عالم الحياة الزوجية - منتدى

لـــمـــى · 23-09-2009, 06:44

هذي القصه صارت لواحد نعرفه معرفه شخصيه

بداية القصه عرفتها من شخص يقرب لهالرجل و الباقي عايشته بنفسي

حكاية رجل كان مثال للقسوه و الجهل و سوء الأخلاق مثل ماكانت أمه

سلم حياته لأمه

و كانت النتيجه ...

طلق زوجته و ندم أشد الندم لكن للأسف مانفعه هالندم

لكن النتيجه الأهم و الأعظم انه انتقم من نفسه و من أمه شر انتقام !!!!

بحاول أحكي القصه و اختصر منها كثير من الأحداث و أتمنى ان أسلوبي يساعدني في كتابتها و انكم تتحملون تعليقاتي على الشخصيات و الأحداث

اسمه ناصر

كان ناصر انسان

مستهتر

طايش

مافيه عمل سيء ماسواه

سرقات . خداع . ظلم . نصب و احتيال . مضاربات و مشاجرات وصلت للطعن

هذا غير تهربه من الصلاه و عقوقه بأمه و أبوه و .. و ..

يعني الولد مخربها على الأخير

و ماكان احد قادر عليه

لا أبوه و لا غيره

تعبوا منه

و فكروا أبوه و أمه و مالقوا حل الا انهم يزوجونه

و طبعاً بهالطريقه بيخلصون من همه و يرمون بلاه على البنت المسكينه اللي بتتكفل بتربيته لهم و اصلاح حاله

و فعلاً

كانت الضحيه المها

قريبته

بنت الـ13 سنه

خطبوها له

و بشروه بالموافقه رغم معرفة أهلها كل صغيره و كبيره عن هالولد !!

لكن للأسف سبب عدم اهتمام هالعايله بهالأمور اللي مو بصالح الولد هو انهم عايله ماتتزوج من خارجها و ماعندهم أي مانع في زواج بنتهم من اي رجل مهما يكون سواد تاريخه ( لكن المهم انه من نفس القبيله ) !!!

لكن نقدر نقول كان عندهم أمل انه مثله مثل أي شاب طايش و مصيره يعقل

رغم اعلان خطوبته و كتابة العقد بينهم لكن تم ناصر ماله أي دور في تطوير نفسه و انه يحسن من تصرفاته و أخلاقه و يلقى العمل المناسب في سبيل يحسن من صورته بنظر أهلها و نظر زوجة المستقبل

مسكه أبوه و قال له انه لازم يتسنع و يبدأ يهتم بوضعه و يحاول يلقى عمل و يصير رجال يرفع راسه

و فعلاً ناصر راح و دور عمل و بدأ يحاول يحسن من نفسه

.............

عمرها 13 سنه يعني شي بديهي انه أول رجل بحياتها و مع كل البهجه اللي صارت بخطوبتها البنت حبته من كل قلبها ... رغم صغر سنها لكن أمها ما قصرت بتعليمها كل الأمور و تحمل المسؤوليه و تقدير الزوج و احترامه و أهم شي مهما يصير بينكم يتم بينكم و .. و .. و ..

.............

تزوجوا و سكن في نفس بيت أهله بقسم منفصل

بداية حياتهم كانت ماشيه الحياه و ماشيه الدنيا معهم تمام

حب ناصر المها و كان يدور رضاها و مدلعها و يلبي لها كل طلباتها و مايسمح لأحد يتكلم عنها بسوء

بالمقابل المها نفس الشي كان هدفها ترضي ناصر و تنفذ كل طلباته و ماتقصر ناحيته بشي

لكن للأسف

تجري الرياح بما لا تشتهي السفن

بدأت المها تعاني من سوء أخلاقه و قسوة معاملته لها و ضربه لها لأتفه الأسباب ( اللي ماعرفنا أسبابهم الا بعدين )

كان مايتعامل معها الا بالصراخ و الهواش و السب

رجع يسهر كثير و يمارس مراهقاته في الشوارع و في عمله كالعاده

كثرت مشاكله في عمله و انطرد

و صار عاطل عن العمل

هذا غير ان أغراض البيت الضروريه من أكل و شرب ماكان يجيبها لها الا وين و وين و هالشي طبيعي بحكم وضعه المادي

لدرجة المها ماكان عندها ماتسد جوعها فيه

و اذا جاعت يقول لها تنزل لبيت أمه ( خالتها أم ناصر ) و تشوف لها شي من الثلاجه !!!

