عالم الحياة الزوجية - منتدى

ابونواف · 03-10-2009, 10:55

السلام عليكم جميعا
يشرفني اني لاول مره اكتب في هذا القسم
وراح نمر عليه دايم لان رحلات البر راح تجي ان شاء الله وعسى الله يرزقنا الخير والامطار
راح اعطيكم بعض ما عندي من صور رحلتنا العام الماضي
( اعتذر عن الاخوة العرب لاني راح اسرد القصة بلهجتي العاميه )
راح نذكر لكم افراد الرحله

أفراد الرحلـة : ابوسعد صديقي وحبيبي واخوي نواف العله وابوراشد
مدّة الرحلة : ممممم .. اسبوع تقريباً !

هذي الرحلة مليئة جداً بالمواقف والذكريات !
وبعض ناس حمّق علي كم مرة بهالرحلة ( ابوسعد ) بس المسامح كريم هههه

طبعاً أنا بصراحة راعي نسيااااان .. لذلك أبسرد اللي أذكره !
واللي ما أذكره زين ؤلف فيه هههه ! يعني زي الأوقات والله يانا أبذكرهن !
يعني جزاكم الله خير ياخويانا لا يجي أحد ينط بي يقول تكذب !
لأن الرحلة الآن لها سنة تقريباً ..

مشينا آخر العصر من الرياض .. وأثاري الكاميرا مع أخوي نواف العله هو وخشته !
وأدقدق عليه ماعنده إرسال ،، ضاقت بي الدنيا يارب ألقاه لانهم مبعدين عننا مسافه حتى الكنود ما يوصل ( الكنود جهاز لاسلكي ) .
وصلنا القصيم واشوا لقيناهم اثاريهم متغدين قبلنا ادري فيه ابوراشد حار بطن ما يصبر،،، تغدينا وعقبه كملنا لحايل

أخذت الكام من اخوي وهو ما يدري وتوكلنا على الله لحـــايل حيث العقال المايل ! لا يزعلون علي اهل حايل بس يا حبهم ينكسون العقال ههههههه

وحنا بالطريق .. وقّف أبوسعد عند بقالة !
المهم شرى اثنين فانتا فراولة قزاز !
يوم عطاني الفانتا وإلا هو حااااار .. وأنا ما أواطن المشروبات الغازية
لوهن بويردات << يعني باردات بس ماهوب قوة وشلون لا صار حار !
المهم فتحته وشربت ربعه يمكن أبسمح خاطره !
وكانت دريشتي مفتوحة .. وأحسبه مفتوحة كله !
وأمر آخذ عزم عشان أجدع الفانتا مع الدريشة ويطلع برا الزفلت
يوم جدعته ويصبخ الدريشة وينكب علينا كل أبوه !
وقفنا وجلسنا نمسح وإلا كل الحوض يخلف الله أحمر !
لين وصلنا حايل والدنيا تدبّق هههههه !

طبعاً ماهوب عشان كذا حمق علي ابوسعد !
صدز إنه حليم ياحبي لقليبه !

وصلنا حايل وتعشينا وكذا ..
بالمناسبة .. كنت أنا وزير المالية والاقتصاد الوطني ( معاي القطه ) !

ثم مشينا ونمنا بالنفود الكبير .. وهنا صارت سالفة الكنوّد !

سالفة الكنود ان ابوسعد الله يصلحه سوا فيني مقلب ضاغط على ريشة الجهاز ( الريشة اللي هي الجهاز مثل السماعه يضغطه ويكلم فيها والطرف الثاني اللي هو اخوي وابوراشد يسمعون ) اثاريه قبل لا يضغط يحش باخوي نواف وابوراشد يومني استنيت وجيت احش وهو يضغط على الريشه وهم يسمعون حشي فيهم هههههههههه يومنا وصلنا فرشوني ههههههههههههه .

يوم أصبحنا تقهوينا ومشينا ومرينا جبّه وتمشينا شوي وأخذنا فطور من أحد المقاصف !

