عالم الحياة الزوجية - منتدى

مرجوووجة · 07-08-2005, 18:19

^
^
^
^
^
^
^
^
^
^
^
أنا بالعطلة حضرت زواج واحد من اقاربي بالرياض والصراحة أول مرة احضر
زواج مثل ذاك الزواج وأشين زواج حضرته رغم فخامته أدري بتقولون وراه ؟؟؟

بوه اشياء قسمن بالله تضيق الصدر وأول مرتن أشوفه خلون بقولكم وشهن !!
قبل ماادخل من باب قاعة الفندق صوت الموسيقى صم أذاني
وجان كتمة وضيقة صدر وإحباط وقلبي يرجف من الخوف

وأقول لوحدة من خواتي تحسين باللي أحس بوه قالت إيه وبدت تخوفن زيادة
قالت إن ما خسف بنا الله بهالليلة الله يستر شكلنا داخلين بمرقص مهوب عرس
وبديت أتعوذ من إبليس قلت يمكن لأننا ما تعودنا على كذا
لين هديت شوي ودخلت اسلم على قريباتي
إلا وش أشوف

!! لبس الحريم مصاليخ الله يعفو عنا مابوه ولا وحدتن متسترة
الثوب للركبة هذا غير البطن والظهر مكشوف لاخره ولا فتحة لنص الفخذ
ياخزياه بس ..
واثار هالشئ بنفسي تساؤل ياربي وشلون تفكير هالحريم لهالدرجة من الغباء
مادام الله سبحانه رزقه جمال الجسم وشوله تبرزه
ولو فكرت كل وحده بعقل وتقول : هالحين مثل ماربي عطان نعمة جمال القوام يقدر ياخذه مني لاني ماعرفت
احافظ عليه وعشان تحافظ على هالنعمة اللي يمكن بوه غيره يتمناه وتحسد عليه ( تستر)
ولو جاه مرض ولا تشوه بعيد الشر تندم انه لبست يوم من الايام لبس فاضح
بل تحاول تخفي التشوه بقدر الامكان سبحان الله مدري ليش مابوه تفكيرن بالعواقب !!
والمشكلة بعضهن جسمه سمينة ولا عنده ترهلات ولا عجوز ولا يرده هاللبس
بس تبي تقلد هالعالم وبس
وحاشرتن روحه بثوب ضيق تقل حزمة بقدونس بسوق الخضرة

ولا وحدتن قاعدتن معنا بالطاولة مركبة شعر باروكة تقل أثلة

منتفش واصفر ومجعد وكل ماتحركت ولا جيت بسولف دخل شعره بفمي

حامت تسبدي استغفر الله ياربي تعافيه ولا تبلانا اللهم لاشماتة
وصدق الرسول يوم قال :
(ولـــو دخــلوا جـــحر ضـــب لدخـــلتمــوه ) أو كما قال صلوات الله وسلامه عليه ...

هذا شئ

أما الشئ الثاني
يوم جت زفة العروسة الساعة 2 ونص <<< أنواع الرواقة اللي المفروض بهالوقت يكون العرسان مع بعض
بدى التصوير وأناظر الحريم نصهن ماتغطن
ولا بعضهن متلثمة والسيقان طالعة ( خوش غطاء )

ويوم دخل المعرس الساعة 3 ومعه شلة رجال اخوان العروس كلهم وابوها وابو العريس
ياسلام سلم هزلت رجال ويدخلون عند الحريم
وبدوا انواع الاستعراض بالرقص امحق رجال اخر زمن
وين الرجولة ؟ وين الهيبة اللي يتميز به الرجل ؟؟
والغريبة خوات العروس واقفات معهم وحاطاتن شيلات خفيفة مالهن داعي
وباين الوجه مثل عين الشمس
وتسولف مع العريس وكانه اخوه مهوب زوج اخته
هذا غير المصورة اللي لبسه فاضح وواقفتن قدام الرجال تصورهم
ياربي ترفق بنا على هالمستوى اللي وصلنا له

وبعد ماخلصوا الرجال تصوير مسكت اخت العروس يدين ابوها وقعدت ترقصه وترقص معه
والعريس قدامه وحركات استحي اقوله .. انا استغرب ياربي ابوه مايغار
والمشكلة متزوجة ياربي زوجه مايغار عليه ولا مايدري عنه
وبعد ماراحو العرسان الساعة 3 ونص <<< مساكين راحت ليلتهم كله بالفندق