طبعاً البنت بعد محاولات معه يجيها منه من الكلام مايجيها فتسكت و تتحمل لحد ماتوصل حدها بالجوع و تغامر و تنزل لبيت خالتها أم ناصر

هذا كله كوم و تدخلات أم ناصر و محاولاتها للسيطره على حياتها بأساليب مراوغه و التظاهر بحسن النيه قدامها و الافتراء عليها بكلام ماله أساس من الصحه عند الناس كوم ثاني ( لكن لحسن حظ المها ان الناس عارفينها زين و عارفين تربيتها و عارفين أم ناصر زين و يعرفون منو المفتري و منو المسكين )

نجي لأم ناصر ...

كانت في وجه المها أم طيبه حنونه تسعى للخير و الصلح بين المها و ناصر و تلعب دور الأم اللي تعبت من ولدها و ماصارت تدري وشتسوي معه ....

لكن واقعها انسانه حقوده .. متسلطه .. تحب السيطره .. مااحد سلم من شرها .. الكل كان يشتكي منها حتى زوجها اللي كان حاقرها تماماً بسبب سوء أخلاقها و مامسكها عنده الا لأنه مراعي العشره و الأولاد اللي بينهم ....

باختصار كانت انسانه غير محبوبه نهائياً حتى من أقرب الناس لها و الكل يتجنبها

أم ناصر بالإضافه لطبيعتها المسيطره يوم شافت شلون ناصر مع زوجته و شلون يعاملها بدا القهر و الغيره تشتعل بقلبها و بدت تكيد و تخلق المشاكل بين المها و ناصر

كانت ترمي على ناصر كلمات تستفزه فيها مثل زوجتك هي اللي متحكمه فيك و زوجتك ممشيتك على كيفها و انت صاير كنك بزر عندها و حشى هي الرجال مو انت و روح استشير المها بهالأمر شوفها ترضى او لا ...................... و من هالكلام الاستفزازي ( و لاحظوا المها عمرها 13 سنه طفله مو داريه عن ربي وين حطها !! )

و طبعاً ناصر انسان عصبي و الحماقه تعميه لا انقهر بس في البدايه كان يبلع و يسكت

صارت أم ناصر تفتري على المها بكلام ان المها قالته و المها بريئه من كل كلمه تقولها أم ناصر على لسان المها .. مثل المها تقول انها بتخليك تسوي المها تقول انك ماتقدر تقول لها لا ......................

يعني أم ناصر كانت هي سبب انقلاب ناصر على المها و هي اللي تترس راس ولدها على المها و تسبب بينه و بينها المشاكل و تفهمه انه اذا ماأعطى زوجته على راسها و مامشى كلامه عليها مابتحترمه ولا تقدره و بتضيع هيبته ..........

و أكثر من كذا كانت تطالب ولدها انه مايجيب أغراض لبيته و ان الخير وافي و كافي في بيت أبوه و ان زوجته لازم تفهم ان بيت أبوه هو الأساس !!!

كانت تناديه هو و زوجته للوجبات في البيت العود بحجة انها تستانس بوجودهم

و اذا المها رفضت تنزل لهم لأي سبب مهما تكون أهميته تقوم أم ناصر الدنيا و ماتقعدها و تترس راس ناصر ان المها شايفه حالها عليهم و المفروض تحمد ربها ان ولدها أخذها ولا مليون بنت تتمناه !!! ( من جد كنت دايم أسأل نفسي منو هالمليون بنت اللي بتتمنى عيشة المها !!! )

و طبعاً تصرف أم ناصر هذا له توابع من غضب ولدها و صب حرته كلها على المها ضرب و سب و اهانات

