عالم الحياة الزوجية - منتدى

ثلاثيني ومنفصل · 26-10-2009, 05:23

يووووه يالسعودي

تردد هذه الكلمه على السن بعض النساء يوميا .. للحين مادري وش سبب هالكلمه ولا ادري وش اسباب تصور الكثيرات ان غير السعودي هو ملك الرومانسيه والعطاء الزوجي والرجل اللي ممكن يكون حلم لكل متزوجه .. ماحاول ادافع او ارقع لشباب بلدي ولكن مانشوفه من واقع هو اللي يدافع عنهم .. ( وان كان فيه شواذ عن هالقاعده فهم شواذ لاينبغي تعميمهم على المجتمع ) .. هالواقع هو اللي يقول ان الرجل السعودي ( لبى والله معاليقه ) اكثر الرجال سخاء وعطاء ولايرضي بأي حال من الأحوال ان يكون عاله على زوجته ( والدليل ان نظره مجتمعنا للرجال اللي يعتمدون على زوجاتهم او يسلبونهن رواتبهن هي نظره دونيه لان المتعارف عليه في مجتمعنا هو العكس ) ويمكن يكون للزوجه راتب ووظيفه ولكن عند شراءها أي شي لبيتها او لابناءها يقوم زوجها باعطاءها ماصرفت ( لان بقناعته هو المسئول عن بيته بالمقام الاول ) ..

وبالرغم من هالشي لم نسلم من الذم والسخط الدائم ..

كانت الامثله قديما أيام عز حسين فهمي ومصطفي فهمي .. وحولوا بعدها على اللبناني ومن سنتين صار تركي ولاندري كان ام بـي سـي عندها نيه دبلجة مسلسلات هنديه ويصير الرجل الحلم هندي وتصير الوجهه بالصيف بومباي ولا مدراس بدل اسطنبول وكعاده مواطنينا الاعزاء بالطيران بالعجه لان بصراحه عقب مكاين السنجر معاد استبعد شي ( وعلى طاري الام بي سي احب اوجه لهم رساله من خلال الموضوع ... حطيتوا دعايه نانا قلنا ماعليه ودابر املا قلنا تهون ولكن ان وقت الاعلانات زاد عن وقت المسلسل هذي مالكم حق فيها .. قسم بالله ترفعون الضغط مايمدي عاصي تقول شي الا الفوط ترفرف على الشاشه الله يحوم تسبودكم و زين انهم شالوا هالاعلان ) ..

نرجع لمحور حديثنا .. لن ازيد في امتداح الرجل السعودي حاليهم الله من غير مدح وماهم بحاجه المدح بس ودي اضيف انهم قبل أي ميزه اخرى يتحلون فيها .. فيه مخافه الله سبحانه في نظرتهم لحياتهم الزوجيه واعرف الكثير ممن قد لايحمل تلك الرومانسيه الجياشه ولكنه يخاف الله في زوجته وبيته فلايعاملها الا بالحسنى ولا تسمع منه أي أساءه ... نكمل حديثنا وننتـقل للجانب الاخر تلك الفئه المتذمره لحياتها ووضعها وزوجها ... تربط الكثيرات من النساء بحكم سيطره العاطفه على العقل وانتفاء العقل احياناً حياتهن الزوجيه ويقارننها بما قد يشاهدنه في مسلسل او فيلم او يقرأنه في روايه .. مانقوله هنا ان المسلسل مدته ايام .. والروايه تكتب وقد تقرأ بيوم والفيلم مدته ساعه ونص ولا ساعتين اما الحياه الزوجيه فهي عمر .. والانسان بعمره يمر بحلو ومر وفرح وحزن وانتعاشه وانتكاسه .. والحياه الزوجيه مثلها ليست كلها عسل في عسل مثل مايتصور البعض فهي تمر بحظات مختلفه فيها الزين والشين والحكيم فقط والعقلاء من يستطيعون مقاومه هذه التغيرات وتجاوزها .. للسير بحياتهم الزوجيه لبر الأمان ..
بعضهن لو عمرها كله ماشافت الا الخير وتزعل لها بيوم ولا يقصر بشي قالت ماعمري شفت منك خير .. وجحدت وقامت تذكره ( تذكر يوم اقولك ودني لاهلي ولا وديتني وتذكر يوم اقولك ابهدي نوال بنت اختي سواره ذهب ولا عطيتني ) وتلقونه له من المواقف الطيبه معها اكبر من هاللي تقوله كله .. بس وش نقول حريم

والثانيه جايه من بيت اهلها وكانهم مرسلينها للجبهه ماناقص الا جهاز لاسلكي معها وتلبس لبس الجيش وتجي زحف ومع امها وكل تصرف ولا كلمه تطلع من اهل زوجها تنقلها بالحرف لأمها ( وعاده تنقل بصيغه غير محايده ) .. ولاوقفت عند هنا وبس يمكن تنقل هذا كله للزميلات والصديقات ..