دخلوا الحريم للعشاء واذن الفجر المفروض فطور مهوب عشاء
قالت ام لسانين ( المطربة ) اللي يوم شفته مادري هي حرمة ولا رجل شعره محلق ومع الوسط منفوش
تقل مصارع وشلة الطرب اللي معه اشك انهن حريم عربجيات بقووووة
قالت : نكمل بعد الصلاة <<< الحرمة مطولة
والادهى والامر والشئ اللي يندي له الجبين
بعد ماخلصوا الحريم من العشاء رجعوا للرقص والتفرج والسواليف
وطارت عيوني الحريم ولا وحدتن منهن قامت تصلي لهالدرجة وصل
ضعف الدين وقسوة القلوب والتساهل

اللي الصلاة وهي عمود الدين وصلة العبد بربه
ما احد يهتم به

الله يعفو عن المسلمين

وجت المضيفة تقدم نسكافيه تقول صحصحوا قلت لامي اقول شكل الدعوة صباحي امشي نطلع بس
احسن لنا وفعلا بعدها طلعنا وانواع الكآبة مرسومة على وجيهنا ....

يعني ياخواتي واخواني بالله عليكم المعاربس وشلون ربي يوفقهم لاصار كل هالمفاسد والمنكرات بزواجهم
ولاحظت التكلف الزايد عن اللزوم والاسراف والبذخ يعني فرضا لو كل شاب يبي يعرس
المطلوب منه يسوي كل هالاشياء الاغلبية ماراح يعرسون
خصوصا انهم يعانون من قلة الوظايف واذا بطلعة الروح حصل الواحد منهم وظيفه راتبه مايساعد
والفتن عن يمينه ويساره وبكل مكان ووده يعف نفسه بالزواج فيتذكر تكاليف العرس
ويجيه احباااااط ونقول ليش انحرفوا أكثر الشباب ؟ وانا ما أبرر لهم هالشئ
ويمكن يصيبه كره للعرس مثل ماقريت من احد الاعضاء قبل فترة
وماله حل عشان يتزوج الا يتسلف ولا ياخذ قرض ويزيد همه هم كله عشان يبعد نفسه عن الحرام
وبعضهم يدخلون عياله المدارس وهو ماخلص تسديد دين عرسه <<< والله العظيم حقيقة مرة
ونقول ليش يزيد عدد العوانس ؟؟
إذا كل بنت تشرطت أبي وأبي وأبي ومهوب غيري احسن مني
وتنسى أو تتناسى قول الرسول اللهم صلي وسلم عليه :

( أعـــظم النســــاء بركـــــة أيســـرهـــــــن مـــــؤونـــــه ) ....

ولازم نغير يا حلوات بعض المفاهيم اللي معشعشه بروسنا
العبرة ياحبيبات قلبي مهوب بقيمة فستان الزواج ولا بأي فندق تحطينه ولا بطريقة الكوشة
ولا كيف يكون ترتيب الزواج أو الزفة ولا وش الفرقة اللي بتجيبينه وانه لازم الكل يتكلم عن هالزواج
طيب وبعدين همن اذا قالوا زواجتس تحفة ولا يهوس كلام ويطير بالهواء

لا يا أخواتي

العبرة منهي اللي تخلي الكل يتكلم عنه كيف قدرت تسلب عقل زوجه وقلبه بأسلوبه ؟
ويظلون العمر كله على التفاهم والانسجام !
كيف قدرت انه تكون بيت أسري ناجح !
كيف قدرت تنشأ أبناء وبنات صالحين !
كيف قدرت تحافظ على بيته وزوجه وصارت ربة بيت صالحة يشار لها بالبنان !
وانا منب اعترض على مسألة الشكليات المعقولة
لكن مانقدمها على الجوهر وهو الاهم الله يحفظكن

ولا تقولين يا عروسة هذي ليلة العمر بستانس أنا ماقلت لاتستانسين بالعكس أنتي أكثر
وحدة لازم تكونين مستانسة وفرحانة ومحد قدتس والليلة ليلتس بس مهوب بعصيان الله اللي وهبتس
الزوج وتمم زواجتس على خير وتطلبينه التوفيق وتشكرينه
وربنا سبحانه قال ( ولـــئن شـــــكرتم لآزيــدنـــكم )

وإذا كانت الزواجات بهن مثل هالمفاسد
ليش نقول ارتفعت نسب الطلاق
وليش ماتوفقنا وليش مشاكلنا كثيرة
وليش مارزقنا الله ذرية
وليش كل هالمصايب تجينا وليــــش وليــــش وليـــــش ؟؟
إذا أول ليلة من حياتكم بهالشكل نسأل الله العافية
ربي ما أمرنا بهالشئ

نــعيب زمـــاننا والعــيب فيــنا ............................ ومــا لـــزمانــنا عيـــب ســوانا

فعلا والله مشكلة مقلقة ولازم نعيد النظر ؟؟ ,,,
أدري طولت عليكم وبتقولون ياكثر قرقتس
بس والله قمة القهر إن الواحد يشوف الخطأ قدام عينه ويسكت ..