فصارت المها تكتفي شرهم و تنزل تاكل معهم

وقتها تبدأ أم ناصر ترمي كلام على المها و انها مو سنعه و انها .. و انها .. و الأهم انها مابتقول هالكلام الا لخوفها على مصلحة المها ( طبعاً هالكلام بوجود ناصر لأن المها تسكت و ماتعترض على كلام خالتها فيعتقد ناصر ان سكوتها = رضاها و اعترافها بالواقع )

و يوم يغلط ناصر غلطة عمره و يعترض و يحاول يدافع عن المها بأي موقف

تقول له انت منت فاهم البنات و انا فاهمتهم و انت ماتعرف تتعامل مع البنات .... و من هالكلام

لدرجة ناصر صار يعتقد بصحة كلام أمه و انها تبي مصلحته و اكيد هي أكبر و أفهم منه بسوالف البنات

هذي كانت مجرد بدايه

و رغم كذا كانت المها تسكت و تتحمل و تجاريها ببعض المواقف

هذا غير محاولاتها الفاشله للتقرب من خالتها و الحصول على رضاها

لكن أم ناصر ماكانت تشوف محاولات المها الا انها دليل على ضعف المها و دليل على قدرتها على السيطره على حياة ناصر و زوجته

...................

آهات السنين · 23-09-2009, 06:55

حسبي الله عليها امه بس ممممم القصه مو كنها ماكملت >>ننتظر

الف شكر

crâzy яoмâитic · 23-09-2009, 06:57

حسبي الله ونعم الوكيل على كل متسلط يااااساتر اشباة ام ناصر يخوفون

وهذا الي يخلي البنات تتجنب العيش مع ام الزوج بمجرد سماع هذا الشي

لـــمـــى · 23-09-2009, 06:59

نجي للواقع المرير ...

ناصر انسان فاشل .. عاطل .. حق سهرات و مشاكل .. أخلاقه صفر

ماتعود ان اي شي في هالدنيا يسيطر عليه

ماتعلم يتحمل المسؤوليه

ماتعلم ان مثل ماتبي تاخذ لازم تعطي

ماتعلم يمشي أموره بنفسه

ماتعلم ان الأم شي و الزوجه شي ثاني

و الأهم مالقى من يوجهه بحياته بطريقه صحيحه

لكن هنا بدأ دور أم ناصر اللي كان له الدور الأكبر بدمار حياة عايله كامله

صارت تسبب المشاكل بين ناصر و زوجته بكل صغيره و كبيره

كانت المها من طيبتها و حسن نيتها ( و نقدر نقول غباءها و سذاجتها )

اذا صار جدال بينها و بين زوجها تروح تشتكي لخالتها و تترجاها تساعدها

فكانت خالتها بوجهها تهديها و تطيب خاطرها و تخليها ترجع لشقتها

و مجرد يجي ناصر تروح له ركض تعلمه ان زوجته جتها تشتكي منه و تفتري عليها بكلام زود لين تخلي الرجال يشب و يطلع لزوجته منعمي و ينزل فيها ضرب

و في يوم تعبت المها و طلبت من ناصر يوديها للمستشفى

حقرها ناصر و راح لربعه يسهر كالعاده

راحت اتصلت على أبوها يجي يوديها للمستشفى

جا أبوها و أخذها للمستشفى

و جا الخبر

المها حامل

كان أسعد خبر بالنسبه لناصر و المها و بدأ ناصر يحاول يرجع و يعدل حياته عشان المها و طفله الجاي

على العكس

كملت أم ناصر محاولاتها للتدخل أكثر بحياة المها و محاولاتها لتهميش المها تماماً

صارت اذا اشتكت المها انها تعبانه معناها تتدلع

اذا اشتهت شي بسبب وحمها معناه انها نفسها بهالشي بس تتظاهر انها تتوحم عليه عشان يجيبه لها ناصر

و اذا الدكاتره وصفوا للمها علاجات و الأدويه فهم مبالغين و يضحكون على الحوامل فيها بس عشان الفلوس

حتى الحمل و تعبه رسمته أم ناصر بنظر ولدها انه مافيه شي يتعب و ان المها تتدلع و متأثره بالأفلام و المسلسلات و تبي تلعب الدور