عاد تعرفون جبّه وحايل وذيك الديار راعين كرم ووناسة !
طلبنا من المطعم فطور .. وعلى ما يخلص رحنا ندوّر مسجد !
بنطير الشراب الله يكرمكم!
المهم شفنا مسجد ما ادري وش الله قايلن فيه !
وكان جنبه فيه باب مفتوح .. وحنا منعمين شوي يعني منتهين
دخلنا من عند الباب على إنه تبع المسجد ..
المهم كان معي واحد من الشباب ما أدري أيهم والله ..
المراد إنه هو اللي دخل الأول لدورة المياه وأنتم بكرامه !
يود دريت ويطلع علينا رجّال ويناظرنا باستغراااب !
سلمت عليه وقلت هذا المسجد وإلا لا ؟ << اللي بطنه ذا ما ذاك
قال لا والله .. هذا بيتنا ! لكن حيّاكم الله !
قلنا المعذرة والله كنا نحسبه تبع المسجد وكذا قال عادي ادخلوا تقهووا !
قلنا نبي نمشي جزاك الله خير .. قال أبد ماتروحون ولزم مرة !
المهم أنا قلت له سم بس خل أبدخل دورة المياه
تقهوينا عندهم شوي ومشينا من جبة !

ياحبيلهم هالشمامرة .

صور من النفود الكبير :

شوفو انا معطيكم ظهري كارفيني قاعد اغسل البيالات هذا وانا وزير الماليه

يا حبيله اخيي نواف يقاله عالم جوليجيا الناس تصور نمور واسود وهذا يصور خنفسان

نواف اخيي يستهبل ومنبطح على الشارع لا تواخذونه فرحان ماخذه معنا هههههههههه

المهم وقفنا بالعليم شوي وصورنا مع الغضا وسرينا !

وصلنا الجوف مسيّان .. وشفنا لنا مكان بين تبوك والجوف
وتقهوينا فيه وتعشينا طبعا انا اللي طابخ بس نسيت اصور طبخي من الجوع مب مني ونمنا !
بس والله ياهو مكان .. خطير بالحيل الصراحة ..
صور له :

يا لبى قلبي قهوتي

قمنا من النوم وكملنا الين

وصلنا حقل ولا كان اهنا شيء يسوى الروحة ..
يعني السفينة ذيك الغرقة والشاطي بس ..
بس ولو حلوة

الموقف اللي قفلت مع أبو سعد علي عشانه ..
بما إني وزير المالية شريت ثلج عشان نحطه وسط الحافظة !
المهم حطيته وراء مرتبة الحوض .. عشان لا وصلنا أفك الكيس وأكبه بالحافظة ..
لعلي نسيته .. ونمنا ذاك اليوم .. يوم ركبنا السيارة الصباح وإلاه وش تشوف هههههههههه
الفانتا أسكتنا عنه .. بس هذا ماعنه سكوت !
إيه وضبطنا الوضغ وشرينا ثلج جديد بس من جيبي ماهوب من الميزانية

المواقف اللي بالرحلة هذي وااااجد .. وفيه شيء ما ينقال
هههههههههه

نترككم مع الصور !
طبعا هنا لبست شورتي الكاروهات الشهير ودليت اسبح بس ما خليتهم يصورني خفت احد ينظلني

طبعا هاذي الصورة يقالك ابو الرومنسيه واللي رايحين
فادي وهاني ومدحت وتامر هههههههههههه
ما يدرون الطيور ان اللي يصورهم كل واحد خشته تقول يدة باب مستودع

الشيخ نواف ابن عدوان يقالك ماسك الشوزن يتميلح ههههههههه

ودّي أكمل .. بس لعلي أكتفي بهذا القدر .. والجود من الماجود ..
وسامحونا على القصور وبطلع العزبة ابشوف صور قديمه لي اذكر لكم بعض السفرات والرحلات