يمكن بتقولون شكلتس أول مرة تحضرين زواج
بقولكم لا والله حضرت زواجات كثير بس بحدود المعقول
وما به كل هالبلاوي
وكنت اسمع عن هالزواجات بس ماكنت اصدق لاني ماشفت بعيني
لكن بعد هالزواج كل شئ اتوقعه
اذا هذا ما يسمى بالتطور والحضارة فحنا بغنا عنه
مشكلتنا بدال مانحاول نرقى بأنفسنا ننزل لتحت
ونتقبل الانفتاح بزينه وشينه
ياعالم .. ياناس .. الرقي ومواكبة العصر زين بس نراعي شرع الله بوه قبل كل شئ

الله يهدينا ويثبتنا على الطريق السوي ويكفينا شر أنفسنا والشيطان
ويوفق كل المعرسين يارب ويرزق اللي ما أعرسوا الأزواج والزوجات الصالحين قولوا امين ؟؟

واعذرون على عدم ترتيب الكلام اللي مدري احس انه مرتج شوي

بس اتمنى ان الفكرة واضحة

نبــ الحنان ــع · 07-08-2005, 18:46

اختي مرجوجه مشكوره على الموضوع

بس هذي ليله بالعمر الواحد يبي يستانس بها وخصوصي اذا مثلاً كان اول شخص من العائله يبي يتزوج او وحيد العائله

ممكن انتي برايك فيها شي غلط بس مادري احسه شي عادي والكل الحين على ذي الحال

والله يهدينا ويهدي الجميع

اختك

!™«§ ? §»ٍنــ§¨الحنـان¨§ـبع«§ ? §»™

حبيبة قلبه · 07-08-2005, 19:43

..............................................

¤©§هـــدى§©¤ · 07-08-2005, 19:55

مرجوووجة ما شاء الله عليك قدرتي تحضري الفرح كله حتى بعد الفجر .
لو أنا مكانك كنت أخذ عزالي وروحت من أول الفرح .
وكلامك كله صح . وخاصة هذه : ( ولو جاه مرض ولا تشوه بعيد الشر تندم انه لبست يوم من الايام لبس فاضح .. بل تحاول تخفي التشوه بقدر الامكان سبحان الله مدري ليش مابوه تفكيرن بالعواقب !! ) يا عمري لو الواحدة فكرت بها الكلام ما كانت سوت كل إللي سوته .

سلام

مرجوووجة · 07-08-2005, 20:00

حبيبة قلبه :

بس ماعطتين رايتس بالموضوع يالحلوة

اقول جازتلي البنوتة اللي بتوقيعتس ودي اعضه ياملحه تجنن
شكلي بسرق توقيعتس ههههههههههههههههه <<< مهيب حرامية ابد

مرجوووجة · 07-08-2005, 20:04

اقتباس:

المشاركة الأصلية كتبت بواسطة هـــدى

مرجوووجة ما شاء الله عليك قدرتي تحضري الفرح كله حتى بعد الفجر .
لو أنا مكانك كنت أخذ عزالي وروحت من أول الفرح .
وكلامك كله صح . وخاصة هذه : ( ولو جاه مرض ولا تشوه بعيد الشر تندم انه لبست يوم من الايام لبس فاضح .. بل تحاول تخفي التشوه بقدر الامكان سبحان الله مدري ليش مابوه تفكيرن بالعواقب !! ) يا عمري لو الواحدة فكرت بها الكلام ما كانت سوت كل إللي سوته .

سلام

ياقلبي مهوب على كيفي ولا ودي اطلع بس ماحصلي

مشكورة ياخيتي على ردتس الرائع

على فكرة تعجبن شخصيتس ياهدى وارتاح لتس كثير

HeeMoo9 · 07-08-2005, 20:07

وربي مني مصدق اقول انتي من وين ؟؟ من السعودية ؟؟

وانا متأكد انك قصدك على زواجات برى الدول العربية والاسلامية ..

بس مدري معقولة لهالدرجة استخفينا ..

والله اللي قاهرني لما اهل العريس يدخلو ونص الحريم ماتغطو وقاعدين يتصورور ..

والا يرقصو ...

لا وربي قاعدين في ديسكو والا مرقص والعياذ بالله ..

الحمدلله ابوي عنده قانون وماشي عليه زي الفل ..