المهم ان أم ناصر كان عندها تفسير لكل تصرف طبيعي و بريء تسويه المها

لدرجة صارت المها بنظر ناصر كذابه و مراوغه و مايصدق أي شي تقوله او اي تصرف تتصرفه

لما تمت المها في الشهر السابع بدت تحس بآلام و تعب

و في ليله صحت من نومها على آلام شديده

قامت تدور ناصر مالقته

اتصلت فيه و طلبت منه يلحقها

جا ناصر طيران على البيت و اول مادخل استقبلته أمه قالت له وشفيك ؟

قال لها ان المها تعبانه و يبي يلحقها

قالت أمه اكيد كالعاده تلعب و تمثل

و طلعت معه

لقوا المها تتألم و تبكي لوحدها و أول ماشافت ناصر و أمه تشبثت بثوب ناصر و صارت تترجاه ياخذها للمستشفى

قالت أمه وش تحسين فيه ؟

قامت وصفت لها الألم

قالت لها يعني تدلعين !!! هالحين مقومه الدنيا عشان جاك ألم بسيط ؟؟ تراك ماكملتي شهورك ابليس لعب براسك من بدري هالمره بس قولي تبين تنكدين على ولدي من كيدك مو هاين عليك انه مستانس مع ربعه !!!!!!

قامت المها تحلف و تتقطع انها مو قادره تتحمل و أمه مصممه ان المها مكبره الموضوع

و ناصر واقف بينهم مو فاهم وش يسوي و شلون يتصرف !!!

قالت أم ناصر خلها شوي و بتهدا لحالها

و تركوها و طلعوا

المها أخذت جوالها و اتصلت على أمها و أبوها و استنجدت فيهم

جا أبوها و يوم وصل لبيت أبو ناصر

فتح له ناصر الباب

من غير سلام ولا كلام طلع طيران لبنته و أم المها وراه

و ناصر و أم ناصر طالعين وراهم و يهدوهم

ابو ناصر شال بنته و بسرعه راح فيها المستشفى

طلعت المها معها حالة ولادة مبكره و المصيبه جسمها ضعيف جداً بسبب سوء التغذيه

طبعاً أم ناصر لسانها هذاك الوقت انخرس

ولدها ناصر تم واقف مايدري وش يقول

طبعاً المها بعد ماولدت راحت على بيت أهلها

و كان ناصر يروح يزور المها و ولده في بيت أبوها لين مضى شهرين جا ناصر يبي ياخذ زوجته وقتها أبوها كلمه و ان حال بنته مو عاجبه و حالهم كعايله مو ماشي بالذات ان رب هالعايله ( ناصر ) عاطل و عايش لحد الحين على فضل أبوه و قال لناصر اذا لقيت لك شغل و تسنعت وقتها بيكون لك زوجه و ابن عندنا غير كذا مع السلامه

صارت مشاكل و سوالف انتهت بصلح و وعد بتعديل وضع ناصر و ان ناصر يطلع المها من بيت أهله و يسكنها ببيت مستقل

و طبعاً كلام الليل يمحيه ضو النهار

رجعت المها مع زوجها و ابو ناصر حدد مصروف لناصر 3000 ريال لحد ماناصر يدبر عمره بعمل

و للأسف ناصر كالعاده طنش و كمل حياته ولا اهتم لا بزوجه ولا بولد بالعكس تطورت معاملته للأسوأ فكان يضرب المها على أتفه سبب

بالمقابل صارت المها أاقوى و تبدل حالها

بعد ماكانت تدور رضى خالتها و تهتم فيها صارت ترد عليها بالمثل و تتمشكل معها و ماعاد صار يهمها معاملة ناصر لها ولا ضربه القاسي ولا الرجعه لبيت أهلها ( بعد ماطلبت الطلاق و رفضوا أبوها و أمها طلاقها و ان غرض أبوها من تهديد ناصر بالطلاق كان تخويف بس .. هذا غير ان ناصر بعد كان يرفض تطليقها و حجته ولده )

