأحد الين ماتتفقون وتتم الملكه

قال عليه الصلاة والسلام {استعينوا على قضاء حوائجكم بالكتمان فإن كل ذي نعمة محسود}

بس باين عليه انه شاريك اطلب شوفه ثاني ولاتستعجل بأمورك ولاتنسى الأستخاره

الله يوفقك ويكتبلك كل خير...

الإستخاره شيء مقضي منه وما يبيلها توصاة وانا اخوك...بس تعالي مبروك على ايش اختي...بليززززز لا تصيرين مثل جارنا الملقوف :-) ...اااااه بس ياليت من من يقول لابوها كلامك وانه كان غلطان بتصرفه ... على العموم صار الي صار والله يسامحه

realistic_777 · 18-08-2009, 01:58

اقتباس:

المشاركة الأصلية كتبت بواسطة أحبه ياناس أحبه

اولا استخير الله
ولايهمك كلام ابوها اهم شيء البنت انت راضي فيها توكل على الله
البنت مسكينه مالها ذنب ويمكن ابوها شاريك ولايبيك تهون
الله يساعدك ويسهل عليك

اولاً...شكراً على الدعوه وجزاك الله خير...بس بصراحه كانت حركته مرفوضه...وحسيته معتبرني طرطنقي وما لي راي ابد...او انه مفكر ابوي واهلي يبي يغصبوني علي الزواج من بنته...ما درى اني رافع الرايه عن ابوي من فتره عقب مرضه وكبره!! وحتى لو اعتبرته مثل ما تقولين انه شاريني...بالله عليك هذا اسلوب تنشرى فيه!! ليش ما يكون لين الجانب معي وقت ما التقيت فيه ببيتهم علشان احس انه كان فعلاً شاريني!!

realistic_777 · 18-08-2009, 02:02

اقتباس:

المشاركة الأصلية كتبت بواسطة اجمعني بها يارب h

الله يعينكم .. ويكتب لكم اللي فيه خير وصالح ..!

ااااامين...وشكراً على الدعوه.

realistic_777 · 18-08-2009, 02:11

اقتباس:

المشاركة الأصلية كتبت بواسطة كحلها سايل

ربي يعوضك باللي احسن .. و يعوضها باللي احسن برضووو ..
سبحان الله كل شيء توافيق .. و الأرواح جنود مجنده ..
طيب من بعد هالسنه ؟
ايش اللى خلى فكرة الأرتباط تتأجل عندك ..
هل الموضوع له أثر سلبي ع نفسيتك ؟

ااااامين...فكرة الإرتباط ما زالت قائمة وضروري انستر لي مع وحده بنت حلال...بس زي ما ذكرت بالموضوع فوق ان امي مريضة وكانت في تلك الفتره بالبيت اما الان هي منومه بالمستشفى من مده طويله :-( الله يكشف ضرها وكل مسلم ويااارب تفرح فيني وانا معرس.

اما من ناحية التأثير فالموضوع بحق اثر فيني وكدرني حيل...بس الوضع العام بالبيت ما يستحمل زيادة حزن...لأن مصيبة امي اكبر عافاها الله وهي احق الناس بالحزن عليها.

mousaa · 18-08-2009, 02:25

سلام

شكرا على قصتك التي تبين الكثير مما يحدث داخل مجتعماتنا

تحياتي

همس.... · 18-08-2009, 02:48

انت استعجلت شوي اذا تزوجت البنت خلاص ملكتها وابوها ماله دخل فيها

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

اسباب تجعل المعرس يغير رايه بعد النطره الشرعية غير الشكل!