عالم الحياة الزوجية - منتدى

شـوشـو · 08-10-2009, 03:26

السلام عليكم ورحمه الله وبركاته

حابه افضفض شوي لكم

لاني مالقيت أحد يسمعني ويفهمني وينصحني !

وأبي رايكم بكل صراحه ( أمانه )

وبتقبله بكل صدر رحب مهما كان ..

أنا بنت عمري 20 مخطوبه لي ثمنيه شهور

على أخو صديقتي مايقرب لي عمره 26 وهو من نفس بلادي

بعد الشوفه تمت الموافقه من الطرفين

عن نفسي كنت مرتاحه بعد الشوفه كثير

والي مريحني اني أعرف أخته وأطباعها والكل يمدح فيها وفي أخواتها وأهلها

بس أبوي كان معه تردد بسيط عشانهم سمران يعني لونهم حنطي بس خطيبي أبيض

وزوج أختي الكبيره ( ولد عمي )

قال لابوي من سمارهم وشكلهم موب قبايل

تجنن أبوي من ذي الكلمه

راح أبوي اليوم الثاني مع العلم أنه ما نام اليوم الاول

قعد بس يهزء فيني

من كلامه الي ماراح أنساه بذيك الليله

أنتي المسؤله عن نفسك أذا وافقتي أنا مالي دخل ..الخ

أنا بس كنت أرد أقوله انت ابوي والمسؤل عني أذا موافق

أنت أنا موافقه l

وبعدها تأكد من أصولهم ولكل مدح فيهم

المهم

أبوي سوى لي حفله خطوبه على حسابه

وكل تكليف الحفله كانت علينا

جت أمه وأهله لبستني الخاتم والطقم وكم هديه

وخلال الحفله

أخته الي أهي صقيقتي دخلتني غرفه بلحالنا

و أصرت أني أكلمه ذيك الليله

وأنا كنت رافضه قالت بس يقولك مبروك

قلت لا مقدر

قالت ليش قلت أهلي مايرضون

راحت قالت لامي قالت أمي اوكي بس يسلم ويبارك

استسلمت وكلمته مع أني ماأبي

مسكت الجوال وأنا أرجف

قال السلام ورديت سلامه

قال مبروك قلت الله يبارك فيك

وعطيت الجوال لاخته وطلعت من الغرفه

وأنتهت الحفله ع خير

مع العلم

أننا ماستلمنا منهم ولا ريال مقدم !

وهاذا الشيئ مضايق أبوي أتوقع

الا أبوي من كلامه أفهم

ماوده أتزوج من برا العايله

بس أنا رافضه من أهل أصلا مايعرفوني ولا أعرفهم

لأننا عايشين بغير بلدنا من عرفت نفسي

لا أعرف لا خاله ولاعمه ولاجد ولا غيرهم

طول عمرنا عايشين لحالنا

كل أهلي يروحو ويرجعو بلدنا ألا أنا وأختي

ومع مر الشهور كانو يكلموني أهله

لين يوم قالت أخته شوفي أهلك أذا رضو أنه يأخذ رقمك ويراسلك بس ( قصدها خطيبي )

أنا قلت بشوفهم ومن غير ما أقولهم رديت اليوم الثاني قلت رفضوو لين ملكت يصير خير

وبعد كم شهر قلت لأمي قالت شطوره j

المهم

وبذي الصيفيه الي راحت سافرنا لبلدنا

كانت سفرتنا الاولى خارج الممكله

سافرت أنا وأمي وأختي

رحنا كتغير جو

وبعد كم يوم حبيت المكان مع أننا كنا قعدين (بقريه ) وببيت أبوي

المهم

تعرفت على أهلي وبناتهم

حبيتهم .. وأكثر أنسانه تعلقت فيها وحبيتها أهي بنت خالتي

كنا ننمام ونأكل ونقوم ونشتغل مع بعض

خلتني أحب المكان وأهله ..

وكانت صدقيتي ( أخت خطيبي )

تدق علي بين فتره وفتره ومتواصلين مع بعض حتى برسايل

وأبوي كان يدق علي يوميا أو أسبوعين

يسالني ها عجبتك بلدك ؟

اقوله أيه حلوه

يرد

أجل لا ترجعين بفسخ خطوبتك أهم مو من أهلنا ولا من أصلنا

واجلسي عندك أحسن لك وعيال عمك عندك الكل يتمناك ..الخ

دايم يردد ذي الكلمه كل ما دق

لين بديت أتضايق من كلامه وأوسوس وأبكي أحيان

كنت أشكي لبنت خالتي تقول ماعليك منه

وكلي أمرك لله ..