و أم ناصر زادت مكايدها و صارت تتدخل بكل شي و تخلق المشاكل بينهم غصب و تحرش على المها و تفتري و تترس راس ناصر لين تخليه يطلع من طوره و يطلع و يضرب المها او يوديها لبيت أهلها

و صارت سوالف المها و أم ناصر على كل لسان

تطورت أم ناصر لحد انها اذا صارت مشكله بين ناصر و المها ( و غالباً تكون هي السبب فيها ) تقول له طلقها طلقه وحده تتأدب بعدها

فكان ناصر يروح لزوجته و يهددها بالطلاق من غير مايطلق ولا شي

لكن مع الأيام طبق كلام أمه و رمى يمين الطلاق على زوجته مرتين فصار باقي طلقه وحده و ينتهي الموضوع

حملت المها للمره الثانيه و كان ولدها عمره سنة و شوي وحال زوجها على نفس الحال و أمه لا تزال تلعب دور الحماه الشريره من غير يأس ولا تعب

و جابت طفلها الثاني و كان بنت

بعد ماكملت بنتها أول سنه من عمرها صارت مشكله بين أم ناصر و مها كالعاده لكن الفرق ان هالمشكله كانت نهاية معاناة المها و بداية معاناة ناصر

.............................

لـــمـــى · 23-09-2009, 07:00

اقتباس:

حسبي الله عليها امه بس ممممم القصه مو كنها ماكملت >>ننتظر

الف شكر

العفو حبيبتي
أسعدتني متابعتك

لـــمـــى · 23-09-2009, 07:03

اقتباس:

حسبي الله ونعم الوكيل على كل متسلط يااااساتر اشباة ام ناصر يخوفون

وهذا الي يخلي البنات تتجنب العيش مع ام الزوج بمجرد سماع هذا الشي

صاادقه بكلامك حبيبتي
هالأشكال يبي لهم وحده عندها صبر و تعرف تتعامل معهم لأنها بتتعب معهم
مشكووره على المتابعه يااقمر

لوله العسوله · 23-09-2009, 07:04

الله على الظالم ولا ظالم بخير

لـــمـــى · 23-09-2009, 07:12

اقتباس:

الله على الظالم ولا ظالم بخير

ربي مايرضى بالظلم
لكن خلينا نشوف نتيجة الظلم وش كانت !!
أسعدني ردك ياقمر

تفائلوا · 23-09-2009, 07:42

[size="5"][color="royalblue"][b][right][

اسف جدا نزلت رد بطريق الخطأ

لكن أتابع الموضوع

وعسى ماتكره النفس خيرة

و عسى الله يسر أمرك للخير

المستغنية بالله · 23-09-2009, 07:49

الرائعة لمى

السلام عليكم ورحمة الله وبركاته

لازلنا ننتظر ما حدث, تشابكت بعض خيوط القصة مع ما مررت به , لكن اولست ترين اخيتي, ان صاحب الطبع الارعن قلما يجاوز طبعه.

في كل حادثة طلاق اسباب ومسببات, كما يذكر ان غالبية اسباب الطلاق هي عين وسحر اصاب الزوجين, ولكنني لازلت اؤكد ان بيتا ما انطفأت اضوائه ليلا, وما خلت غرفه من قوام وبكائين في الليل, مستغفرين في السحر, غير غافلين عن القرآن ليلا ونهارا, او ليس اهل ذاك البيت في حماية الله, لكن ان يبقى السحر شماعة الزوج او الزوجة في كل تفريق بينهما, فهنئيا لذاك الزوج بالطلاق اذ ان الشيطان قد امكن منه, واصابه في لحظات غفلته, وما من الغافلين وددنا الزواج.