حبيت من خلال هالموضوع اني احيي هالقسم وادخل على شفاكم البسمه ونعرف بعض معالم ربوع بلادي السعوديه
وعسى الله يوفقكم جميعا وينعم عليكم بالصحه والعافيه

فمان الله جميعا في حلقة قادمه بإذن الله

اخوكم ابونواف

الرجاء عدم نسب او تحريف او نقل اياً من مواضيعي دون إذن مني..أو كتابة منقول وكتابة اسم المنتدى وأسم معرفي

على الموضوع ولا احلل ولا ابيح من اخذ موضوعي بدون اذني

منون الحلوه · 03-10-2009, 11:08

بصراحه أنا مبسوطه اكون اول من قرا الموضوع بصرااااااااااااحه يفطس من الضحك كأنه مسلسل كوميدي

واحسن مافيه اخوك نواف وهو منبطح في الشارع ستايل شكله

والله شوقتني لروحت البر الله يرزقنا

ويعطيك العافيه وكمل حلقات المسلسل لا هنت

الرومانسيه العربيه · 03-10-2009, 11:27

يعطيك ربي ألف ألف عافيه على المجهود
الرائع ..
بصراحه قمه وفي غاية الروعه الله يبسطك
ويسعدك .
كل كلمه كتبتها تشكر عليها أما الفانتا ههههههه
لك كل الشكر ولي عوده !

قائد الاسود · 03-10-2009, 11:33

الله يعطيك العافيه بو نواف

بس والله شرهان عليك

ليش ما قلتي اخاويك

الاكيد رحله حلوووه وخوت الرجال تنشرا

ننتظر جديدك

ابونواف · 03-10-2009, 11:40

اقتباس:

المشاركة الأصلية كتبت بواسطة منون الحلوه

بصراحه أنا مبسوطه اكون اول من قرا الموضوع بصرااااااااااااحه يفطس من الضحك كأنه مسلسل كوميدي

واحسن مافيه اخوك نواف وهو منبطح في الشارع ستايل شكله

والله شوقتني لروحت البر الله يرزقنا

ويعطيك العافيه وكمل حلقات المسلسل لا هنت

الحين نواف صار ستايل هو وكراعينه اللي تقول مساويك مكه هههههههههه

حياك الله اختي يا هلا ومرحبا

ابونواف · 03-10-2009, 11:41

اقتباس:

المشاركة الأصلية كتبت بواسطة الرومانسيه العربيه

يعطيك ربي ألف ألف عافيه على المجهود
الرائع ..
بصراحه قمه وفي غاية الروعه الله يبسطك
ويسعدك .
كل كلمه كتبتها تشكر عليها أما الفانتا ههههههه
لك كل الشكر ولي عوده !

حياك الله اختي يا هلا ومرحبا فيك

ابونواف · 03-10-2009, 11:43

اقتباس:

المشاركة الأصلية كتبت بواسطة قائد الاسود

الله يعطيك العافيه بو نواف

بس والله شرهان عليك

ليش ما قلتي اخاويك

الاكيد رحله حلوووه وخوت الرجال تنشرا

ننتظر جديدك

ابشر بسعدك وانا اخوك تامر امر

@قصيده شجن @ · 03-10-2009, 11:58

تبي الصدق انا امووت في رحلات البر >>>حشى مو بنت
والصرراحه ياشبااب احسدكم من قلبي على الرحلات البريه والوناااسه حتى خوااني يقهروني قبل لايطلعون البر >>>مو لو صار شئ لاسمح الله تقول هي من عيوون قصيده ماشااااااء الله تبااارك الرحمن.
والله فله,,,يعطيك الف عاااااافيه.

الدبلوماسي · 03-10-2009, 13:08

رحلة روعه يا ابو نواف
ياحبي لحايل واهل حايل
ميل عقاله ولد شمر
غريبة يوم مريتم حايل ما رحتم منتزه مشار
وكمان ليه مغطين وجيهكم ؟؟
يسعدك ربي

وليد الشوق · 03-10-2009, 13:11

مشاء الله عليكم يابو نواف رحلة مميزة ..