( الكلام اعلاه ماهوب معمم ولكن يشكل غالبيه وفيه من هم مختلفين عما ذكرت سواء بالجانب الايجابي او السلبي عشان مايجي من يطمر لي ويقول انت تعمم ) ..

لان من يشوف هاللي يتحسرن يقول ابد طاقتن تسبدها والاجنبي ميت عليها بس بحكم العادات والتقاليد ماتقدر تسوي شي .. ابد من بغت الزواج بغير السعودي محدن ماسكها ولها منا من يعين ويعاون وفوق منها الدعاء بس لاتنسى تاخذ بجامات معها من لانســنـزا لاتروح تفشلنا ببجامات القطن .. الوحده من تشوف لها عيون خضر ولا زرق راحت ملح ماتدري ان حتى القطاوه عيونها خضر . .

كم واحد شاف السعادة بما فيه ,,, واليوم من كثـر الغرابيـل ثـاوي
والحلم لا من زاد يطمع براعيه ,,, يطمع على العاقل ردي الهقـاوي

وبدت المدرسه

بدا العام الدراسي وبدا معه النزف الاستراتيجي لجيوب الاباء .. وبدا معه تذمر المعلمات وعلى طاري تذمر المعلمات ماتلاحظون كثرة تشكيهن من انظمه الوزاره وتعاميمها وكثرة الشكوى من العمل وارهاق العمل اتوقع هالطبع ملازم للمرأه سواء كانت عامله او غير عامله .. انا اتمنى ان اكون وزير التربيه والتعليم لمده ساعتين فقط ساعه وتسعه وخمسين دقيقه بسوي فيها اجتماع مع جميع المعلمات والموجهات والمشرفات والدقيقه الباقيه عشان اصدر قرار ما حول ماسمعت وشاهدت .. وغالبا اتوقع القرار بيكون فصلهن جميعا .. كنت بالامس بإسواق المزرعه لشراء بعض الاغراض ويحطني ربي بذاك الممر اللي كان من سوء حظي ان اغلب احتياجاتي فيه وبنفس الوقت تقابل فيه ثلاث معلمات ووكيلة مدرسه ( ولحد يقول شلون عرفت انها وكيله فلدي حدس بمثل هالامور خاصه لاصار التنوره مغبره من تحت ) أول موضوع ناقشنه في هالاجتماع الطياري هو ( انهم ليه ماأجلو الدراسه ) تقول احداهن : وش ضرهم لو أجلوها لبعد الضحيه <<<<< بذمتك

وتجيك الثانيه ترد : والله يابنت الحلال مافيه من يقدر كرف وحاله هالتدريس ليتهم يحسون بس >>>> الاخت تداوم بمفاعل نووي ماهوب بمدرسه

وتتحفنا الثالثه بقولها : ياختي كلن حاسدنا على هالاجازه كأنه محد ياخذ اجازات الا المعلمات مايدرون عن هالمعاناه اللي نشوفها كل يوم من هالتدريس >>> مغصوبه على التدريس جاي الوزير والوكلاء لبيتها يحرمون ويطلقون ويترجونها تدرس ..

اما عاد الابداع صراحه كان من الوكيله الله لايضرها على هالمخ والحمد للمولى عز وجل ان مافيه غيرها ولا كان رحنا فيها ردت عليهن قائله ثمان وعشرين سنه لي بالتدريس ماشفت تعميم جانا زي العالم والناس <<< المره الجايه ان شاء الله بيرسلون لك التعاميم مع السواق عشان تقولين رايك فيها قبل يصدرونها ..