اعتقد وهذا رايي اخيتي ان صاحب الطبع لن يجاوز طبعه, مهما طال الزمان, وتأكدي ان من ظلم انثى او رجل سيأتي عقابهم ولو بعد حين, لكنني لست ارجو لاحد اي بلاء, وان كانت انواع البلاء قد مرت بمن كان شريكي واهله, الا انني والله حسيبي ان ما مر بهم لم اكن اتمناه, ولم اسأله لله, " اللهم انت القوي وانا الضعيف, اللهم انه استقوى على ضعفي فأرني قوتك فيه" فلك ان تتخيلي قوته سبحانه على عباده, وكيف ان العباد في لحظة قوتهم غفلوا عن ان الله شاهد على الظلم والتعدي, والكذب, وبأني ما سخطت يوميا لعلمي ان للمظلوم دعاء لا يرد, وقد اقسم رب العزة بأن انصرنك ولو بعد حين فاطمأن قلبي, بأن ربي هو ناصري ومعيني, فلست تنتظرين بلاء يصيب من ظلمك, انما تبغين اجر الصابرين, الراغبين الى الله, المؤمنين بأن الدنيا دار ممر, والعالمين حقا ان الآخرة هي المقر. ولا زلت متابعة...فللحديث بقية

جزيت خيرا على ما كتبت

لـــمـــى · 23-09-2009, 08:03

جا ناصر ورمى يمين الطلاق على المها بلحظة تهور و كانت اليمين الثالثه

راحت المها و اتصلت بأبوها و علمته بالخبر و كان شكلها مثل اللي يبشر بأمر سعيد

رجعت لبيت أهلها بدون أطفالها اللي أخذتهم أم ناصر و حرمتهم من أمهم و بحكم قرابتهم فضلوا العايلتين يبعدون عن المحاكم و مشاكلها و يتمون الأطفال عند ناصر ( او على الأصح عند أم ناصر ) و كل شهر يروحون لأمهم يومين

هذا كان حال المها

أما ناصر فكان حاله أسوأ

ماصدق اللي سواه و صابته حالة ذهول من اللي صار

كنا نعتقد ان ناصر مصدوم بس

لكن الموضوع كان أكبر من كذا

ناصر كانت صدمته عظيمه لأنه حب المها من جد

حاول يرجعها و يتحايل بأي طريقه لرجعتها لكن للأسف

انتهى الموضوع و انتهت حياته مع المها

لكن اللي استغربناه

انه صابته حالة اكتئاب و حالات بكاء و تغير حاله

صار ماياكل ولا يشرب ولا يضحك و دااايم سرحان

و تم على هالحال فتره طويله

و الكل كان يعتقد انها فتره و تنتهي

........................

عاشوا أطفال ناصر و المها

في بيت جدهم أبو ناصر و كانوا كل شهر يروحون عند أمهم

لكن الصدمه

كانوا يكرهون أمهم !!!

كانت أم ناصر تكمل دورها في الحياه من غير تعب

كانت تكره الأطفال بأمهم و تزرع بروسهم ان أمهم ماتحبهم و انها تركتهم لأنها ماتبيهم و من هالكلام

وصلت فيها انها تعلم الأطفال انهم ينادونها ( ماما ) و ينادون أمهم بإسمها

ماصاروا يرضون يروحون لأمهم ولا يبون يزورونها ماغير يقعد أبو ناصر مطارد وراهم عشان يروحون يزورون أمهم !!

و الأعجب او على الأصح الصدمه ان أمهم بعد ماعادت تهتم فيهم ولا تسأل عنهم

كنا داايم نفكر و نستغرب عدم اهتمامهم بأطفالها و عدم مطالبتها حتى بشوفتهم !!!

يمكن هالشي راجع لصغر سنها

و يمكن ردة فعل نفسيه بسبب كون حياتها ببيت ناصر و أهله ماتحمل لها الا الذكريات الأليمه و نفسياً ماعاد عندها رغبه بأي شي يذكرها بحياتها ببيت أم ناصر

و يمكن .. و يمكن ..

كثرت الاحتمالات و الأسباب و النتيجه وحده

المها ماتبي أطفالها

..............................

بالنسبه لناصر زادت حالته سوء و بدا جسمه يضعف بدرجه فظيييعه و تم على حاله ماياكل ولا يشرب

كانت أمه تجيه بالأكل مايرضى

تكلمه مايرد عليها

و اذا رد عليها يرد ردود فظيعه !!!!!!!!!