لين انفجرت يوم وأهو يكلمني وأهو نفس الكلام يعيده

قلت أنت ليش كذا ماعندك غير هالكلام أذا بتدق تسمعني ذا الكلام لاعاد تدق

وقمت أبكي .. يوم سمعني ضحك وناداني ولا رديت وسكر

وبعدين صار يدق ولا عاد يتكلم بسالفه

لين رجعنا بعد شهرين ونص

ويوم رجعتنا كان يوم مأساوي بنسبه لي سحيت بذاك اليوم وش معنى الغربــــــــــــه كنت اسمع بذي الكلمه لكن توني فهمتها بذاك اليوم

الكل كان يودعني كوداع أخير ماراح يشوفوني بعدها لاني بتزوج

وأهل خطيبي صدق من نفس بلدي لكن ولاعمرهم زاروها

كنت أبكي من قلبي لاني حبيت المكان وربي

ويوم جيت أسلم على بنت خالتي بذات توقفت الدنيا أحس عندها

لاني أول ماره أتفق و أتعلق بكذا أسانه صدق حبيتها وحبتني

ضمينا بعض لدرجه أنهم ماقدرو يفكونا أذا بسحب والضرب يدنا عشان نفك بعض

الي كان حابس دموعه طلعها ..

وألين اليوم وأنا كل ماتذكرت ذيك اللحظه تنزل دمعتي

ورجعت الرياض ( قبل أسبوع )

وأنا أبكي ودي أرجع لبلدي وأدرس جامعه حالي حال بنت خالي وعمي وجدي

والي رجعني أني مخطوبه وعلى وجه زواج

وكانو يقولو أهل خطيبي قبل نسافر

بشهر ثمنيه الملكه وبعيد الفطر الزواج

وجونا اهله بالاجازه

وقالو

بشوال الملكه وبعيد الاضحى الزواج

وسافرنا ورجعنا على أساس كلامهم

بس مافي جديد !

ومن أول مارجعت و أبوي يعيد نفس الكلام

ليش رجعتي .. كان درستي و تزوجتي هناك .. أحسن لك من ذا .. مانعرفهم ولا أدري شلون بتعيشين .. آلخ

والقهرني أكثر

زوج أختي كمل علي كنت أكلم أختي بالجوال

وأقولها ودي أرجع لبلدنا

سمعني

قال قولي لها

تنسى .. الحين بيجيئ يشيلها العبد ( يقصد خطيبي )

المهم من ذا كله

أبي شوركم .. وش أسوي ؟

أنا الحين مشتته ذهنينآ

طول اليوم أبكي أبي أرجع لبلدي لاني ارتحت هناك أكثر من راحتي هنا ..

وبنفس الوقت أقول كيف وأنا مخطوبه

وقسم أني متضايقه حيييييل ومحد حاس فيني

وكل ما أتذكر شيئ عشته هناك فجأءه أبكي

وكل ماشافني أبوي يعيد ويزيد بكلامه

مدري وش أسوي بنفسي وبتفكيري

أنصحوووووني ؟؟

وآسفه على الإطاله

ضــي شاعـرهــا · 08-10-2009, 03:34

يعني الحين بس القباايل الي لونهم ابيض ؟؟

وربي فيه قباايل الوانهم غامقه اهم شئ دينه وصلاااته واخلااقه

استمري بس واتركي عنك الوسوووسه والاهم من هذا استخرتي او لا؟؟

THE SKY COLORS · 08-10-2009, 03:34

اسمعيني سالفتك حوسه اهلك مو مرتاحين
انا من رايي ابوك يكلم الولد تبي تتزوج حياك الله ماتبي خل البنت تشوف طريقها ..
يعني السالفه مسخت واهل خطيبك ساكتين واهلك متلخبطين وهذي عواقب الخطبه الطويله
خلي ابوك يحاكيهم ويحطونك بالصوره ..

هتاف جده · 08-10-2009, 03:36

ياقلبي عليكي طيب خطيبك اايش ذنبه؟

من البدايه طالما انكم منتو مقتنعين ليش توافقون

ياقلبي وعسى ان تكرهوا شيئا وهو خير لكم

اايش ذنبوا خطيبك؟ وواش ذنبه انو اسمر ولا ابيض اهم شي دينه واخلاقه ورجولته

توكلي على الله وكملي حياتك يمكن يطلع انسان طيب وينسيكي بلدك وبنات خالاتك وعماتك

موفقه

# مشعل # · 08-10-2009, 03:54

ألف ألف مبروك و أسأل الله أن يتمملك على خير ، أهم شئ الدين و الأخلاق وحب الوطن ، كل الناس أصلهم آدم و آدم من

تراب ،إذا إستخرت و إرتحتي له خلاص وش تبين بكلام الناس ، كلنا عبيد لله ، إستعيذي من الشيطان وتوكلي على الله

قال الله تعالى : (( و من يتوكل على الله فهو حسبه )) ، أكثري من الإستغفار ، قال تاج رأسي رسول الله صلى الله عليه

وسلم فيما معناه : (( إذا جائكم من ترضون دينه و خلقه فزوجوه)) ، إرفعي يديك لمولاك و خالقك و رازقك في الثلث الأخير

و إسأليه تفريج همك و الله أن الله حيي كريم يستحي أن يرد عبده صفر اليدين ، أكثري من الإستغفار أكثري من الإستغفار

أكثري من الإستغفار .

