عالم الحياة الزوجية - منتدى

ابونواف · 04-10-2009, 12:52

السلام عليكم جميعا

نظرا لما ياتيني بطلبات من الاخوان والاخوات بملفي الشخصي والرسائل الخاصه بعرض بعض من رحلاتي لربوع بلادي الغاليه اليكم ادناه رحلة خاصه للصمان لعام 1430-- 2008 بعد رحلتي لحايل بموضوعي السابق

قبل ما نذكر مكان الرحله سوف نذكر الاتي : اعتذر عن الاخوة العرب لعدم امكاني بترجمة بعض المصطلحات السعوديه ،، ايضا سوف يتخلل الرحله صور عن بعض الروض والفياض والنفود
ونظرا الى طلبات الاخوات سوف يتخللها بعض من الطبخات .

رحلتي للصمان الغربي والجنوبي

المرافقين بالرحله :

الغثيث اخوي ( نواف ) وصديقي الجديد ( ابومشاري ) وابوراشد السواق المحترف
قبل ما نبدا ودي اعرف لكم بعض المصطلحات المتعارف عليها علشان لحد يسال

الروضة : المكان الذي يجتمع فيها ا لماء، وينبت في العشب بشكل يفوق ما حوله

الفيضة : الأرض التي تغمرها مياه السيول، وهي مثل الروضة ولكنها أكثر ماءًا.

طلعنا من الرياض عصر الاثنين الموافق 28-2-1430 وكان الجو ممطر ومن ابدع ما يكون وصادفنا الليل ونمنا بالنفود وبعد ما اصبحنا وهي لا زالت تمطر ومثل ما انتو شايفين

نسيت لا اقولكم انا اذا رحت للبر لابد اخذ جهازي معي اللي هو اثير بلس ابد ركب شريحة الجوال واكلم اميمتي اطمنها وهاذي صورة الجهاز

طبعا كملنا طريقنا لروضة ام قرين بالبداية انا عطيت خاوينا ابومشاري صديقنا الجديد الكاميرا وقلت لا هنت وزها ( خشها او خبها ) عندك اخاف ان اخوي نواف يتلقف وياخذها ويضيعها للاسف الاخ يومننا وصلنا طلع ما عنده ما عند جدتي يقول نسيت وين انا حاطها فيه

طبعا انا كنت الامير عليهم ووزير الماليه ووزير المواصلات واللي يغسل البيالات واللي يطبخ وكلش هههههههههههههه

نكمل الرحله وصلنا لروضة ام قرين واستمتعنا بربيعها وبعدها كملنا لروضة ام قليب وانا متحسف على الكاميرا هاللي مدري وين ودها هالكمخه بس انا راكب معاه اخاف اني اقوله شي يحمق علي وينزلني فالتزمت الصمت وبعدها كملنا الين وصلنا لروضة دغيم وخلاص تعبنا من كثر الدوران بالسياره وقلت لهم وقفو نتقهوا هنا وبعد ما فتحت العزبه لقيت الكاميرا طبعا الكاميرا انا حاطها بشنطه صغيره والاخ يحسبها كرتون شاهي ،،،، المهم بوريكم بعض صور لروضة دغيم

وهاذي الثانيه

وهاذي الثالثه

طلعنا من الروضه لانها كانت مزحومه بالسيارات وقررنا اننا نشوف لنا فيضة مرادفه لها

ووصلنا لفيضة وسميتها بفيضة ابومشاري لاني حسته حوس يومني لقيت الكاميرا وقلت ابي اراضيه وسمي الفيضه باسمه طبعا هو ما صدق وشوفو الفيضه

الثانيه

الثالثه

قررنا نشتري خروفنا من هنا طبعا الراعي حبينا خشمه وقلنا له نغديك ونعشيك على حسابنا يالله انه وافق يبيعنا الخروف وبعد مطاردات للامساك بالخروف اخيرا يالله اننا قوينا نمسكه لان طال عمركم الخرفان وقت الربيع والامطار تكون نشيطه واكلها كله صحي مب مثل اللي بسوق الغنم هنا بالرياض الين مريت على خروف وقلت مساك الله بالخير يرد عليك مساك الله بالرضا والعافيه

طبعا كان ودنا نشتري حاشي صغير بس اللي معنا حدهم دجاج ويخب عليهم قطتهم يالله تكفي

ذبحنا الذبيحه وطبخنا غدانا وعينا من الله خير وتبطحنا وتمددنا وتعشينا عقبه ومن فجر اليوم التالي صلينا وتوكلنا على الله نكمل باقي الروض والفياض