انو لما يكون فيه زواج وامي وخواتي بيروحون .. ماتجي الساعة 1 ونص الا وهم في البيت ...
احسن للكل ..

لكن متل هيك مصايب ماأصدق كون فيه موجود عندنا في بلادنا ..

مشكورة اختي على موضوعك ..

وصج كلامك المفروض الواحد مايسكت عن المنكرات ووجب التذكير ...

تحياتي

Aseal · 07-08-2005, 20:29

كل اللي قلتيه عين العقل
يعني الواحد يسوي عرس فخم بس يبتعد عن الحرام
الله يهدينا اجمعين و يغنينا بحلاله عن حرامه

حبيبة قلبه · 07-08-2005, 21:11

سامحيني حبيبتي مرجوجة بس من جد ضحكتني حنان..
لابجد الأفراح تقريبا سارت كلها بهذا الشكل لا وحكاية الملابس حكاية تانية..
وبعدين الناس من جد ما أخافو أنو ربنا إخسف بيهم الأرض يالطيف ياربي ..
وهذي بداية مش كويسة لبداية حياة زوجية يعني أيش الفرق مثلا لوكان فرح بدون موسيقى وهدي المصخرة مثلا انا فرحي والله كان من جد اجنن كل الي حضرو اقولو انبسطنا ماكان في موسيقى ولا شي من دا من جد الواحد أخرج من الفرح مبسوط وقلبو منشرح مش زي الافراح التانية تخرج من الفرح قلبك مقبوض وراصك مصدعة من الديجي والغنى وماعجبك الفرح لانوربنا ما ابارك فية الله اغفرنا يارب وسامحوني على التطويل..

تحياتي..

غربة الروح · 07-08-2005, 21:58

ياحبي لك يامرجوجه..
والله انك صادقه..
عن جد حتى انا ماارتاح في هذي الأجواء..
وماأحب الناس اللي تسوي لي فيها
(زعـــاطـــه)

بكرى أحلى · 08-08-2005, 00:47

ممكن اخطبتس ؟

وش هالعقل وش هالثقل !! .. لالا أنتي جوهرة نادرة ..
أنتي محدن يستاهلتس إلا ولدي .. تبينوووووه؟

ههههههههههههههههههه امزح أمزح .. بس جازلي كلامتس وكلله عين العقل يالمرجـ .... آآ يالعاااااقلة

عاد تبين الصدز ؟ .. انا تراي صرت ما أواطن حضور العروس من تالي أبد أبد .. بسبب كل اللي قلتيه
مو والله زود دين .. يااااااليتوه مير
بس انا من وجهه نظري أحس هالبذخ اللي يسوونه الناس سخيف وبايخ .. ويدل على نقص عقل
بدل مايدعون الله إن الله يوفقهم ويسهل أمرهم ويولّف بين قلوبهم .. يسوون أشياء تغضب الله !!!!
يعني فعلا شي مناقض لما في القلب .. قال إيش ؟ قال عشان خاطر البنت ماينكسر وتقول وش فرقي عن البنات الثانيات

الحمدلله بس على العقل

فمـان الجرح · 08-08-2005, 01:07

مرجوجه ... زواجات الرياض ما فيها تكلف بالعكس هي لازم كذا .. إظهار مشاعر الفرح ما تتم الا بهذه الطريقة صحيح الواجب ما فيه ترف ومظاهر لكن اشوفها احسن من غيرها ..

peace angel · 08-08-2005, 01:11

شكرا على الموضووع خيتووو

موضوعج يعبر عن آرائي الشخصية بحذافيرها

وهذا الشي الذي حرصت على عدم فعله في حفل زواجي

الكثير لامني

لكني أشعر بالراحة النفسية والثقة بالنفس

بغض النظر عن المصاريف المختصرة التي استفدت أنا وزوجي من أموالها

لا يعجبني الطرب والمجون

ولا الاسراف

ولا التبجح والتفاخر

ولا ((عرض الازياء))

عموما شكرا مرة أخرى كماأضم صوتي لك لدعوة الاخوات لتلافي مثل هذا النوع من الحفلات.

THE-BARON · 08-08-2005, 01:23

كذب من قال انك مرجوجة
روعة والله وبلهجة قصمنجية خالصة
تستاهلين بعد كل هذا
دعوة بظهر الغيب مثل اول

و4 طن كليجا
البارون

AL-Bandar · 08-08-2005, 01:31

الله يكملك بعقلك يارزينه العقل.
صدق الي قال زينه البنت عقلها
بس أسمك شوي متناقض ياليت تغيريه, مو أفضل؟!

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

أسألكم بالله مهوب شئ يقهرررر ؟؟ يانااااس شئ مهوب معقووول...