حتى وجودها عنده ماصار يتقبله

كان يشتمها

و يرمي الأكل بوجهها

و يطردها

و يرفض يشوفها

و كانت هي تقعد تبكي و تروح لأخوانه تترجاهم يشوفون له صرفه

بس مافيه فايده

ناصر يكره أمه

و ماندري هل اللي صار له كان عقوبه له بسبب تاريخه الأسود قبل و بعد زواجه بالمها ؟؟

ولا عذاب الحب و عشقه

بالذات ان هالشي رغم اعتراض ام ناصر عليه

و اصرارها على انه ناصر يكره المها

لكن الكل يشهد على ان ناصر كان يحب المها حب ماينوصف لكن .... ماندري شصار !!!

..............................

بعد ثلاث سنين من طلاقهم تزوجت المها برجل عوضها عن كل اللي عانته بحياتها مع ناصر و أمه و كانت هذي نهاية معاناة المها بحياتها

لكن كان الثمن انها خسرت أطفالها اللي كبروا و صارت ماتطرى لهم على بال بعد ماانغرست كراهيتهم لها عن طريق جدتهم

و بنفس الوقت هي بعد كملت حياتها و تركتهم وراها كأنهم شي انتهى من حياتها و ماعاد له وجود

مثل ناصر

................................

نرجع لناصر

تم ناصر على نفس الحال من سيء لأسوأ

بالذات بعد ماجاه الخبر بزواج المها

صار كتلة كراهيه و حقد مصوبه ناحية جهه وحده

( أمه )

و بنفس الوقت بدت صحته تتدهور

صار نحيف نحافه فظيعه و بالكاد يقدر يوقف

صار يدخن بشراهه

امتنع عن الأكل و كان يرفض اي شي تقدمه له أمه

لو يتم يوم كامل على جوعه

لكن

اي شي يقدمه له أبوه او أخوانه او حتى الغريب كان ياخذه و مايعاند

لكن ماطال هالحال

بعد زواج المها

صار يرفض الأكل من الكل و يرفض ان اي احد يهتم فيه او يجلس معه

و اذا جلس معه أحد

يقعد يحكي له عن المها و وش كانت أمه تسوي فيها و وش كانت تقول له يسوي

و يجلس يبكي مثل الأطفال و يقول كنت أحسبها فاهمه و تبي مصلحتي

و ليش يزوجوني من البدايه

و ليش أمي سوت فيني كذا

و الصدمه

كان اذا واحد من أخوانه بيتزوج

يجلس يحذره

تدرون من منو يحذره !!

تدرون وش يقول ؟؟

كان يمسك أي واحد يخطب

و يقول له انتبه من أمك

لا تخليها تدمر حياتك مثل مادمرت حياتي

لا تخليها تتدخل بحياتك

و لا تسكنون قريب منها

و اذا قالت كذا لا تسوي

و اذا سوت كذا لا تطيعها

و اذا .. و اذا ...

و تمينا معتقدين انها أيام و يرجع ناصر أحسن من أول

لأن ناصر اللي نعرفه كان عكس اللي حنا نشوفه تمااااماً

و كان الأمل لايزال قائم

( انا اللي ذكرته من افعال ام ناصر قطره من بحر ... ناصر كان يحب المها و يموت فيها و كنا نعرف هالشي ... و كنا نعرف ان سبب مشاكلهم هي أمه ... لكن ماتوقعنا يصير بناصر كل هذا !! )

......................

لـــمـــى · 23-09-2009, 08:05

اقتباس:

اسف جدا نزلت رد بطريق الخطأ

لكن أتابع الموضوع

وعسى ماتكره النفس خيرة

و عسى الله يسر أمرك للخير

تسعدني متابعتك

لـــمـــى · 23-09-2009, 08:21

اقتباس:

الرائعة لمى

السلام عليكم ورحمة الله وبركاته

لازلنا ننتظر ما حدث, تشابكت بعض خيوط القصة مع ما مررت به , لكن اولست ترين اخيتي, ان صاحب الطبع الارعن قلما يجاوز طبعه.