دار الكثير من النقاش في هالخمس دقايق وتخلله بعض الحش ببعض زمايلهن ( لاسمعت حريم يقولن الله ربنا وربها اعرف ان السالفه فيها تقطيع لكائنه حيه ماهيب موجوده معهن ) .. لحد هنا نقول ماعليه وبكيفهم ولكن ان يقولن ( مالقاها الا الموظفين متكين في هالمكاتب وفي المكيفات وشرب شاهي ولا تعب ولا شي )

هنا نقول معليش .. هالموظف المسكين اول شي ماتجيه هالوظيفه الا بعد جهاد ومشاوير وروحات وجيات وجاهيات ومافيه الا سدح ملفات علاقيه خضر بكل مكان .. ولما يجي التعيين ويحط على مرتبه ويبدا بالتفكير بمستقبله والزواج ويدفع اللي وراه ودونه ويتحمل اقساط ومصاريف عشان هالشي يمكن يدخل ولده المتوسط وهو مازال على نفس المرتبه وان كان يبي الترقيه فلازم تكون شهاده الدورات معبيه ملفه ( طبعا في قاموس المعلمين والمعلمات مافيه شي اسمه دوره لان الترقيه وتحسين المستوى يجي وهم متسدحين والدوره اللي ممكن تاخذها المعلمه من خلال خبرتها العمليه هي في اعداد ترامس القهوه كل صبح وتوزيع جدول الفطور على المعلمات ) نجي بعدها للاجازات فالموظف حده بالسنه 35 يوم يمكن ياخذها ويمكن مايعطونه اياها اما لان ظروف العمل ماتسمح ولا لان زملاءك كلهم طالعين اجازات .. اما المعلمين والمعلمات فغير الاجازه الاسطوريه السنويه ( الثلاث شهور ) فيه اجازات الاعياد ومنتصف العام واجازه الربيع ولا يقوولون ليه ماتمدد لبعد الحج بعد

واهم من هذا وذاك مقابله جمهور المواطنين من مراجعين فهذا لحاله جهاد على الاقل في مدرستك عارف من عندك والوجيه وحده ولكن لاصرت في دائره حكوميه وكل يوم يمر عليك مئات المراجعين واشكال والوان وصاحي ومهبول <<< هذولا اللي تحسبهم الاخت في مكاتب وعلى مكيفات مدري وش سر هالكلمه عندنا الظاهر يبون الموظفين يحطون مكاتبهم على ارصفه الشوارع .. ولا يحطونهم بالنفود
كان الله في عونكم ياموظفين وماقول الا ( ياحظ مزنه بالجنه )

نحسبه خميـــــس ..

مدري ليه احس ان المراهقه في كل دول العالم مستحيل تكون باي شكل من الاشكال زي مراهقتنا .. صح كلن يشوفه طفولته ومراهقته بديرته غير ولكن هي وجهة نظر لا اقل ولا اكثر ..

عندما انطلقت اول صرخاتي البريئه في ولاية سدير العظيمه شهد العالم في ذلك العام احداث وصراعات وحروب ( لاحدن يقول وش هي عشان ماتعرفون تاريخ الميلاد ) وعلى فكره حاولت اشوف الاحداث اللي تصادف يوم ميلادي العظيم خلال القرن والقرون السابقه لقيته يصادف من المصائب مالله به عليم .. ففي مثل ذلك اليوم .. انتحر هتلر .. وسقطت بغداد وليس هذا محل الجدال ولكن الشاهد في السالفه ان ذلك العام كان قد شهد عدة مواليد على مستوى الديره والعائله وكلهم ( ذكور ) باستثناء بنت وحده ( وهالبنت مالها من الانوثه غير اسمها الله يذكرها بالخير ) لدرجه كانت من ضمن الشله في أيام الطفوله وتقريبا مافيه منا من لم تتوطى في بطنه يعني كانت تلك المجموعه مختلفه فكريا وعقليا عما سبقها وعما لحقها من أجيال .. ومن الطبيعي ان من يكون بسنك خاصه في القرى بيكون هو رفيقك وبنفس الوقت زميلك بالصف يعني مامن فكه .. لذلك ونظرا لان الزحف كان متأصل بتلك المجموعه والحمد لله عز وجل أننا على مستوى قريه يعني لو كنا على مستوى الرياض مثلا او الدوله ككل كان الله يخلف على الديره وهالحين بدل مانتم مقابلين النت تقرون هالموضوع كنتم متسدحين اما على رصيف أو غدير او بالسجن ..