وين الربيع ووين الصور الباقية ترى ماشفنا شي كمل وانا اخوك ورنا الباقي ولا تبخل علينا ..

تراك حمستني انزل الصور اللي عندي برحلات غواصتي الشهيرة

ابونواف · 03-10-2009, 13:13

اقتباس:

المشاركة الأصلية كتبت بواسطة @قصيده شجن @

تبي الصدق انا امووت في رحلات البر >>>حشى مو بنت
والصرراحه ياشبااب احسدكم من قلبي على الرحلات البريه والوناااسه حتى خوااني يقهروني قبل لايطلعون البر >>>مو لو صار شئ لاسمح الله تقول هي من عيوون قصيده ماشااااااء الله تبااارك الرحمن.
والله فله,,,يعطيك الف عاااااافيه.

اقول وانا اخوك ما عندنا بنات يطلعون للبران حدكم الثمامه وناخذ صندوق يوسف افندي لكم وفصفص وشاهي وقهوه وكيك وكل وحده فيكم تاخذ دورة بالسياره وقبل المغرب ترجعون للبيت هههههههههههههههههه

ابونواف · 03-10-2009, 13:15

اقتباس:

المشاركة الأصلية كتبت بواسطة الدبلوماسي

رحلة روعه يا ابو نواف

ياحبي لحايل واهل حايل
ميل عقاله ولد شمر
غريبة يوم مريتم حايل ما رحتم منتزه مشار
وكمان ليه مغطين وجيهكم ؟؟

يسعدك ربي

الدبلوماسي وشرايك يعني نطلع وجيهنا كان من بكره تلقاها بقناة الاخباريه

ابونواف · 03-10-2009, 13:18

اقتباس:

المشاركة الأصلية كتبت بواسطة وليد الشوق

مشاء الله عليكم يابو نواف رحلة مميزة ..

وين الربيع ووين الصور الباقية ترى ماشفنا شي كمل وانا اخوك ورنا الباقي ولا تبخل علينا ..

تراك حمستني انزل الصور اللي عندي برحلات غواصتي الشهيرة

والله يا وليد زهقنا من القسم اللي خبرك اكتب فيه

تقول داخلين عالم الثقافه هالمبزره اللي هناك ما يشبعون من مواضيع الثقافة الجنسية

قلنا خلنا نجي هنا نوسع صدرونا

المهم اقول اسدح صورك لا هنت ننتظرها

@ام ريما@ · 03-10-2009, 13:24

رحله روعه ابو نواف ويا زين شبت الضو والرمال ذكرتني بطلعاتنا قبل الزواج الله يذكرك الشهادة كانت احل ايام والمشي على الرمال حكاية ثانيه دخلت جو ههههههه
وياحلو القهو ههههههههههه تدري وش ضحكني

يالبى قلبي تمدح في نفسك على العموم يحق لك
والله يرزقك السعادة في الدارين
تقبل مروري

ابونواف · 03-10-2009, 13:28

اقتباس:

المشاركة الأصلية كتبت بواسطة @ام ريما@

رحله روعه ابو نواف ويا زين شبت الضو والرمال ذكرتني بطلعاتنا قبل الزواج الله يذكرك الشهادة كانت احل ايام والمشي على الرمال حكاية ثانيه دخلت جو ههههههه

وياحلو القهو ههههههههههه تدري وش ضحكني

يالبى قلبي تمدح في نفسك على العموم يحق لك
والله يرزقك السعادة في الدارين
تقبل مروري

ام ريما حياك الله

ايه بس القهوه اللي امدحها ودي امدح طبخي بس اخاف ينضلوني ههههههههه

جزاك الله خير اختي ام ريما الله يقويك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

مغامرتي ورحلتي بربوع بلادي