في كل حادثة طلاق اسباب ومسببات, كما يذكر ان غالبية اسباب الطلاق هي عين وسحر اصاب الزوجين, ولكنني لازلت اؤكد ان بيتا ما انطفأت اضوائه ليلا, وما خلت غرفه من قوام وبكائين في الليل, مستغفرين في السحر, غير غافلين عن القرآن ليلا ونهارا, او ليس اهل ذاك البيت في حماية الله, لكن ان يبقى السحر شماعة الزوج او الزوجة في كل تفريق بينهما, فهنئيا لذاك الزوج بالطلاق اذ ان الشيطان قد امكن منه, واصابه في لحظات غفلته, وما من الغافلين وددنا الزواج.

اعتقد وهذا رايي اخيتي ان صاحب الطبع لن يجاوز طبعه, مهما طال الزمان, وتأكدي ان من ظلم انثى او رجل سيأتي عقابهم ولو بعد حين, لكنني لست ارجو لاحد اي بلاء, وان كانت انواع البلاء قد مرت بمن كان شريكي واهله, الا انني والله حسيبي ان ما مر بهم لم اكن اتمناه, ولم اسأله لله, " اللهم انت القوي وانا الضعيف, اللهم انه استقوى على ضعفي فأرني قوتك فيه" فلك ان تتخيلي قوته سبحانه على عباده, وكيف ان العباد في لحظة قوتهم غفلوا عن ان الله شاهد على الظلم والتعدي, والكذب, وبأني ما سخطت يوميا لعلمي ان للمظلوم دعاء لا يرد, وقد اقسم رب العزة بأن انصرنك ولو بعد حين فاطمأن قلبي, بأن ربي هو ناصري ومعيني, فلست تنتظرين بلاء يصيب من ظلمك, انما تبغين اجر الصابرين, الراغبين الى الله, المؤمنين بأن الدنيا دار ممر, والعالمين حقا ان الآخرة هي المقر. ولا زلت متابعة...فللحديث بقية

جزيت خيرا على ما كتبت

ربي يسعد قلبك حبيبتي
انا بعد مؤمنه ان بو طبيع مايجوز عن طبعه
لكن صدقيني هالسالفه بالنسبه لي شي غريب و فيها كثير من التناقضات اللي مافهمناها حتى الحين
أقصد تناقضات بشخصية ناصر نفسه
انسان جد ماينعرف له
يمكن لأنه شخص غريب عني و مالي فيه اي احتكاك ماقدرت أفهم شسالفته بالضبط
كنت بس أشوفه و أسمعه و هو يتكلم أحياناً و تجيني أخباره و سوالفه من ناس قريبين له
يعني لو تعرفين وش كانت نهاية ناصر و وش شكلها بتستغربين
اعذريني لكن فاتني اني أقول ان ناصر بعد زواجه الشي الوحيد الحلو اللي سواه هو انه التزم بصلاته
رغم اصراره على عقوق أمه
و سوء معاملته للمها -رغم حبه لها- اللي كان بتحريض من أمه
لكن كان طبيعي مع الباقيين و سهراته اللي اعرفه انها ماكان فيها شرب و سوالف كانت سهرات شباب فاضيين لعب بلوت و تدخين

الشي الأكيد ان ربي مايرضى بالظلم
المها انظلمت من البدايه بزواجها منه
صغيره بالسن و شاب مو مؤهل للزواج و حماه الشر متمثل في تصرفاتها هذا غير عاداتنا اللي حكمت علينا بأمور الدين مايرضاها
الله عوض المها بإنسان حبها و عوضها عن كل اللي عانته عند ناصر و أمه
و ربي بيعوضك ان شاء الله حبيبتي كل خير بحياتك و يوفقك و يسعدك

لـــمـــى · 23-09-2009, 08:26

اعذروني بوقف القصه هنا و أكمل يوم ثاني ....

أضوآء · 23-09-2009, 08:30

هلا والله بلمى

سلمت أناملك ياالغالية ع كتابة هالقصة

احداثها وفصولها محزنة خصوصا النهاية ,, كره الاولا لامهم ,و ما حدث لناصر

ودليل حب ناصر للمها انه ماتزوج.......

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

قــــــصــــــة رجــــــل مــــــطــــــلــــــق !!!