مشينا الين وصلنا روضة حسنا السبق نوريكم بعض الصور

الثانيه

وكملنا عشان نشوف ردايف روضة حسنا السبق وكما ذكرت لكم بالسابق ان الروض دايم تكون مزحومه فنطلع للردايف افضل وبوريكم لبعض صور الردايف

الثانيه

قررنا اننا ننام فيي الرديفه هالجميله هاذي ونزلنا عزبتنا وابوراشد طبعا اخذ الابريق وانحاش لانه كان الله يكرمكم يبي يطير الشراب هذا بريقه فشلنا الله يفشله

وبعد ما تغدينا قلت ابتمشى شوي بالسيارة وكان جنبنا اعتقد واحد ولد نعمه او امير وانا امر بجنبهم بالجيب اتميلح قلت كود يقولون هلا بالضيف انزل بس للاسف ما حولك احد

كان مجمل رحلتنا 3 ايام بلياليها تقريبا وكانت من اجمل الرحلات وبعدها رجعنا للرياض

يتبع ادناه

ابونواف · 04-10-2009, 12:53

تكمله

طبعا الحين راح اعرض لكم بعض صور طبخي بالبر حسب طلب بعض الاخوات اتمنى انه ينال على اعجابكم بس اتمنى الكل يقول ما شاء الله لا اله الا الله لان في بعض الناس عيونهم تقول مصاقيل لحد ينضلني ترا راس مالي اصابعي والله يا ان بكره تورم وتغدى اطناب خيمه

طبعا قطعت البصل واضفت معاها بعض من السمن وبديت احمسها بالقدر

ما عجبني القدر الصغير وغيرته بقدر اكبر وقصصت الطمام وجمعته مع البصل وبديت احمس الكشنه

قطعت اللحم قطع صغار واضفت له بعض البهارات مع الكشنه

وعقبها الين استوا اللحم كبيت الرز فوقه الين استوا الرز وسلامتكم

وحياكم الله

يا عيني على الفلفل والليمون يا ناس

طبعا في الليل اسهل لانه برد سويت لهم مكرونه مع ضليعات يحبها قلبكم

وهاذي قهوتنا على الضو

واخيرا هاذي خيمتي الحبيبه

ونتسودعكم الرحمن برحله ثانيه ان شاء الله اما ان تكون داخل ربوع بلادي او خارج البلاد

اخوكم ابونواف

الرجاء عدم نسب او تحريف او نقل اياً من مواضيعي دون إذن مني..أو كتابة منقول وكتابة اسم المنتدى وأسم معرفي

ولا احلل ولا ابيح من اخذ موضوعي بدون اذني

شمس التفاؤل · 04-10-2009, 13:06

lماشــاءالله تبــارك الله
موضـــوع رائـــع حجز مقعد من الدرجه الاولى
ولي عـــوده

السمو 555 · 04-10-2009, 13:18

ماشاء الله عليكم ابو نواف اجل متولع بالرحلات

موفقين إن شاء الله تعالى

وصراحه طبخه رووووعه

الدبلوماسي · 04-10-2009, 13:32

ياخوك تشرح الخاطر ويفز القلب من شوقه للبر
ام قرين + ام قليب + دغيم ، هذي وين يابو نواف ؟
بهذلتنا يابو نواف ، انت واخوياك كل شوي تطيرو الشراب ، ياخوك ردوها ( بستره ) دامكم تنحصرون هههههههههههههههههه
يسعدك ربي
ويجعل كل ايامك افراح وليالي ملاح

الرومانسيه العربيه · 04-10-2009, 13:38

**مرحبا أخوي .
يعطيك العافيه على هذه الرحله الرائعه ..
وإنشاءالله الرحله الجايه أنا وشمس نروح
معاكم هههههه
بس بدون القطه (طفيليين) هههههه

لكن الأخيره كلماتها مؤثره !
لك كل الشكر ...؟

الرومانسيه العربيه · 04-10-2009, 13:49

ماشاء الله عليك طباخ ماهر
قلت ماشاءالله؟ عشان ماتقول حسدتك ..
( فنان بالكتابه والطبخ )
تقبل مروري .