كانت المتعه بارتكاب الاخطاء .. اما التصرفات الصحيحه والسنع فكنا نشوفها بلاهه وتفاهه والانسان المؤدب العاقل هو انسان يجب عدم الاحتكاك فيه عشان ماتجينا العدوي من الادب والاخلاق .. من ضمن المواقف الكثيره العالقه بالذاكره .. قررنا باحد الايام الغياب عن المدرسه وطبعا في تلك الايام رغم الشطانه كان للمعلمين هيبه واحترام وكان الاهل بعد حساسين من ناحيه الغياب .. المهم كان فصلنا 22 طالب وكان ذلك اليوم يصادف إربعاء وطول الاسبوع كان امطار وخير يعني ماهوب جو دراسه ابد .. طلاب الفصل ال 22 كان منهم 18 سعودي وسوري وثلاثه مصريين .. جيت انا واحد الشباب واجتمعنا بالفصل مع باقي الزملاء واتفقنا نغاب جميعا يوم الاربعاء عشان نبي نكشت للبر وحددنا المكان وطبعا ماهوب كلنا معنا سيارات ثلاث طلاب فقط معهم واحدهم كان معه الباص اللي ينقل فيه طلاب قريتهم المجاوره (باص صغير مايمديك تمد رجليك فيه ومضلل ) الجميع وافقوا وحتى من كان متحفظ من السعوديين ( وافق عشان مايقال عنه رخمه وخواف ) بقت المشكله والطامه في الزميل السوري وباقي الزملاء المصريين .. السوري اقنعناه بصعوبه ولكن المصريين رفضوا حاولنا فيهم يمين يسار مافيه فايده .. قلت اصلا لو داومتوا يعني بتكونون 3 طلاب بس بالفصل محدن معطيكم درس وبعيدن عن شواربكم اللي ماطلعت تسووون فيها مجتهدين على حسابنا .. وجاء يوم الاربعاء وكان الشباب يتجمعون خارج سور المدرسه وكلن معه شي من العزبه ( اللي معه كيس بصل واللي جايب القدور والصحون واللي جايب الرز والبهارات لدرجه بعضهم حاطن البصل في مخابيه تخبرون حتى الاهل مايدرون وذاك الوقت مافيه شغالات تدفها لها ببطاقه شحن وتجهز لك المطلوب لو تبيها تذبح كفيلها ) .. بقى عندنا المشكله الكبيره الا وهي الاخوه المصريين وش نسوي بهم خاصه ان اباءهم ينزلوهم عند باب المدرسه .. تجمعنا وشكلنا فرقه كوماندز ومن نزل منهم وحرك ابوه ناديناه وشيلوه وحطوه في الباص .. تمت العمليه بنجاح وطلعنا للبر بذاك اليوم الممطر وانبسطنا وزملائنا المصريين بعضهم يبكي ( متحسف على اليوم الدراسي ) <<<< والله ياواحد منهم تقول ميت له احد من اهله معاد الا يغشى عليه من الصياح لولا ان احد العيال قعد يعطيه مسائل بالرياضيات وهو قاعدن يحلها ..
كان يوم لاينسى وراسخ بالذاكره حتى الآن .. الشاهد بالمووضوع انه يوم جاء يوم السبت وجانا رائد الفصل يسال عن هالغياب المفاجي والجماعي ( طبعا غياب الاخوه المصريين هو اللي ساهم في تصديق الكذبه ) اجابتنا كانت باختصار ( نحسبه الخميس ) المعلم بغى ينهبل يقول يحسبه واحد ولا اثنين اما الفصل كله على باله خميس ..

مهما يقولون

مهما يقولون .. ومهما صار ... تظل انت البطل

....

على الهامش

رغم الجروح الكثيرة .. والضلوع الكسيرة ..
مازالت ذات الضفيرة .. تجتاحه بين الحين والحين
في الليالي المقمرة .. والممطرة
يتراءى له منها .. العين والثغر
في الدوائر التي يرسمها المطر ..
إذا لامس الأرض وانتحر

ام بنوته · 26-10-2009, 06:30

رووووووووووووووووووووووووعه طرحك مميز اول شي
ماخليت على قلبك شي يعني شرحت الحريم تشريح
تاني شي الرجلل السعودي من ارقى الرجال سؤاء تعامل وعطاء واذا في عيب بكل شعب عيب مو لازم الكمال بس عطاء ورومنسيه البعض وليس الكل ,,,,,,,,,,
حكاية تحسبونها خميس شي ثاني ههههههههههههه مابدي اقول قنة اللؤم مع الصريين
شو الاحداث اللي صارت يوم ولادتك كمل؟؟؟؟؟؟؟؟؟؟