أخوك / مشعل

روعة جنوني · 08-10-2009, 04:17

اللي فهمته انه مشكلتك مو مع خطيبك
انتي تحسين بالحنين لبلدك واهلك لكن العائق الوحيد خطوبتك صح ولا .؟

بما انه ماصار عقد القران افضل انك تستخيري وماتستعجلي
واهم شي اسمعي كلام اهلك لانهم يشوفون اللي احنا مانشوفه

الله يوفقك يارب

شـوشـو · 08-10-2009, 04:21

محتاجه دفاك

يختي مدري وش سالفه أبوي

أهو يقعد يوسوس وفي من يوسوسه ..!

أهو مو معترض اهو ماقالهم موافقين ألا واهو مقتنع وسال عن أصلهم وفصلهم

بس مدري وش الي حاده يأذيني بهالكلام

وأنا وربي مو متضايقه من كلامه ألا لأني أحبه حتى أكثر من أمي

لو يجيئ كلامه من أمي أهون

وانا استخرت كثيرر ورتحت ولحد الحين مرتاحه من ناحيته

بس ربك كريم

ماقصرتي يالغاليه على مرورك

the sky colors

أيه وربي حوسه

نستنى شوال يخلص ويصير خير

ماقصرتي على مرورك

..........

هتاف جده

ماذنبه شيئ ؟؟

السالفه مو سالفه مو مقتنعين بالعكس

ابوي بس مدري وش الحاده يقول هالحكي

وان شاء الله يارب

وامين الله يسمع منك يارب

يسلملي مرورك

مشعل

آمين .. ونعم بالله

كلامك جميل

ماقصرت ياخوي

شـوشـو · 08-10-2009, 04:27

روحي جنوني

وقفت على نقطه حلوووه

أنا من كثر ما أنا مضايقه

من الحكي الي يجيني هالحين حنيت لأني هناك كنت ناسيه ذا كله والحين رجعت

شلون ماتبيني أحن ؟

أهلي يقولون لاتوسوسين

محد حاس

شاكره لك مرورك

يعافيك ربي

سارونه البارونه · 08-10-2009, 04:38

الله يعينك، لاتستعجلينى ، أخاف بكرة تندمين.

شـوشـو · 08-10-2009, 13:34

سارونه

وقسم ردك جاء على الجرح

وهذا الي مجنني

ماقصرتي على مرورك

سلطان الفنان · 08-10-2009, 14:33

السلام عليكم ورحمه الله وبركاته
دام خطيبك ما صدر منه عيب اتركي هالكلام عنك هو ما قصر معك ولون الرجل عمره ما كان عائق
ان كان راعي خلق ودين
انتي اجلسي مع ابوك وتكلمي وتناقشي معاه وليه هالكلام بعد ما صار خطبه وقريب شبكه
ودام الرجل ما ينعاب ما يجوز هالكلام ودام ما صدر منه عيب راح تكملين معاه
وزوج اختك ما عليك منه اهم شي ابوك

شـوشـو · 08-10-2009, 18:36

سلطان الفنان

وربي أهو مافيه عيب

بس أنا مضايفني كلام أبوي

وزوج أختي يزيده

وأنا ياما كلمت أبوي يصرف السالفه

ويرجع يقول نفس الحكي ولا كني حاكيته

مشكور على مرورك

لاتحرمنا

برستيجي عالي · 09-10-2009, 02:46

مشاعرك ياقلبي الي حسيتي فيها ربما تكون وقتيه لانك اول مره تشوفين ديرتك انتظري واستخيري يمكن تتغير مشاعرك سوا تجاه خطيبك او تجاه عودتك لديرتك ..
الله يسهل امرك ويستر عليك .

شـوشـو · 09-10-2009, 04:39

برستيجي عالي

أحس أكثر وحده فهمتني أنتي

أحاسيس مجتمعه كل شوي وأنا في وادي

بس ربك كريم

آمين .. ولك بالمثل

لاعدمت طلتك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

وش أسوي :(