المرفهة · 04-10-2009, 14:03

ماشــاءالله تبــارك الله
باين عليها رحله حلوه شكل الكبسه رووووعه
وكمان الصور طالعه روووعه
رحله سعيده إن شاء الله

شمس التفاؤل · 04-10-2009, 14:07

ماشاء الله رحله رووووعه وصور تشرح الصدر
والا الطبخ ياويلي على الطبخ شي خطييير ماشاء الله تبارك الله
عيني عليك مثلجه لايجيك حارش مارش وتقول نضلتوني
وعسى الله يهنيكم دوووم ويوسع صدوركم بالعافيه
يعطيك العافيه على هيك موضوع
لك هاي المواضيع اللي بتشرح الصدر

الجود المشاري · 04-10-2009, 14:13

هلا هلا ابو نواااااااااااااف
ماشاء الله تبارك الله وشذا الزين كله لا لا هالرحلة أطلق ميه مرة من الرحلة اللي فاتت ايه هنا شغل الربيع والمخيمات صح ..
بس ياخوك ورا خيمتك صغيره ؟؟؟؟؟ خخخخخخ
لكن رووووووووووووعه الرياض والربيع شي شي شي ماشاء الله الله يهنيك يارب

قسم عاد ان الطبخه تتعب من قلب اخبر ترا الرجاجيل إذا طبخوا يحكرون الطبخه وهالشي أنا اشهد عليه بس بسم الله عليك الكبسه ماهيب صاحيه من قلب خخخخخخ بالعافيه على قلوبكم ...

8

8

8

آآآآآآآآآآآآآآآىىىيه ليه ليه تقليب الممواجع ياخي حرام عليك يازين السمر يازين القهوه على الضويه قسم كل شي له طعم ثاااااااااااااني من قلب

اخوي ابونواف الله يعطيك العافيه قسم ماقصرت تصوير ولا آرووووووووووع روعه قليل عليه ورحله كثير حلوه وربي يديم عليك العافيه تسوي كل شوي رحله وتصورها لنا نتفرج
لكن شي ماشاء الله تبارك الله

شمس التفاؤل · 04-10-2009, 14:13

اقتباس:

المشاركة الأصلية كتبت بواسطة الرومانسيه العربيه

**مرحبا أخوي .
يعطيك العافيه على هذه الرحله الرائعه ..
وإنشاءالله الرحله الجايه أنا وشمس نروح
معاكم هههههه
بس بدون القطه (طفيليين) هههههه

لكن الأخيره كلماتها مؤثره !
لك كل الشكر ...؟

ياحبني لك يالرومانسيه مانسيتني في الرحله من جد ماانلام اذا حبيتك
بس تصدقين حلووووه منك بدون قطه ههههههههههههه
ترى هذا اهم شي خلي وزير الماليه يتكفل بمصاريفنا هههههههههههههه

لوله العسوله · 04-10-2009, 14:14

صراحه من ابدع الصور اللي شفتها في حياتي اول صوره وبما اني اعشق الطبيعه والبحر
فرحلتك حسستني اني معاكم بس اكيد في خيمه الحريم
للاسف انا من الناس اللي ما يروحو رحلات البر ليه
لان عندنا البحر وكل رحلاتنا فيه (جده غير)
اذكر زماااان قبل اكثر من 30 عام كانت اقصى رحلاتنا لابها والباحه والطائف اما الان مختصره على عروس البحر جده
اتمنى في يوم اجرب رحله من رحلاتك صراحه شدني المكان جدا ولاول مره اعرف ان في مملكتنا اماكن رائعه خلابه اشكرك لاستظافتي في موضوعك وانتظر جديدك
تحيااااااااااااتي ام ريان

قائد الاسود · 04-10-2009, 14:19

ايه بو نواف

ذكرتنا بالربيع والوناسه

حمستني يالغالي

THE SKY COLORS · 04-10-2009, 14:22

فتحت العزبه لقيت الكاميرا طبعا الكاميرا انا حاطها بشنطه صغيره والاخ يحسبها كرتون شاهي ،،،، المهم بوريكم بعض صور لروضة دغيم >>> خويك ذا سلمني عليه اجل الكاميرا كرتون شاهي
الصافق ينسى بس المصفوق ماينسى وانت المصفوق لانك انت اللي دافعن سعرها

مو معقوله الخضره هذي تجنن قسم بالله بالرياض مااشوف حولي الا غبار خصوصا اليوم السماء منقسمه نصفين نصفها سماوي اشهب والنصف الثاني غبار !! الله بس يرحمنا برجمته

كنت اتخيل ان هالمنظر مايوجد الا بافلام كرتون هايدي
صار عندنا مثله
مره ثانيه اذا جيتو تروحون ازهم علي بروح معكم >>> بس ماراح اطبخ

ابونواف · 04-10-2009, 14:28

اقتباس:

المشاركة الأصلية كتبت بواسطة شمس التفاؤل

lماشــاءالله تبــارك الله
موضـــوع رائـــع حجز مقعد من الدرجه الاولى
ولي عـــوده

زين انك قلتي بحجز مقعد ما قلتي ابي شي من الطبخه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

مغامراتي رقم ( 2 ) رحلتي للصمان