ام بنوته · 26-10-2009, 06:32

رووووووووووووووووووووووووعه طرحك مميز اول شي
ماخليت على قلبك شي يعني شرحت الحريم تشريح
تاني شي الرجلل السعودي من ارقى الرجال سؤاء تعامل وعطاء واذا في عيب بكل شعب عيب مو لازم الكمال بس عطاء ورومنسيه البعض وليس الكل ,,,,,,,,,,
حكاية تحسبونها خميس شي ثاني ههههههههههههه مابدي اقول قنة اللؤم مع الصريين
شو الاحداث اللي صارت يوم ولادتك كمل؟؟؟؟؟؟؟؟؟؟

الرومانسيه العربيه · 26-10-2009, 07:15

(عزي وفخري ونصفي الثاني السعودي)
فيه أحد يقدر يقول غير كذا
*السعودي تاج على راسي*
يعطيك العافيه ثلاثيني على هذا الموضوع
الشيق ..
لي عوده !

~Pure Heart~ · 26-10-2009, 07:24

بصراحة انا ماابي غير السعودي لو يلطشني ليل نهار غير السعودي مااتزوج الله يخليهم لنا ويصلح الطالح منهم ويرفع قدر الصالح ويزيده من فضله
باقي الموضوع ماقرأته

قلبه في يديني · 26-10-2009, 07:32

ماشالله الله لايضرك انا تعبت وانا اقرا وشلون انت اللي كاتب شكلك وانت تكتب في قنة الروقان
بعدين شوي شوي تراك قطعت جلودنا اكل العنب حبة حبة وانت اكلته كله يابو الشباب
بعدين على فكره توه جااااااااااااااااااااااااااااايني اتصال وبشرك عينوك وزير مزدوج كل من التعليم والكوره وحقوق الانسان وكل ماتبي بس رح وقع قبل لايهونوووووووووووووووووون هههههههههههههه

عليك عيوني*** · 26-10-2009, 07:55

السعودي ونعم فيه اهو تاااااج راسنا والله لا يحرمنا منه
هههههههههههههههه هههههههههه اما تنورتها مغبره
بس من جد المدرسااات ارحمهم كفااايه غربتهم
وتعينهم في مناطق بعيده واحياان مو في الخريطه
ههههههههههههههههههه ياحرااااام المصاريه خطفتوهم علشان تكمل الخطه
والله اياااااام الدراسه ماتتعوض انواع الفله والونااااسه
يعطيك العافيه ع الموضوع الفرفوووووش والحلووو.........

انا واااو · 26-10-2009, 08:03

مرحبا /

نصف رومانسية الرجال على زوجته , يعني مدري وش يحسون فيه اللي يقولون ان

السعودي مو رومانسي :/

مدري ليه تفكيرنا كذا ان البنت هي اللي دايم تعطي الرومانسيه , و الرجال جلف

و ما عنده رومانسيه =(

و اكثر شي يقهر ان اغلب اللي يقولون هالكلام ما بعد تزوجوا او مالهم تجارب سابقه :/

و بعد احس الرومانسيه شّابه من بعد مهند .. يحسبون كل من في ديرة مهند صار مهند =D

و كله كوم و اللي تقول ابي اتزوج اجنبي كوم =D

على اساس انه السعودي ما يستاهلها هههههههه

شي يفطس من الضحك بصراحه ..

اما الموظفات صدق دايم زهقانين من الدوام , حتى لو ما فيه زهق تزّهق نفسها

و لو قلت لها تقاعدي انهبلت ,

و مدري شلون يصير لها 30 سنه او اكثر موظفه وهي زهقانه و تعبانه ..

اما سالفه نحسبه خميس مره خبله ههههههههههههههههه

يعطيك العافيه موضوع حلو و اسلوب احلى

وه يا ملحي · 26-10-2009, 08:10

هههههههههههههههههههههه

أسلوب راااائع في الطرح مع أنك ضحكتني من صماصيم قلبي

ع العموم ترا مالنا غنى عن السعوديين فيهم الأبو والزوج والأخ والعم والخال

لايغرك أذا جت الوحده تسبسب في عيال ديرتها والله أكثرهم خرطي وقت زعل وترجع ههههههه

معصي والله نغير تماسيحنا بغيرهم أبد لو يصير اللي يصير يالبى قلبهم

مشكووووووووووووووووووووووووووور

ثلاثيني ومنفصل · 26-10-2009, 11:15

اقتباس:

المشاركة الأصلية كتبت بواسطة ام بنوته

رووووووووووووووووووووووووعه طرحك مميز اول شي
ماخليت على قلبك شي يعني شرحت الحريم تشريح
تاني شي الرجلل السعودي من ارقى الرجال سؤاء تعامل وعطاء واذا في عيب بكل شعب عيب مو لازم الكمال بس عطاء ورومنسيه البعض وليس الكل ,,,,,,,,,,
حكاية تحسبونها خميس شي ثاني ههههههههههههه مابدي اقول قنة اللؤم مع الصريين
شو الاحداث اللي صارت يوم ولادتك كمل؟؟؟؟؟؟؟؟؟؟

قولي وش ماصار بس ..

اشكر لك طلتك .. دمتي بخير

اقتباس:

المشاركة الأصلية كتبت بواسطة الرومانسيه العربيه

(عزي وفخري ونصفي الثاني السعودي)
فيه أحد يقدر يقول غير كذا
*السعودي تاج على راسي*
يعطيك العافيه ثلاثيني على هذا الموضوع
الشيق ..
لي عوده !

الله يعافيك يالرومانسيه .. وبانتظار العوده .. مودتي

~Pure Heart~ · 26-10-2009, 14:13

اهداء للسعودي

قالوا مهند قلت [ قلبي ] محمد
قالولي يحيى قلت [ روحي ] بسلطآن

كلي وطن لزين ( السعودي ) مجند
في غترته .. في رزته القلب هيمآن

عيني عليه ... وغير زوله مفند
ماعآش من حط راسه ب قرمان !!

لآقال لي ولهآن وشوقي تجدد
سمي عسى مآشر ترى البآل قلقان

وش لي بحكي اترآك نصه مقلد !!
عيون شهب ورجولة(ن) مالها شآن

وش لي ب رخوم(ن) ك خشب مسنّد
شكل(ن) حسن ماله من العز أوطان !!

تميم .. فهد .. خالد .. ياسر .. مؤيد
يآآآآخلق وربي مابين الفريقين شتان !

نظره من عيون ( السعودي ) تهدد
تهز منهو حآول الشين .. أو هان

ثوب(ن) بيآضه بالنقاوه تجدد
وعقال(ن) سواده حآلك الليل فتآن

في بسمته لذه ويسبيني الا عنّد
يجعلك في عزته .. في هيبته حيران

في نخوته طيح عقاله وتوعد
في فزعته قومة شيوخ(ن) وفرسان

أموووت بتراب ( السعودي ) وأردد
يامدور على غيره من الناس غلطآن

ياعسى خطوات ( السعودي ) تسدد
وياجعل ناوي له بالمكاييد خسران

ورد تشرين · 26-10-2009, 14:33

بسراحه موضوع فانتاستك

استمتعت وانا اقرا

اما مواقف الطفوله فضااااااايح خلها مستوره بس

يعطيك العافيه اخوي

إح ـسـاس طفـله · 26-10-2009, 14:34

لاتعليق

السعودي خاصة والخليج عامة

ماعليهم أي كلام

ومافي أي رجل من أي جنسية بالعالم يسواهم ولاهو قصور بالباقيين

بس السعودي فيه غيرة وحمية ونخوهـ ماهي عند غيرهـ

يعني السعودي أقل القليل زعلان منها أو مو زعلان مايرضى لها المذله ولا يحدها على غيرها

وأما البقيه عادي جدا يزعل منها يطردها برا هذا وقت الزعل

أجل وقت الحب كيف ؟!

الرومنسية والخرابيط هذه شئ نسبي أصلا بين الرجل والمرأة يعني في رجال رومنسيين وحريمهم ولاهم هنا

والعكس صحيح يعني مالها دخل بالجنس أبد

أنا شخصيا أعرض وأعتب على أي امرأة تقلل من شأن زوجها السعودي لانه مايستحق كذا أبدا

وصح لسانك أخوي

غلا1234 · 26-10-2009, 19:53

احجزوا لي مقعد ...
لاني مشغووله اللحين .. بس ما تكون زي حجوزات الخطوط

لمراة الوحيدة · 26-10-2009, 21:22

لان من يشوف هاللي يتحسرن يقول ابد طاقتن تسبدها والاجنبي ميت عليها بس بحكم العادات والتقاليد ماتقدر
واللة انك صادق

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

عليك باللي يرفع الراس طاريه ,,, وان ماحصل ماهو ضروري تخاوي